Faaavanoaina o le Taimi ina Ia Paia
I magaala o Hong Kong, e televave le alu o le olaga i se vave le mafaufau. I le ao po o le po, e solo faatasi ai le toatele o tagata e nanati mai lea nofoaga i lea nofoaga. E lolofi atu tagata i fale faatali nofoaafi ae taape i le isi itu i le agai atu i galuega, i le maketi, po o aoga.
I se aganuu lea e faatauaina ai le galue malosi ma mea e ausia, e foliga mai e le lava itula o le aso e fai ai mea uma.
“Ou te manaomia nisi taimi se tele,” o le mapusela lea a Ng Kathy Ka-Lai, a o latou malolo ma nisi o ana uo o le autalavou nofofua ina ua maea se Aso Sa pisi.
Ua iloa e nei uo mai mea e tutupu, o le lalolagi e faatauanau ma lofituina. E mafai ona vave tosoina se tagata i ni itu se tele a o faifai malie atu i sona taimi o totoe. O manao faatotope a le lalolagi ia i tatou e mafai ona tuua ai na o se taimi itiiti mo mea faaleagaga. Ma afai tatou te le faaeteete, tatou te iloa mulimuli ane, o le a le puipuia i tatou mai le lalolagi ae oo ai i se tulaga e valaau ai mo le alofa tunoa o le Atua.
Ua Fetaomi Mai le Lalolagi
Ua iloa e Kathy ma ana uo le faigofie ona āia i le vevesi o le lalolagi.
O Chow Shu Wai, 28, o se supavaisa i se falegaosi oloa, e faigaluega i le 70 itula o le vaiaso. O Yuen Lung Sing, 29, e faigaluega i le silia ma le 50 itula o le vaiaso o se enisinia tusiata o fale. O Kathy, 28, e faigaluega foi pe a ma le 50 itula o le vaiaso e tautua mo fefaatauaiga. O Chan Misty Lai Ming, o se tagata suesue fesoasoani e 27-tausaga le matua, ae o Tsang Dick Hing Leung, e 28-tausaga o se enisinia taavale, ma e faigaluega uma i laua pe a ma le tai 45 itula.
Ma o nei foi talavou matutua faamaoni o le ekalesia ua taliaina ni tiutetauave faaopoopo lea e o mai faatasi ma valaauga a le Ekalesia, lea latou te faaaluina ai le 5 i le 15 itula i le vaiaso. O le vaega e aofia ai se peresitene o Tamaitai Talavou a le siteki, o se fesoasoani i le au peresitene o Alii Talavou a le siteki, o se fesoasoani i le au peresitene o le Aoga Sa a le uarota, o se peresitene o le aufono a le inisitituti i le risone, ma se sui o le autalavou nofofua matutua a le siteki.
O le sailia o se taimi mo le faafouina o le tagata lava ia faaleagaga, fai mai ni uo, e tatau ona fuafuaina e se tagata. O le uiga o lena mea, o nisi taimi ia fatufatuai pe laitiiti se taimi e moe ai, e aofia ai le alapopo, tuai ona momoe, ma faaaoga taimi o feoaiga ma malologa i galuega.
“Afai tatou te loto ia maua se taimi mo mea e pei o le suesue i tusitusiga paia, ona faigofie lea ona maua le taimi mo ia mea,” o le tala lea a Dick. “A leai sa tatou fuafuaga ia o le a tele ina tatou faamaumauina soo se taimi avanoa tatou te maua.”
Faaeteete i Mea Faatosina
E mafua lena ona afai e le o tauanauina oe e le lalolagi e te gauai atu i le galuega ma isi tiutetauave, e masani lava e taumafai ia e gauai atu i isi auala e faaalu ai lou taimi.
“E tele naua mea faatosina i le lalolagi,” o le tala lea a Misty. Mo se faataitaiga, na taua e Misty ia tamai laau faalogologo MP3, lea e mafai ona e fealuai ma ave musika e sili ona e fiafia i ai i soo se mea e te alu i ai, ae o na mea e mafai ona taofia ai oe mai lou gauai atoa atu i se mea.
“Toeitiiti atoa le tausaga talu ona tuu ese la’u tamai laau faalogologo MP3,” o lana tala lea.“ Sa faigata ai lava ona ou mafaufau loloto. E le mafai ona ou mafaufau pe manatunatu loloto pe a ola la’u MP3.”
Sa talanoa mai Dick e uiga i le televise. “A maua so’u taimi mo le televise, ua maua foi lo’u taimi mo tusitusiga paia,” o lana tala lea. “E tatau ona tatou saili ia paleni ma fai le mea sao i le taimi sao.”
