O Le Faatuatua o le Tali Lea
Ia manatua o le faatuatua ma le usitai o tali na—e tusa lava pe le sa’o mea e tulai mai, aemaise lava pe a sese se mea.
O popofou o le vaitau o le 1950 sa tau ai le Iunaite Setete i le taua i le penisula o Korea. Talu ai ona o se tulafono a le malo i lena taimi e faamalosia ai le ave o tagata i le fitafita, o lea sa le faatagaina ai alii talavou e o e faamisiona ae tatau ona auai i le vaegaau. I le iloaina la o lenei mea, sa tusia ai loa lo’u igoa i le A’oga o Fitafita Faaleoleo a le Ami ina ua ou aoga i le kolisi. O la’u sini o le avea lea ma se taitai e pei o lo’u uso matua. Ae peitai, i le taimi na ou asiasi atu ai i lo’u aiga mo malologa o le Kerisimasi, na valaaulia atu ai au e lo’u Epikopo, o Vern Freeman, i lona ofisa. Na ia fautuaina ai au o loo i ai se taitai talavou o le Ekalesia e igoa ia Brother Gordon B. Hinckley o loo feutagai mo se maliliega ma le malo o Amerika ina ia faatagaina ia uarota taitasi i totonu o le Iunaite Setete e valaauina se alii talavou se toatasi e auauna atu i se misiona. O lea alii talavou o le a otometi lava ona tolopo lana militeli i le taimi o lana misiona.
Na saunoa mai Epikopo Freeman sa ia tatalo e uiga i ai ma sa ia lagona e tatau ona ia fautuaina au e avea o se faifeautalai faamisiona e fai ma sui o le matou uarota. Sa ou faamalamalamaina atu ia te ia ua uma ona faia isi au fuafuaga—ua uma ona tusia lo’u igoa i le Vaega Faaleoleo a le Ami ma ua ou faamoemoe e avea au ma se taitai! Na toe faamanatu mai ma le filemu e lo’u epikopo ia te au, na uunaiina o ia e fautuaina au ina ia auauna atu i se misiona i lena taimi faapitoa. Na ia saunoa mai, “Alu i le fale ma talanoa i ou matua ona e toe foi mai lea i le afiafi nei ma lau tali.”
Sa ou alu i le fale ma ta’u i lo’u tama ma lo’u tina le mea ua tupu. Sa la fai mai na musuia le epikopo ma e tatau ona ou taliaina ma le fiafia le valaaulia a le Alii ina ia auauna atu. Sa mafai ona iloa e lo’u tina lo’u le fiafia ina ua le mafai ona avea au ma se taitai o le ami. Sa ia fai mai:
“Ia e faatuatua ia Ieova ma lou loto atoa; a e aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.”1
O le po lena na ou toe foi atu ai i le ofisa o le epikopo ma talia lana valaaulia. Na ia ta’u mai ia te au ou te alu i le Ofisa o Auaunaga Filifilia [mo le militeli] ma logoina i latou i la’u faaiuga.
Ina ua ou faia, na ou ofo ina ua ta’u mai ia te au e le tamaitai sa taitaifono i le Ofisa o Auaunaga Filifilia e faapea: “Afai e te taliaina se valaauga faamisiona, o le a e mauaina se faaaliga e logoina ai oe a o lei mafai ona e toe ulufale mai i le Vaega Faaleoleo a le Ami. O le a e auauna atu o se tagata faaleoleo, ae le o se taitai.”
E ui i lenei suiga e lei faamoemoeina, ae sa manaia lava la’u misiona. Na suia ai le ala o lo’u olaga e pei ona faia foi i isi o e na auauna atu. Ae, i le faamaoni ai i le latou faamatalaga, na auina atu ai e le malo se tusi e faailoa atu ai le taliaina o au i le Ami a le I.S. ae toe tasi le masina mae’a la’u misiona.
Ina ua maea le tolauapiga ma le aoga faaleoleo a le militeli, sa tofia au i se vaega a le ami ma ou galue ai o se leoleo i le militeli. O se tasi po na tuu mai ai se tofiga ia te au mo le po atoa e vaavaaia ai le auina atu o se vaega o pagota mai le tasi tolauapiga i le isi.
