Tokoni ‘a e ‘Initanetí ki he Kau Mataotao Fakatekinolosiá

ʻE lava ke maʻu ʻe he kau mataotao fakatekinolosia ʻa e siteikí ha ngaahi fakamatala ʻi he ʻInitanetí ki ha toe tokoni ki hono fakahoko honau fatongiá. Ne tukuatu ha tuʻasila ʻInitaneti ko e konga ʻo e LDS.org ʻa ia ʻoku lava ke maʻu ai ha ngaahi tokoni ʻa e kāingalotu ko ʻeni kuo uiuiʻi ke fakaleleiʻi ʻo e ngaahi palopalema.

Naʻe pehē ʻe Pila Pusei ko e pule ngāue ia ʻi he Potungāue Fakamatala mo e Fetuʻutaki (Information and Communications Systems) ʻa e Siasí, “Naʻa mau fiemaʻu ke fakapapauʻi ʻoku ʻiloʻi ʻe he kau mataotao ko ʻení ʻoku ʻi ai ha ngaahi maʻuʻanga tokoni ʻoku lava ke nau maʻu.”

ʻE lava ke maʻu ha ngaahi fakamatala ʻe laungeau fekauʻaki mo e ngaahi ngāue tatau, ʻo kau ai ʻa e ngaahi kaveinga hangē ko hono puke ʻo e polokalama satelaité, faʻu mo tauhi ha ngaahi lekooti fakakomipiuta pea mo hono fakaʻaongaʻi ʻa e polokalama ʻinitaneti ki hono fakaongoongoleleiʻi e faifekaú (missionary online recommendation) ʻi he ngaahi fonua ko ia kuo fokotuʻu ai ʻa e polokalama ko ʻení. ʻE lava foki ke nau maʻu ʻa e tatau PDF ʻo e ngaahi tohi mo e fakamatala fekauʻaki mo e ngaahi fakamafolá mei he tuʻasila ʻInitanetí ni pea pehē ki ha fakamatala fakalukufua ʻo e ngaahi fatongia ʻoku fakahoko ʻe he mataotao fakatekinolosiá.

ʻE hounga ha ngaahi fakamatala ʻe ʻomi ʻe he kau mataotao fakatekinolosiá ki he tuʻasila ʻInitaneti ko ʻení. Naʻe pehē ʻe Misa Pusei, “ʻOku mau fie ʻilo ki he ngaahi meʻa ʻoku fakakaukau ki ai ʻa e kakaí.”

ʻOku lava ke maʻu ʻa e tuʻasila ko ʻení ʻi he lea faka-Pilitāniá mo faka-Sipeiní pea ʻoku lolotonga liliu ia ki he lea faka-Siamane, Siapani, Potukali mo faka-Lūsia. ʻE lava ke hū ki he tuʻasilá ni ʻi he staketech.lds.org.