Kaduha Mapanalangini
Ang akong kinabuhi nausab sa hangtud sa diha nga ang akong bana ug ako miadto sa doktor aron sa pagpasusi kon babaye o lalaki ba ug ang kalamboan sa among wala pa matawo nga bata. Mihilak ako sa hingpit nga kalipay sa diha nga among nadiskubrehan nga nagpaabut ako og kaluha. Apan ang akong kalipay nahimo ngadto sa usa ka walay paglaum samtang ang doktor mipasabut nga usa ka magsunod-sunod nga mga komplikasyon ang makahimo niini nga ingon og ang kaluha dili mabuhi hangtud sa pagkatawo. Ang doktor misugyot nga hunungon ang pagmabdos. Siya miingon nga ang pagpadayon mahimo nga makuyaw ug nga ako may higayon nga maospital
Bisan pa sa mga kuyaw, mihukom kami sa pagpadayon sa pagmabdos.
Sa among pagpauli ako nakaamgo sa kalisud kaayo sa kahimtang. Akong gihunahuna kon unsaon nako paghimo sa pagbiya sa akong bana ug sa among tulo ka mga anak ug magpabilin og dugay nga panahon sa ospital. Nasayud nga ang among mga masuso maingon og matawo nga wala pa sa panahon—ug dili tingali mabuhi—nahimo nga dakong kaguol alang kanako. Dili ako siguro nga makalahutay ako niini nga pagsulay.
Diha lamang sa nakadawat ako og panalangin sa priesthood gikan sa akong bana ug ugangan nga lalaki nga mibati ako og kalinaw. Ako nakaamgo nga bisan unsa pa ang mahitabo, ang akong pamilya ug ako mamaayo ra. Gibati nako ang gugma sa akong Manluluwas ug nasayud nga Siya magauban kanamo diha sa hingpit nga kalipay ug sa kasub-anan.
Sa wala madugay, nanamilit ako sa akong pamilya ug misulod sa ospital sulod sa walay tagal nga pag-estar. Ang mga pinitik sa kasingkasing sa mga masuso kanunay nga gibantayan aron pagsiguro nga luwas ang mga masuso. Malisud kini alang kanako sa pagtan-aw nga moubos ang ilang pinitik sa kasingkasing, ug naghunahuna ako kon makaabut ba sila sa tumong sa pagpanganak nga 34 ka semana. Sa 25½ ka semana, ang pinitik sa kasingkasing sa usa ka masuso mius-us ngadto sa malisud nga kahimtang, nga hapit mohunong. Ang mga doktor mihukom nga kon ang iyang kasingkasing dili mosugod sa normal nga pagpitik, ang duha ka mga masuso pagawason pinaagi sa emergency cesarean section sulod sa pipila ka minutos. Nalisang ako sa diha nga akong nadungog ang nurse nga mitawag sa akong bana ug misulti kaniya nga ako giandam alang sa operasyon ug ang neonatal team nangandam.
Nasayud ako nga sa paglatas niini nga pagsulay, nagkinahanglan ako sa panabang sa Langitnong Amahan. Nag-ampo ako sa hilum, nangamuyo nga ang among masuso maulian, sa ingon magtugot sa mga kaluha sa gikinahanglan kaayo nga panahon aron sa pagtubo diha sa uterus. Nag-ampo usab ako sa kahupayan. Sa makausa pa mibati ako og kalinaw, sama sa akong naangkon sa diha nga nakadawat ako og panalangin sa priesthood. Wala ako masayud kon ang among mga masuso mabuhi o mamatay, apan ako nasayud nga bisan unsa ang mahitabo, kon ako moduol sa Ginoo, Siya motabang sa pagpas-an sa akong palas-anon. Ang resulta, ang pinitik sa kasingkasing sa masuso mibalik sa normal, ug ang operasyon wala na kinahanglana.
Ang akong pag-estar sa ospital mipadayon sulod sa misunod nga duha ka bulan, ug dihay daghang mga higayon nga nabalaka kami mahitungod sa nag-usab-usab nga pinitik sa kasingkasing sa among mga masuso. Apan maayo gani walay usa sa mga pinitik sa kasingkasing sa kaluha ang mius-us sama ka ubos sa kaniadto. Ang among anak nga mga lalaki, si John ug Jacob, natawo sa ika-33 ka semana. Ang ilang mga pusod nabaligtos og kawalo, ug si John—ang anak nga lalaki kansang pinitik sa kasingkasing mius-us sa hilabihan ka ubos—nabaligtos ang pusod libut sa iyang liog og makaduha. Ang among mga kaluha nagpabilin sa intensive care unit sa ospital aron ang ilang mga temperatura sa lawas ug pagginhawa mapahiangay. Bisan pa sa kalagmitan nga mga problema nga uban sa wala sa panahon nga mga pagkatawo, si John ug Jacob nakahimo sa pagpauli human lamang sa 19 ka adlaw.
Ang among mga kaluha karon mga batang gagmay, ug wala silay negatibo nga mga epekto gikan sa pagkatawo nga wala pa sa panahon. Mapasalamaton ako nga unsay nagsugod isip usa ka pagsulay nahimong usa sa labing mahinungdanon nga mga panalangin sa akong kinabuhi. Gihatagan ako og duha ka himsog nga anak nga mga lalaki, ug ang akong pagpamatuod sa gahum sa mga panalangin sa priesthood ug pag-ampo napalig-on. Mapasalamaton usab ako nga nakahimo sa paghinumdom sa kalinaw ug gugma nga akong gibati sa pagkasayud nga ang Ginoo nagbantay sa akong kahimtang. Niana ako nakakat-on nga, uban sa panabang sa Ginoo, makabaton kita sa kalig-on sa paglahutay og mga pagsulay.