Faka‘atā ‘e he Faingamālie Fo‘oú ke Tokolahi Ange ‘a e Kāingalotu ‘e Ngāué
Naʻe fiefia ʻa Telemā Teila ʻi hono fatongia ʻi he senitā hisitōlia fakafāmili fakalotofonua ko ia ʻi Mesa ʻi ʻAlesona ʻi ʻAmeliká. Naʻá ne tokoniʻi, fakahinohinoʻi pea poupouʻi ha kakai tangata mo fefine ʻi ha taʻu ʻe 17 ʻi heʻenau fekumi ko ia ke ʻiloʻi ʻa ʻenau ngaahi kuí. Ka naʻe hoko ʻa ʻene hiki ki Kulisi ʻi ʻAlesoná, ʻi he taʻu 2005 ke mamaʻo ʻaki ha maile ʻe 40 (64 km) mei he senitā hisitōlia fakafāmili ne ʻi ai e kau pataloni naʻá ne faivelenga ʻi hono tokoniʻí.
Koeʻuhí naʻá ne meimei kui pea ʻikai lava ʻo fakaʻulí, ne manavasiʻi ʻa e fefine taʻu 83 ko ʻení ʻe ʻikai lava ʻo fefonongaʻaki ki Mesa pea ʻe ngata ai ʻa ʻene ngāue ki he hisitōlia fakafāmilí. Ka naʻe ʻi ai ha taki angaʻofa naʻá ne ʻomi ha vetekiʻanga ʻo e palopalemá ni ʻo fakafou ʻi ha ngāue fakafaifekau tokoni ʻa Sisitā Teila maʻá e Siasí, ʻo ngāue pē mei hono ʻapí. Talu mei he 2006 mo ʻene ngāue ko ha faifekau FamilySearch Support maʻá e Siasí, ʻo fakaʻaongaʻi pē ʻa ʻene komipiuta ʻi ʻapí ke tokoniʻi ʻa e kakaí ʻi hono fakahoko ʻenau ngāue hisitōlia fakafāmilí.
ʻOkú ne fakamatala ki he meʻa naʻe hoko ki ai ʻo pehē, “Kuó ne tāpuekina au ʻo laka ʻi he ngaahi tāpuaki kuó u malava ʻo laú. Kuó u tupulekina lahi ʻi he tafaʻaki ko ia ʻo e hisitōlia fakafāmilí pea mo e meʻa ʻoku ou malava ke fakahokó.”
ʻOku ʻOmi ʻe he Maʻuʻanga Tokoni Foʻoú ha Ngaahi Fiemaʻu Foʻou
ʻI he kamata ko ia ke sivisiviʻi ʻe he Siasí ʻa e Uepisaiti FamilySearch.org foʻoú, ʻi ha ngaahi lea fakafonua ʻe valu, ʻe lahi ange ai hono fiemaʻu ha kau ngāue fakafaifekau tokoni ʻa e Siasí ʻo hangē ko Sisitā Teilá ke tokoni ki he kau pataloní ʻi hono fakaʻaongaʻi ʻo e ngaahi meʻangāue hisitōlia fakafāmilí ke kumi ʻaki ʻenau ngaahi kuí.
Ko e FamilySearch, ʻa e maʻuʻanga tokoni fakatohihohoko ʻa e Siasí ʻi he ʻInitanetí, ʻoku faʻufaʻu ia mo ha ngaahi nāunau ʻi he lea faka-Siainá, Pilitānia, Falanisē, Siamane, Siapani, Kōlea, Potukali mo e faka-Sipeiní. Naʻe ʻuhinga hono faʻu ʻo e uepisatí ni ke tokoni ke taʻofi hono fakahoko tuʻo ua ʻo e ngaahi ouau fakatemipalé. ʻE hokohoko atu ai pē ʻa hono fiemaʻu ko ia ʻo e kau faifekau ngāue tokoni ʻa e Siasí he funga māmaní, kae tautautefito ki he ngaahi lea fakafonua ko ʻení mo ha ngaahi lea fakafonua kehe ʻamuiange ʻi he malava ko ia ke nau maʻu ʻa e FamilySearchfoʻoú he funga māmaní.
