Ɔsor Ɔdɔ a ɔwɔ Egya Ne Nhyehyɛɛ mu
Asɔr a wɔdze asan ananmu aba yi ne nkyerɛkyerɛ na ahyɛdze no botae nye dɛ obesiesie Nyankopɔn ne mba akɔ nkwagye wɔ celestial ahenman no mu na nkwagye ntowdo wɔ ntwerba a ɔkrɔn mu.
Asɛmpa nhyehyɛɛ no kyerɛ hɛn Ɔsor Egya no dɔ ma Ne mba nyina. Ama yɛaatse iyi ase no, otwar dɛ yɛhwehwɛ dɛ yɛbɛtse Ne nhyehyɛɛ na Ne mbrasɛm ase. Ɔdɔ Ne mba ara ma Ɔdze Ne Ba a Wɔwoo no Kortoo no, Jesus Christ, mae dɛ Ɔbɛyɛ hɛn Agyenkwa na Pomfo, dɛ Ombohu amandze na Onwu mma hɛn. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo a wɔdze asan ananmu aba mu no, yɛwɔ ntseasee soronko wɔ hɛn Ɔsor Egya ne nhyehyɛɛ ho. Iyi ma hɛn kwan a ɔson a yɛdze hwɛ ɔnnkyebo abrabɔ no botae, atsɛmbu krɔnkrɔn a ɔtoa do no, na ewiei koraa no, Nyankopɔn ne mba nyina hɔn enyimnyam nkrabea.
Modɔ hom, m’enuanom na nkyerɛbaa. Modɔ Nyankopɔn mba nyina. Ber a wobisaa Jesus dɛ, “Mbra no mu asɛnkɛse nye mmuana?” Ɔkyerɛkyerɛɛ dɛ ebɔdɔ Nyankopɔn na wo nyɛnko no nye Nyankopɔn ne mbrasɛm kɛse a odzi kan.1 Mbrasɛm yinom na wodzi kan osiandɛ wɔto nsa frɛ hɛn ma yenyin sunsum mu ber a yɛhwehwɛ dɛ ɔdɔ a Nyame dze dɔ hɛn no, yɛdze bɔdɔ binom. Me yamu annkyɛ hɛn nyina yɛtse ɔdɔ nkyerɛkyerɛ na ahyɛdze a hɛn Ɔsor Egya, na Ne Ba, Jesus Christ, dze akyekyer Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no ase. Dza mebɛkã no ha no hwehwɛ dɛ ɔbɛkyerɛkyerɛ mbrɛ Nyankopɔn no dɔ si kyerɛkyerɛ nkyerɛkyerɛ no nye nkenyan Asɔr no ahyɛdze horow no mu.
I.
Ntseasee a wɔatahyɛ a ɔnntsen a ɔfa atsɛmbu no a ewiei no, odzi ɔnnkyebo abrabɔ ekyir no, nye dɛ, nkorɔfo a wɔyɛ papa no kɔ bea a wɔfrɛ no heaven na nkorɔfo a womuo no kɔ afebɔɔ bea a wɔfrɛ no hɛl. Nsusui yi a ɔnntsen dɛ ndaamba mbea ebien pɛr na ɔwɔ hɔ no, kyerɛ dɛ hɔn a woenntum ennsie mbrasɛm no nyina a wohia dze akɔ heaven no otwar dɛ wokowie wɔ hɛl afebɔɔ.
