Upumoni Tumau mo Taimi Fesuisuiai
O i tatou o tagata o le Ekalesia a Iesu Keriso o le Au Paia o Aso e Gata Ai, e tatau ona tatou faafetaia’ia ma le lototetele ia mea matautia o loo siomia ai i tatou ma o tatou aiga.
Ou uso e, ma tuafafine pele, o [e] o mafai ona ou vaai atu i ai, ma e o faapotopoto i le lalolagi atoa, ou te talosagaina a outou tatalo ma lo outou faatuatua ao ou faataunuuina lo’u tofiga ma le avanoa e lauga atu ai.
E muamua ona ou faamalo atu ia te outou uma. I lenei lalolagi o faigata, o le autalavou aupito sili lenei a le Ekalesia nai lo se isi lava taimi. O le faatuatua, o auaunaga ma faatinoga a o tatou tagata o le Ekalesia ua viia. O i tatou o ni tagata tatalo ma tumu i le faatuatua, o loo taumafai pea ina ia faamaoni ma amio lelei. Tatou te fetausiai. Tatou te taumafai e faaali atu le alofa i o tatou tuaoi.
Ae peitai, ina nei o tatou faapea ua lava lea, o lea ou te sii mai ai ni upu mai le 2 Nifae i le Tusi a Mamona.
“I lea aso [e]… . faamoe ai i latou [e le tiapolo] i le filemu i la le tino, latou te fai mai: Ua lelei mea uma i Siona; e moni, ua manuia Siona, ua lelei mea uma—e faapena ona olegia e le tiapolo o latou agaga.”1
Fai mai se tasi tagata, o la tatou laau o le faamalieina, e tele ona lala e fotu mai ai fuga fou i tautotogo uma.
E le tatau ona tatou faapea ua faamalieina i tatou. Ua tatou ola i aso faigata; ua siomia i tatou i faailoga. Ua tatou iloa lelei lava aafiaga le lelei i lo tatou lalolagi, ua faapea ona faia [ma le faamoemoe e faaleagaina ai] tu ma aga faaleaiga. E i ai taimi e faaali mai ai e televise ma tifaga ia tama ma teine autu faalelalolagi ma le mataga, ma taumafai e faailoa mai o ni faataitaiga lelei [i latou], o nisi alii ma tamaitai i ata tifaga o o latou olaga o le faafeagai o se faataitaiga lelei. Aisea o le a tatou mulimuli ai i se taitai tauaso? Ua leoleoā le faasalalauina e leitio o le tele o musika le lelei ma upu e le afeiina, o valaaulia matautia, ma le faamatalaina e toetoe lava o soo se ituaiga o mea leaga e mafai ona e mafaufauina.
O i tatou o tagata o le Ekalesia a Iesu Keriso o le Au Paia o Aso e Gata Ai, e tatau ona tatou faafetaia’ia ma le lototetele ia mea matautia o loo siomia ai i tatou ma o tatou aiga. Ina ia fesoasoani ia i tatou i lenei faamoemoega, ou te tuuina atu ai ni nai fautuaga, faapea foi ma ni faataitaiga mai lo’u lava olaga.
Ou te amata atu i afiafi faaleaiga. E le mafai ona tatou lafoaia lenei polokalama musuia mai le lagi. E aumaia ai le tuputupu ae faaleagaga i tagata taitoatasi o le aiga, e fesoasoani ai ia te ia e faafetaia’ia faaosoosoga ia ua soo se vaipanoa o i ai. O lesona e aoaoina i totonu o le aiga, o lesona ia e sili ona umi lona aoga. E pei ona ta’u mai e Peresitene Gordon B. Hinckley ma i latou na muamua atu ia te ia: “O le aiga o le faavae lea o se olaga amiotonu, ma e leai se isi auala e mafai ona suia lona tulaga pe faataunuuina ai ana galuega taua.”2
Na tusia e Dr. Glenn J. Doman, o se tusitala lauiloa ma se pulega [o galuega] o le soifua maloloina e faapea: “O le tamaitiiti faatoa fanau mai, ua toetoe lava o se komepiuta faatoa fai, e ui lava ona o le komepiuta i lea tulaga o loo faaleleia i soo se auala… . O mea ua tuuina i le [mafaufau] o le tamaitiiti i le valu tausaga muamua o lona olaga atonu o le a i ai pea iina. Afai e te tuuina ni faamatalaga sese i lona [mafaufau] i lena taimi o lona olaga, o le a matuai faigata lava ona toe aveesea.” Sa faaopoopo mai Dr. Doman, “o le matua e sili ona maatiati ai le olaga o le tagata o le lua po o le tolu tausaga.”3
Ou te fiafia i le manatu lenei: “O lou mafaufau o se kapoti, ma o oe e te teuina ia fata.” Ia tatou mautinoa o fata o o tatou kapoti, faapea ma [kapoti] a tagata o o tatou aiga, ua teuina i mea o le a maua ai le saogalemu i o tatou agaga ma mafai ai ona tatou toe foi atu i lo tatou Tama i le Lagi. O na fata e tatau ona teuina lelei i sikolasipi o le talalelei, o le faatuatua, tatalo, alofa, auauna atu, usiusitai, faataitaiga ma le agalelei.
