O Le Tatalo a La’u Fanau.
Ao ou talia le telefoni i le matou falesa i Viseu, Potukale, sa ou tau mafaufau po o ai o loo telefoni mai! Sa faateia au i le faalogoina o le leo gatete o lou atalii e valu tausaga i luga o le laina.
“Mama, na so’a Viviana e se taavale,” na fai mai ai. “O loo ola o ia, a o loo lavatoto lona ulu! Ua ave o ia i le falemai.”
Na toetoe a ou matapogia. O le a sa’u mea o le a fai? O le mea na lelei ai, o loo lata ane ni ou aiga—sa matou nonofo faatasi ma o’u uso e toalua. O le tasi o i laua na ma o atu i le falemai, a o le isi na alu e vaai ma faalototele si au fanau le mautonu e toatolu sa i le fale.
I le lotolotoi o le mau mea faatiga, sa ou manao e tatalo ae sa na o lou tagi lava. Ae peitai, i le agai atu i le falemai, sa faafuasei ona oo mai le lagona o le filemu ma le mautinoa. Sa ou lagonaina sa le tatau ona ou popole, o le a lelei mea uma.
Na vaaia e lou uso le suiga ma fesili mai, “O lelei ou faalogona?” na lue atu lou ulu. I le masalosalo lava, na toe fesili mai ai, “E moi?” “O lelei ou faalogona?”
“Ioe,” na ou tali atu ai, ma lē toe tautala ai i le taimi na totoe o le malaga.
Ina ua ma taunuu atu i le falemai, na ou maua atu lau tama teine e fa tausaga le matua o loo malamalama ma na o ni nai manua mitimiti. Ina ua uma ona ou faamafanafana atu ia te ia, na le mafai ona alu ese ma lou mafaufau le faalogona filemu na ou lagonaina.
Na toe foi Viviana i le fale ina ua mavae se aso se tasi i le falemai. I le talanoa ai e uiga i le faalavelave, sa faapea mai lou uso o le sa i le fale ma tamaiti, “O ananafi ina ua alu ese atu le taavale a le falemai, sa o atu Vanesa ma Vasco i le fale ma tatalo faatasi ai.”
Sa ootia au i le iloa, i le totonugalemu o le fefe ma le mata’u na latou oo i ai, sa manatua e lau fanau mea na aoaoina ai i latou i le aiga ma le Peraimeri. Sa na o le 6 ma le 7 o laua tausaga, peitai sa la faatuatua i le mana o le tatalo. Sa la iloaina e mafai e le Tama Faalelagi ona fesoasoani i si o la tei laitiiti.
Sa ou manatunatu pea i lo la faatuatua i le aoauli atoa. Ona oo mai ai lea o se fesili i lou mafaufau: o le a le taimi na amata ai ona ou lagona le toafilemu? Ina ua maea ona tau faavasega le umi e oo atu ai i le falemai, na ou iloaina ai, na amata ona oo mai le toafilemu e tusa o le taimi tonu lea na tatalo ai Vanesa ma Vasco.
Ou te iloa sa faafofoga le Tama Faalelagi i na leo malu, ma sa le gata ina faamanuiaina ai lau tama teine ae na faamanuiaina ai foi au i le toafilemu. O le a le galo ia te au le mea na ou aoaoina mai lau fanau i lena aso: o loo i ai so tatou Tama alofa o Lē faafofoga ia tatou tatalo ma finagalo e faamanuia i tatou “i se faamautinoaga filemu ma lona alofa” (“Ia e Lotomaualalo,” Viiga, nu. 69).