Sises Krais Me Wia Kakehlepen Me Pwulopwul Kan
Komw kopworopworki Sises Krais. E pahn ketin kaweihd kumwail ong ni ahl me pwung. Ih me wia kehlepomwail.
Ni ai wie kaukaunopehng padahk en rahnwet, I kehn pepehm laud ehu ien padahk ong peinakapw oh mwahnakapw kan.
I pil men wia ai pato ong irail kan me pwulopwul rahnteio, oh pil mehlel ong irail kan me pil solahr kak taman ansou me re pwulopwulo.
Oh I pil patpatohieng koaros me kin poakoahng sapwellimatail aramas pwulopwul kan oh me kin kupwurki irail en pweida nan arail mour.
Oang dih me kokohdahkan, mie rohng kaperen ehu me I men ehukieng kumwail sang amwail Sounkomour, Sises Krais.
Sapwellimen Sounkomouro Rohng Kaperen ong Kumwail
Kempoakepahi kan, ma Sounkomouro ketiket wasa kiset ansou wet, dahme E pahn mahsaniong uhk?
I kamehlele me E pahn ketin tepkihda sang ni kasalehda Sapwllime limpoak ong kumwail. E pahn kak en mahsanihwei ni lepin mahsen kan, ahpw e pahn pil pwulewei ni wen kehlail ehu—me pahn sang ni Eh ketiket wasahuo—kumwail udahn pahn ese, e pahn sair nan amwail mongiong kan, oh kadirehla palingenimwail kan!
Oh ahpw, pwehki atail luwet oh sohte unsek, miehte ekei iren kapwunod kan me pahn wailong nan atail madamadau kan. Kumwail pahn kakete tamanda sapwung kan me kumwail wiahda, ahnsou kan me kumwail lohdi nan kasongosong, soahng kan me kumwail mentehno sohte wia—de mentehno kumwail wia mwahusang.
Sounkomouro pahn kak kehn, oh I kamehlele me E pahn ketin ketkihong kumwail koapwoaroapwoar sang ni lepin mahsen kan me E ketin mahsaniher nan iren pwuhk sarawih kan me mahsanih:
“Kumwail dehr masak.”1
“Dehr peikasal.”2
“Kin ahniki peren.”3
“Ieremen mweidehng amwail mongiong en kin ahniki insensuwed.”4
I sohte leme me E pahn ketin song en mendahkihla amwail sapwung kan. E sohte pahn katikala irail. Soh, E pahn mahsaniong kumwail en koluhla—kumwail en pwilikihdi dipamwail kan, wekila, pwe En kak mahkohng kumwail. E pahn katamankihong kumwail me pahr 2,000 [riekid] samwalahro E ketin kapaihkadahr oh lokolongki dihp akan pwe kumail en kak koluhla. Iei met me wia ehu kisakis en kisehn pilahn en peren soutik me Samatail Nanleng me diren limpoak ketkihong kitail.
Sises pahn kak kasalehda me amwail inou sarawih kan ong Ih—wiawihda ni ansou me kumwail pepdaisla oh kin katakataman nan ansou koaros me kumwail kin tungoale kamadipw sarawi—kin kiheng kumwail ehupene kesempwal ehu ong Ih. Songen ehupene me iren pwuhk sarawih kan kawehweh ni ah kin pwukopwukpene pwe sang ni Sapwellime sawas, kumwail pahn kak kapaihk songen katoutou koaros.5
I kamehlel me Sounkomour Sises Krais pahn ketin kupwurki kumwail en kilang, pehm, oh ese me Ih me wia kakehlepomwail. Met sang ni Sapwellime sawas, e pahn sohte mie imwi ong dahme kumwail pahn kak en pweida loale. E pahn sohte imwin dahme kumwail pahn keke. E ketin kupwurki kumwail en kin kilang kumwail duwehte E kin ketin mahsanih kumwail. Oh met me inenen weksang mwomwen sampah ah kin kilang kumwail.
