Ang Pag-adto sa Templo

Chhom Koemly, Cambodia

Sukad sa panahon sa among bunyag niadtong 2001, ang akong bana ug ako nag-istoryahanay og makadaghan kabahin sa pagbiyahe padulong sa templo uban sa among pamilya aron ma-sealed sa kahangturan. Apan, ang among mga plano nahunong sa dihang siya nahiling nga may sakit sa atay ug namatay sa wala pa kami makaadto.

Nasagmuyo ko, apan ang akong tinguha alang sa among pamilya nga ma-sealed sa kahangturan mas nagkakusog human sa kamatayon sa akong bana. Isip usa ka biyuda nga inahan sa upat ka mga anak, hinoon, nasayud ako nga dili sayon ang pagtigum og kwarta nga gikinahanglan sa pagdala sa akong pamilya gikan sa Cambodia padulong sa Templo sa Hong Kong China—mga 1,000 ka milya (1,600 km) ang gilay-on.

Bisan pa sa among gamay nga kinitaan, ang akong mga anak ug ako nasayud nga kami kinahanglan nga moadto sa templo aron kami ma-sealed isip usa ka pamilya hangtud sa kahangturan. Mipadayon ko sa pagkugi og trabaho sa pagpanlaba sa usa ka hotel samtang ang akong mga anak mobuhat sa lisud nga mga trabahoonon. Sa hinay-hinay misugod kami sa pagtigum og gamay nga kwarta alang sa among pagbiyahe, apan sa wala madugay kami nakaamgo nga kami dili makatigum og paigo.

Tungod kay kami nasayud nga ang mahangturong pamilya mas bililhon pa kaysa sa bisan unsa nga butang nga among maangkon dinhi sa yuta, kami mihukom sa pagbaligya sa nag-inusarang bililhong butang nga among gipanag-iya—ang motorbike sa akong namatay nga bana. Human namo kini gibaligya alang sa dakong kantidad sa kwarta, ang among mga kasingkasing nagmaya sa pagkasayud nga kami sa dili madugay ma-sealed ngadto sa among hinigugmang amahan ug bana.

Apan ang among kalipay wala magdugay. Usa ka semana human gibaligya ang motorbike, kami miuli gikan sa simbahan nga mao na lamang ang among nakit-an nga ang pagkakita sa among balay gikawatan. Sa dihang among nadiskobrehan nga ang kwarta nga halin samotorbike nawala na, hilabihan ang among kasagmuyo. Pipila ka mga bulan human sa pagpangawat, kami mipadayon sa pag-ampo aron kami makakita og paagi nga makaadto sa templo.

Human sa pipila ka mga bulan ang among mga pag-ampo gitubag sa dihang kami giingnan nga kami makadawat og tabang gikan sa Church’s General Temple Patron Assistance Fund.* Ang akong mga anak ug ako nalipay sa balita ug wala madugay natuman ang among pangandoy sa pagbiyahe paingon sa templo.

Salamat sa mga manggihatagon nga mga Santos sa Ulahing mga Adlaw, kami karon usa na ka mahangturong pamilya.

*Ang General Temple Patron Assistance Fund gimugna sa paghatag og tabang pinansyal sa mga miyembro sa Simbahan sa gikinahanglan nga kwarta sa pag-adto sa templo.

Sa hinay-hinay misugod kami sa pagtigum og gamay nga kwarta alang sa among pagbiyahe padulong sa templo, apan human nga gikawatan ang among balay, kami naghunahuna nga kami dili makatigum og paigo.