E Le Mo Na o se Aso
“Ina ia latou potopoto mai faatasi, ma ia o atu i le malumalu” (Mosaea 1:18).
Na amata le Aso Toonai e pei lava o isi aso. Na oso a’e le la i luga o mauga e lata i le fale o Kolini, ma sa susulu atu le la mai le faamalama o lona potumoe. E i ai se aso o le a taumafai ai e lafi i lalo o ona ieafu ma moe ai pea. Peitai na mavava Kolini ma falo ma totolo ese mai le moega, ona e i ai se mea faapitoa o le a tupu, ma e tatau ona sauni ai.
E masani lava, o Aso Toonai o se aso e taaalo ai ma ana uo po o le fesoasoani i le fanua, po o le afe e asi lona tamamatua ma lona tinamatua pe a uma ana feau. E masani ona ia ofuina ni lavalava e tatau ona faaeleelea. Nai lo lea, na fai lona ofu lotu lea sa faamama ma auli e lona tina. Sa faamau lona ofutino paepae ma sulu i totonu ma le faaeteete. Sa faamaulu ona totini ma seevae ma faasolo lona fusiua faataamilo i lona ua—o le a fesoasoani tama i le seleina. Ina ua valaau mai tina, “Ua oo i le taimi o le a tatou o,” ae ua saunia o ia.
Faatasi ai ma tagata uma ua faamau lelei o latou fusipau i totonu o le veni, na aveina loa e Tama [le taavale] e faataamilo i le pioga o le auala. Sa ataata Kolini ina ua taunuu atu i le malumalu. Sa ia vaaia le manaia o le tino o le malumalu ona o le susulu o le la, ma le felanuai o faamalama feilafi e faasolosolo agai i le tumutumu ma le agelu o Moronae.
E tele taimi na vaai ai Kolini i le malumalu. Na oo muamua foi i totonu o se malumalu: o le taimi muamua ina ua faamauina o ia i ona matua i le ono o ona masina, ma le isi ina ua vaetama e ona matua ia lona uso laitiiti o Kateni. Sa laitiiti tele Kolini e manatua ai na taimi uma, ae a o tuputupu ae o ia, sa ia aoaoina o na mea na tutupu iina e matua taua. Ma sa malamalama Kolini a uma lana asiasiga faapitoa i lea Aso Toonai, o le a avea lona tuafafine pepe na vaetamaina o Shayla, ma se vaega o le aiga e faavavau, e pei lava o ona tuagane matutua.
O isi aso e fiafia Kolini e ata ma talanoa. Ae ina ua ulufale atu o ia i faitotoa tetele o le malumalu faatasi ma lona aiga, sa taumafai lava e tuu uma ona uiga tafitifiti ma le tato i fafo. Sa ia iloaina o se nofoaga paia lea.
O le au faigaluega faauo na latou aveina Kolini, Kateni ma Shayla i se potu faapitoa mo tamaiti, na fai ai o latou lavalava papae, ma faatali ai mo le taimi e o ai i le potu o faamauga na faatalitali mai ai Tama ma Tina. I totonu o le potu o faamauga na vaaia ai e Kolini lona tamamatua, ma tinamatua, uso, tuafafine, ma tuagane o o latou matua, aiga, uo, ma nisi tagata o lana uarota. O se aso fiafia, e ui ina sa i ai nisi na maligi o latou loimata.
Sa faafeiloai e le fai faamauga ia tama i se faatalofa malosi ma se ataata. Sa fai mai o ia, ua latou aulelei lava i o latou ofu papae. Sa ia faamalosiauina i latou e fai i taimi uma ia filifiliga lelei ina ia latou saunia ai e fai ni misiona ma toe o mai i le malumalu. Ona ia faamanatu mai lea ia i latou e uiga i le taua o le mea o le a tupu. Ina ua uma lena, sa amata loa le sauniga o le faamauga.
Ina ua uma le faamauga, sa laulaututu Kolini ma lona aiga ma vaavaai i faata i totonu o le potu. Sa ia vaaia ai ia lava, lona tama, tina, uso ma lona tuafafine pepe. E leai se mutaaga o ata, e pei lava o lona aiga e faavavau. Na iloa e Kolini, o le malumalu e mafai ai e lona aiga ona faatasi e le mo na o lena aso, ae mo le faavavau.