Faasoaina Atu o le Talalelei e Faaaoga ai le Initoneti
Sii mai se lauga na tuuina atu i le Iunivesite a Polika Iaga–Hawaii i le aso 15 Tesena, 2007.
Ua 79 nei o’u tausaga. I se isi faamatalaga ua foliga mai ua ou matua. O le mea moni lava, o nisi ua manatu o nisi o le Usoga ua matutua tele ua le iloa ai mea o loo tutupu i o outou olaga. Ou te fia faamautinoa atu ia te outou, o loo matou matuai malamalama lelei lava.
O Se Lalolagi ua Suia
I le lata i le 80 tausaga ua ou vaaia ai le tele o suiga. Ina ua amata la’u misiona i Egelani i le 1948, o le auala taatele lava sa masani ona maua ai e tagata ia talafou o nusipepa ma le leitio.
Ua matua ese lava le lalolagi i aso nei. Mo le toatele o outou, afai tou te faitauina ia nusipepa, e i ai avanoa tou te faitauina ai i luga o le Initoneti. O le lalolagi i aso nei ua aofia ai fesootaiga i le vanimonimo, telefoni feaveai ma vitio pue, o musika ma vitio e pue mai le Initoneti, o upega o fesootaiga lautele, o feau feaveai i luga o telefoni feaveai ma initoneti, o komepiuta e uu i lima ma tamai laau faalogologo.
O le lalolagi lenei o le lumanai, faatasi ai ma fatuga e lei moemiti i ai ia o le a oo mai i lo outou olaga e pei ona maua i lo’u taimi. O le a faapefea ona outou faaaogaina nei fatuga ofoofogia? Ae o le aano tonu lava, o le a faapefea ona outou faaaogaina e faalautele ai le galuega a le Alii?
Ua outou maua se avanoa maoae e avea ai ma se malosiaga mamana mo le lelei i le Ekalesia ma le lalolagi. O loo i ai se upumoni i le faaupuga anamua e faapea “e malosi atu le peni nai lo le pelu.”1 I le tele lava o tulaga e tele atu mea maoae e te ausia i upu na e faia. Ae o le auala e faasoa atu ai na upu lea ou te fia tautala atu ai ia te outou.
Mai lava i ona amataga, sa faaaoga ai e le Ekalesia a Iesu Keriso o le Au Paia o Aso e Gata Ai le mana o upu tusitusia e faasalalau atu ai le savali o le talalelei toefuataiina i le lalolagi atoa. O le Alii lava Ia, i le gasologa mai o seneturi, sa i ai Lona aao i tagata musuia ina ia fatuina meafaigaluega e faafaigofie ai le faasalalauina atu o le talalelei. Na faaaogaina ma taliaina e le Ekalesia na meafaigaluega, e aofia ai masini lomitusi, o auala o faasalalauga, ma le Initoneti.
Atonu o loo i ai ni nai fatuga na tele so latou aafiaga i le lalolagi nai lo le masini lomitusi, lea na mua i malae ai ia Johannes Gutenberg pe tusa o le 1436. O masini lomitusi na mafaia ai e le malamalama, e aofia ai le malamalama o loo i totonu o le Tusi Paia, ona faasoa atu i le toatele nai lo le mea sa i ai muamua.
O Le Initoneti: O Se Masini Lomitusi Faaonapo Nei
O aso nei ua tatou maua masini faaonapo nei e pei o masini lomitusi i le Initoneti. O le Initoneti ua faatagaina ai tagata uma ona avea ma se lomitusi, ia lagonaina lona lava leo, ma o se lalolagi ua siisii i luga. A o lei oo mai le Initoneti sa i ai papupuni tetele i le lolomiina o tusi. Sa tele le tupe, malosiaga, aafiaga, ma le taimi na alu ina ia lolomiina ai. Ae o aso nei, talu ai ona o le tulai mai o mea ua tatou taua o Ala Fou o Faasalalauga, ua mafaia ona o le Initoneti, ua aveesea ai le tele o na papupuni. O Ala Fou o Faasalalauga e aofia ai meafaigaluega o loo i luga o le Initoneti lea e mafaia ai e toetoe lava o soo se tasi ona lolomiina pe faasalalau atu i se aofia toatele pe toalaiti. Ua uma ona ou taua nisi o na meafaigaluega. O le tulai mai o Ala Fou o Faasalalauga ua faafaigofie ai talanoaga i le lalolagi e toetoe lava o soo se mataupu, e aofia ai talitonuga faalelotu, ma e toetoe lava o tagata uma e mafai ona auai i ai. O lenei masini faaonapo nei ua talitutusa ma masini lomitusi e lei faapolopoloina mo na o e maualuluga.
