Osuanyiyɛ Ndamyɛ mu wɔ Nda a Odzi Ekyir mu
Hom ma yenya awerɛhyɛmu, nnyɛ kosɛ, kosɛ, ndam, nnyɛ hufo, agyedzifo, nnyɛ surofo ber a yɛma Ewuradze ne kandzea do wɔ nda a odzi ekyir yi mu.
Nyimpa ne pɛ yɛ Nyankopɔn n’akyɛdze a ɔsom bo a ɔdze ma Ne mba mu kor biara.1 Yɛwɔ “kwan dɛ [yɛ]san mu fa ahotɔ nye onnyiewiei nkwa a ɔnam adasa nyina hɔn Ntamugyinafo kɛse no do, anaa wɔfa ndɔmmum na owu dɛ mbrɛ abɔnsam no ndɔmmumfa nye no tum tse.”2 Nyame rennhyɛ hɛn dɛ yɛnyɛ papa, na abɔnsam so runntum nhyɛ hɛn dɛ yɛnyɛ bɔn.3 Binom bɔdwen dɛ asetsena yi yɛ akansi bi a ɔda Nyankopɔn na ɔsɛɛfo no ntamu dze, eso asɛm kor fi Agyenkwa no hɔ “na wɔama Satan ayɛ mem na wɔapam no. … Ɔyɛ [hɛn] ahoɔdzen na wɔrosɔ ahwɛ—nnyɛ Nyame ne dze.”4
Ewiei no yebobu dza hɛn nkwa nda nsanmunyi horow edua no.5 Ntsi ebɛnadze na hɛn adwendwen, apɛdze, kasaa, na ndwuma kã bɔ mu a ɔkyerɛ fa hɛn dɔ ma Agyenkwa no, No nkowaa a Oeyi hɔn, na N’Asɔr a w’asan dze aba no ho? Ana hɛn enuma, asɔfodzi, na temple ahyɛmu horow no hia hɛn kyɛn wiadze n’ayeyi anaa “like” dodow a ɔwɔ social media do? Ana hɛn dɔ ma Ewuradze no yɛ dzen kyɛn hɛn dɔ ma biribiara anaa obi fofor wɔ abrabɔ yi mu a?
Ɔsɛɛfo no na n’edziekyirfo no aper dabaa dɛ wɔbɛsɛɛ Christ na No nkɔnhyɛfo hɔn ndwuma. Agyenkwa no ne mbrasɛm no, sɛ wommbuu enyi nnguu do korakora a, nyimpa pii adan no egyingyandze wɔ ndɛ wiadze yi mu. Ewuradze n’ asomafo a wɔkyerɛ nokwar a “ɔmma ahotɔ” no wɔtaa yi hɔn akwa. Agyenkwa no Noara ankasa mpo wɔfrɛɛ no “nyimpa tumfur, nsahweam,”6 wɔdze too no do dɛ ɔsɛɛ amanmufo asomdwee na ɔdze nkyekyɛmu ba. Akra a hufo bɔɔ mu “faa adwen wɔ mbrɛ wobesi akyer no wɔ ne nsɛmkã mu”7 na N’asɔpɔkan Christianfo “kuw mba” no wɔkasaa tsiaa hɔn … wɔ beebiara.”8
Agyenkwa no na N’asɔpɔkan akadofo no nye dza otsia dzendzen a ofi hɔn mu nye abɔntsen dzii esi, na hɛn so yehyia dɛm ara. Ndɛ yennkotum edzi hɛn gyedzi do akokodur mu ara a yɛnnkɔtwe atwetwesi nsatseaba binom efi wiadzefo hɔ. Yeridzi Agyenkwa no n’ekyir awerɛhyɛmu mu ara yɛ mfaso, naaso ɔtɔfabi a hɔn a wɔkasa dɛ “dzidzi, nom, na ma w’enyi ngye”9 nkyerɛkyerɛ nsa kã hɛn, bea a wɔdze adwen feefee dɛ Nyankopɔn bobu hɛn bem wɔ bɔn nketsenketse ho osiandɛ Ɔdɔ hɛn dodoodow no ahyɛ gyedzi wɔ Christ mu, setsie, na nnuhu ananmu.
