Kamakamour oh Wihwia Amwail Kadehde

Sang Elder Gary E. Stevenson

Sang Pwihn en Wahnpoaron Ehk-Riemenko

I lukei kumwail en rapahki ahnsou mwahu kan en wia amwail kadehde ni lokaia oh ni wiewia.

Mehn Kapehse

Ni mwomwen ahnsou kan en nan mour ni eh kin kalapw pwarada oh sohte mie kasikpe, kin pil wiawi ni ansou me kumwail pwulopwul. Mweidohng ie ien ehukieng kumwail soi pwot me pid duwen tohn skuhl men nan high skuhl ede Kevin, me pilipilda en seiloakla liki ni ah wia weliepen kaun en tohn skuhl men, ni ah peihn koasia koasoi ehu.

“Ai ansou ahpw kohdo nan laihno, oh soun intingihdi ahd akan ahpw idek rei ia edei. E kilang nah irekdihn ahd akan oh inda, ‘Eri kowe me wia pwutak pwulopwul sang Utah.’

“‘Wewehki ngei kelephw?’ I idek.

“‘Ehng, kowe kelehpw.’ E ahpw kieng ie nei doaroapwe me edeio inting powe me ’Utah’ inting ie pahn edeio. Ni ansou me i katengehieng pohn ai seht, I kak kehn me I wia emen weliepe.

“I ahpw iangih tohn skuhl limen en high skuhl nan elepeider me pil mie ederail kan me pil duwehte edeio. ‘Okoi, kowe mehn Utah. Kowe emen Mormon?’ emen tohn skuhl kau ahpw idek.

“I kak kehn nan pwungen kaun en tohn skuhl kan me kohdohsang sohte lipilipil en wehi kan. ‘Ei,’ I ahpw sapeng ni mehlel.

“‘Ih kumwail me kin kamehlele Joseph Smith, me inda me e kilangada tohnleng kan. Ke sohte udahn kamehlele met, apwe ia?’

“I sehse dahme I pahn inda. Tohn skuhl kau koaros me iang elepeidero ahpw kilikilangdohng ie. I apwtehn peidi, ah koaros ehusoangkinie ehr. Neghi mwur ekis namenekda ahpw ndahieng, ’I ese me Joseph Smith wia soukohp en Koht men.’

“’Iawasa mwo kohsang ie?’ Iahpw medewehla. I sehse me I kolokol rehi. Ahpw koasoi kau me mehlel.

“‘Ehng, mie me indahng ie me kumwail tohn sarawi saliel kei,’ e ahpw indahla.

“Ni mwo, mie ekis sonsuwed miehda ni ansou me wenihmw en elepeidero ohpenda. Ni ansou me se kihpene aht kapang kan, e aluhdihla oh kokouruhr.

“Eri, ngihl ehu ahpw peidekdo mwuri, ‘Mormon kan sou mie ehu songen neirail Paipel?’

“Ai soh. Menlau ieremen pwurehng. I pirekekla oh kilang pil emen tohn sukuhl me iang mih nan elepeidero, adahniki Christopher.

“‘Eden pwuhko Pwuhk en Mormon,’ I ahpw indahla, mentehno irail en dehier koasoia. I pwokada ai kapang kan oh tepida aluhdihla.

“‘Ih pwuhko men me Joseph Smith kaweweh?’ e ahpw idek.

“‘Ehng, ihmwo,’ I ahpw sapeng. I alialuhte kohla songosong ien dehr namenekda.

“‘Eri, ke ese ia mwomwen ai pahn kak alehdi ehu?’

“Iren pwuhk sarawi ehu me i esehla nan semineri ahpw kohdo nan moangei ie. ‘Ih sohte namenengki rongamwahu en Sises Krais.’¹ Ni ansou me met kohda nan moangei iet, I kehn peihn ai namenekda.

“Nan wihko pwon, iren pwuhk sarawio sohte kohsang ie. I sapengala diren peidek kan me pid duwen Mwomwohdiso wen ai kak koaros, oh miehda diren kempoakepahi.

“I diarada me I sohte peikasalki ai mwomwohdiso.