Ɔsor Egya dɔfo wɔ nhyehyɛɛ papa kyɛn iyi ma Ne mba. Jesus Christ N’Asɔr no a wɔdze asan ananmu aba ne nkyerɛkyerɛ a woeyi akyerɛ no kyerɛkyerɛ dɛ Nyankopɔn ne mba nyina—gyedɛ kumabaa a wosuar dɛ yebosusu wɔ ha—ewiei no wɔbɔkɔ enyimnyam ahenman mu.2 Jesus kyerɛkyerɛɛ dɛ, “M’Egya fie wɔ tsenabew pii.”3 Fi ndɛ nyikyerɛ mu no, yenyim dɛ dɛm tsenabew pii no gu enyimnyam ahenman ebiasa mu. Atsɛmbu a Odzi Ewiei mu no wobobu hɛn atsɛm dɛ mbrɛ hɛn ndwuma na hɛn akoma ne pɛ tse.4 Ansaana no, obehia dɛ yehu amandze wɔ hɛn bɔn a yennu hɛnho no ho. Kyerɛwsɛm no yɛ pefee wɔ ɔno ho.5 Nkyii hɛn Ɔtsɛmbuafo tseneneenyi no bɛma hɛn bea wɔ enyimnyam ahenman no kor mu. Dɛm ntsi, tse dɛ mbrɛ yenyim wɔ ndɛ nyikyerɛ mu no, “na wobobu hɔn atsɛn … , na mbrɛ ɔdasanyi biara no ndwuma tse no na ɔbɛkyerɛ ne tsenabew a obenya wɔ efi a woesiesie no mu.”6
Ewuradze asan mu eyi a Ɔada nsɛm kumabaa edzi a ɔfa enyimnyam ahenman ebien yinom ho. Naaso, Ewuradze eyi nsɛm dodow edzi a ɔfa enyimnyam ahenman no a ɔkrɔn kɛse, a Bible mu no wɔfrɛ no “ewia enyimnyam” no.7
“Celestial enyimnyam mu no,8 ntwerba ebiasa, anaa gyinabew na ɔwɔ mu.9 Dza ɔkrɔn wɔ iyinom mu no nye nkwagye ntowdo wɔ celestial ahenman no mu, bea a yebotum abɛyɛ tse dɛ hɛn Ɔsor Egya na Ne Ba, Jesus Christ. Ama wɔaaboa hɛn ma yeetu nyamesu mpon na suban nsakyer a yɛdze benya hɛn nkrabea krɔnkrɔn no, Ewuradze eyi nkyerɛkyerɛ akyerɛ na Ɔdze mbrasɛm abɔbɔ adze a ogyina onnyiewiei mbra do. Iyi na yɛkyerɛkyerɛ wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu osiandɛ Asɔr no a wɔdze asan ananmu aba ne nkyerɛkyerɛ na ahyɛdze no botae nye dɛ obesiesie Nyankopɔn ne mba ama nkwagye wɔ celestial ahenman no mu, na nkankara, ama ntowdo wɔ ne gyinabew a ɔkrɔn.
Ahyɛmudzi horow a wɔayɛ na nhyira horow a wɔdze abɔ anokwafo anohoba wɔ Nyame ne temple mu no yɛ ne saafee. Iyi kyerɛkyerɛ siantsir a yesisi temple horow wɔ wiadze nyina mu no, a adwontokuw no atow ho ndwom dɛɛdɛw no. Mbrɛ yesi dzi iyi ekyir kɛse no yɛ binom ahobow, a wonnyi temple ahyɛmudzi na ayɛdze horow a ɔma hɛn kwankyerɛ kɔ nkwagye ntowdo ho ntseasee. Wobotum enya iyi ho ntseasee nko wɔ enyimnyam gyinabew ebiasa no nokwar nyikyerɛ no mu. Osian hɛn Ɔsor Egya no dɔ kɛse ma Ne mba nyina no Ɔama enyimnyam ahenman binom so—dɛ mbrɛ Elder Quentin L. Cook kyerɛkyerɛɛ mu ndeda no— a ne nyina yɛ nwanwa kyɛn dza yebotum atse ase.10
Jesus Christ No Werdambɔ no ma iyinom nyina tum ba mu. Oeyi akyerɛ dɛ “ɔhyɛ Egya no enyimnyam, na ɔgye ne nsaano ndwuma nyina nkwa.”11 Dɛ wɔma nkwagye wɔ enyimnyam ahenman ahorow mu. Yenyim fi ndɛ mber yi nyikyerɛ dɛ “wɔama ahenman nyina ho mbra.”12 Tsitsir ara:
“Nyia oenntum enndzi celestial ahenman ne mbra do no nnkotum atsena celestial enyimnyam no mu.
