Se a Se Mea Lelei Silisili Tatou Te Iloa: O Uo Faapei o Keriso
Ua silafia e le Atua manaoga o Lana fanau, ma e masani lava ona galue o Ia e ala ia i tatou, i le musuia o i tatou ina ia fesoasoani atu le tasi i le tasi.
O ni nai vaiaso talu ai, na ma auai atu ai ma lo’u toalua i se sauniga i le malumalu. A o ma ulufale atu, sa faafeiloai i ma’ua e se tagata faigaluega o le malumalu, o se uo pele mai le matou uarota. O lena faafeiloaiga na amataina ai se aafiaga matagofie mo i ma’ua. Nai lo se isi lava taimi ou te manatuaina, sa matou feiloai ma sa toatele tagata ma te iloaina sa fesoasoani mai: o uo mai uarota sa ma i ai muamua, o uo mai le nuu, o alii ma tamaitai sa matou galulue faatasi i tofiga eseese. O le tagata mulimuli sa ma feiloai o se tamaitai talavou ou te le’i iloaina. Sa lalelei o ia, ma ina ua amata ona tautala mai, sa vave lava ona ou toe manatuaina [o ia]: o Robin, o se tasi o tamaitai talavou i la’u vasega o le Lora i le taimi muamua na avea ai au ma se peresitene o Tamaitai Talavou. A o ma talanoa ma fefaasoaai i mea na manatua mai taimi ua mavae ma aafiaga o le olaga, sa ia ta’u mai ia te au le taua tele o na vaitaimi ia te ia. Sa faapena foi o’u lagona.
Sa ou tuua le malumalu ma le lagona ootia i le tele o le agalelei, ma le iloa lelei o le taua o a’u uo i lo’u olaga atoa. O loo pa’i mai pea le Alii i lo’u agaga i lea taimi ma lea taimi, ma o le tele lava o na taimi, e oo mai ai Lana pa’i i lima o se uo.
O le masina lenei e atoa i ai le tolusefulu valu tausaga ua mavae, sa ma asiasi atu ai ma Dean, i New Mexico, e asi lo’u tama, o le taimi lena e le’i leva ona ma faaipoipo. A o ma i ai iina, na ave ai ma’ua e lo’u tama i se malaga i le ao agai atu i mauga i le itu i matu o le setete. I le aoauli, sa matou tau atu ai i se taavale o tu i tafatafa o le auala ua pa le pau. Sa ta’u mai e le avetaavale i lo’u tama, e pa foi lana sipea, ma e fia tietie atu i le taulaga lata mai e fai ai le pa’u. Sa fai atu lotama, ina ua ia vaaia o loo i ai le aiga o le alii i totonu o le taavale, “E le mafai ona e alu i le taulaga ma toe foi mai a o le’i po. Ae vaai, e tutusa le tetele o uili o a ta pa’u. Ave la’u sipea, ae o le isi taimi e te ui mai ai i Albuquerque, ia toe faafoi mai la’u pa’u.”
Sa faapea mai le tagata ese, i lona te’i i le ofo na tuuina atu, “Ae e te le masani ia te au.”
O le tali a Tama, ua masani ai lava o ia, “O oe o se alii faamaoni a ea? O le a e toe faafoi mai le pa’u.”
O ni vaiaso mulimuli ane, sa ou fesili ai i lo’u tama e uiga i le sipea. Fai mai o ia, ua uma ona toe faafoi mai.
O le taimi nei, ua 90 tausaga o lo’u tama, ae o loo ia faia lava lena mea. O le toatele lava o tagata latou te tupulaga, e mauaina a latou taumafataga mai le meals-on-wheels [taavale meaai], ae o lo’u tama na te tilivaina mea taumafa mo “tagata matutua.” E masani ona nofonofo o ia i tafatafa o moega o ana uo e mama’i pe ua lata ona maliliu. E alu atu o ia ma lana ili afi e fesoasoani ai i le kalapu Roteri i a latou taumafaiga faaletausaga e faamatagofie le alalafaga. Pe a ou manatunatu i le olaga ma gaoioiga a Tama, ou te manatuaina ai faaupuga a Peresitene Boyd K. Packer: e “malosi o ia i le talalelei.” (“O Tausaga o le Matua,” Liahona, Me 2003, 82). O lona soifuaga, e pei ona faamanatu mai e le viiga, na pa’i atu mo le lelei o tagata, ma o le pa’i atu, e faatamaoaigaina ai [tagata] uma. (tagai “E Latou te Fai Mea Lelei,” Viiga, nu. 134). E malamalama lo’u tama i le uiga o faauoga.
