O Le Taimi Lenei e Sauniuni Ai
O le taimi lenei e sauniuni ai e feiloai ma le Atua. Atonu ua tuai tele taeao.
O’u uso e ma tuafafine pele, i le mavae ai o le konafesi aoao na te’a nei, sa maliu la’u manamea—lo’u toalua faapelepele mo le 59 tausaga. A o ou i ai i le fale i se Aso Toonai e le masani ai, ona ua leai so’u tofiga [faalelotu] e fai ai, sa ma galulue faatasi. Sa fai lana tagamea. Sa ou fesoasoani e la’u ma gaugau, ma teu. Ae ina o ma nofonofo i le sofa, ma uulima, ma matamata i se polokalama i le televise, sa te’i ua sola filemu la’u Dantzel faapelepele, i le faavavau. Sa faafuase’i ma e le’i mafaufauina lona maliu. I le fa aso a o lumana’i lona maliu, sa maua mai ai se lipoti a le matou foma’i i suesuega o ana siaki e masani ona fai, fai mai o loo lelei. Ina ua siliga a’u taumafaiga, sa lofituina a’u i lagona o le te’i ma le faanoanoa. Ua aveesea la’u uo e sili ona mamae, o se tina agelu o le ma fanau e 10, ma se tinamatua o fanau e 56 a le ma fanau.
O Dantzel sa le na o se soa alofa ma alofagia. O ia o se faiaoga: o ana faataitaiga tamalii, sa ia aoao mai ai le faatuatua, amioatua, usiusitai, ma alofa mutimutivale. Sa ia aoao a’u i le ala e faalogo ma alofa ai. O ia, ua ou iloa ai faamanuiaga uma e mafai ona oo mai i se tane, tama ma se tamamatua.
Faatasi ai ma se lagona loloto o le faafetai, ou te faailoa atu ai le masaa mai o le alofa mai uo pele i le lalolagi atoa. E le mafaitaulia tusi, o telefoni, o kata, ma isi savali sa auina mai. O nei saafiafiga uma sa ta’u mai ai le alofa faamama’i mo ia ma le lagona faavauvau mo i matou, ua ia tuua. Sa matua tele ma anoanoa’i na faamaisega, ma e faanoanoa lava, ona ua le mafai ona matou tali ta’itasi atu i ai. Ou te fia faafetai atu ia te outou uma taitoatasi mo le tele naua o lo outou agalelei mo i matou. Faafetai tele lava. Ua matua faamafanafanaina i matou i a outou faalaeiauga, i lenei taimi o le loto mafatia o lo matou aiga. Matou te matua alolofa tele i le pele o Dantzel! Ua matou misia lava o ia!
E mafai ona tatou aoaoina se lesona taua mai lona maliu faafuasei: o le taimi lenei e sauniuni ai e feiloai ma le Atua. Atonu ua tuai tele taeao. Ua autausagā ona ta’u mai e Perofeta: “E tatau i tagata ona sauniuni i lenei olaga e fetaiai ma le Atua. … Aua tou te faatuai le aso o lo outou salamo.”1
O Le Manaomia o le Saunia Nei
Ae toatele lava o loo faatuatuai.2 Ua lapata’ia i tatou e se perofeta: “Tou te le mafai ona faapea atu … o le a ou salamo, o le a ou foi atu i lo’u Atua. E leai, tou te le mafai ona faapea, aua o lea lava agaga o i ai i o outou tino i le aso tou te tete’a ai ma lenei olaga, … o lea lava agaga o le a toe foi atu i o outou tino i lena olaga faavavau.”3 O loo faaopoopo mai se isi perofeta: “O le ua eleelea, e eleelea pea o ia; o le ua amiotonu, e amiotonu pea o ia.”4
E maeu le iloa “o soo se mataupu faavae o le malamalama tatou te maua i lenei olaga … o le a tutu mai faatasi ma i tatou i le toetutu.”5 Ua tatou aoao mai foi i le Perofeta o Iosefa Samita, “e i ai … se taimi a le Atua … ua tusia … Na te avatu ai Ona tagata, o e sa usita’i i Lona leo ma tausi i Ana poloaiga, i Lona malologa selesitila. O le malologa 6, o le matagofie atoatoa ma le mamalu, lea e matua manaomia ai se sauniuniga a le tagata a o lei mafai ona ia oo atu i ai, e tusa ai ma tulafono o lena malo, e ulu atu i ai ma olioli ai i ona faamanuiaga. … Ma ua tuuina mai e le Atua ni tulafono patino i le fanauga a tagata, afai e tausia, ua lava ia e saunia ai i latou e fai mo latou tofi lenei malologa.”7 Ua matuai saunia lelei Sister Nelson!