O nisi o nei meafaigaluega fou— e pei o soo se isi lava meafaigaluega i se tagata e lei aoaoina ai pe le malamalama foi i ai—e mafai ona matautia. E mafai ona faaaoga le Initoneti e folafola atu ai le talalelei a Iesu Keriso ma e mafai foi ona faigofie ona faaaoga e faalauiloa atu ai le eleelea ma le mataga o ponokalafi. E mafai ona faaaoga polokalama faakomepiuta e pei o iTunes e kopi mai ai musika faagaeetia ma le faaootia loto po o ituaiga fati faasaulemausau e tumu i upu masoa. O upega o aga fesootai i luga o le Uepi e mafai ona faaaoga e faalautele ai faauoga lelei e pei ona faigofie ona faaaoga foi e tagata amioleaga e maileia ai i latou e leai se sala. E leai se eseesega o lena ma le auala o loo filifili ai tagata e faaaoga le televise po o tifaga po o se faletusi. E vave tele Satani e faaaoga le mana leaga o fatuga fou, e faaleaga ma faatamaia, ma faaleaogaina ai soo se aafiaga mo le lelei. Ia mautinoa o filifiliga e te faia ina ia faaaoga ai le Ala Fou o Faasalalauga o filifiliga e faalautele ai lou mafaufau, faateleina ai ou avanoa, ma fafagaina ai lou agaga.
E pei ona outou silafia, o le Ala Fou o Faasalalauga ua matuai tele sona aafiaga i le lalolagi tuai o nusipepa ma isi tu ma aga o faasalalauga. Sa i ai se taimi, i le avea ai ma se taitai o le Ekalesia na ou faia ai se faatalanoaga i le nusipepa, ona faatalitali lea i se aso se tasi pe lua ona faatoa vaaia lea i totonu o le nusipepa. Ona lafoai lea o lena nusipepa, ma po o le a lava se aafiaga atonu sa i ai e vave lava ona mou atu.
I le taimi nei, a o o’u tuua se tasi tofiga ae malaga atu i se isi tofiga, o le lipoti o la’u asiasiga po o le faatalanoaga e toetoe lava a vaaia i luga o le Uepi saite a le nusipepa po o luga o itulau, lea e mafai ona kopiina ma faasalalauina uma atu i luga o le Uepi. Ua mafai la ona outou vaai i le auala e taua tele ai le sao o upu i aso nei. O upu e faamaumauina i luga o le Initoneti e le aluese. Soo se sailiga i le Google po o le Yahoo! o le a maua ai se upu se tasi, mo se taimi umi.
