O Ki i le Lumanai
Ua iloa e lenei alii talavou i Italia, o le faaaogaina o le perisitua e fesoasoani ai e fausia se alalaupapa e agai atu ai i lona fiafia.
I Florence, Italia, sa masani ona mulimuli ia ulugalii i se faiga masani i aso la: latou te faamauina ni loka i le alalaupapa o Ponte Vecchio ae lafo ia ki i le Vaitafe o Arno i lalo ane, e faailoa ai ua faavavau ona “loka” o latou alofa.
O aso nei ua le toe fautuaina le faamauina ai o ni loka ina ia fesoasoani e puipuia ai le alalaupapa lauiloa, lea sa fauina i aso ua leva. Ae ua iloa foi e le alii e 16-tausaga le matua o Cristian Morelli o loo i ai ni ki moni ua leva ona i ai ao lei faia le alalaupapa i Ponte Vecchio—o ki o le perisitua mamana sa toefuatai mai ia Iosefa Samita i le 1829, ina ua toefuatai mai le Perisitua Arona ma le Perisitua Mekisateko. O se tasi o na ki o le mana o faamauga, ma ua iloa e Cristian e moni e mafai ona “lokaina” le alofa o se aiga mo le faavavau. Sa faamauina ona matua i le malumalu e se tasi o loo umia lena pule o le perisitua, ma ua ia fuafua e i ai se aso na te maua ai foi faamanuiaga o le malumalu. O loo sauniuni o ia e ala i le faia o ona tiute o le Perisitua Arona ma ola agavaa mo lenei faatuatuaga paia.
Fatufatuai Mao’i
Ua lauiloa Florence o le faaautama o le Renaissance, i le vave ona lauiloa i faatufugaga, tusitusiga, ma manatu faasaienitisi. E pei o alii talenia o le Renaissance na muamua atu ia te ia, ua iloa e Cristian e tele le manuia e maua i musika ma tusi. Ua tolu tausaga o ona taina le kitara leo malū, ma e fiafia foi e suesue i tusitusiga ma filosofia faaPeretania.
Ae ua ia iloaina lelei o nisi taimi e oo atu ai le “fatufatuai” i le agasala. Na te iloaina nisi o le tupulaga e aafia i musika leaga po o faafiafiaga faaponokalafi. O le manatuaina o le perisitua o loo ia umia, ua iloa ai e Cristian e tatau lava ona ese ai o ia.
Afi Faamama
O le 1497 sa tauanauina ai e se faifeau mai Florence ia tagatanuu e susunu uma a latou meatotino ua faapea e faalelalolagi pe leaga, e aofia ai faata, lavalava taugata, ma galuega o faatufugaga. O le 2008 e fai si ese o le fuafuaga a Cristian. Nai lo le taumafai e aveese tagata o loo siomia ai o ia, ua ia sailia le afi o le Agaga Paia e faamamaina lona lava olaga.
“E fai si faigata,” o le tala lea a Cristian. E na o le toafa tamaiti seminare i lana vasega, ma e le mafai ona latou feiloai i aso uma ona e vavamamao o latou nofoaga. E masani ona ia lagona le tuua toatasi, ae ua ia iloa o le mana faamama e mafai ona oo mai e ala i tofotofoga. Mo musumusuga, e vaavaai atu o ia i isi o e na fetaiai ma mea faafeagai.
Sa oo Peteru le Aposetolo a Iesu Keriso i tofotofoga i le atunuu o Cristian, sa faafalepuipuiina i Roma ma e masalo na maliu faamaturo ai o ia iina. E oo mai i le aso, o le pule o le perisitua a Peteru, e masani ona faaalia i le uuina o ni ki lapopoa. E pei o Peteru, e manao Cristian e avea ma soo moni ma tumau le tautino atu i ona valaauga faaleperisitua, e tusa lava po o le a le mea e tupu.
O le isi tama autu a Cristian o Nifae. “O Nifae, e pei o Peteru, na oo i nisi o tofotofoga,” o le tala lea a Cristian. “O nei tofotofoga na fesoasoani e avea ai o ia ma tagata e pei ona i ai.”
O le tatalo, suesue i tusitusiga paia, ma sulufaiga saogalemu na te taua o le aiga, na fesoasoani e fai Cristian ma tagata ua i ai nei—o se tagata o le Au Paia o Aso e Gata Ai e tautino i le faamamaluina o le perisitua, auauna atu i se misiona, ma ia avea o se tane ma se tama faamaoni i se aso.