Sounkomouro pahn ketin kasalehda, ni sohpeikasal, me kumwail iei Sapwellimen Koht Lapalahpieh serepein oh pwutak kan. Samamwail Nanleng wia aramas keieu lingan oh lapalap nan sampah, me diren limpoak, popohl, mwakelekel, sarawi, maraihn, kadek, oh mehlel. Oh ehu rahn E ketin kupwurki kumwail en ahnikihla soahng koaros me E ketin ahniki.6
Iei met me kahrehda kumwail mihmihki pohn sampah—kumwail en kak esehla, kekeirda, oh pweida mwahu oh wiahla soahng koaros me Samwamwail Nanleng ketin kapikumwailkihda.
Pwe met en kak pweida, E ketin kadaredo Sises Krais en wia amwail Sounkomour. Iei met me wia kahrepen Sapwellime pilahn en peren soutik keieu laud, Sapwellmie Mwomwohdiso, Sapwellime prihsduhd, iren pwuhk sarawi kan—mepwukat koaros.
Iei mwo me kumwail dokedoke. Iei mwo me pahn wia amwail mour en ehu rahn. Peihn amwail pilipil!
Mehlel oh Pilipil kan
Amwail manaman en pilipil me wia pwurien Sapwelimen Koht pilahn oang amwail peren soutuk.7 Ei ni mehlel, Samamwail Nanleng udahn kupwurki kumwail en pilada popohl soutik Reh, oh E pahn ketin seweseikumwail en alehdi, ahpw E sohte douluhl pahn idingehng kumwail.
Eri E ketin mweidohng kumwail en pein pilada: Maraihn de rotorot? Mwahu de suwed? Popohl de kapwunod? Mour soutik de mehlahn palingehn?8
E ngoaren me pilipil pwukat me mengei e? Ahpw soh pwe pohn sampaht, e mwomwen apwal sang dahme sansal.
Kahpwalpe pwe kitail sohte kin kalapw kilang soahng kan ni sansal mwahu me kitail mwahuki. Wahnpoaren Paul karasahieng met duwehte atail kilangwei “pwar kilahs ehu me rotorot.”9 Diren sawehweh pohn sampaht me pid duwen dahme pwung oh sapwung. Kawehwehpen me mehlel kan wekideklahr oh wiadahr me suwed kan en mwomwen iei me pwung oh me pwung kan wialahr me suwe.10
Ahpw ni amwail pahn ngoangki rapahki me mehlelo—mour soutik, mehlel kohkohlahte—amwail pilipil kan pahn wie marmaraihnla. Ei, kumwail pahn ahnikihte kasongosong kan oh kahpwal akan. Me suwed kan pahn wihwiawihte. Kasapwurupwur kan. Kapahtou kan. Ahpw kumwail pahn kakehng ni ansou me kumwail pahn ese ihs kumwail, dahme kahrehda kumwail mihki wasaht, oh ni ansou me kumwail pahn likih Koht.
Eri iawasa kumwail pahn diar ie me mehlelo?
E mih nan rongamwahu en Sises Krais. Oh unsek en rongamwahuo iei me padahkpe mih nan Mwomwohdiso en Sises Krais en Souleng en Imwin Rahn-akan.
Sises Krais mahsanih, “Ngehi me ahl, ngehi me mehlel, oh ngei me mour: sohte me kak kolahng Semei ma soh ngehi.”11
Ni ansou me mie pilipil kesempwal kan me kumwail anahne pilada, Sises Krais oh Sapwellime rongamwahuo me keieu wia pilipil kaselel. Ni ansou me mie amwail iren peidek kan, Sises Krais oh Sapwellime rongamwahuo me wia keieu pasapeng kaselel. Ni ansou me kumwail kehn luwet, Sises Krais me wia kehlepomwail.
E ketikihong roson ong me pwangadahr kan; oh ong irail kan me solahr angirail, E kalaudehla arail kehlail.
