Haʻu ʻo Fanongo ki he Leʻo ʻo e Palōfitá
Hala Fakakavakava ʻe Tolú
Mei ha lea ʻi he konifelenisi lahi ʻo ʻOkatopa 2003.
ʻI he ngaahi taʻu lahi kuo hilí, ne u lau ai ha tohi ko e The Way to the Western Sea ko e faʻu ʻe Tēvita S. Lavenitā (David S. Lavender). ʻOkú ne ʻomi ha fakamatala mālie ʻo e fononga kāfakafa ʻa Meliueta Luisi (Meriwether Lewis) mo Viliami Kalake (William Clark) ʻi heʻena taki ʻena kau fakatotolo ʻiloá ʻo kolosi he konitinēniti ʻo ʻAmelika Tokelaú ʻo ʻilo ai ha hala ʻi loto-fonua ki he Tahi Pasifikí.
Naʻe mohu faingataʻa fau honau halá pea ʻi ai mo ha ngaahi teleʻa lilifa naʻe pau ke fai ai ha kolosi, mo ha lue lalo lahi, ʻo haʻamo ai pē honau ʻū vaka kuo fonu he ngaahi nāunau kehekehe, ke kumi ha toe kiʻi vaitafe ke hoko atu ai ʻenau fonongá.
ʻI heʻeku lau ʻa e ngaahi meʻa ne nau fouá, naʻá ku faʻa fakakaukau, “Kapau pē ā naʻe ʻi ai ha ngaahi hala fakakavakava fakaonopooni ke kolosi ʻi he ngaahi lilifá pe ngaahi vai ʻoku tafe mālohí.” Ne u fakakaukau ki ha ngaahi hala fakakavakava lalahi ʻo hotau kuongá ʻoku nau fakahoko faingofua pē ʻa e ngāue ko ʻení: ʻa e Hala Fakakavakava Matapā Koula (Golden Gate Bridge) fakaʻofoʻofa mo ʻiloa ʻo Seni Felenisisikoú; ʻa e Hala Fakakavakava fefeka ʻo e Taulanga ʻi Senē ʻAositelēliá; pea mo ha ngaahi hala fakakavakava kehe ʻi ha ngaahi fonua lahi.
Ko hono moʻoní, ko e kau fononga kotoa pē kitautolu—ko ha kau fakatotolo ʻo e moʻui fakamatelié. ʻOku ʻikai ke tau maʻu ha taukei mei ha meʻa naʻa tau aʻusia fakatāutaha ki muʻa. Kuo pau ke tau foua ha ngaahi lilifa loloto pea mo ha ngaahi vai ʻoku tafe mālohi ʻi heʻetau fononga ko ʻeni ʻi māmaní.
Ko hotau ʻEiki mo e Fakamoʻui ko Sīsū Kalaisí, ʻa e pule tufunga hala fakakavakava maʻatauá, pea mo e faʻahinga kotoa ʻo e tangatá. Kuó ne langa ʻa e hala fakakavakava kuo pau ke tau kolosi ai ke tau tūʻuta ki hotau ʻapi fakalangí.
Naʻe foaki mai ʻe Sīsū ʻa e Hala Fakakavakava ʻo e Talangofuá. Naʻá Ne hoko ko e sīpinga taʻe tūkua ʻo e talangofua fakafoʻituituí he naʻá Ne tauhi ʻa e ngaahi fekau ʻa ʻEne Tamaí.
Ko e hala fakakavakava hono ua ne ʻomi ʻe he ʻEikí maʻatautolu ke tau kolosi aí ko e Hala Fakakavakava ʻo e Ngāue Tokoní. ʻOku tau vakai ki he Fakamoʻuí ko e sīpinga Ia ʻo e ngāue tokoní. Neongo naʻe hifo mai ki he māmaní ko e ʻAlo Ia ʻo e ʻOtuá, ka naʻá Ne ngāue ʻi he loto fakatōkilalo maʻanautolu naʻe ʻiate Iá. Naʻá Ne tāpuakiʻi ʻa e mahakí; naʻá Ne fakaʻeveʻeva ʻa e pipikí, ʻa e kuí ke ʻā mo e tulí ke fanongo. Naʻe aʻu ʻo Ne fokotuʻu foki ʻa e maté ke toe moʻuí.
Fakaʻosí, ʻoku foaki mai ʻe he ʻEikí kiate kitautolu ʻa e Hala Fakakavakava ʻo e Lotú. Naʻá ne fakahinohino mai, “Lotu maʻu pē, pea te u lilingi hifo hoku Laumālié kiate koe, pea ʻe lahi ʻa ho tāpuakí” (T&F 19:38).
Naʻe fakafehokotaki ʻe he Tufunga Hala Fakakavakava ko Sīsuú ʻa e vanu lahi ʻoku tau ui ko maté. “He ʻoku hangē ʻoku mate kotoa pē ʻia ʻĀtamá, ʻe pehē foki, ʻe moʻui kotoa pē ʻia Kalaisi” (1 Kolinitō 15:22). Naʻá Ne fakahoko maʻatautolu ʻa e meʻa naʻe ʻikai ke tau mei malava ʻo fai maʻatautolú; ko ia, ʻe lava heni ʻa e faʻahinga ʻo e tangatá ke kolosi ʻi he ngaahi hala fakakavakava naʻá Ne langa—ki he moʻui taʻengatá.