”I kihong Christopher ehu Pwuhk en Mormon. Mwur, ohlo ntingdongie, ndnda me a luke misineri kan en kohla nihmweo.

“I esehla me I sohte pahn namenengki ien ehukiheng mehteikan ai kadehde.”²

I inenen kapingki Kevin ah sohte masak en ehukihda ah kadehde. E wia mehn kakehlail ehu rahn koaros ong towe pwoson kan en Mwomwohdiso nan sampah. Ni ai pahn ehukihwei ai madamadau kan, I men lukei kumwail en medemedewe iren kalelapak pwukat:

I ese oh wewehki dahkot kadehde?
I ese mwomwen ai pahn wia ai kadehde?
Iahnge songen kahpwal akan me mie ni ai kin ehukihda ai kadehde?
Ia mwomwen ai pahn kak kolokol ai kadehde?

I Ese oh Wewehki Dahkot Kadehde?

Amwail kadehde me keieu wia mehkot kesempwal, me kin patehng pepehm loal kan en pali ngehn. Pepehm pwukat kin sansal ni ngihl tikitik, ”meleilei oh malamal.”³ E wia amwail lamalam de eripit en me mehlelo, ni ah kin wia soun kadehde me kin kohsang rehn Ngehn Sarawi. Ni amwail pahn alehdi kadehde wet e pahn wekidala dahme kumwail kin inda oh mwomwen amwail wiewia. Soang kesempwal kan en kadehdeh, me sansalda sang rehn Ngehn Sarawi, kin iangahki:

Koht iei amwail Sahm Nanleng, kumwail wia Sapwellime seri. E poakohng kumwail.
Sises Krais ieias. Iei ih me Ieros en Koht ieias oh amwail Sounkomour oh Soundoar.
Joseph Smtih iei soukoph en Koht me malipilipda pwehn kapwurehdo Mwomwohdiso en Sises Krais.
Mwomwohdiso en Sises Krais en Souleng En Imwin Rahn-akan iei Sapwellimen Koht Mwomwohdiso kopwurupwurdo pohn sampah.
Mwomwohdiso en Sises Krais en Souleng en Imwin Rahn-akan me kopwurupwurdohr kin mih pahn kaweidpen soukohp ieias en rahnwet.

I Ese Ia Mwomwen Ai Pahn Wia Ai Kadehde?

Kumwail kin kasalehda amwail kadehde ni ansou me kumwail kin ehukiheng mehteikan amwail pepehm mwahu kan. Ni atail wia towe en Mwomwohdiso, kitail ahneki ansou mwahu en kasalehda amwail kadehde ni koasoi nan ansou en tuhpeneh kan en Mwomwohdiso de ni kisin ehu peneh kan, de koasoakoasoipeneh kan en nan peneinei, kempoakepah kan, de mehteikan.

Pil ehu wiepen ehukihda ahmw kadehdeh iei wiewia mwahu. Ahmw kadehde pen Sises Krais kaidehn teh ahmw lokaia kelepw—ahpw pil mwomwen ahmw mour.

Ehu ehu ansou kan me kumwail kin wia amwail kadehde de kasalehda sang ni amwail wiewiah kan, amwail loaloapwot en idawehn Sises Krais, kumwail kin luke mehteikan en “kohdo rehn Krais.”⁴

Towe kan en Mwomwohdiso kin kesihnenkihda arail wia sounkadehde en Koht ansou koaros, ni mehkoaros, oh ni wasa koaros.⁵ Ansou mwahu kan en wia met nan momour en mwehi wet en audauwudkihda peihn atail de audepeh kan me kin sawas seweseikitailda me kin kaunopdasahng mehteikan kin sohte mie imwi. Kitail wiewia kadehdeh ni atail poakohng, ehukiong, oh luke, nan mour en ahuahu rahn oh pil nan inderned. Ahmw tweet kan, message kan, oh posd kan pahn ahniki kahrepe laud ni ahmw pahn doadoahnki inderned pwehn ehukihda ia mwomwen Sises Krais ah kin kawekila ahmw mour.

Iahnge Kahpwal Akan Me Kin Pwarada Ni Atail Kin Ehukihda Atail Kadehde?

