Pagpangita alang sa usa ka Paborito nga Himno
Ang among presidente sa misyon kanunay nga nagpahimangno sa mga misyonaryo sa Misyon sa Ghana Accra nga “magpabilin nga may tumong.” Nabantug siya tungod sa paggamit niini nga hugpong sa mga pulong. Sa usa sa among mga komperensya sa zone, misugyot siya og mga paagi nga mahimo namong mabuhat kini, ug usa ka imporante nga punto sa iyang lista mao ang pagbaton og paborito nga himno.
Gisultihan niya kami sa pagpili og paborito nga himno, ug memoryahon kini, ug kantahon kini sa mga higayon nga pagatintalon o nawad-an og paglaom. Kini nga pamahayag milanog sa akong panumduman sa tibuok adlaw.
Gimingaw ako sa amo. Walay usa sa akong pamilya ang misulat kanako sa bag-uhay, ug gibati nako ang kasubo. Mikunhod ang akong tumong. Mao kini ang higayon nga akong gikinahanglan sa pagpili og usa ka himno aron sa pagbayaw sa akong espiritu. Nasinati nako ang daghang mga himno sa among berde nga hymnbook, apan hain ang akong labing ganahan?
Nianang gabhiona, ako mikuha sa daan nga hymnbook ug gipakli ang pinil-an og gamay sa tumoy sa mga pahina, nangita og usa ka himno nga adunay makahupay nga kahulugan ngari kanako. Dihadiha, nakabaton ako og usa ka ideya. Si Elder Sheldon F. Child sa Seventy, kanhi Presidente sa Area sa Kasadpang Africa, mibisita sa among grupo didto sa missionary training center ug misulti kabahin sa Pag-ula. Siya mitapos, “Kon kamong tanan nga batan-ong mga misyonaryo nakasabut sa Pag-ula sa atong Ginoong Jesukristo, wala na kinahanglana ang mga lagda sa misyon.”
Mao kana ang matang sa himno nga akong gikinahangan. Wala na gayud ako maglibug. Kon adunay akoy himno kabahin sa Pag-ula, bation nako ang gugma sa akong Manluluwas, mahupay, ug magpabilin nga adunay tumong sa unsay gusto Niya nga ipabuhat kanako.
Sa katapusan akong gipili ang himno numero 136, “Ako Nasayud nga Akong Manunubos Buhi.”
Karon mapasalamaton ako sa akong presidente sa misyon tungod sa maalamon niya nga tambag. Karon aduna na akoy paboritong himno nga namemorya, diin kanunay nakong gipamalandong ug gihinumduman sa pagkanta sa mga panahon sa kaluya, mga pagsulay, ug mga kalisdanan. “Akong Manunubos buhi. Ako nasayud niini. … Buhi sa pagpanalangin.”