O le isi, ou te tautala atu i le mataupu o le aitalafu. O le vaitaimi lenei o le nono, o se vaitaimi o le tele o ofo mo kata fai aitalafu ia e taunuu mai ia tatou pusameli i vaiaso taitasi. E tele ina latou ofoina mai ni tului sili ona maualalo, lea atonu e na o sina taimi puupuu lava e faatatau i ai; ae o le mea e tele ina le iloa e se tagata, a uma lena taimi, e matuai faateleina lava ia tului. Ou te fia faasoa atu ia te outou se faamatalaga na saunia e Peresitene J. Reuben Clark, Jr., o le na avea i le tele o tausaga ua mavae ma se tasi o le Au Peresitene Sili. O lona moni e faatatau i vaitau uma o le olaga. Fai mai o ia:
“O le tulafono a lo tatou olaga faale-tamaoaiga ma mea tautupe i le lalolagi atoa, o le tupe tului e tatau ona totogiina i tupe nono… .
“O tupe tului o aitalafu e le moe lava pe ma’i foi pe oti; e le alu lava i le falemai; e galue o ia i Aso Sa ma aso malolo; e le alu lava i se malologa; e le alu e asiasi e le faimalaga foi; e le manao i se fiafiaga; e le faamaloloina lava ma le galuega pe tuliesea foi ma le galuega; e le galue lava i ni itula ua tipi faalaiti… . E te nofo aitalafu loa, ona avea loa lea o le tupe tului ma au soa i minute uma o le ao ma le po; e le mafai ona e aloese ai pe mafai foi ona e sola ese ai; e le mafai ona e aveesea; e le gauai atu i ni aioiga, poloaiga, po o ni faatonuga, ma soo se taimi lava e te faalavelave ai pe e te sopoia ai lona ala, pe e te le faia ai foi mea na te poloaiina ai oe, o le [taimi foi lena] na te solipalaina ai oe.”4
Ou uso e, ma tuafafine, ou te inoino i nisi o faasalalauga faatosina ou te vaaia ma faalogoina e fautuaina ai ni nonogatupe mo fale e laugatasia ai [tagata uma]. I se faaupuga faigofie, o se mokesi [aitalafu] lona lua lea e faaaoga le fale e faamau ai. O le faalauiloaina o na ituaiga o nonogatupe, ua fuafuaina ina ia faaosoosoina ai i tatou e nono mai ni tupe se tele ina ia mafai ona maua ai ni mea se tele. O le mea e lē taitai ta’uina mai, o le mea moni e faapea, afai e le mafai e se tasi ona totogiina lenei tupe e totogi ‘lona lua’ mo le fale, ua i ai lea tagata i le tulaga matautia o le aveesea o lona fale.
Ia aloese mai le filosofia ma le ‘alofaga e faapea, o mea sa faigata ona maua i aso la, ua avea ma mea ua manaomia i aso nei. E le o ni mea lava e manaomia, sei vagana ua tatou faia lava na mea ma mea tatou te manaomia. O le toatele o o tatou ulugalii talavou i aso nei, ua mananao e amata [o latou aiga] i ni taavale se tele ma le ituaiga fale lea sa galulue ai Tina ma Tama i le olaga atoa ina ia maua. O lea, latou te faia ai ni aitalafu e umi se taimi e totogi ai, ae faavae i luga o totogi o ni tagata faigaluega se toalua. Ae atonu e fai si tuai ona la iloa mulimuli ane, e oo mai suiga, e fananau tamaitai, e femulimulitai ma’i i nisi o aiga, e aveesea galuega, e tutupu faalavelave o le natura ma isi tulaga, ma ua le mafai ai ona totogi ia mokesi o fale, e faavae i se tupe maua mai totogi o ni tagata se toalua.