I le gasologa o le po, na afe ai le vaega lenei ae faatoa afa le auala mo se malologa. Na faatonuina i matou e le taitai ina ia matou o atu i le faleaiga ma inu ai sina kofe ina ia mafai ona matou ala i le po atoa. Sa vave ona ia matauina lo’u teenaina. Sa ia fai mai, “Fitafita, e moomia lou inuina o sina kofe ina ia e mataala ai i le vaega atoa o loo totoe o lenei malaga. Ou te le manao i se pagota e solaese pe faatupuina se faalavelave i le taimi o lo’u tiute.”
Sa ou fai atu, “Alii e, ou te teenaina ma le faaaloalo. O au o se Mamona, ma e ou te le inu kofe.”
Sa lei popole o ia i la’u tali, ma sa ia toe apoapoai mai ia te au ina ia inu le kofe.
Sa ou toe teenaina foi ma le faaaloalo. Sa ou nofo i le pito i tua o le pasi, ma la’u auupega i lo’u lima, ma tatalo i lo’u loto ina ia ou ala pea ma ia aua lava ne’i ou faaaogaina [le kofe]. Na taunuu le malaga e aunoa ma se faalavelave.
I nai aso mulimuli ane na toe valaaulia atu ai foi au e le taitai lava lea mo se faatalanoaga. Na ia ta’u mai ia te au e ui lava sa ia popole ina ne’i o’u le mataala i le taimi atoa o le po na alu ai le malaga, ae na ia talisapaia lo’u tumau ai e tusa ma o’u talitonuga. Na ou ofo tele ina ua ia fai mai ua siitia lona fesoasoani ma ua ia fautuaina au e avea ma ona fesoasoani fou!
O le vaega tele lava o le lua tausaga na sosoo ai sa ou maua ai le tele o avanoa mo tofiga faale-taitai po o le pulega. E pei ona oo i ai, o aafiaga lelei na ou maua mai la’u tautua i le militeli sa sili atu nai lo mea na ou moemiti i ai.
Mai lenei tala faigofie—ma le tele o isi e pei o lea i le taimi atoa o lo’u olaga—na ou aoaoina ai o le faatuatua ma le usitai, o tali na i o tatou popolega, atugaluga, ma puapuaga. O le faatuatua i le Alii o Iesu Keriso o le mana moni lava lea e mafai ona suia o tatou olaga ma tatou maua ai le faaolataga.
E mafai faapefea ona tatou fausia lenei faatuatua? E ala i a tatou mea e fai. E tatau ona tatou “o ma fai mea ua poloaiina ai i tatou e le Alii,”2 e pei lava ona fautua mai ai Nifae. E tatau ona tatou faatuatua i le Alii ma o tatou loto atoa, e pei ona aoaoina ai au e lo’u tina alofa. E faafetaia ai, ona o le tele o taimi tatou te faatinoina ai le faatuatua e faia le finagalo o le Alii, tatou te iloaina ai le matuai faamanuiaina lava o i tatou i lo tatou usiusitai.
O nisi taimi, e ui lava tatou te iloa o loo tatou faia le mea silisili e auauna atu ai i le Alii, ae tatou te puapuagatia lava. E mafai ona e iloaina se tasi o loo feagai ma nisi o luitau sili ona faigata: mafaufau i se tina ua ma’i lana tama, o se e tatalo ma anapogi uma i ai le aiga ma o latou loto ma agaga atoa, ae oo lava ina oti. Po o le faifeautalai e ositaulaga ina ia alu i se misiona, ona te’i lea ua maua i se ma’i faigata lea na mafua ai ona le atoatoa lona malosi pe matuai tigaina ai lava. Po o le tamaitai e ola i se olaga faamaoni ma le usiusitai atoatoa e mafai ona ia faia, ae le mafai ona ia maua se fanau sa ia faamoemoe i ai. Po o le ava na te faia mea silisili ia maua ai se fale lelei mo lona aiga ma tausia ai lana fanau, ae ua tuua o ia e lana tane. E tele faataitaiga a tusitusiga paia o tagata o e sa faasaoina ina ua mavae ona faaalia le faatuatua, tele e pei o Sataraka, Mesako, ma Apeteniko i totonu o le ogaumu aasa. Ae o loo tele foi faataitaiga mai tusitusiga paia o tagata faamaoni o e lei mafai ona maua se laveaiga faalelagi i le taimi o se faalavelave. Sa susunuina Apinati; sa vavaeeseina le ulu o Ioane le Papatiso; na lafoina i le afi i latou sa mulimuli ia Alema ma Amoleka. O le ola lelei pea e le faapea o le a sologa lelei ai pea mea uma. O le autu lava ia manatua, o le faatuatua ma le usitai o tali na—e tusa lava pe le sa’o mea e tulai mai, aemaise lava pe a sese se mea.
