Fakakaungāmeʻá
ʻAʻeva Angatonu
ʻOKU LOTU ʻA E FĀNAU KOTOA PĒ ʻI MĀMANI, HIVAʻAKI E NGAAHI HIVA PALAIMELÍ, MO AKO KI HE ONGOONGOLELEÍ—ʻO HANGĒ PĒ KO KIMOUTOLÚ! ʻI HE MĀHINA NÍ TE TAU FEʻILOAKI AI MO SIUTI PEA MO KULISITOFĀ SELENI MEI KALAISI ʻI ʻĪTALI.
ʻOku ʻi ai ha taua ʻi ʻĪtali ʻoku tuʻu ʻo kiʻi malele ki he tafaʻakí. Naʻe faʻa pehē ʻe he kakaí naʻe ʻuhinga pē ʻa e tangata langa ko ʻeni ʻi he senituli 12 ke tuʻu pehē ʻa e tauá, ka kuo ʻilo ʻeni ʻe he kau saienisí naʻe palaní ke tuʻu hangatonu ki ʻolunga. Naʻe ʻohovale pē kuo ngaue ʻa e kelekele ia ʻi lalo he Taua Malele ʻo Pisá pea haʻu leva e vai ʻo tānaki ʻi he lalo fakavaʻé, pea ʻoku ʻalu hake ʻa e māʻolunga ʻo e vaí mo holo hifo ʻo fakatatau pē mo e faʻahitaʻú. Naʻe taʻu ʻe 200 ʻa e feinga ʻa e kau tangata langá ke fokotuʻu hangatonu ʻa e tauá, ka naʻe ʻikai lava ʻeni tupu mei ha meʻa pē ʻe taha: naʻe ngaue fakataha pē ʻa e fakavaʻé ia mo e ngaue ʻa e kelekelé.
ʻI he kolo ko Kalasi ʻa ia ʻoku mamaʻo siʻi pē mei Pisa, ʻoku ʻikai tuʻu ai ʻa Siuti mo Kulisitofā Seleni ia ʻo e Kolo ko Pisá ʻi ha kelekele ʻoku ngaungaue. Kuó na langa ha fakavaʻe mālohi ʻoku fakavaʻe ʻi he ongoongoleleí, ʻi heʻena feʻofoʻofaní pea mo ʻena ʻofa ki hona fāmilí.
Ngaahi Meʻa ʻOkú Na Manako Aí
Siuti, taʻu 11
Meʻakaí: fuamelie
Lēsoni he akó: hisitōlia
ʻEkitivitī fakafāmilí; vaʻinga fakatahá
Sipotí: volipolo
Feituʻu ʻoku fie ʻaʻahi ki aí: ko e temipalé
Kulisitofā, taʻu 8
Meʻakaí: kelato (gelato, ko e ʻaisi kilimi faka-ʻĪtali)
Lēsoni he akó: lēsoni kau ki he ngaahi tohi kuo pulusí
ʻEkitivitī fakafāmilí; vaʻinga vitiō mo e Tangataʻeikí
Sipotí: soka
Feituʻu ʻoku fie ʻaʻahi ki aí: ko tahi
Taimi Te Na Lalahi Aí
ʻOku fie maʻu ʻe Siuti ke ne hoko ko ha taʻahine faiva heleʻuhila pe taʻahine hiva.
ʻOku fie maʻu ʻe Kulisitofā ke heka paiki mo vaʻinga soka.
Ko e Mālohi ʻo e Ngāue Tokoní
Ko e meʻa ʻe taha ʻokú ne ʻai ke kei mālohi ai ʻa e fāmili Selení ʻi he Ongoongoleleí ko ʻenau fuakava ʻo e papitaisó. Ne toki papitaisó ni pē mo hilifakinima ʻa Kulisitofā, peá ne pehē ko e meʻa naʻá ne ʻai ke makehe ai ʻení “ko e taimi naʻe hiva fakataha ai ʻa ʻeku tangataʻeikí mo hano kaungāmeʻa.”