I le avea ai ma se Au Peresitene o le Aualofa, matou te faalogoina ai i nisi taimi o faapea mai tamaitai, latou te le lagonaina le alofa o le Alii. Ae atonu o le a sili atu ona latou lagonaina Lona alofa, pe a latou vaavaai mo Lona aao i gaoioiga a i latou o e alolofa ia i latou. Atonu o se tagata o le latou paranesi po o le uarota, o se tuaoi, po o se tagata ese foi, e faamanuiaina i latou ma faailoa atu le alofa o Keriso. Ua aoaoina i tatou e Elder Henry B. Eyring: “Ua valaauina oe e fai ma sui o le Faaola. E avea oe ma sui o le Alii pe a e molimau atu, e avea ou lima ma Ona aao” (“Tulai i Lou Valaauga,” Liahona, Nov. 2002, 76). Afai e mafai ona tatou siitia isi i le suafa o Keriso, o le mea moni, e mafai foi ona siitia i tatou.
O se faiaoga o aiga ou te masani ai, sa faia ma le faamaoni ana asiasiga faalemasina i se tina matua ua oti lana tane. Ae peitai, e le na ona asiasi atu, o tautoulu uma lava na te tapenaina ai lana masini ea malulu ina ia gafatia le tau malulu ma siaki le faamama o lana ogaumu faamafanafana. Pe o le alofa ea lena o le Atua po o le alofa lava o le faiaoga o aiga ia? O le tali, e moni lava o [alofa] uma na.
Se a se mea e silisili,
Nai lo uo e amio pei o le Alii
O mea lelei latou te fai,
Matou te uunaia ai.
(Viiga, nu. 134)
Ua faamanuiaina a’u i lo’u olaga atoa i ni uo faapei o Keriso—mai a’u uo ao ou talavou i le toatele o tagata o e ua faamanuiaina lo’u aiga i uarota uma sa matou nonofo ai. O lo latou faatuatua ma le talitonu i le Talalelei a Iesu Keriso, o a latou auaunaga, o a latou aoaoga poto ma le malu, ua faatamaoaigaina ai o matou olaga. E matuai eseese lava i matou ma nisi o a’u uo. [E i ai mea] matou te le malilie faatasi i ai, ma e faaita foi e le tasi le isi. Peitai o faauoga e avanoa ai mo eseesega—o le mea moni, e taliaina eseesega. Ou te fiafia e asiasi atu i siteki e i ai ni ituaiga tagata e eseese mea e tupuga mai ai, matutua, ma atunuu.
O loo ou lagonaina i le taimi nei se sootaga faapitoa o le usoga ma le faauoga a o matou galulue ai ma Uso Parkin ma Pingree, faapea ma isi tamaitai i le au peresitene ma pulega o ausilali. O i latou nei o ni tamaitai lelei. Ou te alofa tele ia i latou. I le tuanai ai o tausaga e tolu o matou faatasi, ua matuai iloa lelei lava a’u e ou uso pele o le au peresitene. Latou te silafia lo’u faatuatua ma la’u molimau, ae latou te silafia foi lo’u le mautonu ma o’u popolega. Latou te silafia, a ou vaivai mai se malaga umi i se aoaoga, ua ou faalēlelei foi. Ae ou te lagonaina lo latou alolofa ma le onosai, ma ou te iloa, latou te mafaufau pea i mea lelei e uiga ia te au. O a latou molimau ma talosaga e faamalosia ai au. O a latou tōēga e mālie ai lou aso. I soo se uiga lava, o i matou o uso.
E faapena foi ni o’u aafiaga ma lo’u lava aiga. Sa tauivi se tasi o o’u uso laiti ma le kanesa i masina ua mavae. Matou te le nonofo felatai, ae o le telefoni e latalata mai ai o ia. Ma te fetufaai i le alofa, tatalo, manatua o mea na tutupu, ma molimau ootia ao i ai o ia i lenei mafatiaga faigata. O o’u uso o ni uo faapelepeleina. E faapena foi i o’u tuagane, o lo’u toalua pele, o la’u fanau, ma fanau a la’u fanau (e tusa lava pe o le a le pisapisao o le fanau a lau fanau).
I uluai tausaga o le Toefuataiga, sa potopoto faatasi ai tagata fou o le ekalesia e fausia Siona. O Siona sa avea o se nofoaga ma se faamoemoega—o le agaga. Ua tatou le toe potopoto nei i lena faiga. O a tatou paranesi ma uarota o o tatou Siona ia. Ae pau le taimi latou te tauaveina ai le agaga o Siona, pe a tausia e le tasi le isi. O le mea e faanoanoa ai, o nisi taimi tatou te faalogo ai i ni tamaitai ma alii sa latou lagonaina le loto tiga ma le faaesea e isi tagata o le Ekalesia. Afai o loo e i ai, po o fea lava le itu o lenei faafitauli—o le tagata e sese po o le tagata foi ua faamanualia—ia saili le faamagaloga; ia malamalama po o le a lau vaega i le faafitauli. Manatua le apoapoaiga a Keriso ia i tatou: “Ou te fai atu ia te outou, ia tasi; afai e le tasi outou, e le a a’u outou” (MFF 38:27).