Ɔnam “[Ɔnoara] ne ndze anaa [No] nkowaa ndze do,”10 Agyenkwa no annkasa ammfa hɛn nda yi ho dɛ “ber bɛba a worinntsie nkyerɛkyerɛ pa, na hɔn asowamu hen ntsi wobedzi hɔn akɔndɔ ekyir aprapra akyerɛkyerɛfo aboa hɔn do” na dɛ pii “bɛdan hɔn aso efi nokwar no ho, na wɔaman akɔ anansesɛm ho”?11 Ana Oenndzi awerɛhow dɛ “wɔsɔr me gyan, wɔkyerɛkyerɛ nkyerɛkyerɛ a ɔyɛ nyimpa ahyɛdze”?12 Ana Ɔammbɔ kɔkɔ dɛ “homankasa hom mu nyimpa bɔsoɛr a wɔbɛkã nsɛnkyew dze atwe esuafo edzi hɔn ekyir”?13 Ana Oennhu dɛ “wɔ[bɛ]frɛ bɔn dɛ papa, na papa dɛ bɔn”14 na dɛ “nyimpa n’atamfo bɛyɛ ne fifo”?15
Ntsi nhɛn so ɛ? Ɔwɔ dɛ yɛbɔ hu anaa yesuro? Ana yendzi hɛn som do wɔ nsumaa mu ara? Oho! Yɛdze gyedzi wɔ Christ mu no yennhia dɛ yesuro adasa hɔn enyimtsiabu anaa hɛn akoma tu wɔ hɔn ehunahuna ho.16 Agyenkwa no da tsir no na nkɔnhyɛfo atseasefo a wodzi hɛn kan na wɔweɔn hɛn kã hɛnho no, “woana na otsia hɛn?”17 Hom ma yenya awerɛhyɛmu, nnyɛ kosɛ, kosɛ, ndam, nnyɛ hufo, agyedzifo, nnyɛ surofo ber a yɛma Ewuradze ne kandzea do wɔ nda a odzi ekyir yi mu.18
Agyenkwa no kãa no pefee dɛ “obiara a ɔbɔbɔ me dzin wɔ nyimpa enyim no, ɔno na mo so mobɔbɔ ne dzin wɔ m’ Egya n’enyim. … Na obiara a ɔbɛpa me wɔ nyimpa enyim no, ɔno na mo so mebɛpa no wɔ m’Egya n’enyim.”19
Dɛm ntsi, ber a binom bɛpɛ Nyame a ɔmma mbrasɛm no, hom mma yendzi dase akokodur mu ara wɔ Elder D. Todd Christofferson ne nsɛm mu dɛ “Nyame a ɔnnhyɛ mbra biara no tse dɛ ddNyame a ɔnntse ase.”20
Ber a binom bɛsa mu wɔ mbrasɛm a wodzi do no, hom mma enyigye mu ara yɛngye Agyenkwa no ne nsato dɛ “[yɛ]dze asɛm a ofi Nyankopɔn n’anomu ba biara [bɔ]bɔ bra.”21
Ber a dodow gye dzi dɛ Ewuradze na N’asɔr wɔdɛ wofua “adze biara a [hɛn] akoma pɛ”22 ndzeyɛɛ do no, hom mma ndamyɛ mu ara yɛnkã dɛ ɔyɛ mfom dɛ “yɛbɛka dɔm do akɛyɛ bɔn,”23 osiandɛ “dɔm nnkotum adan dza Nyame akã dɛ ɔyɛ bɔn no papa.”24
“O kaa, kaa … dɛ Nyankopɔn ne mbrasɛm yɛ katsee” eso ɔma ahotɔ.”25 Ɔtɔfabi a erekyerɛkyerɛ no pefee no wohu no dɛ nyɛe a ɔkyerɛ dɛ yɛnngye binom nnto mu. Ntsi wɔma obu mu ara yɛnkyerɛ dɛ ɔbɛyɛyie na ohia so dɛ yɛdɔ Nyame ne ba a ofua gyedzi fofor fi hɛn dze ho.