O se faataitaiga lenei o lea tulaga: I le 2007, na oo mai ai le Televise a le NBC i Sate Leki mo le faatalanoaina o au o se vaega o se ata sa latou gaosia e faatatau i le Ekalesia. Sa ma faaaluina faatasi ma le fai lipoti o Ron Allen se itula i totonu o le falesa i le Maota Faamanatu o Iosefa Samita. Sa umi o ma talanoaina le Ekalesia. I nai aso mulimuli ane na vaaia ai lenei tala, ma i le umi e 4 minute sa faaalia ai i luga o le ea, sa aofia ai se upu sii puupuu pe tusa ma le 6 sekone mai le faatalanoaga e 1 le itula. Na lava ma totoe lena taimi mo au e tautino atu ai lo tatou faatuatua ia Iesu Keriso o loo avea ma totonugalemu o mea uma tatou te talitonu i ai. Ou te toe fai atu, e na o le 6 sekone sa faaaogaina mai se faatalanoaga e 60-minute. O na sekone e 6 e matuai taua lava, aemaise lava, mo tagata o faasalalauga masani a le TV, na manatu e faasalalau na o ni nai vaega laiti. O le eseesega tele mai aso ua mavae i aso nei ona e faaalu foi e le fai lipoti le 15 minute o le ma faatalanoaga i luga o le Uepi saite a le NBC Nightly News. Ma o na minute e 15 o loo i ai pea iina. O mea tatou te tautatala ai ua le toe ola mai ma toe mou atu, ae e tumau pea o se vaega e teuina ma e mafai ona vaaia i luga o isi saite lea e toe faaaogaina. O tagata o loo faaaogaina le Initoneti e saili ai malosiaga e suesue ai mo autu e uiga i le Ekalesia o le a tau ai i lena faatalanoaga atoa ma le tele o isi mea faapena.
O nei meafaigaluega ua faatagaina ai faalapotopotoga ma tagata taitoatasi e sopoia atoatoa ia ala e faasalalauina ai talafou ae lomia pe faasalalauina a latou savali i lo latou atoatoa i tagata ua faamoemoe e ave i ai. Mo se faataitaiga, o le tausaga na tea nei na faatautaia ai e le Matagaluega o le Va i fafo a le Ekalesia se faatalanoaga ma Elder Dallin H. Oaks o le Korama a Aposetolo e Toasefululua ma Elder Lance B. Wickman o le Au Fitugafulu e faatatau i le tulaga o le Ekalesia i le tosina atu i le itupa lava e tasi. I aso anamua, ina ia fesootai atu la tatou savali i le lautele i se mataupu e pei o lenei, semanu tatou te faalagolago i le ala e faasalalauina atu ai talafou. Ae o lenei faatalatalanoaga vailiili sa faatautaia e le aufaigaluega o le Va i Fafo a le Ekalesia ma tuuina atu ai loa lava i luga o le Uepi saite a le Ekalesia, e lei toe iloiloina e faasalalauga o talafou.
Auai i le Talanoaga
O loo i ai talanoaga o loo faia pea e uiga i le Ekalesia. O na talanoaga o le a faaauau pea ona faia e tusa pe tatou te filifili e auai atu i ai pe leai. Ae le mafai ona tatou tutu i autafa ae o loo taumafai isi, e aofia ai ma le au faitio, e faauiga mea o loo aoaoina atu e le Ekalesia. E ui o nisi talanoaga o loo i ai ni aofia e fiaafe pe fia foi miliona, ae o le tele lava, e matuai toalaiti lava. Ae o talanoaga uma lava e i ai se aafiaga ia i latou e auai atu i ai. O manatu e uiga i le Ekalesia e tulai mai i talanoaga taitasi.
O le luitau ona o loo toatele tagata o loo auai i talanoaga e uiga i le Ekalesia mo le aufaigaluega a le tatou Ekalesia e talanoa ma tali atu i ai taitoatasi. E le mafai ona tatou tali atu i fesili uma, ma faamalieina suesuega uma, ma tali atu i soo se mea sese e tulai mai. E moomia ona tatou manatua o loo i ai se eseesega i le va o mea e naunau i ai ma le na o le fia iloa. O nisi taimi e na ona fia iloa lava e tagata pe faapei le Ekalesia. Ma o nisi o loo sailia ia ni tali e mananao e sau sao lava mai se tagata o le Ekalesia. Latou te talisapaia se talanoaga taitoatasi.
