Ua Atagia Mai i Fuainumera le Mautu o le Faatupulaia

O le faitau aofai aloaia o tagata o le Ekalesia ua pasia le 13 miliona mo le uluai taimi ina ua faamatuu mai ia faitauga faafuainumera i le konafesi aoao a le Ekalesia ia Aperila 2008. Ua atagia mai ai i numera le mautu o le faatupulaia o le Ekalesia i le lalolagi atoa. E tusa ai ma suiga talu ai nei, o loo faatupulaia le Ekalesia pe tusa ma le tasi le miliona tagata i le tai tolu tausaga i le lalolagi atoa.

E fesuisuiai le maualuga o le faatupulaia i le lalolagi ma o loo maualuga lava i eria e pei o Aferika, e tusa ai ma faitauga faafuainumera a le Ekalesia, o loo iloa ai o Nigeria o loo tulai mai ai se faatupulaia i le tausaga e tusa ma le 8.1 pasene. I le vaitau o le 2000 i le 2006, na oso ai i luga le faitau aofai o tagata o le Ekalesia i Nigeria mai le tusa ma le 30,000 i le lata i le 79,500.

E faia e le Ekalesia se pepa faamaumau pe a papatisoina ma faamauina se tagata i le Ekalesia. Mo se faataitaiga, i le 2006 e silia ma le 272,800 papatisoga liliu mai. E faia foi e le Ekalesia se pepa faamaumau mo se tamaitiiti faatasi ai ma se maliega a matua. Ae peitai, e atoa loa le 9 tausaga o le tamaitiiti ona le faitaulia lea o se tagata o le Ekalesia aua e lei papatisoina ma faamauina. O le faatupulaia o nei “tamaiti ua i ai pepa faamaumau” mo le 2006 sa silia ma le 94,000.

O Glen Buckner, o se tausi fuainumera a le Ekalesia ma o se tasi o le Faalapotopotoga o Tagata Tausi Fuainumera o Vaega Faalelotu a Amerika, na faamatalaina e faapea “o le faitau aofai o tagata e aofia ai i le faamoemoega ma le faatulagaga.” Na ia saunoa o le manatuaina o tagata uma, e tusa lava po o le a le maualuga o lo latou toaaga, e matuai taua lava. O lenei talitonuga e ese mai le auala o loo faitauina ai e isi faatuatuaga o latou tagata auai. O le Yearbook of American & Canadian Churches, lea o loo iloa ai o le Ekalesia o le talitonuga faalelotu lona fa lea lona tele i totonu o le Iunaite Setete, o loo faailoa mai ai e faapea e le o i ai ni faatulagaga po o ni tuuaofaiga a ekalesia e faaaogaina e ni faalapotopotoga faalelotu. O loo tau mai e le tusi faaletausaga e faapea “e leai ma se faatulagaga e tasi mo le aoina mai o faamaumauga o loo i ai e faaaoga i le tele o faatulagaga faalelotu o loo lipotia i le Tusi Faaletausaga. E le gata i lea, o le faauigaga o tagata auai ma faaupuga e talafeagai i ai e matuai eseese lava le tasi ekalesia mai i le isi ekalesia.”

O le mea moni, o le suesuega o Religious Congregations & Memberships in the United States 2000 na saunia e Dale E. Jones ma isi na faaiuina ai e faapea “o le faafitauli ogaoga i le faatinoina [o le suesuega] o le faauigaina lea o le tagata auai… . Talu ai ona e le o i ai se faauigaga faafuainumera o le tagata auai, sa lagonaina ai o le atofaina o tagata auai o le a taatia atu lea i talitonuga faalelotu lava ia.”

O se faailoilo lelei o le saoasaoa o le faatupulaia o le Ekalesia o lana polokalama lea o fale. E tusa nei ma le 8,254 falelotu o loo i fafo atu o le Iunaite Setete, lea o loo faaalia ai se 10 pasene o le faatupulaia i le lima tausaga ua tuanai. O lena suiga na faamaonia foi lona moni i totonu o Amerika, lea o loo i ai nei le 6,361 falelotu, lea o loo faaalia ai se faatupulaia e 9.6 pasene i le vaitau lava lea e tasi. O le tele o nei falelotu o loo faaaogaina e le tele o faapotopotoga.