O Leo o le Au Paia o Aso e Gata Ai
Talu ai nei sa matou fai ‘aiga ai ma lo’u toalua ma nisi o uo. Na oo la matou talanoaga i mea tau lotu, ma sa amata ona tau mai e se tasi o uo, o se tagata e le toaga i le Ekalesia, le mafuaaga e le moni ai le Ekalesia.
I le aluga o lana faamatalaga sa oo ina loto maaa, tetee, ma toatamai. O le taimi atoa sa na o lou nofo lava ma faalogologo. I le taimi muamua sa ou lagona na pei a ou tagi, peitai na oo ina ou ita ma ou manao ai e otegia o ia. Ae peitai, na ta’u mai e le leo itiiti ma le filemu, ia ou filemu.
Ana le uma lava ona matou aai ma totogi le matou pili e le uma le lauga umi ma le ita o le ma uo. Ona nofonofo lea, e pei o faatalitali mo sau tali tetee atu. Sa ou nofo pea mo sina taimi ma ou tatalo lemu. Ona ou faapea atu lea i se leo malu, “E te iloa le mea e sili ona ou fiafia ai ou te alu i le lotu i le Aso Sa? O le faamanatuga. Ou te maua ai le avanoa e punou filemu ai lou ulu ma tatalo atu i le Tama Faalelagi. Ou te tauina atu ia te Ia mea uma na semanu e mafai ona ou faia i se auala e ese mai i le vaiaso ua mavae, ma ou te saili mo auala e faaleleia atili ai.
Ona ou toe faaopoopo atu lea, “ou te mafaufau i tagata uma sa ou taumafai e avea ai ma se faamanuiaga i le vaiaso ua tuanai, ma ou ole i le Tama Faalelagi e fesoasoani ina ia ou maua nisi tagata se toatele e faamanuiaina i le vaiaso o lumanai. Ou te faafetai i le i ai o sou taimi i le taimi o le faamanatuga i vaiaso taitasi e faia ai lenei mea, ma ia avea au ma tagata sili ona lelei i le mafai ou te mafaia.“
Sa tilotilo mai le ma uo ia te au e aunoa ma se tala na fai mai. Na matou tuua le faleaiga ma o atu i le taavale. Ona ou fesili lea i ai pe na te manatuaina uma tusi fesoasoani e suia ai olaga sa i luga o lau fatatusi i le fale. Sa ia manatua. Sa ou fai atu ia te ia, na talu lava ona ou auai i le Ekalesia, ou te lei toe faitauina lava se isi tusi fesoasoani. Sa ou faapea atu, na pau lava le tusi o loo aumai ai au tali o le Tusi a Mamona.
I ni nai aso mulimuli ane, na telefoni mai ai o ia e faatoese mai.
Ua fautuaina i tatou e Moronae, “O mai ia ia Keriso … ma alolofa atu i le Atua ma o outou loto atoa, ma o outou manatu atoa, ma lo outou malosi uma” (Moronae 10:32). A o ou taumafai e mulimuli i lena fautuaga, ua faateleina lou alofa i fanau a le Atua—e oo lava ia i latou o e taumafai ia avea ma ou fili.