Anaa sa mga Balita

Si Elder Oaks Namulong sa mga Estudyante sa Law sa Harvard

Si Elder Dallin H. Oaks sa Korum sa Napulog Duha ka mga Apostoles bag-ohay lang nga namulong sa mga estudyante sa Harvard Law School atol sa ilang ika-lima nga tinuig nga Mormonism 101 Series.

Matag tuig usa ka miyembro sa Simbahan ang imbitaron sa Harvard Law School Latter-day Saint Students Organization sa pagpamulong kabahin sa nag-una nga mga gituohan sa Mormonism ug sa pagtubag sa mga pangutana nga ihatag sa mga estudyante.

Si Elder Oaks mipasabut sa gituohan sa mga LDS kabahin sa Langitnong Amahan, ni Jesukristo, ug sa Espiritu Santo isip tulo ka indibidwal nga mga binuhat, managlahi ang kaugalingon ug managhiusa sa katuyoan. Gipasabut usab niya ang katuyoan sa kinabuhi pinaagi sa minubo nga asoy sa plano sa kaluwasan.

Mihatag siya sa iyang pagpamatuod mahitungod ni Jesukristo ug sa gahum sa Pag-ula, nga nag-ingon, “Alang kanako, ang milagro sa Pag-ula ni Jesukristo dili matugkad, apan ang Espiritu Santo mihatag kanako og saksi sa kamatuoran niini, ug nalipay ako nga mahimo akong mogahin sa akong kinabuhi sa pagsangyaw niini.”

Mipadayon siya sa pagpasabut nga ang Simbahan nagsalig sa tinubdan sa kamatuoran, lakip na sa modernong pagpadayag ug sa kasulatan.

“Wala kita matakdo sa kaalam sa kalibutan o sa mga pilosopiya sa katawhan—bisan unsa pa kini ka dugay o karespetado,” siya miingon. “Ang atong pagpamatuod kang Jesukristo gipasikad diha sa mga pagpadayag sa Dios ngadto sa Iyang mga propeta ug sa tagsa-tagsa kanato.”

Ang Cardinal Nagdayeg sa Hiniusang mga Paningkamot sa Pagpanalipod sa Kagawasan sa Relihiyon

Sa unang pakigpulong nga gihatag sa usa ka cardinal didto sa Brigham Young University, ang iyang kamahalan nga si Francis Cardinal George miingon nga ang mga Katoliko ug ang mga Santos sa Ulahing mga Adlaw kinahanglan gayud nga maghiusa nga mobarug sa pagpanalipod sa kagawasan sa relihiyon sa Estados Unidos.

“Kon ang gobyerno mapakyas sa pagpanalipod sa konsensya sa mga lumulupyo niini, mahimo na kini nga katungdanan sa mga relihiyuso nga pundok, ilabi na sa pundok nga namugna pinaagi sa ebanghelyo ni Jesukristo, nga mahimong mga tigpanalipod sa tawhanong kagawasan,” miingon siya.

Si Cardinal George, ang Arsobispo sa Chicago ug Presidente sa United States Conference of Catholic Bishops, namulong sa usa ka grupo sa 12,000 ka mga estudyante nga mga Santos sa Ulahing mga Adlaw ug sa mga magtutudlo sa Marriott Center sa Provo, Utah, USA.

Gipahayag niya ang iyang pasalamat nga ang mga “Katoliko ug ang mga Santos sa Ulahing mga Adlaw makakita sa usag usa nga magkauban nga kasaligan sa pagpanalipod sa giambitan nga maayong mga baruganan.”

Kining duha ka simbahan nagkahiusa mahitungod sa mga isyu sama sa aborsyon, pornograpiya, ug panagminyo sa managsama og sekso, siya miingon.

“Ang kagawasan sa relihiyon dili mahimong ipaus-os ngadto sa kagawasan sa pagsimba ni gani sa kagawasan sa pribado nga konsensya,” miingon siya. “Ang kagawasan sa relihiyon nagpasabut nga ang relihiyusong mga pundok ingon man ang relihiyusong mga indibidwal adunay katungod sa paggamit sa ilang impluwensya diha sa pang-publiko nga hawanan.”