Toe Tasi le Vaiaso oo i le Aso Totogi
Ma sina faafaigata laitiiti, sa matou maua atu ai ma lou toalua ma le ma fanau laiti e toalua se laulau gaogao i totonu o le potuai a le kolisi. Sa aumai i fafo ia sanuisi sa fai i le fale, ma matou talanoaina le faaletonu o lo matou tulaga tautupe.
Na leai sa matou tupe ae toe tasi le vaiaso oo i le totogi. Ma te lei mananao uma e fesili i o ma matua mo se fesoasoani. Sa i ai a ma kata e faaaitalafu ai faatauga, ae afai e amata ona ma faaaogaina, o le a faapefea ona toe tuu? Sa totogi faamaoni a ma sefuluai ma sa ma faamoemoe o le a faamanuia i matou e le Tama Faalelagi.
Ao ma mafaufau i a matou filifiliga, sa ou iloa atu se tamaloa na ataata mai ia i matou mai i ni nai laulau na mamao ese atu ma matou. O le i ai o se fanau pisapisao ma le ulavavale, na ou masani ai i le faatausisila mai o tagata ia i matou. Ou te lei mafaufau lava i lana faatausisila mai seia oo ina savali mai o ia ia i matou. Sa na tuuina se fasipepa na gaugau i luga o le laulau, ma popo le tauau o lou toalua ma ataata ma fai mai, “E foliga mai ua tutumu ou lima.
Ona savali ese lea o ia ma na vave ona lilo atu i le tumutumu. Na tatalaina le pepa, ma faitau, “Ia manuia! E foliga mai o loo lelei lava le lua alu.” Sa sulu i totonu o le pepa na gaugau se tupe na lava ma totoe mo i matou i le vaiaso na sosoo ai ma ona talaatu.
Faatasi ai ma loimata, na ou lagonaina le faamaoniga mafanafana a le Agaga e faapea, o le tali lenei ia matou talosaga ma o se faamanuiaga o le totogiina o a matou sefuluai. Na ou iloaina i lena taimi sa silafia lelei lava e le Tama Faalelagi si o matou aiga faatauvaa, ma Na te le tuulafoaia lava i matou.
Sa ou teuina le faamatalaga ma faitauina i le tele o taimi i nai tausaga ua mavae. Ou te mautinoa e le i iloa lelei e le tagata ese le aafiaga o lana galuega o le a i ai. Ae peitai, mo lo matou aiga, o lenei aafiaga o se liliuga lea—o se liliuga e agai atu i le faateleina o le usiusitai, faatuatua ma le agaga faafetai
O se uunaiga faaleagaga, o se tagata ese agalelei sa naunau e galue, ma se faamatalaga aoga na faamanuiaina ai lou aiga e faavavau.