Naʻe pehē ʻe ʻAti Sionisoni ko e pule fakaʻēlia ʻo e FamilySearch Support, “ʻOku nau maʻu ʻa e faingamālie ke ʻunuaki ki muʻa ʻa e ngāue ʻa e ʻEikí ʻi heʻenau fengāueʻaki mo e kau pataloní.”
Ko Hono Ngāueʻaki ʻa e Tekinolosia Foʻoú ke Tokoní
ʻI hono ngāueʻaki ʻo e Uepisati ʻoku fakaʻaongaʻi ai e polokalama telefoní, ʻe lava ʻe he kau faifekaú, ʻa ia ʻoku lava ke maʻu kinautolu ʻi ha faʻahinga feituʻu pē ʻi māmani kehe pē ke nau maʻu ʻa e ʻinitanetí ʻi he broadband, ʻo tali ha ngaahi fehuʻi ʻe 10,000 he māhina. ʻE lava ke kau ʻa e ngaahi fehuʻi ʻa e kau pataloní ha ngaahi tefito kehekehe, ʻo kau ai ʻa e fakatotolo hisitōlia fakafāmilí, fakahokohoko fakamotuʻaleá mo hono fakahū atu ʻo e ngaahi hingoá ki he temipalé.
Neongo ʻoku ʻikai sai ʻa ʻene sió, ka ʻoku lava pē ʻe Sisistā Teila—ʻa ia ʻoku ne lolotonga tokoniʻi ha kaungā ngāue fakafaifekau ʻe toko ono, ʻo ʻai ke ʻasi matalalahi ʻa e mataʻitohí ʻi heʻene komipiutá ke ne lava ʻo lau ʻa e ʻī-meili ʻa e kau pataloní mo tali ʻenau ngaahi fehuʻí.
ʻOku akoʻi lahi ʻa e kau ngāue fakafaifekau tokoní ʻo fakafou ʻi he ʻInitanetí ke nau lava ʻo fakahoko pē ʻi ʻapi. ʻOku ʻikai fiemaʻu ia ke lea faka-Pilitānia ʻa e kau faifekau ngāue tokoní, ka te nau ngāue pē ʻi heʻenau lea fakafonuá mo ʻenau kau ngāue fakalotofonuá ʻa ia te nau tokoni ke tali e ngaahi fehuʻí mo fakahoko ha ako fakatāutaha mo ha tokoni. Ko ʻene ʻosi pē ʻenau akó, ʻe lava ke nau hū leva ki he maʻuʻanga fakamatalá (database) ʻa ia ʻoku kau ai ha ngaahi fakamatala ʻe 4,000 ʻe lava ke maʻu mei ai ha tali ki he ngaahi fehuʻi ʻa e kau pataloní.
Naʻe toki ako pē ʻa Sisitā Teila ia ki hono ngāueʻaki ʻo e komipiutá ʻi hono taʻu 66, ka ʻokú ne pehē ko ha taukei lelei mo ʻaonga ʻaupito. Naʻá ne pehē, “ʻOku ʻikai tokanga ha taha pe ko e hā ho taʻu motuʻá. ʻOku ʻikai ke ke motuʻa ko e ke ako ki hono ngāueʻaki ʻo ha komipiutá.”
Ko Hai ʻe Lava ʻo Ngāué pea ʻe Anga Fēfē
ʻOku ʻikai ʻuhinga ʻa e ngāue fakafaifekau tokoni ʻi he FamilySearch Support ʻi he Siasí ke ne fetongi ʻa e ngāue fakafaifekau taimi kakató, ka ʻokú ne ʻoatu ha toe fili ʻe taha maʻanautolu koia ʻoku ʻikai lava ke nau ngāue fakafaifekau taimi kakató.
Naʻe pehē ʻe Sisitā Teila, “Ko ha tuʻunga lelei moʻoni ʻeni kiate au he koeʻuhí ʻoku lava ke hokohoko atu ʻeku akó mo e tokoní.” Naʻá ne pehē kuo tokoni ʻa ʻene ngāue fakafaifekau tokoni ʻi he Siasí ke ne ongoʻi ʻoku ʻi ai hano ʻaonga ʻi he faʻahinga taʻu ko ia ʻoku fakangatangata ai ʻa e ngaahi meʻa te ne lava ke fili ki aí.