E taua ona tatou ola i mea ua tatou maua.
O le isi, ua uunaia au e talanoa atu i tina, o tama, o atalii ma afafine.
Ou te faapea atu i tina ma tama taitasi—ia avea ma se [tagata] faalogo lelei. O fesootaiga e taua tele i aso nei, i lo tatou lalolagi saosaoa. Faaavanoa le taimi e faalogo ai [i le fanau]. Ma o outou le fanau, talanoa i lou tina ma lou tama. Atonu e faigata ona iloa, ae sa soifua ae foi o outou matua i le tele o na lava luitau o loo outou fetaiai i aso nei. E tele taimi latou te malamalama lelei ai i aafiaga o gaoioiga [i lou olaga] nai lo oe. E tatalo i latou mo outou i aso taitasi ma e agavaa mo musumusuga a le tatou Tama Faalelagi mo le tuuina atu o fautuaga ma lapataiga ia te oe.
Tina, ia faasafua atu feau o le fale. E masani ona sili atu le faigofie o lou faia lava e oe o mea uma, nai lo le tauanauina o lau fanau e fesoasoani atu, ae e tatau ona latou aoao i le taua o le faia o le latou vaega [o tiute i le aiga].
Tama, ou te fautuaina outou ina ia faaali atu le alofa ma le agalelei i lou toalua. Ia faapalepale i lau fanau. Aua nei tuuina atu ia i latou mea taugata uma latou te mananao i ai, aua e tatau ona latou aoao e ola na o i latou i le lalolagi.
Ou te uunaia outou ina ia faaavanoa [o outou taimi] mo a outou fanau. Sa ou faalogo i se faamatalaga e faapea, a oo mai le oti, e leai se tagata e faapea mai, maimau pe ana tele se taimi sa ia faaaluina i le ofisa.
Ou te fiafia i le faataitaiga mai se tusitusiga e taua “O Se Aso i le Matafaga,” na saunia e Arthur Gordon. Fai mai o ia:
“Pe tusa ua sefulutolu o’u tausaga ae sefulu lo’u uso, sa folafola mai e lo’u Tama na te aveina i ma’ua i le faafiafiaga felanulanuai. Ae ina ua oo i le taimi o le taumafataga i le aoauli, sa i ai se telefoni: o se mataupu faapisinisi na matua manaomia vave ai o ia i le taulaga. Sa ma nofo sauniuni mo se tala e le fiafia ai. Ona ma faalogo atu lea o faapea lana tala, ‘Leai, ou te le alu atu. Fai i ai e faatali.’
“Ina ua toe sau o ia i le laulau, sa ataata Tina ma fai atu, ‘E te iloa oe, e toe sau foi ma toe sau faafiafiaga felanulanuai.’
“‘Ou te iloa,’ o le tala lea a Tama, ‘ae e le toe foi mai le olaga faatamaitiiti.’”5
Ou uso e, ma tuafafine, o le taimi e faaaluina faatasi ma lau fanau o le a le umi ae mavae atu. Aua le tolopoina lou i ai faatasi ma i latou. Sa faaupuina e se tasi i le auala lenei: Afai o loo tatou ola mo na o taeao, o le a leai se mea tatou te manatua e olioli ai i le taimi nei.6
Matua, fesoasoani ia outou fanau e faatutu ni sini e faatatau i aoga ma galuega. Fesoasoani i ou atalii e aoao tu ma aga o le faaaloalo i tamaitai ma tamaiti.
Na saunoa Peresitene Hinckley, “A o tatou aoaoina se augatupulaga fou, o le a faapena foi ona i ai le lalolagi i ni nai tausaga. Afai o loo e popole mo le lumanai, ona e tagai lea i le tausiga o lau fanau.”7
E fetaui lelei foi i ai le faamatalaga a le Aposetolo o Paulo i lana uo pele o Timoteo: “Ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.”8
Matua, ia outou soifua i ni olaga e mafai ai e a outou fanau ona avea outou ma ni faataitaiga aoga e mulimuli ai.