ʻOku ngāue ʻa Kulisitofā mo Siuti he taimí ni ke tauhi maʻu pē ʻena ngaahi fuakava ʻi he papitaisó mo fai ʻa e meʻa ʻoku fie maʻu ʻe Sīsū Kalaisi ke na faí. ʻOku pehē ʻe Kulisitofā, “Ko ʻene mamahi pē hoku ngaahi kaumeʻá, ʻoku ou feinga leva ke tokoniʻi kinautolu.” ʻOku saiʻia foki mo Siuti ke tokoni: “ʻOku ou tokoni ʻi ʻapi. ʻOku ou tokoni kia Kulisitofā ʻi heʻene akó, pea ʻoku ou tokoni ki hono ngaahi kaumeʻá.”
ʻOku tānaki mai ki ai ʻe he tangataʻeikí, “ʻOkú na loto fiemālie pē ʻi he taimi ʻoku kole ange ai ke na teuteuʻi e tēpilé pe fufulu ipu he ʻosi ʻa e kaí. ʻOkú na tokoni loto tauʻatāina.”
Ko ha Faʻifaʻitakiʻanga Mālohi
ʻOku ʻikai ke tokolahi ha kāingalotu ʻo e Siasí ʻi Kalasi ka ʻoku ʻikai ko ha palopalema ia kia Siuti. ʻOku kei tuʻu taʻeueʻia pē hono fakavaʻe ʻi he ongoongoleleí. ʻOkú ne pehē, “Kuo fehuʻi mai ʻe ha niʻihi ʻo hoku ngaahi kaungāmeʻá kau ki he Siasí. Ne u ʻomi haku kaumeʻa ki he lotú, naʻe haʻu pea naʻá ne saiʻia ai. Naʻe ʻi ai e taimi ʻe niʻihi ne fakakataʻaki au ʻe hoku ngaahi kaungāmeʻá, pe fanongo ha taha he kalasí ʻoku ou kau ki ha siasi kehe. Ka ko e taimi lahi naʻe mahino pē ʻeni ki ha tokolahi ʻo hoku ngaahi kaungāmeʻá, pea naʻa nau fai mai ha ngaahi fehuʻi.”
Ngaahi Fakakaukau ʻa e Tangataʻeikí
“ʻOku tokanga ʻaupito ʻa Siuti ʻo hangē ha faʻeé pea ʻokú ne fuʻu tokoni lahi mo feinga ke fakapapauʻi ʻoku fai e tokanga ki he niʻihi kehé. ʻOku ʻofa mo angalelei ʻa Kulisitofā. ʻOkú na fiefia ʻi heʻena fakatahá. Ko e moʻoni ʻoku ʻi ai pē fanga kiʻi fakakikihi fakafāmili ʻoku hoko ʻi he vahaʻa ʻo e tuongaʻané mo e tuofefiné, ka ʻokú na fiefia pea ko e meʻa ia ʻoku mahuʻingá.”
Fakavaʻe Fakalaumālié
ʻOku fakamālohia e fakavaʻe fakalaumālie ʻo e fānaú ʻi heʻena ō ki he Palaimelí. ʻOku manako ʻa Siuti ke lau ha potufolofola mei he tuʻunga malangá, pea ʻokú na fakatou saiʻia hono hivaʻi e ʻū hivá. Ko e foʻi hiva ʻoku manako taha ai ʻa Kulisitofaá ko e “Fānau Au ʻa e ʻOtuá” 1 ʻOku kei hokohoko atu pē ʻi honau ʻapí ʻa e ngaahi ongoʻi lelei ko ia naʻá na maʻu ʻi he lotú. ʻOku pehē ʻe Kulisitofā, “ʻOku ou ongoʻi e Laumālié he lolotonga ʻemau lotu fakafāmilí” pea pehē pē mo e lau ʻa Siutí.
ʻOku lolotonga ngāue ʻa e kau saienisí he ʻahó ni ki he Taua Malelé ke toe fefeka ange ʻene tuʻú. ʻOku nau pehē tokua ʻe lelei ʻeni ki ha toe taʻu kehe ʻe 300 nai. Kae monūʻia pē naʻe langa ʻe Siuti mo Kulisitofā ʻena moʻuí ʻi ha fakavaʻe ʻoku mālohi, ko ha fakavaʻe te ne poupouʻi kinaua ke na aʻu ki ʻitāniti.