ʻOku fakanofo foki ʻa e kau ngāue fakafaifekau tokoní pea nau tui ha pine hingoa ʻo hangē pē ko e kau faifekau taimi kakató. ʻOku akoʻi lahi kinautolu ʻi hono fakaʻaongaʻi ʻo e Uepisaití mo ako ʻa e ngaahi founga lelei taha ki hono tali ʻo e ngaahi fehuʻi ʻa e kau pataloní. ʻOku ngāue ʻa e kau faifekau ngāue tokoni ʻa e FamilySearch Support ʻi ha houa ʻe 15 ki he 30 ʻi he uike ʻo aʻu ki ha māhina ʻe 6 ki he 30 pea lava ke nau ngāue fakafaifekau ʻi he vahaʻa taimi ko ʻení mei honau ʻapí.
ʻOku lolotonga ʻi ai ha kau faifekau tokoni ʻe toko 700 ʻoku nau lolotonga tokoni ʻi he tafaʻakí ni, pea mahalo naʻa fiemaʻu ke liunga ua ʻa e fika ko ʻení ʻi he taʻu ka hoko maí ʻi he lahi ange ʻa e ngaahi feituʻu te nau lava ʻo maʻu ʻa e FamilySearch foʻoú. ʻOku totonu ke fetuʻutaki ʻa e kakai tangata mo fafine ʻoku nau fie hoko ko e kau faifekau ngāue tokoni ʻa e Siasí ki heʻenau pīsopé pe palesiteni fakakoló. Ke maʻu ha fakamatala lahi ange fekauʻaki mo e ngaahi faingamālie ʻi he FamilySearch Support, ʻī-meili ki he support@familysearch.org pe ʻaʻahi ki he contact.familysearch.org/ en.htm ke maʻu ʻa e ngaahi fika telefoni fakalotofonuá.
Ko ha Tāpuaki ki he Kau Faifekaú mo e Kau Pataloní
Kuo tāpuekina ʻa e moʻui ʻa ha kāingalotu tokolahi, kakai matuʻotuʻa mo kei talavou ʻe he faingamālie ko ia ke ngāue ko ha kau faifekau tokoní, ʻoku talamai ʻe honau kau takí, ʻe ongoʻi ʻe he ngaahi laumālie toko lahi ʻa e ola ʻo ʻenau ngāué.
Naʻe pehē ʻe Misa Sionisoni, “Ko e laumālie ko ia ʻo e fakatapuí [ʻa ia ʻoku ʻomi ʻe he kau ngāue fakafaifekau tokoni maʻá e Siasí] ʻoku nau ʻomi ki honau uiuiʻí, ʻoku mau lava ai ke vakai moʻoni ki ha ngaahi mana ʻi he tupulaki mo e tupu ko ia ʻa e ngāué.”
ʻOku fakalata ʻa e ngāué pea fakamāfana. Naʻe pehē ʻe Sisitā Teila, “ʻOku maʻu koe ʻe he laumālie ʻo e ngāué ni pea ʻikai ke ne toe tukuange koe. Neongo pe ko e hā ho taʻu motuʻá, ʻe lava pē ke ke hoko ko ha tokoni moʻoni ʻi hoʻo hoko ko ha faifekau ngāue tokoni FamilySearch Support.”
Naʻe pehē ʻe Misa Sionisoni ko e tokoni ko ia ʻoku fakahoko ʻe he kau faifekau ngāue tokoní ʻoku mahuʻinga ia ki he ola lelei ʻa e FamilySearch foʻoú. ʻE lava ke hoko ha tali ki ha pataloni ʻo tokoniʻi ha taha ke kumi ʻa ʻene ngaahi kuí pea fakakakato ʻa ʻenau ngāue fakatemipalé, ko ha ngāue matuʻaki mahuʻinga mo toputapu ia.
Naʻe pehē ʻe Misa Sionisoni, “ʻE lava ke tau fakaʻatā ke maʻu ʻe hotau ngaahi tokoua mo tuofāfine kuo pekiá ʻa e ngaahi tāpuaki mo e ngaahi ouau ko ia ʻo e ongoongoleleí ʻoku tau fiefia ai ʻo fakafou ʻi heʻetau ngāué.”