Soangen kahpwal kan me mie ni ansou en kasalehda amwail kadehde kak en iangahki amwail pahn sehse dahme kumwail pahn inda. Matthew Cowley, emen Wahnpoaren, ahpw koasoiada mwekid wet ni ansou me mweselda ong ni pwukoahn misin me wereiki sounpar limau ni ansou me e sounpar 17 kohla New Zealand:

“I sohte pahn monokehla en ai pahpau ah kapakap akan ni rahn me ih mweselo. Ih sohte kin rong kapakap en kapai me inenen kaselel nan ai mour et. Eri kaimwsekilahn ah kosoi kan ong ie ni railroad station o, ‘Nei pwutak, ke pahn kowei oh wia amw misin; ke pahn onopiki; ke pahn wiahda amw padahk kan; oh ekei pak ansou me ke pahn kin likwerida, ke pahn kin medewe me ke kounopadahr, ahpw ansou me ke pahn kesihnenda, amw mwahliel en pahn sohla audepe.’ Ih kehn ehr songen mwekid wet pak tohto.

“I inda, ‘Dahme ke pahn wia ni ansou me ahmw madamadau pahn sohrala?’

“E ahpw inda, ‘Ke pahn kesihnenda mwo oh sang ni unsek en amw mour, ke kadehdehki me Joseph Smith wia soukohp en Koht ieiaso, oh madamdau kan koaros ahpw pahn peido nan amw madamadau oh koasoi kan nan ewemw ong mongiong koaros me rongorong.’ Oh nan ai madamadau, pil sohrala ni ansou en ai misin … , pil kiheng ai ansou mwahu en wia ai kadehde nan kemwekid kalaimwun ehu me mih nan poadoapoad en sampah me pid kalohpwulahn atail Kaun. Song ekei pak, pwutak kan oh serepein kan. Ma solahr me kumwail pahn inda, kadehdehki me Joseph Smith wia soukohp en Koht, oh soahng koaros me pid poadoapoad en Mwomowhdiso pahn pwarada nan amwail madamadau.”⁶

Me duwehte, Preseden Dallin H. Oaks ah kasalehda me, “Ekei kadehde kan kin mwahu ni amwail pahn kin kesihnenkihda amwail kadehdeh sang ni kelepwikihdi oh kapakap kin irail.”⁷ Ngehno kin kadehdehieng soun kapahrek kan oh me kin rongorong kan.

Pil ehu kahpwal me soi en Kevin pil kasalehda iei masepwehk. Ni Paul ah intingieng Timothy:

“Pwe Koht sohte ketkihong kitail ngehn en masak; ahpw manaman, oh limpoak. …

“Kumwail dehr namenengki kadehdehki duwen atail Kaun.”⁸

Pepehm en masepwehk sohte kin kohsang rehn Kauno ahpw sang rehn pali suwedo. Ahniki pwoson, me duwehte Kevin wia, pahn kak en sewesei kumwail en powehdi pepehm pwukat oh ahniki saledek en ehukiwei dahme mih nan amwail mongiong.

Ia Mwomwen Ai Pahn Kak Kolokol Ai Kadehde?

I kamehlele me kadehde mihmi loaletail, ahpw, pwe en kak wie mihmi oh wie kekeirda, Alma padahngki me kitail anahne en kamkamour atail kadehde ni keneinei.⁹ Ni atail pahn wia met, “e pahn miehda kalewe, oh keirda, oh pahn miehda wah.”¹⁰ Ma sohte met, “ah e pahn sohrala.”¹¹

Towe kempoake kan en neitail Keieu Presidensi kihehng kitail ehr kaweid en ahniki kadehde.

