Feia apî
To‘u tamataraa i te faaroo
13 to‘u matahiti a haamata ai au i te tai‘o i te Buka a Moromona i te mau mahana atoa, e mai taua taime ra ua haamaitaihia vau i te mau mahana atoa.
E ere ta matou piha haapiiraa 13 matahiti no te Haapiiraa Sabati, i te hoê piha faatura roa. Tera râ, e orometua maitai roa to matou, o tei imi i te mau rave‘a atoa no te haapii na roto i te Varua. Te hoê o te reira huru haapiiraa, no ni‘a ïa i te tai‘oraa i te mau papa‘iraa mo‘a.
I te hopea o te haapiiraa ua horo‘a mai oia i te hoê titauraa ia matou. No matou paatoa ïa taua titauraa ra, tera râ, aita vau i taa e, no te aha oia i hi‘o afaro mai ai i ni‘a ia‘u a parau ai e, « te titau nei au ia outou ia tai‘o i te Buka a Moromona i te mau mahana atoa ! » Ua feruri au i roto ia‘u iho e, « e faaite au ia oe. E rave au ! »
Ua haamata vau i te 1 Nephi pene 1 i taua ihoa pô ra e ua tamau noa i te tai‘o i te mau mahana atoa. E ere paha te mana‘o tano roa to‘u i te haamataraa, tera râ, i roto i te roaraa o te tau ua haamata vau i te au i te mea ta‘u i farii na roto i te tai‘oraa i te Buka a Moromona. Ua riro mai te tai‘oraa i te mau pô atoa ei ohipa oaoa no‘u.
Hoê ava‘e i muri iho ua tae au i ni‘a i te Alama 32 e ua maere au i to‘u iteraa i te parau no te tamataraa i te faaroo. I te fare haapiiraa no haapii noa a‘e nei matou i te parau no te mau tamatamataraa i te pae o te ite ihi, no reira, ua tuturi au i raro e ua parau vau i te Metua i te Ao ra e, e haamata vau i taua tamatamataraa ra. Ua ani au ia ite e, e parau mau anei te Buka a Moromona.
I muri a‘e ra, ua ite au e, ua pahono mai te Metua i te Ao ra i ta‘u mau pure e rave rahi taime. Na roto i te tai‘oraa i te Buka a Moromona i te mau mahana atoa, ua tupu i te rahi to‘u aravihi ia upooti‘a i ni‘a i te ino. Ua ite au i to‘u faafatataraa i piha‘i iho i to‘u Metua i te Ao ra. Ua ite au i te puai no roto mai i te Varua Maitai no te upooti‘a i ni‘a i te mau fifi. E parau mau ta Alama i parau no ni‘a i te tamataraa i te parau na te Atua : « Ua faarahihia to‘u varua ; oia ïa, ua haamaramaramahia to‘u mana‘o, e e mea oaoa ïa ia‘u nei » (Alama 32:28).