Yebotum agye na yebu binom ber a yenngye hɔn gyedzi anaa hɔn ndzeyɛɛ a ɔnnye Ewuradze ne pɛ nnsɛ no nnto mu. Hia biara innyi hɔ dɛ yɛdze nokwar bɔ afɔr wɔ ntseasee anaa sɔn ne pɛ afɔrbukyia do.
Zion na Babylon nnhyia. “Obiara nntum nnsom wuranom beenu.”26 Hɛn nyinaa nkaa Agyenkwa no n’asɛmbisa a ɔhɛn mu yi, “Ɔyɛ dɛn na hom frɛ me Ewuradze, Ewuradze, na hom nnyɛ dza mese?”27
Hom mma yɛmfa akoma mu nyinara, etuhuakyɛ setsie nkyerɛ hɛn dɔ ma Ewuradze.
Sɛ etse dɛ woho akyer wo wɔ osuanyiyɛ nye wiadze ntamu a, meserɛ kaa dɛ w’Agyenkwa dɔfo “ato ne nsa … , na ɔatserɛw ehumbɔbɔr abasa no mu wɔ hɔn do, na ɔse: Hom nnu homho, na mebɛgye hom.”28
President Nelson kyerɛkyerɛɛ dɛ “Jesus Christ bɛyɛ N’edwuma kokroko binom sesei kesi ber a Ɔbɛba bio no.”29 Naaso ɔkyerɛkyerɛɛe so dɛ “hɔn a wɔsan mu yi Ewuradze no kwan no bɔsɔw atseetsee.”30 “Worubu [hɛn] bi dɛ [yɛ]sɛ dɛ wɔbɔ [hɛn] adapaa wɔ Dzin no ntsi”31 botum ayɛ hɛn kyɛfã ber a “yegyaa mu ma Ne ndze dzi kan wɔ biribiara do.”32
Agyenkwa no kãe, “nyia mennkɛyɛ no fintsidua no, nhyira akã no.”33 Wɔ beebi so no, yesũa dɛ “asomdwee kɛse na hɔn a wɔdɔ wo mbra no wɔwɔ; na wonnya kwan a wɔnam do fintsiw.”34 Hwee ara! Ntsi yembisa hɛnho, “Ana miritsim mber kakra, mbom sɛ akotorka anaa atseetsee soɛr ɔnam asɛm no ntsi a, mber gu mu no m’efintsiw?35 Ana maatow pintsinn wɔ Jesus Christ na Ne nkowaa botan no do?
Su ho adwenkyerɛfo kyerɛ dɛ nokwar yɛ sɔn mu ahyehyɛdze ara, na nokwar su pɔkyee biara nnyi hɔ. Dza wɔrekã ara nye dɛ biribiara nnyi hɔ a ɔyɛ bɔn,36 dɛ “biribiara a nyimpa bɛyɛ no nnyɛ bɔn,”37 nkyerɛkyerɛ a ɔsɛɛfo no noara dze bɔbɔɔ adze a ɔregye ho dzin! Ntsi hom mma yɛnhwɛ yie wɔ mpataku a wɔdze nguannwoma edura hɔn ho a daa daa wɔrohwehwɛ binom akã hɔn ho na “[wɔtaa dze] hɔn nyansaa tumdzi dze kata [hɔnara] hɔn su bɔn do.”38
Sɛ yɛpɛ dɛ yɛyɛ Christ esuafo ndamyɛ ampaara, yɛbɔhwehwɛ ɔkwan. Annyɛ a, ɔsɛɛfo no bɛma hɛn akwan afofor a wɔyɛ akɔndɔ. Mbom dɛ esuafo anokwafo no “yennhia dɛ yɛbɛpa hɛn gyedzi ho kyɛw anaa yɛsan ekyir wɔ dza yenyim dɛ ɔyɛ nokwar ho.”39
