Pagkalimot sa Among Kaugalingon sa Sicily
Louis Menditto, Nevada, USA
“Ang akong ngalan mao si Omar Interdonato,” ang sinugdanan sa e-mail. “Anak ko nga lalaki ni Fiorella Italia. Nanghinaut ko nga nakahinumdom gihapon ka sa iyang bunyag.”
Treynta ka tuig kaniadto, ang akong kompanyon sa misyon ug ako na-assigned ngadto sa isla sa Sicily ug nangalagad sa Siracusa, usa ka nindot nga siyudad sa baybayon sa Mediterranean. Matag Dominggo kami makigkita sa pipila ka mga Santos sa Ulahing mga Adlaw sa dapit sa usa ka karaang balay, magpahigayon sa sakrament miting sa sala sa balay.
Ang misyonaryo nga buhat lisud, ug kami adunay pipila ka mga bunyag. Disesais ka full-time nga mga misyonaryo ang mialagad sa siyudad, nga kadaghan na nga gi-tractingan. Apan samtang ang akong kompanyon ug ako nagtuon sa mapa sa siyudad usa ka adlaw niana, kami nakabantay og usa ka gamay nga balangay nga nahimutang pipila ka milya gikan sa among apartment ngadto sa tumoy sa siyudad.
Kami milakaw ngadto sa mga umahan niining balangay, miluhod sa kilid sa usa ka bukid nga malantaw ang usa ka walog, ug mihalad sa among kasingkasing ug kalag ngadto sa Dios. Dayon kami misugod sa pagtracting sa usa ka pundok sa mga building nga apartment og matang nga kadaghanang makita sa barangay.
Sa wala madugay kami giabi-abi sa may pultahan sa usa ka babaye sa iyang mga 40 nga panuigon nga nagsinina og lubos itom—usa ka tradisyon sa Italy human sa kamatayon sa usa ka minahal. Giusab namo ang among pamaagi sa pag-ila-ila diha sa pultahan aron sa paghatag og gibug-aton sa plano sa kaluwasan. Ang babaye midapit kanamo sa pagsulod, ug kami giabi-abi uban kaniya, sa iyang duha ka dalaga, ug usa sa ilang mga higala. Among nahibaloan nga ang babaye bag-ohay lang nabiyuda ug adunay upat ka batan-ong mga anak nga amumahan. Among gipakita ang filmstrip nga Man’s Search for Happiness ug gidapit kami sa pagbalik sa sunod semana.
Ang inahan, uban sa iyang kinamagulangan nga anak nga lalaki ug duha sa mga dalaga, ilang lola, ug ang ilang higala sa wala madugay nabunyagan. Human sa akong misyon, mipadayon ko pagsulat sa pamilya, apan sa dihang akong nadawat ang e-mail, natingala ko kon unsa ang nahitabo kang Fiorella, ang batan-ong higala sa mga dalaga.
“Ang akong inahan nagmatinud-anon gayud sa ebanghelyo sa iyang tibuok kinabuhi ug niadtong 1983 naminyo sa usa ka buotan nga miyembro sa Simbahan gikan sa Messina Branch ug na-sealed ngadto sa templo,” ang iyang anak nga lalaki misulat. “Natawo ako niadtong 1984 ug ang akong igsoon nga babaye, si Veronica, niadtong 1987. Kaming tanan aktibo sa Simbahan. Mialagad ko og misyon sa Italy Rome Mission gikan sa 2005 hangtud 2007, naglaum nga makabayad sa Ginoo sa tanang mga kalisud sa duha ka mga misyonaryo kinsa mihukom sa pagsangyaw sa ebanghelyo sa usa ka gamay nga lungsod sa Floridia!”
Adunay mga higayon panahon sa akong misyon sa dihang naghunahuna ko kon ang duha ka tuig sa pagsakripisyo paigo ba. Apan pagkadako sa akong kalipay (tan-awa sa D&P 18:15–16) sa pagkahibalo nga ang kinabuhi ni Fiorella nausab sa kahangturan tungod sa akong kompanyon ug ako nga midesisyon sa pagpadayon ug sa paghikalimot sa among kaugalingon sa pagserbisyo sa uban sa isla sa Sicily.