Ayaw Gayud Kalimot nga Ikaw usa ka Mormon
Sa bisan unsang higayon nga kita mapukan, sa bisan unsang higayon nga kita nagbuhat og minus kay sa ato unta nga himoon, sa hilabihan ka tinuod nga paagi atong gikalimtan ang inahan,” mipahayag si Presidente Thomas S. Monson. Siya midugang, “Ang mga tawo mobiya sa pagkadautan ug mosunod sa ilang mas maayo nga mga kinaiya kon ang inahan mahinumduman.”1
Ang mensahe ni Presidente Monson nahimo nga kalig-on ngari kanako, ilabi na gayud nga sa dihang una nako nga nabasa ang iyang mga pulong, misantop sa akong hunahuna ang akong inahan ug ang maalamon nga tambag nga gihatag niya kanako mga tuig na ang milabay, wala madugay human sa akong pagpasakop sa Simbahan.
Ang akong inahan usa ka miyembro sa laing Kristohanon nga simbahan, apan mabination siya sa mga misyonaryo kinsa mitudlo kanako sa ebanghelyo. Sa diha nga medisisyon ako nga mahimong Santos sa Ulahing mga Adlaw, kanunay siya nga misuporta kanako.
Maayo ra ang tanan sa akong bag-o nga kinabuhi isip usa ka miyembro sa Simbahan hangtud nga mipasakop ako sa mga tulumanon sa Journalism Day sa akong pinuy-anan nga nasud sa Peru. Diha sa usa ka salo-salo nga akong gitambongan, mga pakigpulong ug mga pagdayeg nga mga pulong ang mipuno sa palibut. Mga pagtagay sa pasidungog dayon ang misunod. Samtang ang salo-salo nagkadugay, ingon usab ang tintasyon sa pag-inom uban sa akong mga higala.
Ang kausaban nga himoon sa mga kinabig ngadto sa Simbahan sa diha nga midawat sila sa ebanghelyo sa kasagaran nagpasabut nga kinahanglan gayud nga mohimo og bag-o nga mga higala. Sa pipila ka mga kahimtang, ingon nga akong nahibaloan, ang kanhing mga higala mahimo nga mga instrumento sa kaaway sa pagtintal kanato sa paglapas sa mga sugo ug sa pagbalik sa karaan nga mga kinaiya.
Sa diha nga ang akong kauban sa trabaho midalit kanako og usa ka baso nga beer, gidawat nako kini, giinom kini, ug mipadayon sa pag-inom. Pagkahuman sa salo-salo, ang akong konsyensya mihukom kanako. Ako napukan. Unsa ang ikasulti sa akong inahan?
Sa diha nga miabut ako sa panimalay, hilum akong misulod ug dayon mihigda. Walay gisulti ang akong inahan, apan gibati nako ang kaulaw ug mihukom sa pag-undang og tambong sa simbahan. Paglabay sa usa ka semana, samtang naglingkod kami diha sa lamesa nga naniudto, gitutukan niya ako ug miingon, “Anak, ayaw gayud kalimot nga ikaw usa ka Mormon.”
Sa pag-adto ug sa pagbalik gikan sa trabaho, magsakay ako sa akong bisikleta nga molabay sa balay-tigumanan sa Simbahan. Sa matag higayon sa akong pagbuhat sa ingon, ang akong konsyensya misamok kanako. Usa ka gabii mihukom ako nga dili na ako makahimo sa pagpakabuhi uban sa akong sala. Akong gipahimutang ang akong bisikleta atubangan gayud sa opisina sa presidente sa branch, misulod, ug mihangyo og usa ka interbyu.
Akong gisultihan ang presidente sa branch unsa ang akong nahimo ug nangayo og pasaylo, pagkahuman diin iya ako nga gitambagan. Sukad niana nga higayon, wala na gayud ako molapas sa Pulong sa Kaalam.
Ang akong inahan namatay labaw sa 20 ka tuig na ang milabay, apan kanunay nakong gipaningkamutan sa paghinumdom unsa ang iyang gisulti kanako nga dili gayud kalimtan: Ako usa ka miyembro sa Ang Simbahan ni Jesukristo sa mga Santos sa Ulahing mga Adlaw.