Сүмд үйлчилсэн нь

Багшийн үнэ цэнэ

Ерөнхийлөгч Томас С.Монсон

“Only a Teacher,” Tambuli, 1990 оны 10-р сар, 3-8.

President Thomas S. Monson

Хэзээ ч юм, гурван хөвгүүн аав нарынхаа тухай ярилцаж гэнэ. Нэг нь, “Миний аав чиний ааваас том” гэж. Нөгөөх нь, “Тэгвэл Миний аав чиний ааваас илүү ухаантай” гэж. Гурав дахь хөвгүүн ам хоосон байсангүй, “Миний аав эмч” гэж. Тэгээд тэр нэг хөвгүүн уруу эргэж, “Танай аав чинь ердөө л нэг багш шүү дээ” гэж даажигнан тохуурхсан аясаар хэлж гэнэ.

Амьдрал нь бусад бүх хүмүүсийнхээс үлэмж агуу нэгэн багш байдаг. Тэрбээр үйлчлүүлэхийн тулд биш, харин үйлчлэхийн төлөө, авахын төлөө биш, харин өгөхийн төлөө, Өөрийнхөө амийг аврахын төлөө биш, харин бусдын төлөө амиа золиослохын төлөө амьдарч байсан юм. Тэрбээр хайрыг хүсэл тачаалаас илүү сайхан зүйл, даруу байдлыг эрдэнэсээс илүү эрхэм баялаг хэмээн дүрсэлжээ. Тэрбээр хуулийн багш нар шиг бус, харин эрх мэдэлтэйгээр зааж байв. Мастер Багш, Бурханы Хүү, бүх хүн төрөлхтний Аврагч бөгөөд Гэтэлгэгч, Есүс Христийн тухай би ярьж байна.

Бие сэтгэл бүхнээ зориулдаг багш нар, “Ирж Надаас суралц” гэсэн Түүний ялдамхан урилгад хариулснаар Түүний бурханлиг хүчийг хүртэгчид болдог.

Ийм нэгэн багшийн нөлөөгөөр хүмүүжсэн нь бяцхан хөвгүүн миний туршлага байлаа. Манай ням гарагийн нэг хичээлээр тэр багш эмэгтэй дэлхийн Бүтээлт, Адамын Уналт, Есүсийн цагаатгагч золиослолын тухай бидэнд заалаа. Тэрээр Мосе, Иошуа, Петр, Томас, Паул, бүр Христийг хичээл дээрээ хүндэт зочид болгон авчирсан байв. Бид тэднийг хараагүй ч, тэднийг хайрлаж, хүндэтгэн, дуурайж сурсан юм.

“Миний аав чиний ааваас том,” “Миний аав чиний ааваас илүү ухаантай,” “Миний аав эмч” гэсэн басамжилсан үгсийг сайхь хөвгүүн сонсоод, “Чиний аав миний ааваас том байж болох юм; чиний аав манай ааваас илүү ухаантай байж магадгүй; танай аав нисгэгч, инженер эсвэл эмч байж болно; харин миний аав багш” гэж хариулбал зохих байсан юм.

Бид бүгд ийм чин сэтгэлийн, үнэ хүндтэй магтаалыг хүртэх зүй ёсны эрхтэй шүү дээ!

Оновчтой асуулт асуух нь

Сүмд лекц уншигчийн дуудлага байдаггүй. Лекц уншигч мэдлэгийг зүгээр л дамжуулдаг. Харин багш бол ангийн гишүүдийг сурч мэдэхэд, зарим үед бие биедээ заахад урьдаг. Уйтгартай лекцийг Сүнсээр бялхам, амьд хичээл болгож хувиргах нэг баттай арга зам бол үр ашигтай асуултуудыг асуух явдал юм.

1. Хичээлдээ бэлтгэхдээ хичээлийн явцад асуух асуултуудыг төлөвлө. Гарын авлагад зөвлөмж болгосон асуултуудыг ашигла. Хичээлд чинь тусалж болох өөр асуултуудыг бодож ол. Заах гэж байгаа гол санаа бүрд нэлээд хэдэн асуултыг сонгоход Сүнсний тусламжийг эрэлхийл.

2. Сайн мэдээний үзэл баримтлал амьдралтай нь хэрхэн холбогддогийг ярилцахад ангийн гишүүдэд туслахын тулд гурван төрлийн асуултыг асууж болно:

   • Тодорхой баримтаар хариулж болох асуулт: “Ямар хүмүүсийг уучлахыг Их Эзэн биднээс шаарддаг вэ?”

   • Аль нэг зарчмыг амьдралдаа хэрэгжүүлснээр хариулах асуулт: “Хэн нэгнийг уучлах нь бидэнд хэрхэн нөлөөлөх вэ?”

   • Туршлагаа хуваалцахад урьсан асуулт: “Хэн нэгнийг уучилснаар өөрт чинь нааштай ямар үр дүн гарсан бэ?”

Уулан дээрх Номлол, Карл Хейнрих Блок, Данийн Хиллеридийн Фредериксборг дахь Үндэсний Түүхийн Музейн зөвшөөрлийг ашиглав. Хуулбарлаж болохгүй.