Karaniala Sounkomouro
Ni atail nanantiheng en esehla oh poakoahngala Sounkomouro, kitail kin katohreikitailsang mehteikan ki atail inou ong Koht, kin weksang mehteikan, sohte duwehte oh kin keneinei,sang ni atail kin mihmite rehn irail akan me gahme re kamelelehkan kin wekisang kitail.
Rieiko, soutik wet i men koasoaiwehng kumwail kan me kin karakarahk oh poadidi ni amwail kin idawehn Sihses Krais. Ni ai kin kilang wen kaselel en amwail mour oh amwail pwoson atail Sounkomouro nan wehi wet oh pil nan wehi teikan nan sampah, ai poakohng kumwail kin laudla.
Ni Sapwelime kalohk eh kereniongehr imwsekila, Sapwelime werengko peki rehn Sises en patohwanehng irail “kilelen [Sapwelime Ketdo Keriauo], oh imwin sampah.”1
Sises ketin mahseniheng irail soahng kei me pahn mowehdo Sapwelime ketdo sapahlo oh kaimsekihla me “ni soahng pwuko koaros ah pahn kepweipweidahr, [kumwai pahn] ese me [ansouo] kerendohr.“2
Nan kapokon lap nekiero, I nantiheng rong mwahu President Henry B. Eyring: E patohwan, “emen emen kitail,” e ketin doula “sohte lipilipil was kitail mihie, ese me kitail mihier nan ansou keper kei. … Mehmen me mie mese kak kilang sain kan en ansouo oh kak rong mahsen en soukohp akan eseier me mepwukat mehlel.”3
Pwehki irail, Sises masanih: “meid pai kumwail pwehki mesemwail kan, kin kilang wasa: oh salengemwail , kin rong wasa.”4 Kapai wet en kodohng kitail ni atail pahn rong mahsen en Kauno sang Sapwelime soukohp akan oh meteikan nan kapokon lap wet.
Dihpw mwahu(wheat) oh dihpw suwed(tares)
Kauno ketin mahsanih me mwohn Sapwelime ketdo sapahlo, “wheat” me e kawewehda “seri en wehi o,”5 pahn keirda limwahn “dihpw suwed kan”, de irail akan me sohte kin poakoang Koht oh sohte kin kapwaiada Sapwelime kosonned akan. Irail koaros pahn“keirda wasahtehkis,”6 limwahn emen emen.
Ih mwomwen atail mwehi met loa Soumkomouro pahn sapahldo, e pahn diren me mwahu oh me sued pali koaros.7
Ele komw kehn me komw saikinte rasehng tuhke mwahu kan. Ahneki kanengamah ong pein kumwail! Kauno ketin mahsanih me tuhke mwahu kan pahn osada.8 Kitail iei Sapwelime Souleng en Imwin-rahn akan, oh mendahte atail saik kekehdi wen me kitail men lel, kitail mehlelki atail men wia Sapwelime ni mehlel.
Kakehlaka atail pwoson Sises Krais.
Kitail ese me ni me sued kan ahr wia tohtohla sampah, palingenetail oh pali ngehn en atail peneinei oh kepoakepahtail kan pahn anahne kitail en apwaliada, katengehdi, oh kakehlaka kalewen atail pwoson Sihses Krais. Wahnpoaron Paul kaweidkinkitail kitail en poadokkitaildi,9 oh ketengeikitaildi10 nan atail limpoak ong Sounkomouro oh nan atail ngoangki idawehn Ih. Rahnwet oh rahn kohkohdoh pahn anahne kitail en kin nantiheng pereikitaildi pwe kitail dehr, pirekla, dangahngahla, oh soukautihla.11
Mendahte mwekid en sampah eh wia lalaudla wasa koaros, kitail en dehr masak. Kauno sohte pahn ketin likidmeliehla Sapwelime aramas en inouo kan. I kin miehte kalaudla en manaman en kisakis en pali ngehn oh kaweid sang powe ong me pwoson kan.12 Apw, kapai kapatapat manaman wet sohte kin audahte kohdohng kitail pwe kitail iang dih en rahn pwukat. Kitail kin alehdi ni atail kin kakehlaka atail pwoson Kaun Sihses Krais oh kapwaiada Sapwelime kosonned aka, ni atail kin esehla Ih oh poakohngala. Sihses ketin kapakap oh masanih, “Oh iet mour soutuk: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”13
Atail kin pwoson Sihses Krais oh kin nantiheng idawehn Ih, kaidehn soangen pilipil de mwekid ieu me kitail pahn kin wiahte pak ehu eri nek. E wia mwekid me sarawi oh me kin ahnahne kitail en kin koadoahke, ni eh wia lalaudla erein atail mour, lao lel ni ansou me kitail pahn kelepwikihdi ni Alualiwehn Kauno.
Ni tuhke mwahu kat wie kekerida iang dihpw en Sampah, ia mwomwen atail kak kalaudehla uwen atail pahn loaloapwoat ong Kauno nan rahn akan me kohkohdo?
Iet iren kaweid siluh:
Kaduhdi paliweretail kan nan mour en Sises.