Irail kan me kin awiedo Kauno pahn kin pwurehng kakehlailda sang ni Sapwellime roson.12
Ong Kakehlepen me Pwulopwul kan
Pwehn seweseikumwail rapahki Ahlo oh seweseikumwail en kak alehda sapwellimen Krais padahk sarawih kan en wia mehn kaweihd nan amwail mour, Mwomwohdiso en Sises Krais en Souleng en Imwin Rahn-akan kaunopadahr mehn sawas kapw ehu, me wia kisehn pwuhk en Ong Kakehlepen me Pwulopwul kan
Pahr 50 [limeisek] douwer powe, Ong Kakehlepen me Pwulopwul kan wiahier mehn kaweid ong dih tohto en me pwulopwul en Souleng en Imwin Rahn-akan I kalapw kolokol ehu kapi nan ai pwokid, oh I kin ehukieng aramas akan me kin ese duwen mwomwen atail koasondih kan. Eri met mie soangen mehkot kapw kei me kapatapatieng oh mwahu ong kahpwal akan oh kasongosong kan en ansou wet. Pwuken Ohng Kakehlepen me Pwulopwul Kan, me kapwo, miehier nan internet nan lokaia limeisek E pahn wia mehn sawas laud nan amwail pilipil kan oang amwail mour. Kumwail kasamwohieng nan loalemwail kan oh pil ehukihong iengomwail kan.
Iren kapatapat kapw wet me patehng Ohng Kakehlepen me Pwulopwul Kan iei me koasoia Mehn Kaweihd ong Wiahda Pilipil kan.
Pwehn udahn sansalamwahu, mehn kaweihd keieu kaselel me kumwail pahn kak ahniki ong wiahda pilipil kan iei Sises Krais. Sises Krais me wia kakehlepen me pwulopwul kan.
Eri kahrepen pwuhk wet me koasoia Ong Kakehlepen me Pwulopwul kan ie pwehn idialahng Reh. E padahkiong kumwail duwen mehlel soutik en Sapwellime rongamwahu kopwurupwurdou—mehlelo me pid duwen ihs kumwail, ihs Ih, oh dahme kumwail pahn kak en alehdi sang Sapwellime roson. E padahkiong kumwail ia mwomwen amwail pahn pilada pilipil mwahu sang mehlel soutik kan me sansalehr.13
E pil inenen kesempwal ong kumwail en ese dahme pwuhk en Ohng Kakehlepen me Pwulopwul Kan sohte kak wia. E sohte pahn wiahda pilipil kan ong kumwail. E sohte pahn kiheng kumwail pasapeng en ma “ei” de “soh” ong pilipil kan koaros me kumwail pahn ahniki. Ong Kakehlepen me Pwulopwul kan en dokehte poahson en amwail pilipil kan. E dokehte wihwia mwahu kan, padahk sarawih kan, oh mahsen kesempwal kan ahpw kaidehn ong tiahk akan.
Kauno, sang rehn Sapwellime soukohp akan, ansou koaros kaukauweid kitaihlahng wasahuo. E ketin pekpeki rehtail en “en kakehlakahla palingenatail pwe kitail en kak ale kaudiahl.”14 E ketin luke kitail en “rong Ih.”15 E ketin lukluwerih kitail en idawehnla Ih ni wasa ileilei kan oh wasa sarawih kan.16 Oh kitail koaros kin esehla ni songen mwohmwte ehu nan wihk koaros nan Kohdo, Idawehn Ie.
I leme mehn kaweihdo kak kihong kumwail ehu lisd reirei en likou kan me kumwail sohte pahn likawih, lepin koasoi kan me kumwail sohte pahn inda, oh kasdoh kan me kumwail sohte pahn kilang. Ahpw mehlel e pahn kak wia mehn sawas laud ong nan mwomwohdsoht pohn sampah pwon? Sang ni wiepehu mehlel e pahn kak kaunopuhkada ong momour en Krais?
