Rahn Wet
Atail soukohp ieias wiewia ah pwukoah en kapwulowei Pwuhk en Mormon nan sampah pwon. Kitail anahne idawehn ih.
Riei ohl oh lih akan, mahsen me mih nan Pwuhk en Mormon me inda “Rahn wet”1 e doadoahk pak tohto pwe en kak kasalehieng kitail iren kaweid kan, inou kan, oh padahng kan. Nahnmwarki Benjamin, nan kaimseklahn sapwelime padahk, e kaweidki aramas akan, “rong ei pato kan me I pahn patohwanohng kumwail rahnwet; … rong ie mwahu, oh rongki salengamwail kan pwe kumwail en kak rong mwahu, oh langahda mohngiongamwail kan pwe kumwail en kak wehwehki, oh ritingada amwail madamadau kan pwe sapwellimen Koht me rir kan en kak sansalda ong kumwail.”2 Kapokon lap e kin mih ni soangen mwohmwohte. Kitail kohpene pwe kitail en rong kaweid “rahn wet,” pwe kitail en kak “mehlel ansou koaros”3 ong Kauno oh Sapwellime rongamwahuo. Ih me i keiou kin medemedewe “rahn wet” iei kesempwalpen kaweliakapwih atail loaloapwoat ong Pwuhk en Mormon, me Joseph Smith indahki “me keioun pwung sang pwuhk teikan nan sampah.”4
I kolokol nan pehiet koapi en Pwuhk en Mormon ieu. Nei pwuhk wet e sangete nan 1970, oh e udahn kesempwal ong ie. E mwomwen tok oh wereila, apw sohte ehu pwuhk me kesempwal ong ahi mouret oh ahi kadehde due pwuhk wet. Ni ahi wadek pwuhk wet I alehdi ahi kadehde sang ngehn sarawi me Sises Krais iei Sapwelimen Koht Iehros,5 me Ih ahi sounkomour,6 me iren pwuhk sarawihkat iei mahsen en Koht,7 oh rongomwahuo kapwurpwurdohr.8 Loaleiet audaudkihda mehlel pwukat. Duwehte soukohp Nephi ah kosoia,“Palingeniet kin perenki soahng kan me sang rehn Kauno.”9
Pali maun ong meing: Elder Ronald A. Rasband, young missionary; President Harold Wilkinson, president of the Eastern States Mission; and Elder Marion D. Hanks, General Authority Seventy.
Iet soaiepe. Ni ai wia misineri pwulopwul men, I ale kaweid en Elder Marion D. Hanks, me pwarek kiht nan Eastern States Mission. E wia presiden en British Mission mahs, oh meh riemen nah misinerihko mihmi mwoweht rahnwet: riei ohl Jeffrey R. Holland oh Elder Quentin L. Cook.10 Duwehte nah misineri kan nan England, e padahkiong kiht en wadek koapi en Pwuhk en Mormon pak riau. I kapwaiada luhko. Keieu en wadawad ih pahn anahne kilelehdi ire koaros me doke de kadehde duwen Sises Krais. I doadoahngki pinsel weitahta oh kilelehdi irehkei. Keriau, Elder Hanks dene sen kilelehdi ire kesempwal akan oh padahk kan en rongamwahuo, oh ansou wet ih doadoahngki poh mei nan iren pwuhk sarawi kan. I wadek Pwuhk en Mormon pak riau, nin duwen me e kiheng kihto, oh pak riau mwuri, oh met ih doadoahngki me oangoahng oh toantoal oh kilelehdi irehkan me kesempwal ong ie.11 Ma kumwail kilang, I kilelehdi diren irehkei.