Keieu, kitail kak duhla nan atail songosong en esehla Sapwelimen Sihses mour, lingan, manaman, oh tomwpen dihp. Sounkomouro mahsanih,“Sohpeidohngie nan madamadau koaros.”14 Wahnpoaron Sohn masanih me, “kitail kin poakoahng Ih pweki Ih me tepin poakoahng kitail.”15 Ni uwen Sapwellime limpoak me kiatil kak kehn wia lalaudla, atail limpoak ohng Ih pil wia lalaudla, pwehki met, kitail nantieng idawehn Sapwellime karasaras en poakong oh apwalih mehn impatail kan. Ni atail kin pousehla kerekerenlahng Kauno, uwen atail kak kilang Ih ni sansal kin wie lalaudla.16 Kitail kin wauneki Ih, oh kitial kitail kin song en kahlmangih Ih.17
Wiahda Inou ong Kauno
Keriau, ni atail kin esehla oh poakohngala Sounkomouro, kitail kin men inoukiheng atail utuht oh koapwoaroapwoar. Kitail kin alehda inou kan Reh. Kitail kin wiahda inou pwukat ni atail pepdaisla, oh kakehlaka irail ni atail kin koluhkihla oh peki mahkepen dipatail kan rahn koaros oh kin kasiskasik atail pahn ale kamadipw sarawio nan wihk koaros. Kitail inoukihda me kitail pahn “tamataman Ih ansou koaros, oh kapwaiada Sapwelime kosonned akan.”18
Ni ansou me kitail onopadahr, kitail kin alehda tiahk sarawi oh inou kan en nan tehmpas sarawi. Ni atail kin kehn pepehm sarawi en was ile ni atail kin mih nan tehnpas en Kauno, kitail kin men wiahda inou ong Koht oh kakehlakahla atain ngong en kapwaiirailda.
Atail kin wiahda oh kapwaiada inou kan kin koaloalehla atail limpoakoahng Sounkomouro. Nan Liahonaen sounpwunget, President Russell M. Nelson mahsani: “[atail] inou sarawi [kan] pahn kahreda atail karanihla Ih. … Koht sohte pahn likidmeliehla Sapwellimehkan kan me nanantiheng tengedi Reh.”19 Nin duwen Presiden Nelson ah masanih menseng wet, “Sang ni kasarawih lahn ehu ehu tehnpas sarawi, ehu manaman en powe kin kohdo nan sampah pwe en kakehlailih kitail oh kaluwetehla mwekid kehlail akan en pali suwed o.”
Kitail kakehr wehwehki kahrepen Kauno Eh ketin kaweidki sapwellime soukohp en kaiodo Tehnpese limwahtail pwe kitail en kalapw pwurala loale?
Ni atail kin doulong nan tehnpesen Kauno, kitail kin saledekdahsang kapwunod kan en sampah, ni atail kin kasukuhlki kahrepen mour wet oh kapai sarawihkan me kitail kak alehdi pwehki Sounkomour, Sises Krais.
Apwali mwahu Kisakis en Ngehn Sarawi
Kesiluh en ai iren kaweid: nan seiloak sarawi wet, kitail en kin kolokol, wauhniki, oh pere kisakis en Ngehn Saraweio. President M. Russell Ballard oh Elder Kevin W. Pearson koaros koasoia duwen kokohp me kohsang President Nelson me ketihtiki oh ih pahn kapwurehiong: “E sohte pahn kak kehn komourla ni palingehn ma sohte kaweid, ahl, sawas, oh dodohk en Ngehn Sarawio.” E wia kisakis ieu me inenin kesempwal. Kitail kin wia atail kak koaros pwe en apwalih mwahu atail mwekid kan nan rahn koaros pwe menen Ngehn Sarawio en kak ieiang kitail. Kitail wia mehn serepen sampah, oh ma mia anahnepe, kitail kin pilada kitail en weksang mehteikan. President Dallin H. Oaks kalelapak rehn me pwulopwul kan: “Kumwail [kak] ‘weksang mehteikan?’ … [Me pil inenin] kesempwal … iei pilipil kan me kitail wiwiahda nan pein atail mour. … Kumwail kin mwokimwokid kowei pelpelian suwed en sampah?”22
Pilada ken Kak Wekisang Sampah
Ansoukis samalahro, i luke iral akan me kin iang idawehn Krais ren kasalehda ma mie ansou me arail pilipil karehieng arail weksang mehtei kan. Ih alehdi pasapeng tohto.23 Iet ekei pasapengko:
Amanda: Ngehi Nurse en nan teil en wasaht. I kin song apwalih me kalapwuhs kan duwehte dahme Krais pahn wia.
Rachel: Ngehi soun koul men, i kin kalapw likawihte sohte lipilipil dahme kin kohiengie, mendahte ma e kin nohn kasalawar de soh. Pwehki ai kolahr nan tehmpas sarawi, i ndahieng irail me en kin ekis reirei. Irail sohte nohn perenki apw re pil seireniengete oh wiahda. I sohte men kesehla pepehm meleilei oh popohl me kin sang ni ai kin soun kadehdepen Krais ansou koaros.