Mo nei talavou matutua, o le faafitauli e le o le matamata i faafiafiaga leaga pe faalogologo i musika le lelei. O le faafitauli o le ave uma e faafiafiaga o si taimi laitiiti latou te maua mo mea faaleagaga. Po o le, e pei ona saunoa Elder Richard G. Scott o le Korama a Aposetolo e Toasefululua: “Pe a saputu mai mea o le lalolagi, e tele lava ina tuu atu le faamuamua maualuga i mea sese… . Ua i ai ia Satani se meafaigaluega mamana e faaaogaina i tagata lelei. O mea faatosina. Na te faatosinaina tagata lelei e faatumu o latou olaga i ‘mea lelei’ ina ia aua nei i ai se avanoa mo mea e taua.”1
Faapaiaina o Outou Lava
I le taumafai ai e faasaoloto mai i latou lava mai le lalolagi, ua aoao ai Dick, Kathy, Lung, Misty, ma Shu i o latou tiutetauave e fai e pei ona fetalai mai ai le Alii, “O lea ia faapaiaina ai outou e outou, ma ia paia lava outou” (Levitiko 20:7). Sa talanoaina e nei uo auala e saili ai le faapaiaga.
1. E Ala i le Faatuatua
“Latou te faatuatua mai ia te au, o loo fetalai mai ai le Atua, ina ia faapaiaina i latou ia te au” (Eteru 4:7).
O le faatuatua e taitai atu ai i amioga, ma ua talitonu nei talavou matutua o le faatuatua ia Iesu Keriso o le a taitaiina atu ai i amioga faaKeriso.
I le aso atoa, e taumafai ai Dick e mafaufau ia Iesu i taimi uma e mafai ai. “O Ia o le tatou faataitaiga o le paia. O a mea na fai e Iesu? O a upu sa Ia tautala ai?” sa ia fai mai ai.
Ona taumafai lea o ia e ola faapena.
Ona o le faatuatua, e suesue ai nei uo i tusitusiga paia, auai i le inisitituti, galulue ma faifeautalai, ma auauna atu i le malumalu. Latou te auauna atu i isi ma faasoa atu a latou molimau pe a mafai. Latou te faaalia foi ua latou naunau e ositaulaga o latou manaoga ina ia mafai ai ona usiusitai i le Alii.
“E tatau ona taulai atu lou mafaufau ma au amioga ia Iesu Keriso,” o le tala lea a Kathy. “E le mafai ona ou faapea, ou te manao ia faateleina lou onosai, ae leai se mea e faia. Afai ou te talitonu ia te Ia ma faatuatua ia te Ia, e mafai ona ou avea atili e pei o Ia.”
2. E Ala i le Suesue
“Ia e faapaiaina i latou i lau upu moni: o lau afioga o le upu moni lea” (Ioane 17:17).
“A tatou faatatauina [tusitusiga paia] ia i tatou, e avea tusitusiga paia ma ni tali e fesoasoani ia i tatou e taulima ai ma foia ai o tatou faafitauli o le olaga,” Na faamatala e Dick e uiga i ona aafiaga i le suesue i tusitusiga paia.
E ioe foi i ai nei uo uma. Ma sa latou ta’ua uma foi le taumafai ia maua se taimi o aso taitasi mo le suesueina o tusitusiga paia, e tusa po o le afa itula ao lei faigaluega pe moe po o taimi foi e feoai ai.
O le suesue, faatasi ai ma le mafaufau loloto ma le agaga tatalo, tatou te avanoa ai mo musumusuga, o le tala lea a Lung, ma e mafai foi ona suia ai o tatou uiga.2
“O tusitusiga paia ua loloto ai lo’u malamalama i le talalelei,” na fai mai ai Lung. “E mafai ona ou lagona le Agaga, ma ou te latalata atili ai i le Atua.”
3. E Ala i le Ositaulaga
“Ua oo mai lea faapaiaina ona ua latou tuuina atu o latou loto i le Atua” (Helamana 3:35).
“Na fetalai mai le Faaola ia tatou naunau e ositaulaga o tatou lava manao ina ia mafai ona mulimuli atu i le Atua,” o le faamatalaga lea a Kathy.
“E tatau ona tatou naunau e tuu ese mea a le lalolagi,” o le manatu foi lea o Misty.