Ou te apoapoai atu i aiga uma: ia saili o outou tupuaga. E taua ona outou silafiaina, i le mamao e mafai ona oo i ai, o i latou na muamua mai ia i tatou. Tatou te iloa ai se mea e uiga ia i tatou lava pe a tatou aoao e uiga i o tatou augatama.
Ou te manatua a o ou laitiiti, i lo’u faalogo i aafiaga a ou augatama o le itu o Miller. I le tautotogo o le 1848, na auai ai matua o le tina o le tina o lo’u tina o Charles Stewart Miller ma Mary McGowan Miller, i le Ekalesia i lo la atunuu moni o Sikotilani, sa latou tuua lo latou fale i Rutherglen, Sikotilani, ae faimalaga mai e sopoia le Vasa Atelani. Sa latou taunuu i uafu o New Orleans ma malaga mai ai i le Vaitafe o Misisipi agai i St. Louis, Misuri, faatasi ai ma se vaega o le Au Paia, ma taunuu mai ai iina i le 1849. O le tasi o le la fanau e 11 o Margaret, o le a avea ma tina o le tina o lo’u tina.
Ina ua taunuu atu le aiga i St. Louis, sa fuafuaina e [galulue] ia lava ni tupe latou te maua e malaga mai ai i le Vanu i Sate Leki, sa taia lena eria i le faama’i o le kolera [cholera]. Sa matuai mafatia le aiga o Miller i le faama’i: i totonu o le lua vaiaso, na maliliu ai le tina, o le tamā, ma le la fanau tama e toalua. O le taimi lena, na o le 13 tausaga o le tina o le tina o lo’u tina o Margaret Miller.
Talu ai ona o le tele o tagata maliliu i le eria, sa leai ai ni pusa maliu na maua—i soo se tau lava. Sa tatala e toeaiina matutua na sao mai le faama’i ia pa o povi ina ia mafai ona faia ai ni pusa maliu o tagata o aiga na maliliu.
Sa tuua e tamaiti matuaoti e toaiva o le aiga o Miller ma le toalua o se tasi o le [la] afafine matua, ia St. Louis i le tautotogo o le 1850, faatasi ai ma ni povi se fa ma se taavale toso e tasi, ma iu ai ina taunuu atu i le Vanu o Sate Leki o le tausaga lava lena.
Ou te nofo aitalafu i le agaga faafetai i nei [augatama] faapea ma isi augatama amiotonu, o e na alolofa i le talalelei ma na matuai alolofa i le Alii, lea sa latou naunau ai e ositaulaga mea uma sa latou maua, e aofia ai o latou lava ola, mo le Ekalesia a Iesu Keriso o le Au Paia o Aso e Gata Ai. Ou te faafetai tele mo sauniga o le malumalu lea e fusia faatasi ai i tatou mo le faavavau atoa.
Ou te toe faamamafa atu le taua o le galuega o loo tatou faia i totonu o malumalu o le Alii mo o tatou aiga ua maliliu.
O nei e atoa i ai le lua masina ua mavae, sa faapotopoto ai lo matou aiga i totonu o le Malumalu o Sate Leki, e faataunuu faamauga mo nisi o o matou augatama ua maliliu. O le tasi lenei o aafiaga sili ona faaleagaga na maua faatasi e le matou aiga, ma faamausali atili ai le alofa o le tasi i le isi ma le matou tautinoga ina ia matou ola agavaa mo o matou tupuaga.
O tausaga ua mavae a o auai lo’u atalii laitiiti o Clark, i se vasega o mataupu faalelotu i le Iunivesite o Poliga Iaga, na fesili le faiaoga i le taimi o le vasega ia te ia, “Clark, o le a se faataitaiga o le olaga faatasi ma lou tama e sili ona e manatuaina?”