Sa ou maua se avanoa talu ai nei e talanoa ai i se tamaitai sa fesili mai ia te au e uiga ia Iosefa Samita. Sa manino lava lona masalosalo e uiga i lona valaauga ma lana misiona. A o ou tautala atu ia te ia, na oo mai ia te au le fetalaiga a le Alii ia Oliva Kaotui: “Lagolago ma le faamaoni i la’u auauna o Iosefa” (MFF 6:18). Ou te faamoemoe i lena aso, ma taimi uma o lou olaga, ia mafai ona taua e uiga ia te au, “Sa lagolago atu o ia ia Iosefa.” E fia avea au ma ana uo.
O Iosefa Samita lava ia o se uo maoae i le toatele [o tagata]. Sa ia faapea mai, “O faauoga o se tasi o mataupu faavae sili ona taua o le ‘FaaMamona;’ [ua fuafuaina] e suia ma faaalualuina ai i luma le lalolagi, ma faamuta ai taua ma fevaevaeaiga ae avea ai tagata ma uo ma uso” (History of the Church, 5:517).
Ae peitai, sa ia silafiaina o faauoga e sili atu nai lo se manatu. Sa ia iloaina, i se tasi aso na susunuina ai le fale o se tasi o uso e le fili. Ina ua faapea ane tagata o le ekalesia, ua latou misi alofa lava mo ia, na aumai e le Perofeta se tupe mai lana taga ma faapea mai, “Ou te alofa i lenei uso i le aofaiga e lima tala. O le a le tele … o lou alofa [mo ia]?” (i le Hyrum L. Andrus ma Helen Mae Andrus, comps., They Knew the Prophet, [1974], 150).
Pe tatou te manatu i faauoga e pei ona manatu ai le Perofeta o Iosefa? Pe tatou te liliuina o tatou lagona lelei i ni fesoasoaniga faatino? Ua silafia e le Atua manaoga o Lana fanau, ma e masani lava ona galue o Ia, e ala ia i tatou, i le musuia o i tatou ina ia fesoasoani atu le tasi i le tasi. A tatou galulue i na uunaiga, ua tatou tutu i laueleele paia, ona ua mafai ona tatou maua le avanoa e avea ai o se tufugaaao o le Atua i le taliina o se tatalo.
Uso e ma tuagane, afai o i tatou o uo a le Perofeta o Iosefa, o i tatou foi o ni uo a le Faaola. Pe o tatou ola ea i ni olaga e ta’u atu ai “le naunau i le suafa o le Faaola”? (tagai Viiga, nu. 134). Sa faia e Iosefa Samita, ma o le tausaga lenei, a o tatou faamamaluina le tagata na folasia mai le tisipenisione o le atoaga o taimi, e le gata ina tatau ona tatou manatuaina lana faauoga i tagata soifua, ae faapea foi i lana faauoga ma le faamaoni i le Alii. Na saunoa le Perofeta: “O le a ou taumafai ina ia ou fiafia i lo’u taunuuga, i le iloaina o le Atua o la’u uo. O Ia o le a ou maua ai le mafanafana” (The Personal Writings of Joseph Smith, tuufaatasia e Dean C. Jessee [1984], 239; faatulagaina le sipelaina ma le faasaosaoina).
E tatau ona manino ia i tatou taitoatasi, o le tatou faauoga sili e tatau ona faia ma lo tatou Tama Faalelagi ma Lona Alo, o Iesu Keriso. Ua fetalai mai ma le alofa le Faaola ia i tatou, “O le a ou ta’ua outou o a’u uo, aua o a’u uo outou” (MFF 93:45). O Lona finagalo sili mo i tatou, o Ona uso ma tuafafine, o le toe aveina atu lea o i tatou i lo tatou Tama. Ma o le auala mo i tatou e manino lava: ua atiina ae i o tatou olaga, i le mea tatou te mafaia, o uiga ma aga a Keriso. Usitai i Ana poloaiga ma fai Lana galuega ma Lona finagalo.
Pe a ou toe mafaufau i le aso na faafeiloai ai au i totonu o le malumalu e le toatele o i latou ou te alofa i ai, ou te manao lava ia faapena foi ona faamanuiaina o tatou olaga i aso taitasi. Sa ou lagonaina se alofa na foliga o se faailoga o le alofa mama o Keriso—o le alofa lea e tatau ona faatumulia ai o tatou loto. Ou te mafaufau i uarota ma paranesi lea e tutu faatasi ai uo o soo se matutua ma atunuu e malaga mai ai, ma faataitai o latou olaga i aoaoga a Iesu Keriso.
Ou te molimau atu ia te outou i le aso, o loo soifua Keriso. Ou te faafetai mo Ia. Ou te tatalo ina ia avea pea au ma Ana uo, ma i le faia o lena mea, e avea ai foi au ma a outou uo. I le suafa o Iesu Keriso, amene.