Ai wadawado, i sohte kin kilelehdihte iren pwuhk sarawi kan. Ni ai wadewadek Pwuhk en Mormon, sang ni tapi lel imwi, loaleiet kin audaudkihla limpok laud ong Kauno. I kehn kadehde laud duen mehlel en Sapwellime padahk kan oh mwomwen atail pahn doadoahngki ong “rahn wet.” Pwuhko pahrekiong oaralapo, “Pilehu Kadehdepen Sises Krais.”12 Sang ni onopo oh kadehde me ih alehdiero sang Ngehno, I wiahla misineri en Pwuhk en Mormon oh werek en Sises Krais.13
”Rahn wet,” emen misineri en Pwuhk en Mormon wadawad iei President Russell M. Nelson. Ansou me e tepin alehda pwukoah en Wahnpoaron, e wia kasukuhl ehu nan Accra, Ghana.14 Aramas lapalap kei iang patehng, me iangahki nahnmwarikihn wasa ehu nan Africa, me e koasoaieng ah emen kin kawehweh. Nanmwarikio kin loaloapwoatieng Pwuhk Sarawi oh poakohng Kauno. Mwurin en Presiden Nelson padahko, nahnmwarikio kohla reh, oh idek reh ni lokaiahn Wai, “Ihs kowe?” President Nelson padahkiong me ih emen Wahnpoaron en Sises Krais me keidier.15 Mwirin mwo nahnmwarikio edek, “Dahme ke pahn kak padahkiong ie duwen Sises Krais?”16
President Nelson ale Pwuken Mormon oh pahkala nan 3 Nihpai 11. President Nelson oh nahnmwarkio koaros wadek sapwellimen Sounkomouro padahk ong mehn Nihpahi kan: “Eri, Ngehi Sises Krais, me soukohp akan kadehdeier pahn kohdo nan sampah. … Ngehi me marain oh mour en sampah.”17
President Nelson kiong nanmwarikio ehu Pwuhk en Mormon, oh nanmwarikio sapengki, “Ke kak kihdong ie taimen de takai kesempwal kan, ahpw sohte ehu mehkot me kesempwal ong ie sang ien esehla Kaun Sises Krais.”18
kaidekin ihte karasaras en mwomwen atail soukohpo ah kin ehukiheng mehteikan Pwuken Mormon me. E kiong koapi en Pwuhk en Mormon ong aramas epwiki samwa kei, oh kin ansou koaros wia ah kadehde pen Sises Krais. Ansou me President Nelson tuhwong aramas lukedo kan, president kan, nanmwariki kan, kaun en wehi kan, kaun en pesnes oh pwihn en pali en lamalam teikan, sohte lipilipil ma nan poahson en Mwomwodiso kan de nan arail pein wasa kan, e kin ansou koaros kasalehda pwuhk wet oh audepe kan. E kak kiong irail soahng tohto me pahn kak mih ni tehpel de pohn dana de nan kapined kan pwe en kak wia mehn kataman pen ah pwarala wasao. Ahpw soh, e kin kihla dahme kin keieu kesempwal ong ih, me kesempwal sang takai kesempwal kan oh taimen kan, ni mwomwen namwarikio ah kawewedahr.
“Mahsen mehlel kan en Pwuhk en Mormon,” President Nelson kosoia, “ahniki manaman en kamwahuihala, kansenamwahuih, kapwurehda, powehdi, kakehlaka, koalolamwahuih, oh kaperenih loalen aramas koaros.”19 I kilangehr koapi kan en Pwuhk en Mormon tengeteng nan pehn irail akan me alehdi pwuhk wet sang rehn atail soukohp en Koht. Sohte ehu kisakis laudsang.
E apwtehn tuhwong first lady en The Gambia nan ah ohpis oh ni karakarahk pil kiong ih Pwuhk en Mormon. E sohte uhdi wasao. E pahkpeseng pwuhk wet oh iang ih wadek, pwe en padahki oh kadehde duwen Sises Krais, Sapwelime Tomwo, oh Sapwelime limpoak ong koaros Sapwelimen Koht seri kan—wasa koaros.
Atail soukohp ieias wiewia ah pwukoah en kadirehkihla sampah ki Pwuhk en Mormon.20 Ahpw e sohte kak kelehpw ki doadoahk wet. Kitail anahne idahwen ih.
Sang ni ah karasaras, I pil kin nantiong oh kehlailki ehukihwei Pwuhk en Mormon.