E foliga mai e matua mamao lava lea sini mamalu, pe afai e faalotovaivaia se tasi i faalavelave ma faaletonu faalelalolagi. Ou te manatua sa’u uo ina ua fai si faaletonu o lona aso sa ia faapea, “E, po o le a le mea na ou fanau mai ai?” O le fuafuaga a le Atua na tali ai lana fesili. Na tatou o mai i le olaga lenei ina ia maua se tino faaletino. E mafai ona alofa tele le tasi i le isi ma faaipoipo ai. E mafai ona i ai ni a tatou fanau ma oo i faigata o le olaga faitino. (Faamolemole faamagalo mai a’u i lo’u ta’u faatasi o le fanau ma faigata o le olaga i le fuaiupu e tasi. Ou te lagona o vaega uma na o lo tatou alualu i luma.) Sa toefuatai mai le Ekalesia—sa foafoaina le lalolagi—ina ia mafai ai ona faamauina na aiga i totonu o malumalu paia. A na leai, o le a “matua maumau” lava le lalolagi.”8
Na tatou o mai ina ia tofotofoina i tatou, ina ia suesue ai, ma filifili [le mea e fai].9 O a tatou faaiuga e fai e iloa ai lo tatou taunuuga. Ua tatou “saoloto e filifili le saolotoga ma le ola faavavau, talu le Puluvaga sili o tagata … , pe filifili le faatoilaloina ma le oti.”10 O i latou uma foi e filifilia le ala o le Alii, e ono sauaina i latou.11 Peitai, e mautinoa lava lo latou taui. O i latou e faamaonia lo latou faamaoni, “e fai mo latou tofi le malo o le Atua, … e atoatoa foi lo latou olioli e faavavau.”12 Ua maua e Sister Nelson lena taui. Ua aumaia ai le mafanafana ia te a’u ma lo matou aiga!
O faigata ma tofotofoga e oo uma lava i e mauoa pe matitiva foi. I tausaga ua leva, sa talosagaina ai a’u ou te faia se taotoga o se alii mauoa. Na faamaonia i lea taotoga ua leva lona kanesa ma ua sosolo i lona tino atoa. Ina ua ou ta’u atu ia te ia lea tala, o lana tali muamua lava sa faalagolago lea i ana oa. E alu o ia i soo se mea lava pe na te faia foi soo se mea ina ia togafitia ai lona tulaga. Sa manatu o ia e mafai e ana tupe ona toe faatau mai lona malosi. Peitai e lei leva ae maliu o ia. Sa fesili se tasi tagata, “E fia ni ana oa na tuu ae alu?” O le tali, “O mea uma lava!”
Sa tuu lana faamuamua i mea o le lalolagi. E sese le puipui na faalagolago i ai lana apefa’i o le manuia. Ou te mafaufau ia te ia pe a ou faitauina le mau lea: “Faauta, ua mavae atu o outou aso faata’ita’i; na faatamala outou i le aso o lo outou faaolataga ina seia … [tuai tele].”13
I se faatusatusaga manino, o Sister Nelson sa saunia i lona olaga atoa mo le taimi e toe foi atu ai i le Atua. Sa ola o ia i aso taitasi, e faapei o lona aso mulimuli lena. Sa pele ia te ia itula taitasi, i lona iloa e taua tele le taimi i le fogaeleele.
O nisi tagata e ola lava faapei e leai se aso o se faamasinoga. O isi foi latou te faamaimauina le asō ma le le popole lava mo a taeao po o le matua faatumulia foi o le mafaufau ma gase ai i mea sese o ananafi. Ua tatau ia i tatou taitoatasi ona gauai atu i upu a se fatusolo, o loo tusia i se uati ata lafoia:
O le ata lafoia o lo’u tamailima
E vaelua ai le lumanai mai le taimi ua tuanai:
O luma atu, o loo moe ai le itula e lei oo mai,
I le pogisa, e leai sau mea e mafai i ai:
O tua atu o le laina lafoia,
O i ai le itula ua te’a e te le toe āiā i ai:
Pau le itula ua i ou lima, o le taimi nei,—
Le TAIMI NEI lea ua tu ai le ata lafoia.14
E Faapefea Ona Tatou Saunia?