Ewiei, asɛm kor fa Nyame no nkowaa 15 a wɔtsetse m’ekyir no hɔn ho. Ber a wiadzefo “se adzehufo dɛ, Mma hom nnhu; na wɔse nkɔnhyɛfo no dɛ, Mma hom nnhyɛ nkɔm no,”40 anokwafo no dze “wɔdze nhyira so a ofi sor bɛhyɛ hɔn ahenkyɛw, nyew, mbrasɛm a ɔkã ho no nnyɛ kuma, nye nyikyerɛ wɔ n’aber mu.”41
Ɔnnyɛ hu dɛ, dɛm nkorɔfo yi taa yɛ enyinam ndua ma hɔn a hɔn enyi nnyge Nyame n’asɛm ho dɛ ma nkɔnhyɛfo no kã no. Hɔn a wɔpow nkɔnhyɛfo no nnhu dɛ “Kyerɛw mu nkɔnhyɛsɛm biara nndua nyimpa nkyerɛase do” anaa nyimpa ne pɛ nsunsuando do “mbom nyimpa fi Nyame mu [kasa sesei] dɛ mbrɛ Sunsum Kɔnkrɔn no kã hɔn.”42
Tse dɛ Paul, dɛm Nyame mu nyimpa yinom … “enyi nntõ hɛn Ewuradze adasedzi no” na wɔyɛ Ne “adedua[fo]”43 a ɔkyerɛ dɛ nkyerɛkyerɛ a wɔkyerɛ no nnyɛ hɔn dze mbom Nyia ɔfrɛɛ hɔn no dze. Tse dɛ Peter “[wo]runntum gyedɛ [wɔ]kã dza [wo]ehu na [wɔ]atse.”44 Megye dase dɛ President a Odzi Kan na N’Apamfo na Duebien hɔn Quorumfo no yɛ mbanyin apapa nokwardzifo a wɔdɔ Nyame na Ne mba, na Ɔdɔ hɔn. Ɔsɛ dɛ yɛgye hɔn nsɛm dɛ ma ofi Ewuradze noara n’anomu “wɔ abotar nye gyedzi nyina mu. Sɛ yɛyɛ dɛm ndzɛmba yinom a hɛl mbobow no nnkotum edzi [hɛn] do konyim; … na Ewuradze Nyankopɔn bɔhwetse sum no tum efi [hɛn] enyim.”45
“Nsa a ho nntsew biara nnkotum asɛɛ edwuma no ne kankɔ;”46 ɔbɔkɔ do konyimdzi mu yɛkã ho anaa yɛnkã ho o, ntsi “san mu yi nyia [e]bɔsom no ndɛ.”47 Mma asɛɛfo dede a ofi dan pontonn kɛse no mu ba no nndaadaa wo anaa ɔmmbɔ wo hu. Hɔn ɔper dedeede no wonnkotum dze atoto ndze tseaba, bɔkɔɔ no ne asomdwee nhyɛdo wɔ akoma a abobɔ na sunsum a abotow hɔn do.
Megye dase dɛ Christ tse ase, na Ɔyɛ hɛn Agyenkwa na hɛn Pomfo, na Odua President a Odzi Kan na N’Apamfo na Asomafo Duebien no hɔn Quorum do dzi N’Asɔr baano, a ɔma hɛn awerɛhyɛmu dɛ “nkyerɛkyerɛ mframa biara [renn]yɛ hɛn begyabegya dze hɛn [nn]dzi akɔnaaba.”48
President Nelson kyerɛkyerɛɛ dɛ, “Jesus Christ esuafo nokwafo no wɔ pɛ dɛ wogyina, wobue hɔn ano kasa, na wɔyɛ soronko fi wiadzefo ho. Wonnhihim, woetu hɔnho si hɔ, na wɔyɛ akokodurfo.”49
Enuanom na nkyerɛbaa, ɔyɛ da pa dɛ yɛyɛ papa! Jesus Christ ne dzin krɔnkrɔn no mu, amen.