A niuniu i te pereoo ma‘i !

Simon Heal, Queensland, Auteraria

I te matahiti 1991 te faanaho ra vau i te hoê piha i roto i to matou fare, ua ite a‘e ra vau i te hoê mauiui i roto i to‘u mata aui. E au taua mauiui ra mai te hoê puta raau, e ua parare na roto i to‘u upoo. Ua tamau noa vau i te rave i te ohipa e tae roa’tu i te taime ua rahi roa te mauiui, e ua haere au e faafaaea i roto i te piha taotoraa.

Tera râ, ia tarava a‘e ra vau i ni‘a i te ro‘i, ua muhumuhu maira te reo maru ia‘u. « A ti‘a i ni‘a », te parau ïa a te Varua. « Eiaha e haere e taoto ».

A feruri noa ai au i te faaararaa e te mana‘o no ni‘a i te mea ta‘u e rave, ua faaoti a‘e ra vau e haere e tii i te huero raau ta to‘u metua vahine e rave no te mauiui upoo. Ua haere au i roto i te piha taotoraa o to‘u na metua e ua itehia ia‘u te raau huero, tera râ, a haamata ai au i te tatara i te mohina, ua tae faahou maira te reo : « Eiaha e rave i te reira mau huero raau ».

Maa taime iti i muri iho, ua tae faahou mai te reo no te toru o te taime : « E mea ti‘a ia oe ia taniuniu i te hoê pereoo ma‘i—i teie nei ! »

Aitâ vau i niuniu a‘e nei i te piha no te mau fifi rû na mua a‘e nei, tera râ, ua niuniu oioi au. Ua tae oioi mai te pereoo ma‘i, e ua tuu na tuati ma‘i ia‘u i ni‘a i te ro‘i ma‘i. Te ohipa hopea noa ta‘u e haamana‘o ra maori râ, to raua aniraa mai ia‘u i to‘u i‘oa. E i reira, ua vai mai te poiri.

I muri a‘e, ua ara mai au i roto i te piha utuuturaa rû i te fare ma‘i. E mea paruparu noa â vau e tei roto noa â i te raau faataoto, tera râ te haamana‘o ra vau i te rima i ni‘a i to‘u upoo a horo‘a mai ai to‘u metua tane e to‘u episekopo i te hoê haamaitairaa ia‘u. Ua faaroo vau i te mau parau « e ora oe, mai te huru e, aita hoê mea i tupu ».

I muri a‘e e toru mahana utuuturaa pautuutu e e maha faahou mahana i roto i te fare ma‘i paroita, ua nehenehe ia‘u ia ho‘i i te fare. I reira noa to‘u iteraa e, ua tahe te toto i roto i te roro. I muri a‘e, ua parau mai te taote tei tapu ia‘u e, « vahi iti noa toe ua pohe oe » e e pohe au ahiri au i amu i te raau huero no te mauiui upoo.

I teie mahana e mea maitai au, mauruuru i te Fatu no To’na arata‘iraa i to‘u mau mana‘o i teie mahana. Ua taatihia vau i roto i te hiero i ta‘u vahine maitai roa, e e pae ta maua mau tamarii nehenehe.

Te haamauruuru nei au i to‘u Metua i te Ao ra e to‘u Faaora, o Iesu Mesia, no te semeio o te oraraa. Te faaitoito nei au i te mau mahana atoa ia faaohipa maitai i te taime ta Raua i horo‘a mai ia‘u, e te haamana‘o nei au ma te mauruuru i te parururaa a te reo o te Varua.

Ua parare oioi te mauiui i roto i to‘u mata aui e ati a‘e te upoo. I to‘u ihoa taravaraa i raro, ua muhumuhu maira te reo maru ia‘u : « A ti‘a i ni‘a. Eiaha e haere e taoto ».