Me keren ih alehdi pwukoah ehu nan Mazambique. Aramas en wehi kaselel wet ahneki kahpwal en semwehmwe, soumwahu, sohte doadoahk, kisinieng, oh pwihn suwed kan. Ih ahnekihdi ansou mwahu en tuhwong president en wehi oh, Filipe Nyuse. Sang ni ah pekipek, I kapakapki ih oh sapwellime wehi; I padahkiong me kitail pahn kawada tehnpas sarawi en Sises Krais21 nan ah wehio. Kaimwseklahn aht tuhpeneo, I kihong ih ehu koapi en Pwuhk en Mormon ni lokaiahn Portuguese, ni pein ah lokaia. Ni ansou me e alehdi pwuhk wet, I kadehdehki duwen kopworopwor oh inou ong nah aramas akan, me Kauno masaniher nan pwuhko.22
Nan ehu ansou, ai pwoud, Melanie, oh ngehi tuhwong nanmwariki en Lesotho Letsie III oh ah pwoud ni tehnpasara.23 Ong kiht, kahrepen aht mwemweito iei en kiong ira koapi en Pwuhk en Mormon oh ehukiong ira aht kadehde. Ansou me I tamanda mwekido oh ekei, ih tamanda ire ieu en imwin-rahn akan, “Unsek en ai rongamwahu o pahn kohsang rehn me aramas me luwet oh me mengei kan lau lel ni idin sampah, oh mwohn nanmwariki kan oh kaun akan koaros.”24
I pil ehukiongehr Pwuhk en Mormon ong Ambassador en India ong United Nations an Geneva, Indra Mani Pandey25; oh His Holiness Patriarch Bartholomew26 en Mwomwohdiso en Eastern Orthodox oh meteikan koaros. I kin kehn Ngehn en Kauno reht ansou me I kin kihwei “poahson en atail mwomwohdiso”27 oh wia ai kadehde pen Sises Krais, me wia takain pwukekeimw en atail pwoson.28
Eri, Rieiko, Kumwail sohte anahne kohla Mozambique de India de tuhwong nanmwariki kan de kaun akan pwe en kihong emen aramas pwuhk sarawi wet oh inou kan koaros. I luke kumwail, rahn wet, en kihong Pwuhk en Mormon ong kompokepahmw kan oh peneinei kan, iengemw tohn doadoahk, ahmw kaunen soccer, de tohn doadoahk en nan ahmw markedo. Irail anahne mahsen en Kauno me dierek nan pwuhk wet. Irail anahne pasapeng kan ong peidek kan en nan mour en rahn koaros oh ong mour soutuk me pahn kohdo. Irail anahne esehla elen inou me mih mwohrail oh sapwellimen Kauno limpoak ong irail. Koaros mih nan Pwuhk en Mormon.
Ansou me ke kiong irail Pwuhk en Mormon ke ritingada arail madamadau kan oh loalerail kan ong mahsen en Koht. Ke sohte anahne weuwa koapi en pwuhk wet. Ke kak kin share sang nan noumw cell kan sang ni pali kapw ehu nan Gospel Library app.29
Medewehda irail akan me pahn kak alehdi kapai pwehki rongamwahuo nan arail mour, oh kadaralahng irail ehu Pwuhk en Mormon sang noumw cell. Tamataman en kapataiehng ahmw kadehde oh pil duwen pwuhkwet eh kapaiada ahmw mour.
Kompokepahi kan, ni ai wia Wahnpoaron en Kauno, I men pwurehng luke kumwail en idahwen atail soukohp, President Nelson, nan katohtolahn Pwuhk en Mormon pohn sampah. Anahn wet inenen laud, kitail anahne mwekid ansouet. I inoukiong uhk me ke pahn iang patehng nan “doadoahk me keieu laud pohn sampah” iei kapwurupwurpenehn Isreal,30 ni Ngehno Ah pahn kaweiduhk ni amw pahn sewese irail akan me “sohte ese me mehlel o pwehki re sehse iawasa re pahn diar ie.”31 Irail anahne amw kadehde oh kadehdepen mwomwen pwuhk wet ah wekidala amw mour oh kahreiong amw karanihla Koht, Sapwellime popohl,32 oh Sapwellime “peren me keieu laud.”33
I kadehde me Pwuhk en Mormon kounopadahr nan America mahso pwe en kak kalohki sapwellimen Koht mahsen, pwehn wahdo ngehn kan koaros rehn Kaun Sihses Krais oh Sapwellime rongamwahu kapwurupwurdohu “rahn wet.” Ni mwaren Sises Krais, amen.