Ia manatua ua folafola mai e le Alii o le a Ia fesoasoani ia i tatou a o tatou feagai ai ma faigata. E patino lava Lona alofa mo i latou o e puapuagatia. O Ia lava lea na fetalai, “Amuia e faanoanoa: aua e faamafanafanaina i latou.”3
O se vaega o le Togiola, sa puapuagatia ai lo tatou Faaola i mea uma. Ua Ia malamalama i le tiga i la le tino ma lagona; ua Ia silafia le faanoanoa i le faatoilaloina ma le faalataina. Ae sa Ia faaali mai ia i tatou o le faatumutumuga lava o le alofa, onosai, lotomaualalo, ma le usiusitai o ala ia i le filemu moni ma le fiafia. Na fetalai Iesu, “Ou te tuuina atu ia te outou le manuia, o lo’u manuia ou te avatu ai ia te outou.” Ona lapataiina lea o i tatou ina ia tatou saili ia sili atu nai lo na o manuia faalelalolagi, na faaopoopo mai ai Iesu, “Ou te le avatu ia te outou faapei ona avatu e le lalolagi.”4 E vaai le lalolagi i le filemu o le leai lea o se feteenai po o le tiga, ae ua ofoina mai e Iesu le filemu ia i tatou e ui lava i o tatou puapuaga. O lona soifuaga e lei saoloto mai feteenaiga po o le tiga, ae sa saoloto mai le fefe ma sa tumu i le ta’uaogaina. Na tusia e le Aposetolo o Peteru: “Afai tou te onosai pe a tigaina outou a o amiolelei, o le mea lava lea e malie i le Atua.
“Aua na valaauina outou ona o lea lava mea; aua na tigaina Keriso lava o le sui o outou, ua tuuina mai ai e ia le faaaoao mo outou, ina ia outou mulimuli i ona tulagaaao: …
“O le, sa agateleina, ae lei toe agatele atu; na faatigaina o ia, ae lei faamatau atu; a ua tuuina atu o ia e ia i le na te faamasino tonu.”5
O i tatou o e ua taliaina Iesu Keriso e avea ma o tatou Faaola e tatau ona faalagolago atoatoa i uiga o Keriso. O le a Ia laveaiina i tatou pe a mavae mea uma tatou te mafai ona faia. Pe a tatou faatinoina ma le lototele lo tatou faatuatua ma afai tatou te agai i luma i le faalagolago atu i uiga o Keriso, o le a Ia faamanuiaina i tatou ma taitaiina i tatou i a tatou taumafaiga uma. O le a Ia faamalosia i tatou ma aumai ia i tatou le filemu i taimi o o tatou faigata. “Aua o le faatuatua ua matou savavali ai, a e le o le tino mai o mea.”6 Ou te tatalo ina ia mafai e i tatou taitoatasi ona aoao e tuu atu le faalagolagomaga i le Alii ma ia faateleina lo tatou faatuatua ia te Ia.
O lenei, uso e ma tuafafine, i le faaiuga ou te fia ta’ua ai lava le mataupu lenei e tasi. I tausaga ua mavae atu sa matuai faamanuiaina ai lava au i le matauina lea o Peresitene Hinckley, ma e ou te fia faamanatu atu ia te outou o Peresitene Hinckley ua le na o se perofeta soifua, ae o se tagatavaai soifua foi. Na te silafia mea e le o iloa atu e isi. O loo ia te ia le meaalofa o le iloatino; o ia o se tagata e manatu e tutupu mea lelei ma e talitonu i ai. Ou te fia faailoa atu lo’u agaga faafetai i le Alii mo le faasaoina o le soifuaga o Peresitene Hinckley ma le faatagaina o ia ma ona fesoasoani tamalii e taitai le Ekalesia i lenei 10 tausaga ua mavae atu. O le taitaiga faalelagi a Peresitene Hinckley, ua maua ai e le Ekalesia le tele o faamanuiaga silisili, e tele e le o mafai ona iloa atu. Ou te uunaia malosi outou uma taitoatasi ina ia matuai mulimuli i ana fautuaga ma lana taitaiga, aua e moni lava “uafaatuina e le Alii se tagatavaai mo Lona nuu.”7
O Iesu o le Keriso. O Iosefa o le perofeta o le Toefuataiga. O Peresitene Gordon B. Hinckley o lo tatou perofeta soifua. I le suafa o Iesu Keriso, amene.