Mo se faataitaiga, sa talanoa mai Lung e uiga i se alii talavou i le Tusi a Luka o le sa fesili atu ia Iesu po o le a se mea e tatau ona ia faia e maua ai le ola e faavavau. Sa tausi e lea alii ia poloaiga mai lona laitiiti, ae sa le manao o ia e tuu ese ana oa ina ua valaaulia o ia e Iesu e faatau atu ana mea uma sa i ai, ae mulimuli i le Faaola (tagai Luka 18:18–23).
“Sa manaomia lona ositaulagaina o mea sa fiafia i ai ina ia mulimuli ai ia Keriso,” o le faamalamalama mai lea a Lung. “E tofu uma i tatou ma na mea—e le faapea o ni oa—ae o mea o loo taofia ai i tatou mai le mulimuli atu ia te Ia.”
O se faataitaiga sa latou talanoaina o le tama o le Tupu o Lamonae lea sa manao e lafoai uma ana agasala ina ia iloa ai le Atua (tagai Alema 22:18).
“E fia silafia e le Atua pe o i ai ni o tatou faatuatua e mulimuli ai ia te Ia. O loo finagalo mai o Ia mo o tatou loto,” o le tala lea a Misty. “Na te fia silafiaina po o a mea e sili ona tatou alolofa i ai. O le auala lea e avea ai i tatou ma ni Ona soo.”
“Ina ia paia, e tatau ona ositaulaga o tatou faanaunauga, o tatou manao,” na fai mai ai Shu.
4. E Ala i le Usiusitai
“O le mea e pulea e le tulafono e faasaoina foi e le tulafono ma faaatoatoaina ma faapaiaina ai lava” (MFF 88:34).
O le ositaulagaina o o tatou manao o le faapaiaina lea pe afai tatou te faia ina ia faia ai le finagalo o le Alii, ola i a tatou feagaiga, ma tausi Ana poloaiga.
“Ua tuuina mai e le Atua ia i tatou ni tulafono,” o le tala lea a Dick. “O le usiusitai i ai e faapaiaina ai i tatou.”
“O le a tatou maua ai faamanuiaga e tele pe afai tatou te naunau atili e usitai,” na fai mai ai Kathy. “E mafai ona tatou fiafia i le tausiga o Ana tulafono.”
5. E Ala i le Togiola
“Ua faapaiaina ai i tatou i le taulaga i le tino o Iesu Keriso na fai faatasi” (Eperu 10:10).
“Ia te au, o le uiga o le ia paia, ia agavaa i le afioaga o le Atua, ia mama,” o le tala lea a Lung. “Ua na o le Togiola lava e mafai ai.”
“Ua oo o Ia i o tatou puapuaga,” o le tala a Misty. “O o tatou lagona, sa Ia lagonaina foi. O loo i ai se mana maoae i le Togiola e mafai ona faapaiaina ai i tatou e pei foi ona paia o Ia” (tagai Moronae 10:32–33).
Fai mai Kathy o se vaega o le faatagaina o le Togiola e aafia ai o tatou olaga o le, “manatua lea o mea ua faia e le Faaola” mo i tatou.
Fai mai Dick na te lagonaina aafiaga o le Togiola pe a salamo ma tausi poloaiga i aso taitasi, e mafai ai e le Alii ona faamamaina o ia—o se faataitaiga o le auala e mafai ai ona tatou faapaiaina i tatou lava ina ia mafai ona faapaia i tatou e le Alii (tagai Levitiko 20:7–8).
I Ai i le Lalolagi, ae Le o Ni O o le Lalolagi
O nei talavou o loo latou faaavanoaina se taimi ia paia ma faasaoloto i latou lava mai mea o le lalolagi ona ua poloaiina i tatou e le Alii ia “faatulagaina outou lava, ma saunia outou lava, ma faapaiaina outou lava; ioe, ia faamama o outou loto ma fufulu o outou lima ma o outou vae i o’u luma …”
Ae o le mafuaaga ua Ia poloaiina ai i tatou ia mama, e tutusa lava le taua ma le malamalama i le auala e ausia ai.
“… ina ia ou faamamaina outou; ina ia ou molimau atu i lo outou Tama, ma lo outou Atua, ma lo’u Atua, o loo mama outou mai le toto o lenei tupulaga amioleaga” (MFF 88:74–75).
“E mafai ona le mau manatu le olaga,” o le tala lea a Dick, a o vaai atu i le vevesi e le uma o Hong Kong i le po. “A tatou faatulagaina se taimi mo le Faaola i o tatou olaga, e mafai ona tatou maua Lana fesoasoani e foia ai o tatou luitau. E leai se mea o le lalolagi e sili atu le taua ia te au nai lo le mafai ona [ou] foi atu i lou Tama oi le Lagi.”