Presiden Henry B. Eyring padahkiong kitail ni limpoak me “momourki mahsen en Koht, kapakap mehlel, oh peikiong Sapwellimen Kauno kosonned akan kin anahne en wiawi ansou koaros pwe ahmw kadehdeh en keirda oh kehn ahneki kehlail.”¹²

Presiden Dallin H. Oaks kataman ong kitail me pwehn kolokol atail kadehde, “kitail en alehda kamadipw sarawi nan ehu ehu wihk (tehk D&C 59:9) pwehn ahniki inou sarawi me ’Sapwellime Ngehn en ketiket [rehtail]’ (D&C 20:77).”¹³

Oh President Russell M. Nelson kaweidki ansou keren:

“Kamwengehki [ahmw kadehde] mehlel kan. …

“… Kamkamourkin kumwail mahsen akan en soukohp en mahsoko oh ansou wet. Peki rehn Kauno en padahkihong kumwail ia mwomwen amwail pahn kak rong Ih mwahu. Kohla nan tehnpas sarawi ansou koaros oh wia doadoahk en poadoapoad en peneinei.

“… Ahmw kadehdeh en wia mehkot me keieun kesempwal.”¹⁴

Ni Kaimwisekala

Riei ohl oh lih oko, I inoukieng kumwail me ni amwail pahn esehla ni unsek dahkot kadehde, oh ni amwail pahn ehukihwei, kumwail pahn powehdi kahpwal akan en peikasal oh masepwehk, pahn sewesei kumwail en kak kakairada oh kolokol pwukoah kesempwal wet, me iei amwail kadehde.

Kitail inenen kapaikihda tohtohn irail soukohp en mahsoko oh rahn wet me kasalehieng kitail arail kadehde.

Mwurin pwoulahn Sises Krais, Peter kesihnenda oh kadehdehki:

“Pwehn sansal ong koaros … sang ni mwaren Sises Krais en Nasared, me kumwail kalohpwualar, me Koht ketin kamaurada sang mehla, … iei ohl menet me kesinen mwohmwail. …

“… Pwe sohte ehu ahd me mih pahn lahng me kohieng aramas akan, eri ihme kahreda kitail pahn komourla.”¹⁵

Amulek, mwurin en Alma padahk en pwoson, ahpw kasalehda: “I pahn kadehdeieng kumwail ngei me mepwukat me mehlel. Kilang, I indahieng kumwail, me I ese me Krais pahn ketido nan pwungen seri en aramas akan, oh e pahn ketin matkihla dihp akan en sampah; iei me Kauno Koht ketin mahsanier.”¹⁶

Joseph Smith oh Sidney Rigdon, ni ara kilangada iasadahn Sounkomouro nan ouraman ahpw kadehdehki:

“Oh ansou wet, mwurin diren kadehdeh kan me wiawihongehr ih, iei kadehdeu met, me se kihong ih: Me e ketin ieias!

“Pwe se kilang ih, ni palimaun en Koht; oh se rong ngilen koasoi kadehdehki me ih me wia Sapwellimen Sahm.”¹⁷

Riei ohl oh lih oko, i lukei kumwail en rapahki ahnsou mwahu kan en wia amwail kadehde ni lokaia oh ni wiewia. Ehu ansou mwahu me ahpwtehn kodohng ie, ni keimwseklahn mihting ehu me se wia ong mayor en kapidal en South America, nan sapwellime ohpis me patehng irail kaun teikan en ohpiso. Ni aht kaimwsakala ni pepehm mwahu, I inangiada ien ehukieng irail ai kadehde. Ni ai idawehn pepehm me i ahniki, I kadehdehki me Sises Krais iei Ieros en Koht ieias oh me wia Sounkomour en sampah. Soahng koaros wekila ansouohte. Ngehn me miher nan perehu sohte me kak kahmahmkihla. Likamwete mehkoaros mwekidkihda. “Sounsawaso … kin kadehdeki duwen Sahm oh Nah.”¹⁸ I inenen kapingki ai kak kiheng ie eimah ien kak wia ai kadehde.

Ni ansou me soahng wet kin kohdo, alehda oh ehukiwei ni kaping. Kumwail pahn kehn pehpehm mwahu en Soun Koaloalamwahuo loalamwail ni amwail pahn wia.

I kihehng kumwail ahi kadehde— me Koht iei Samatail Nanleng, Sises Krais ieias, oh Mwomwohdiso en Sises Krais en Souleng en Imwin Rahn Akan iei Sapwellimen Koht mwomwohdiso pohn sampah rahn wet me alialehdi kaweid sang neitail soukohp, Presiden Russell M. Nelson. Ni mwaren Sises Krais, amen.