Joseph Smith mahsanih, “I padahkihong irail padahk mehlel kan, oh irail me pahn katangahwei.”17
Oh Nanmwarki Benjamin ahpw mahsanihong sapwellime aramasoko me mih nan Pwuken Mormon, “Eri, I sohte kak ndaiong kumwail soahng koaros me kumwail kak dipikihda; pwe mie soangen wiepe oh mwohmw kei, iei me I sohte kak wadekedi pwehki araril nohn tohto.”17
Nanmwarki Benjamin ahpw doula oh mahsanih, “Ahpw ih uwen me I kak indahiong kumwail, … kilang pein kumwail, oh amwail madamadau kan, oh amwail kaosoi kan, oh amwail wiewiah kan, oh kasawih kosonned akan en Koht, oh pousehla pwoson, atail … Kaun, pil lel ni imwin amwail mour.”19
E sapwung kitail en ahniki kosonned akan? Ni mehlelo soh. Kitail koaros anahne ansou koaros. Ahpw e sapwung ma kitail pahn tehkete kosonned akan oh moanekehla Sounkomouro. Kumwail anahne esehla kahrepeh kan oh mwomweh kan, oh kumwail ahpw pahn kak tehk wahn amwail pilipil kan. Kumwail anahne kiheng amwail likilik rehn Sises Krais. E pahn ketin kaweihd kumwail ong ni ahl me pwung. Ih me amwail kehlail.20
Manaman en Padahk Mehlel
Ong Kakehlepen me Pwulopwul kan ahniki mahsen kehlail en Sises Krais. E ahniki kehlail en lukei kumwail en wiahda pilipil kan me pahn pid duwen mahsen en Krais. Oh e pil ahniki kehlail en kawewehda kapai kan me Sises Krais inoukiheng irail kan me idawehn Sapwellime Ahlo.21
Preseden Russell M. Nelson padahngki me: “Ni ansou me amwail ineng laud en mweidong Koht en kaunda [amwail mour], … pilipil en koasondih kan pahn mengeila. … Songen kahpwal tohto pahn sohla wia kahpwal kei! Kumwail pahn esehla likou mwahuda. Kumwail ese dahme kumwail pahn kilang oh wadek, iawasa kumwail pahn mwemweihtih ie, oh ihs me kumwail pahn patehng. Kumwail ese dahme kumwail men koadoahkehda. Kumwail ese songen aramas dah me kumwail … men wiahla.”22
Wiewia Mwahu Keieu Laud
Sises Krais kasik wiewia mwahu keieu laud kan ong Sapwellime tohnpadahk kan. Oh luhk me kohieng irail en rapahki ni ngidingid Kupwure oh en momourki Sapwellime mehlel kan me wia wiewia keieu laud me mie!
Kesempwalpen pilipil kan en paliwar oh palingehn en dehrte poason sang peihn dahme kumwail mwauhki, de dahme pahn mwahu de pwopwuler.23 Kauno sohte mahsanih, “Kumwail wia dahme kumwail mwahuki wia.”
E ketin mahsanih, “Mweidong Koht en Kaunda.”
E pil ketin mahsanih, “Kohdo, idawehn ie.”24
E pil mahsanih, “Momour ni sarawih, ni ileile, oh ni aramas koahiek men.”
E pil mahsanih, “Kapwaiada ai kosonned akan.”
Sises Krais me wia atail karasaras, oh kitail nantihong wen atail kak koaros en atail mour en idawehn Ih.
Kempoakepahi kesempwal kan, pwe ien pil ehu kapwurehieng, ma Sounkomouro wie ketket wasaht rahnwet, E pahn ketin kasalehda Sapwellime limpoak poatoapoat ong kumwail, Sapwellime likilik rehmwail. E pahn ketin mahsanihong kumwail me kumwail kak wia met. Kumwail kak kakairada popohl oh peren nan amwail mour pwehki Sises Krais me wia kakehlepomwail. Kumwail kak diar likilik, meleilei, soanamwahu, peren, oh koapwoaroapwoar met oh kohkohlahte, pwe kumwail pahn diar mehkoaros rehn Sises Krais, nan Sapwellime rongamwahu, oh nan Sapwellime Mwomwohdiso.
Iei met me I men wiahki ai kadehde ni ai wia Wahnpoaren en Kaun Sises Krais oh pwilikihdiong kumwail ai kapai en kaping laud oh limpoak ong kumwail, ni mwaren Sises Krais, ahmen.