Diin Man Ako Gikan?

Betty Hollowell, Indiana, USA

Isip usa ka bata kanunay ko nga maghunahuna, “Diin man ako gikan?” Sulod sa kinahiladman sa akong kasingkasing nasayud ko nga ako nagpuyo sa usa ka dapit sa wala pa ako mahimo kon kinsa ako karon, apan ako walay ideya kon asa.

Sulod sa daghang katuigan nahadlok ko nga mosulti ni bisan kinsa—bisan sa akong mga ginikanan—sa kahadlok nga basin og maghunahuna sila nga nabuang ko. Apan usa ka adlaw samtang mao pay akong pagkatin-edyer, nagmaisugon ko sa pagpangutana sa pastor sa among simbahan, “Diin man kita nagpuyo sa wala pa kita mianhi sa yuta?” Gisultihan ko niya nga kinahanglang dili ko maghunahuna mahitungod nianang mga butanga. Siya miingon nga walay usa nga nagpuyo bisan asang dapita sa wala pa sila gipakatawo; wala gayud kita mabuhi sa bisan unsa nga paagi kaniadto.

Tingali sakto siya ug nga ako na buang, apan sa gihapon dili nako matangtang kining mga hunahunaa sa akong alimpatakan. Padayon ko nga nagsiksik, apan walay tawo nga adunay mga tubag.

Sa dihang nag-edad ko og 18 anyos, ang among pamilya mibalhin og puyo. Naghunahuna ko nga basin og ang mga magsasangyaw diha sa among bag-ong lungsod mas nasayud kay sa among katapusang magsasangyaw, mao nga nakahukom ko sa pagpangutana ngadto sa usa kanila sa akong pangutana. Ang iyang tubag mao ra gihapon: siya miingon kanako nga dili normal nga maghunahuna mahitungod sa ingon nga mga butang ug misugyot nga makigkita ko og usa ka psychiatrist.

Wala madugay human niana mihunong ko og simba. Nakatrabaho ko, nakaila og usa ka batan-ong lalaki, ug naminyo. Lima ka tuig ang milabay ang kaminyoon natapos sa diborsyo. Busa akong giimpaki ang tanan nakong mga butang, nagguyod sa duha ka gagmayng bata ug nagmabdos sa usa, ug mipauli sa balay.

Nianang panahona atol niadtong lima ka tuig, ang akong inahan nagpamiyembro sa Ang Simbahan ni Jesukristo sa mga Santos sa Ulahing mga Adlaw. Nahisgutan niya ang Simbahan sa dihang mibisita ko niya ug gihangyo ko sa pagpakigsulti sa mga misyonaryo. Sa katapusan misugot ko, apan sa wala pa ang among pakighimamat, nakahukom ko nga mosugot lang ko sa pagpaminaw sa mga hilisgutan sa mga misyonaryo kon ang mga elder makasulti kanako kon diin ko nagpuyo sa wala pa ko mahimo kon kinsa ako karon.

Sa akong kahingangha, wala lamang nila tubaga ang akong pangutana apan gihatag usab kanako ang tubag nga naggikan gayud sa Biblia (tan-awa sa Job 38:4–7; Jeremias 1:5; Judas 1:6). Human niana, ilang nakuha ang akong tibuok nga atensyon! Ang ilang tubag mitabang kanako nga makasabut kon ngano nga sa tibuok nakong kinabuhi akong gibati nga anaa na ako kaniadto. Karon akong nasabtan nga ako nagpuyo sa usa ka kinabuhi nga wala pa dinhi sa yuta uban sa akong Langitnong Amahan.

Wala madugay nahimo akong miyembro sa Simbahan. Sa unang higayon sa akong kinabuhi, mibati ko nga daw usa ka binuhat ug nga ako adunay usa ka kapalaran nga padulngan—ang pagbalik ngadto sa akong Langitnong Amahan.

Nagpasalamat ko nga ang mga misyonaryo nakatubag sa pangutana nga walay lain nga nakatubag.