Na tusi mulimuli mai le faiaoga ia te au ma faamatala mai le tali na tuuina atu e Clark i le vasega. Na tali Clark: “A o avea au ma se Tiakono i le Perisitua Arona, sa ma o ai ma lo’u tama e fanafana e latalata i Malad, Idaho. O le aso na ma o ai o le Aso Gafua—o le aso mulimuli o le vaitau o le fanafanaga. Na ma savavali i le togavao e fanafana ae sa na o ni nai manu na vaaia, ma sa misi foi. Ona fai mai lea o Tama ia te au, ‘Clark,’ sa tilotilo o ia i lana uati, ‘aveese pulu o a ta fana, ona tuu lea i le alia lenei. Ona ta tootutuli lea i lalo ma tatalo.’ Na ou manatu o le a tatalo Tama ia tele ni manu, ae na sese au. Na ia faamatala mai ia te au o Elder Richard L. Evans o le Korama a Aposetolo e Toasefululua, o loo ma’i tigaina ma o le 12 i le aoauli o lena Aso Gafua faapitoa, e tootutuli uma ai uso o le Korama a le Toasefululua—po o fea lava o i ai—ma tatalo faatasi i le tatalo faatauanau o le faatuatua mo Elder Evans. Na aveese o ma pulou, ae ma tootutuli e tatalo.”
Ou te manatuaina lelei lena mea na tupu, ae ou te le’i moemiti lava o loo matau mai e se atalii, o loo aoao, o loo fausia sana lava molimau.
O ni nai tausaga ua mavae, sa i ai se matou tama talavou tiliva nusipepa, o le sa tele ina lē lelei le tilivaina o ana pepa. Nai lo le togiina o le pepa i le faapaologa o le fale, o nisi taimi na te togiina ai ma lona le iloa le pepa i totonu o se pupuvao pe latalata foi i le auala. Sa tonu i nisi aiga na te tilivaina atu i ai le pepa, o le a latou faia se tusi o se faitioga. O se tasi aso na sau ai se sui o i latou o loo faia lea tusi i lo matou fale ma fai i lo’u toalua o Frances e saini i le tusi. Sa teena e ia ma faapea atu, “Aisea, o ia ua na o se tamaitiiti, ae e mamafa tele pepa. E le mafai ona ou faitio ia te ia, aua o loo ia faia lava le mea sili.” Ae peitai, e toatele lava isi aiga e tiliva atu i ai le pepa sa sainia le tusi ma auina atu i le supavaisa o le tamaitiiti.
O ni nai aso e le’i mamao atu talu mai lena mea, na ou sau ai i le fale mai le galuega ma ou tau mai o tagi ia Frances. Ina ua mafai ona tautala mai, sa ia faamatala mai, o lea faatoa ona maua le tala sa maua atu le tino o le tamaitiiti tiliva pepa i totonu o lona faletaavale, ua pule ai i lona ola. O le mea moni, o faitioga sa faaputu atu i ona luga, na fai ma avega mamafa ia te ia. Sa ma lagonaina le agaga faafetai ona ma te le’i auai i lena faitioga. O se lesona lelei lava lenei mea i le taua o le lē faamasinoina o isi, ma le faia ma le agalelei o isi tagata.
E tatau ona avea le Faaola ma o tatou faataitaiga. E pei ona tusia e uiga ia te Ia, na tupu “le poto ma le tino [o Iesu], ua alofagia o ia e le Atua atoa ma tagata.”9 Sa “femaliuai [o Ia] ma agalelei… . aua sa ia te ia le Atua.”10
Ia manatua o le tele o taimi [e manatu ai] le tagata o le poto o le Atua o le valea lea; ae o le lesona tupito e tasi e mafai ona tatou aoaoina i le faaletino, a fetalai mai le Atua ma usitai ai le tagata, o le a sa’o lava lena tagata i taimi uma.
Tau ina ia tatou mulimuli pea i le Alii o le Filemu, o le sa faaalia moni mai le ala mo i tatou e mulimuli ai, aua o le faia o lena mea, o le a tatou saogalemu ai i nei taimi faigata. O lana fuafuaga paia e mafai ona laveaiina ai i tatou mai mea matautia o loo siomia ai i tatou. O Ana faataitaiga ua faasino mai ai le ala. Ina ua fetaiai ma faaosoosoga, sa Ia lafoaiina. Ina ua ofoina atu i ai le lalolagi, sa Ia teenaina. Ina ua manaomia Lona soifua, sa Ia tuuina atu.
O le taimi lenei. O le nofoaga lenei. Tau ina ia tatou mulimuli ia te Ia, o la’u tatalo lea, i le suafa o Iesu Keriso, amene.