Taulai atu i le Olioli
O sini faapena e tulaga ese ai Cristian mai ana uo. “Sa ou fia alu i le misiona talu ona ou i ai i le Peraimeri,” o lana tala lea. O le mea e faanoanoa ai, sa le mananao ana uo e faalogo i soo se mea lava e uiga i ona talitonuga po o le lotu foi ona “sa ano tele i latou i le faiga o meaaoga, taaalo i taaloga, ma le maua o ni taimi malie ma fiafia.“
Na te manatua ni ona aafiaga faaleagaga i le tufaina o le faamanatuga a o tiakono ma le anapogi mo se tasi o lona aiga sa ma’i. Na te lagona le fiafia tele i asiasiga faaleaiga pe a “mafai ona ia iloa le eseesega o le taimi na amata ai ma le maea ai o le asiasiga,” ina ua maua e aiga sa la aoaoina ma lona tama “le mafanafana ma le agaga faafetai mo upu sa tautalagia.”
O lagona ma aafiaga nei e le mafai e le toatele o uo a Cristian ona malamalama i ai. Atonu e i ai taimi e le malamalama ai tagata ia te ia, ae o faaaliga faaleagaga o se faamanuiaga e le manao e aveesea. E pei o le tagata tauaso sa faamaloloina e le Faaola i se tasi o tala e sili ona fiafia i ai Cristian i le Feagaiga Fou (tagai Ioane 9:1–11), O Cristian ua manino lelei lana vaai ae o le toatele o ana uo o loo tauaso pea i le olioli o le talalelei.
Faasoa Atu o le Miti
O le isi lena mafuaaga e tulimatai atu ai o ia i le faia o se misiona: ia fesoasoani i isi e iloa mea moni faaleagaga ua faamanuiaina o ia e malamalama i ai. Talu mai o laitiiti, sa fiafia o ia i faauoga lelei ma faifeautalai ma e faanoanoa lava i taimi uma e siitia ai se tasi o i latou. “I le aluga o taimi, e galo ai ia te au le igoa o se faifeautalai, ae e le taitai lava galo ia aafiaga. Na tuua e i latou taitoatasi se lagona,” na fai mai ai o ia. “Ou te fia pei o faifeautalai ua ou iloaina.”
E faapitoa le faagaeetia o Cristian i le naunautai sa ia vaaia i le taimi e o atu ai ma faifeautalai. E ui “e toatele tagata e fai mai ma le mautinoa ‘Leai, ou te le manao ai’ pe tapuni foi le faitotoa i o latou foliga, ae latou te o lava,“ o le tala lea a Cristian. ”Latou te tuitui pea i le faitotoa e sosoo ai, ma taumafai e faasoa atu le malamalama o le talalelei i se isi tagata.“
O loo sauni Cristian mo lana lava misiona e le gata i le ola mama ma le suesue i le talalelei, ae faapea foi i le fai faalelei o ona lavalava mo le fuafuaga—e aunoa ma le fia faalialia.
O sitali o lavalava o se mataupu lauiloa lea i Florence, ae mo Cristian, e le taua ni lavalava taugata. I Aso Sa, “Ou te ofuina ai se ofutino paepae, peleue, ma se fusiua e faaali ai lo’u faaaloalo mo le Sapati ma le Alii,” o le tala lea a Cristian. Ua ia iloa, o lenei faiga o le a fesoasoani ia te ia e tausisia ai tulaga faatonuina o laei o faifeautalai. O aso e totoe o le vaiaso e pule ai lava o ia i ofu e fai. “Ou te le fiafia lava e taumulimuli i tulafono o sitaili fou,” o lana tala lea. “Ou te le popole po o le a lou ofu e fai, pau le mea ia fai faalelei ou lavalava”—ae le o le popole po o le a le igoa o loo i le faailoga.
O Ki i le Fiafia
Ua taulai atu Cristian i le mauaina o le Perisitua Mekisateko, faaeega paia i le malumalu, o le valaau e avea ma se faifeautalai faamisiona, ma i se aso, o le avanoa e “loka ai lona alofa” i sona lava aiga e faavavau.
O lea, ua tulimatai atu ai Cristian i le Afio Mai Faalua o Iesu Keriso. “Ou te mafanafana pe a afio mai o Ia,” o agasala a le lalolagi ma le faanoanoa uma e oo i ai “o le a muta.” Ae o le taimi nei, o le a faamamalu e Cristian i latou o loo umia ki o le perisitua ma tausi feagaiga o le a faapea ona latalata atu ai o ia i le Faaola. Ua ia iloa, na pau lea o le ala e saogalemu ai faaleagaga ma fiafia ai e faavavau.