Ua silafia e outou uma ua faamanatu ma uunaia pea e le aunoa ia tagata O Le Ekalesia a Iesu Keriso o le Au Paia o Aso e Gata Ai ina ia faasoa atu le talalelei i isi. E vaavaai pea le Ekalesia mo ni auala sili ona lelei e faailoa atu ai lana savali. O le talai atu o le talalelei o le Toefuataiga e taua pea lava ia te au. Sa ou fiafia i le avea ai ma se faifeautalai i Egelani. Sa ou fiafia i le avea ma se peresitene o le misiona i Kanata. Ma ou te fiafia i lo’u valaauga o loo i ai nei, lea ua ou maua ai avanoa e faasoa atu ai le savali o le Toefuataiga o le talalelei i le lalolagi ma molimau atu o le Atua le Tama ma Lona Alo, o Iesu Keriso, sa faaali atu i le Perofeta o Iosefa Samita i le 1820. Na toe aumaia e ala mai ia Iosefa le talalelei lea na faavaeina a Iesu i taimi o le Feagaiga Tuai. Na leiloa ina ua maliliu ia Aposetolo anamua. E mafai ona ou faasoa atu i le lalolagi le malamalama e faapea o le pule o le perisitua, o aoaoga faavae, ma sauniga o le Ekalesia i le Feagaiga Fou ua toe i ai i le lalolagi. O le galuega sili lenei ona taua e mafai ona tatou auai ai.
Ou te fia talosaga atu nei ina ia outou auai i le talanoaga e ala lea i le auai i luga o le Initoneti e faasoa atu ai le talalelei ma faamalamalama atu i ni faaupuga faigofie ma le manino le savali o le Toefuataiga. O le toatele o outou ua outou silafia afai e mafai ona e faaaogaina le Initoneti e mafai ona e amataina se talanoaga i ni nai minute ma amata ai ona faasoa atu mea ua e iloa e moni. E mafai ona e kopiina ia vitio mai le Ekalesia ma isi saite talafeagai, e aofia ai le newsroom.lds.org, ma auina atu i au uo. E mafai ona e tusi atu i saite o faasalalauga i luga o le Initoneti lea e faia lipoti i le Ekalesia, ma faailoa atu i ai ou manatu i le sao o lipoti. O lenei faiga, e moomia ai lou malamalama lelei i mataupu faavae o le talalelei.
Ua toatele naua tagata e le o lava le malamalama i le Ekalesia ona o le tele o faamatalaga latou te faalogo i ai e mai lipoti o talafou lea e masani ona faatupuina i fefinauaiga. O le tele ona gauai atu i fefinauaiga ua mafua ai ona i ai ni manatu sese o tagata i le uiga moni O Le Ekalesia a Iesu Keriso o le Au Paia o Aso e Gata Ai.
Talu ai nei na tusia ai e se tagata tusitala i se nusipepa lauiloa i le Iunaite Setete sana faamatalaga e le sao e uiga i le Ekalesia ma o tatou talitonuga ma mea tatou te faia. E toatele, atonu e faitau selau ia tagata o le Ekalesia ma isi e malamalama i o tatou talitonuga sa tuuina atu ni o latou manatu i luga o le Uepi saite a le nusipepa, e faasao ai manatu sese sa ia faasalalauina ma talosagaina ai se toe faasaoga.
Faataitaiga o Mea e Mafai Ona e Faia
Sei ou tuuina atu ni nai faataitaiga o le auala o loo faaaoga ai e tagata o le Ekalesia le Ala Fou o Faasalalauga.
O se tagata o le Ekalesia o loo nofo i le Ogatotonu i Sisifo o le Iunaite Setete o loo faia se taumafaiga malosi e faasoa atu le talalelei i aso uma, i tagata. Ona ia tusia lea o se itulau e uiga i ana taumafaiga i aso taitasi ina ia faasoa atu aoaoga o le Tusi a Mamona ma tuu atu kata e faailoa ai i e uma latou te feiloai. O ana taumafaiga ina ia faasoa atu le talalelei sa matuai maelega lava ma moomia, ma o le isi ana taumafaiga faaopoopo na ia tusia e leai se masalomia na musuia ai le toatele ina ia faia foi le mea lava lea e tasi.