Chriss: Ngehi emen me apwtehn koamoaldihsang sakaun wai, i wia memper men oh I kin iang kohla nan tehnpas sarawi. I sohte kin namenekki koasoaia ai luwetieng mehn kasahliel oh ai kadehdepen Sapwelimen Sihses Krais Tomwo.
Lauren: I kin iangih iengei tohn high school kei intingih sipai ieu. Iengeiko men ai palio en kin mwomwomwen namenekoh wiahkintehieu pwisirekida oh loakia sued. Re kin idihdingehngie, apw i ngihtehtehkiheng irail me soh.
Adam: Diren aramas sohte kin kamehleleie ni ahi kin ndahing me I kin kapwaiada kosonned en Mour Mwakelekel oh liksang kilel oh kasido suwed kan. Irail sohte wehwehki uwen laud en popohl oh meleilei nan ahi madmadau kan.
Ella: Ai pahpahu kin iang pwihn en LGBTQ. I kin natiheng eselamalamieng irail apw pil ne ansouohte kolokol tengeteng ai kadehdepen Krais oh tengedieng dahme i kamehlele.
Andrade: I koasoanehdi me ia pahn iangaiangete sarawi mendahte ai peneineiko ahr solahr iang.
Eri mwuhri, sang Sherry: Se iang kamadipw ehu ni ihmwen kepinao. Re kiheng koaros wain pwe koaros en kak “toast.” I ngihtehtehkiheng irail ren wahdohngie pihl, apw re nda me e pahn kamwamwahl ong kepinao. Koaros kawada neirail kepin wain, ah i kawad nei kepin pihlo! Kepinao sohte pil wiahki mehkot.
Presiden Nelson masanih, “Mehlel, kitail momour nan Sampah wet, ahpw atail koasoandi kin weksang koasoandi en sampah pwehn sawas oh liksang suwed akan en sampah.”24
Anastasia, me wia nohno kapw men nan Ukraine, mihmi nan imwen wini oh ahpwtehn neitikiehdi pwutak emen, ni ansou me mahwen tepida nan Kyiv nan Pepweri samwalahro. Nurse ngilen mehn doulongodo oh karuwaikihtada nda, “Ale noumw serien, kidimkipeki plankes, oh kohla nan hallo—met!”
Mwuhr, Anastasia apw nda:
“I sohte leme me e pahn wia soangen apwale ni pahn wiahla nohnohmen, … apw … i nanantihengete medemedewe … kapai oh manaman kan me i kilang. …
Met, … e mwomwen me i pahn sohte kak mahkehng irail akan me karehda soangen kamwomwala oh medek me wiawi.… , apw pwehki ai kin idawehn Krais, I koapwoaroapwoarki me pahn kak ahneki [mahk]. …
“I sehse dahme pahn wiawi mwuhr … apw i ese me ni atail pahn kolokol oh kapwaiada inou kan Ngehno pahn ieiang kitail ansou koaros, … oh pahn kahrehieng atail kak kehn popohl oh koapwoaroapwoar, … pil lella nan ansoun kahpwal kan.”24
Inou en Mour Soutuk oh Lingan en wein Celestial
Riei manakapw oh peinakapw akan koaros, I inenen kapaikihda ien iang alehdi limpok en Sounkomour, Sises Krais. Ih ese me E ieias oh kin kaluhwa Sapwelime dodohk sarawi wet. Sohte koasoi unsek me kak kasalehda ai limpok oh Ih.
Kitail koaros iei “seri en inou kan” kapkapil sampah nan sapw oh wehi koaros, kitail meh rar kei, ni atail awiawi Ketido sapahl en atail Soundoar oh Sounkomour. Ni atail wia serepen mehn impatail kan, kitail kin parapar ingeitail kan, atail madamadau, pilipil, oh wiewiahkan ni keneinei. Ni atail nanantiheng esehla oh poakoahngala Sounkomouro, kitail kin katohreikitailsang mehteikan ki atail inou ong Koht, ni atail pilipil oh wiewia kin weksang mehteikan, ni atail kin wauneki Ih oh Sapwelime padahk kan, apw pil ni ansouohte dehr kadohkitailsang me arail wekisang kitail.
E wia seiloak mwahu ieu atail wiwia tuhke mwahu kan nanpwungen dihpw suwed kan, ekei ansou kansensuwed aphw ansou koaros atail pwoson kak kameleilei. Ni amwail pahn mweidehng amwail limpoakohng Sounkomouro oh Sapwelime limpoak oh kumwail en kihrdieng nan loalemwail, I inoukiheng kumwail me kumwail pahn ahneki koapwoaroapwoar laud, meleilei, oh popohl nan amwail kahpwal kan. Sounkomouro inoukihong kitail: “Ih [pahn] kipene nei aramas akan, duwehte karasaras en dihpw mwahu oh dihpw suwed, pwe dihpw mwahu kan en kak neknekla ong mour soutuk, oh kamwaramwarkihdi lingan en wein celestial.“26 Ni mwaren Sises Krais, amen.