Makahimo Ba Ako sa Pagkalimot sa Akong Nangagi?
Ang positibo ug malipayon nga kinaiya maoy gikinahanglan kaayo alang sa mga tawo nga nagtrabaho diha sa pamaligya, sama sa akong gibuhat. Apan pipila ka mga tuig na ang milabay akong gibati ang kahigawad ug walay tinguha sa pagpakigsulti kang bisan kinsa. Hilabihan kini ka tinuod usa ka hapon niana.
Ang akong panagway tingali nagtug-an sa akong dili maayo nga mga espiritu tungod kay usa sa akong mga kauban sa trabaho, kang kinsa akong gikasulti sa daghang mga okasyon, nangutana mahitungod sa akong kahimtang. Ako mipasabut nga human sa pagkaminyo sulod sa unom ka tuig, ang akong asawa ug ako nagdiborsyo. Kini nga bulan nagtimaan sa ikaunom nga anibersaryo sa panagbulag, busa ako karon diborsiyado na sulod sa sama nga gidugayon sa panahon nga ako naminyo. Ang akong hunahuna ug kasingkasing nasamok, ug ang akong kalag napuno sa kasakit ug kasubo. Nasayud ako nga wala ako diha sa daghang mga kasinatian sa akong mga anak, ug kana nga pagkaamgo usa ka makanunayon nga pagsakit. Kamingaw mikutkot kanako, ug ako walay nakita nga kasulbaran—o gani paglaum—diha sa kapunawpunawan. Kini, akong gisultihan ang akong kauban sa trabaho, mao ang bili nga akong pagabayran tungod sa akong mga kasaypanan.
Ang akong kauban, kinsa usa ka miyembro sa laing Kristohanon nga simbahan, mitubag dayon. “Unsa nga bili ang imong gihisgutan?” siya nangutana. “Si Jesukristo mibayad sa bili, kon tinuod ikaw nga naghinulsol sa imong mga sala. O wala ba ikaw mahinumdom ngano nga Siya mianhi sa kalibutan?”
Natingala ako sa iyang tubag, ug ang iyang mga pulong nakapaamang kanako. Nagbalikbalik kini sa akong kahiladman sa tibuok hapon. Oo—bisan tuod kon nagpakabuhi ako uban sa mga sangputanan sa akong mga sayop, si Jesukristo mibayad sa bili. Nganong wala man ako makaamgo niini? Nahibalo ako sa doktrina, ug nahibalo ako nga tinuod kini. Nasayud nga ang Pag-ula adunay gahum sa akong kinabuhi mipuno kanako uban sa pagbati sa kalinaw ug kahupayan nga gihapon akong gihinumduman karon.
Mga tuig ang milabay sukad niining kasinatian sa trabaho. Akong nakat-unan nga pipila ka mga sangputanan sa atong mga binuhatan magpabilin kanato sa tibuok natong mga kinabuhi. Daghan niini ang makaapekto sa mga kinabuhi sa atong mga minahal. Ang kamingaw dili sayon, apan nakatabang kini kanako nga makaamgo sa akong kahuyang ug mangayo og kapasayloan sa akong Langitnong Amahan ug sa mga tawo nga labing naapektohan —ang akong mga anak ug ang ilang inahan.
Agig kalainan uban sa unsay akong gibati niana nga hapon, ako makaingon nga ako karon adunay kalinaw ug paglaum. Ako nasayud nga si Jesukristo mibayad sa bili, ug ako walay pagduhaduha niini tungod kay ako naghinulsol. Siya misangga kanako sa panahon niining katuigan sa mga pagsulay. Bisan tuod ang akong mga pagsulay nagpadayon, ako nasayud nga samtang ako naghinulsol, moduol sa Ginoo, ug mohupot sa mga kasugoan, Siya magpadayon sa pagsangga kanako.