O le taimi lenei. Ae e faapefea ona tatou saunia? E amata i le salamo! O loo ta’u mai i tusitusiga paia: “Afai tou te saili e fai le amioleaga i aso o outou olaga faata’ita’i, ona maua lea o outou ua eleelea i luma o le nofoa faamasino o le Atua; … e le mafai ona nofo se mea eleelea faatasi ma le Atua.”15 Sa Ia tuuina mai le tulafono faigofie lava lenei: “E le mafai ona e maua lenei mamalu, sei iloga e te usitai i la’u tulafono.”16
O le taimi lenei e faaalia ai le migao o le tagata i lona tino faaletino. O le malumalu lea o le agaga e oo i le faavavau. E tatau ona pulea lelei le fia’ai faaletino e le mana’o o le agaga. E tatau ona tatou “faafitia mea leaga uma.17 E tatau ona tatou “lafoa’i mea leaga uma ma pipii mau i mea lelei, [ma] ola ai i upu uma” e tulei mai i le fofoga o le Atua.”18
Ona o mala taufaafefe ua alia’e soo mai i le lalolagi, ua le talitonu ai nisi tagata o loo soifua le Atua. Peitai, o le mea moni, o loo taumafai o Ia e fesoasoani mai ia i tatou. Sa Ia faaalia mai upu nei: “Ua atufia ona ou valaau atu ia te outou i fofoga o a’u auauna, ma galuega a agelu, ma lo’u lava leo, ma i le leo o faititili, ma … o ta’uta’u, … o mafui’e, … ma uato’a tetele, … o oge ma faama’i uiga ese, … ma semanu e faaolaina outou i le faaolataga faavavau, a e na outou le mafafai!”19
O lona faamoemoega mo i tatou o le ola faavavau. Tatou te agavaa e mauaina e ala i le usitai i feagaiga ma sauniga o le malumalu—mo i tatou lava, o o tatou aiga, ma o tatou augatama. E le mafai ona faaatoatoaina i tatou e aunoa ma i latou.20 E le mafai ona maua lo tatou ala i le afioaga o le Atua i le na ona moomoo. E tatau ona tatou usitai i tulafono e autu i ai na faamanuiaga.21
E sa’olele le fuafuaga a le Atua. E oo lava ia i latou “e oti e aunoa ma se malamalama i lenei talalelei, o ē semanu latou te mauaina pe a na faataga ona ola ai i le lalolagi, e avea i latou ma suli o le malo selesitila o le Atua.”22 E alofa mutimutivale foi Lana fuafuaga. Na te “faamasinoina foi tagata uma e tusa ai ma a latou galuega, e tusa foi ma le manao o o latou loto.”23
O le taimi lenei e tusi ai o tatou igoa faatasi ma le nuu o le Atua. Tatou te faia lea mea i le totogiina o sefuluai. Ua Ia poloaiina Lona nuu e totogi sefuluai ina ia manuia ai.24 Sa aoao ma saga aoao mai pea e Sister Nelson lena lesona i lo matou aiga.25
O le taimi lenei e faagatusa lelei ai a tatou sini ma sini a le Atua. O Lana galuega ma Lona mamalu—“ia faataunuu le faaofuina o le tagata i le tino ola pea ma le ola faavavau”26—e mafai foi ona avea ma a tatou galuega. Na fetalai le Faaola e uiga i faaipoipoga i le malumalu, “Afai e faaipoipo le tane i lana ava i la’u upu, o la’u tulafono lea, ma i le feagaiga fou faavavau, … [latou te] mautofi i nofoalii ma malo, o itumalo sili, ma pulega, ma malo, … faaeaga ma le mamalu i mea uma.”27 E ao ina tatou faaa’oa’o i le faataitaiga a le Alii, ia alolofa e faapei ona Ia alofa, ia tatalo e faapei ona Ia faia, ma tumau seia oo i le iuga e faapei foi ona Ia faia.28
O Le Taua o le Oti i le Fuafuaga e Faavavau a le Atua
O le oti o se vaega taua o lo tatou ola e faavavau. E leai se tasi na te iloa le taimi e oo mai ai, ae e taua i le fuafuaga sili a le Atua mo lo tatou fiafia.29 Faafetai i le Togiola a le Alii, ma o le toetu o se mea moni, ma o le ola faavavau o se mea e mafai ona maua e tagata uma.30 O le na tulaga e mafai ona taunuu pe a tatou usitai i le tulafono a le Atua. Na Ia fetalai, “Afai tou te le tausia a’u poloaiga, … tou te le mafai lava ona sao atu i le malo o le lagi.”31 E i ai se aso o le a faamasinoina ai i tatou e le Alii 32, ma tatou o ai i mea tatou te nonofo ai ua saunia i le maota o lo tatou Tama Faalelagi.33 O loo faatalitali mai le mamalu selesitila ia i latou sa faamaoni i poloaiga a le Atua.34
Uso e ma tuafafine, tatou te ola ina ia oti ma tatou te oti foi ina ia ola—i se isi lalolagi. Afai tatou te saunia lelei, e le aumaia e le oti se atuatuvale. Mai se vaaiga i le faavavau, e na o i latou lava e lei saunia e fetaia’i ma le Atua, e manatu ua vave tele mai le oti.
O le taimi lenei e sauniuni ai. Ma, a oo mai le oti, ua mafai ona tatou sii atu i le mamalu selesitila ua saunia e le Tama Faalelagi mo Ana fanau faamaoni. O le taimi nei, mo i latou e pele ua tuua—e pei o a’u ma lo’u aiga—ua faamafanafanaina mai le tui o le oti ona o le mausali ia Keriso, o se faamoemoe lelei, o se alofa i le Atua ma tagata uma, ma se naunautai loloto e auauna atu ia te i latou.35 O lena faatuatua, ma lena faamoemoe, ma lena alofa o le a faaagavaaina ai i tatou e o atu i le afioaga paia o le Atua, faatasi ai ma a tatou soa e faavavau ma aiga, tatou te mau faatasi ai ma Ia e faavavau. Ou te molimau atu ai i nei mea i le suafa o Iesu Keriso, amene.