Ua tusia ma faamaumauina e isi a latou molimau i le Toefuataiga, o aoaoga o le Tusi a Mamona, ma isi mataupu o le talalelei i luga o saite lauiloa e fefaasoaai ai vitio. E mafai foi ona e faamatalaina lau tala i tagata e le auai i le Ekalesia i le auala lenei. Faaaoga tala ma upu o le a latou malamalama i ai. Talanoa atu i ai ma le faamaoni ma le sao e uiga i aafiaga o le talalelei i lou olaga, e uiga i le auala ua fesoasoani ai ia te oe e faatoilaloina ia vaivaiga po o luitau ma fesoasoani ai e faamanino tulaga e faatauaina. O aofia mo nei fesootaiga ma meafaigaluega o Ala Fou o Faasalalauga e mafai ona toalaiti, ae o le aafiaga tele o le fiaafe o tala faapea e mafai ona maoae. O taumafaiga tuufaatasi e mautinoa lava e aoga le taunuuga pe afai e toalaiti e aafia i au upu o le faatuatua ma le alofa o le Atua ma Lona Alo, o Iesu Keriso.
O le Toefuataiga o le talalelei a Iesu Keriso e leai se masalosalo na i ai sona aafiaga malosi i lou olaga. Sa faafoligaina ai oe e pei ona i ai nei ma lou lumanai o le a i ai. Aua e te fefe e faasoa atu lau tala i isi—o ou aafiaga i le avea ai ma se soo o le Alii o Iesu Keriso. E tofu uma i tatou ma ni tala mananaia lea ua aafia ai lo tatou faasinomaga. O le faasoaina atu o na tala o se auala e le taufaamatau lea e talanoa atu ai i isi. O le faamatala atu o na tala e mafai ona fesoasoani e faailoa atu ai le Ekalesia. E mafai ona e fesoasoani e faatoilalo ia manatu sese e ala i ou lava aafiaga, lea e mafai ona aofia ai le Initoneti.
O Mea e Aloese Ai
O soo uma lava o Keriso o le a sili atu ona lelei ma faia mea sili ona lelei e ala lea i le taliaina o se amioga taua o le avea ai ma se soo o le Faaola. O talanoaga e taulai atu i fesili, faafinau, ma mataupu faavae o le talalelei e masalosalo i ai e laitiiti se sao i le atiina ae o le malo o le Atua. Na apoapoai mai le Aposetolo o Paulo ia i tatou ina ia “aua le ma i le talalelei a Keriso aua o le mana lava lea o le Atua e ola ai i latou uma o e faatuatua” (Roma 1:16). Ia tatou tutu mausali ma tautatala atu ma le faatuatua i le faasoaina atu o la tatou savali i le lalolagi. O le toatele o outou ua maea mai misiona ma e mafai ona faaauauina se talanoaga ‘anoa i le gagana sa outou aoaoina i lau misiona. O la outou aapa atu e mafai ona lautele.
A o outou auai i lenei talanoaga ma faaaoga meafaigaluega o Ala Fou o Faasalalauga, ia manatua po o ai outou—o le Au Paia o Aso e Gata Ai. Ia manatua, e pei ona fai mai le faataoto, “o le tali filemu e liliueseina ai le ita: a o le upu faatiga e tupu ai le ita” (Faataoto 15:1). Ma ia manatua o le finauga e mai le tiapolo (tagai 3 Nifae 11:29). E le manaomia ona finau ma isi e tusa ai ma o tatou talitonuga. E le manaomia ona inaina pe matamataita. E mautu lo tatou tulaga; e moni le Ekalesia. E na ona moomia lava ona tatou faia o se talanoaga, e pei ona faia e ni uo i se potu e tasi, ia taialaina pea e le Agaga ma ia manatua pea le Togiola a le Alii o Iesu Kerkso, lea e faamanatu mai ai ia i tatou le taua o fanau a lo tatou Tama o i le Lagi.
Ia faamanuia outou uma taitoatasi e le Alii ina ia outou maua se aafiaga malosi ia i latou tou te fesootai atu i ai. E pei ona ou fai atu i le amataga, o le mana o upu e tulaga ese. Ia lagonaina o outou leo i lenei galuega tele o le talalelei a Iesu Keriso.