Pioneer nga mga Payong
“Ang gugma nga putli mao ang tiunay nga gugma ni Kristo, ug kini molahutay sa kahangturan” (Moroni 7:47).
Sarah! Sarah, pagmata!” pukaw sa singko anyos nga si Christiana Larsen ngadto sa iyang manghud nga babaye. “Manglakaw na ta.”
Ang tres anyos nga si Sarah naningkamot sa pagbuka sa iyang mga mata.
“Apan ngitngit pa sa gawas,” katulgon nga reklamo niya.
“Kahibalo ko, apan si Mama nag-ingon nga kinahanglan nga magsugod ta og sayo. Ang barko paingon sa Amerika mobiya na sa dili madugay.”
Ang pamilya Larsen nagpasakop sa Simbahan didto sa Denmark. Karon mobiyahe sila og layo nga panaw aron moapil sa mga Santos didto sa Walog sa Salt Lake.
Gitabangan ni Christiana si Sarah sa pagsul-ob og sinina. Dayon ang gagmayng batang mga babaye nagluha-luha nga mitan-aw sa katapusang higayon libut sa ilang komportable nga lawak katulganan. Nasayud sila nga dugay pang panahon ang moabut una sila makahigda pag-usab og tinuod nga katulganan.
“Ayaw kalimti ang imong payong, Sarah,” si Christiana miingon samtang iyang gikuha ang kaugalingon niyang binurdahan nga sida nga payong. “Si Mama miingon nga siya ra ang moimpake niini uban sa mga hapin sa kama.”
Sila si Mama ug Papa miingon nga dili sila makadala og bisan unsa gawas sa mga kinahanglanon alang sa biyahe ngadto sa Amerika. Human maimpake ang mga hapin sa kama, sinina, ug mga himan, wala nay kasudlan sa bisan unsa pa nga butang. Apan sila si Christiana ug Sarah mihangyo og maayo nga dad-on ang usa lamang ka paborito nga butang ngadto sa ilang bag-ong balay. Sa katapusan, ilang gibilin ang ilang mga munyeka, mga libro, ug mga dulaan. Ang matag babaye mipili sa ilang maanindot nga payong.
Pagsilang sa adlaw, si Christiana ug ang iyang pamilya misakay sa barko nga mobiyahe paingon sa Amerika. Naghinam-hinam sila nga moadto sa Zion, bisan og kinahanglan nilang biyaan ang ilang mga higala, pamilya, ug ang ilang panimalay.
Ang paglawig sa kadagatan dugay ug makaluya. Panahon sa init nga mga kahapunon diha sa barko, ang duha ka mga batang babaye migamit sa ilang maanindot nga mga payong aron dili mainitan sa adlaw ang ilang mga ulo. Kon ang hangin mohuros sa sakto nga direksyon, ang barko padayon nga maglawig. Apan kon mausab ang huros niini, ang barko mapugos sa pagbalik, kasagaran ingon ka layo sa gigikanan niini.
Sa dihang ang mga Larsen midunggo na sa Amerika, mipalit sila og karwahe ug mga baka ug misugod sa taas nga panaw paingon ngadto sa Walog sa Salt Lake. Ang biyahe sakay sa karwahe untol-untol ug init, mao nga kasagaran naglakaw na lang sila si Christiana ug Sarah.
Sama sa uban nga mga pamilya nga pioneer, ang pamilya ni Christiana nakasinati og mga kalisdanan ug trahedya diha sa ilang agianan. Ang bag-ong natawo nga igsoong lalaki ni Christiana namatay atol sa ilang panaw ug gilubong sa kapatagan.
Human ang pamilyang Larsen miabut sa Walog sa Salt Lake pagka 1857, si Christiana gusto nga moadto sa simbahan uban sa laing mga bata nga ka-edad niya. Sila si Christiana ug Sarah malipayon nga mibitbit sa ilang mga payong ngadto sa simbahan matag Dominggo aron dili mainitan ang ilang mga nawong sa adlaw diha sa disyerto.
Samtang ang mga adlaw ug mga semana milabay, ang kwarta ug pagkaon sa pamilya nagsugod og kahurot. Usa ka gabii nadungog ni Christiana ang iyang mga ginikanan nga naghisgut sa problema. Ang iyang amahan miingon nga may nahibaloan siya nga usa ka pamilya nga napanalanginan og maayo og ani sa lugas. Ang mga Larsen mahimong mobaylo og usa ka butang nga anaa kanila alang sa pipila ka harina. Apan unsa man ang ilang ibaylo?
Si Christiana misagbat. “Mahimo ninyong ibaylo ang kang Sarah ug ang akong payong, Papa.”
“Apan pinangga kaayo ninyo ang inyong mga payong, Christiana. Dili ko makahimo niana!”
“Okey ra, Papa,” miingon si Christiana. “Mas nagkinahanglan kita og pagkaon kay sa mga payong.”
Pagkasunod adlaw ang amahan ni Christiana mibaylo sa maanindot nga binurdahang mga payong alang sa pipila ka harina. Ang harina mao ang nagsilbing pagkaon alang sa tibuok pamilya.
Nianang gabhiona, samtang nag-andam si Christiana aron matulog, magul-anon niyang gitan-aw ang suok nga butanganan sa iyang maanindot nga payong. Apan samtang iyang mahinumduman ang lami nga pan nga iyang gikaon sa panihapon, ang iyang kaguol nahimong pasalamat. Samtang nag-ampo siya nianang gabhiona, nagpasalamat siya sa Langitnong Amahan alang sa iyang maanindot nga payong, nga nakatabang sa pagpakaon sa iyang pamilya.
Paghulagway pinaagi ni Brian Call