“Na nyia oenntum enndzi terrestrial ahenman ne mbra do no nnkotum atsena terrestrial enyimnyam no mu.
“Na nyia oenntum enndzi telestial ahenman ne mbra do no nnkotum atsena telestial enyimnyam no mu.”13
Sɛ yɛrekã a, enyimnyam ahenman no a yenya no wɔ Atsɛmbu a odzi ewiei mu no gyina mbrasɛm a yɛsan mu dzi do wɔ hɛn Ɔsor Egya no dɔ mu ara nhyehyɛɛ no. Dɛm nhyehyɛɛ no mu no ahenman ahorow wɔ hɔ ama wɔdze Ne mba nyina aato ahenman no a wobotum atsena mu no.
II.
Ewuradze N’Asɔr no a wɔdze asan ananmu aba no ne nkyerɛkyerɛ na ahyɛdze no dze onnyiewiei nokwar yinom dzi dwuma wɔ kwan a wobotum atse ase yie nko wɔ Ɔsor Egya no dɔ mu ara nhyehyɛɛ ma Ne mba nyinara.
Dɛm ntsi yedzi ankorankor ne pɛ nyi. Dodowara nyim Asɔr yi no mbɔdzembɔ kɛse dɛ ɔbɛma nyamesom ho fahodzi atahye. Mbɔdzembɔ yinom nyina ma hɛn Ɔsor Egya ne nhyehyɛɛ no kɔ kan. Yɛhwehwɛ dɛ yɛboa Ne mba nyina —nnyɛ hɛn asɔrmba nko—ma woenya enyigye wɔ fahodzi a wɔdze bɛsan mu eyi.
Dɛmara so, ɔtɔfabi a wobisa hɛn siantsir a yɛsoma asɛmpasomafo kɔ aman pii mu, Christianfo mpo wɔ dɔm no mu no. Wobisa hɛn so siantsir a yɛma nyimpa ho mboa ma nkorɔfo a wɔnnyɛ hɛn Asɔrmba na yɛmmfa iyi mbata hɛn asɛmpakã mbɔdzembɔ ho. Yɛyɛ iyi osiandɛ Ewuradze akyerɛkyerɛ hɛn dɛ yɛmfa obu mma Ne mba nyina dɛ hɛn enuanom na nkyerɛbaa, na yɛpɛ dɛ yɛnye obiara kyɛ hɛn sunsum mu na honandua mu mbordo no.
Onnyiewiei nkyerɛkyerɛ so ma nhumu soronko wɔ mba ho. Ɔnam nhumu yi do yehu dɛ erowo mba na atsetse hɔn no kã nhyehyɛɛ krɔnkrɔn no ho. Ɔyɛ enyigye na asɛdze krɔnkrɔn ma hɔn a wɔama hɔn tum dɛ wɔnkã ho no. Dɛm ntsi, wɔahyɛ hɛn dɛ yɛnkyerɛkyerɛ na yengyina pintsii mma fapem na ndzeyɛɛ a ɔma mba hɔn enyigye na mpontu kwan wɔ Nyankopɔn ne nhyehyɛɛ ase.
III.
Ewiei, wonyim Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ara yie dɛ Asɔr a otsim ebusua do. Mbom dza wonnyim no yie nye nokwar no dɛ hɛn ebusua do ntsimii no nnyɛ ɔnnkyebo abrabɔ mu nkitahodzi nko. Onnyiewiei nkitahodzi so yɛ hɛn nyamesom ne fapem. Asɔr no a wɔdze asan ananmu aba no botae nye dɛ ɔbɔboa Nyame ne mba nyina ma wɔafata dza Nyankopɔn pɛ dɛ ɔyɛ hɛn nkrabea a ɔkrɔn no. Ɔnam ɔpon a Christ No Werdambɔ dze mae no, obiara botum enya onnyiewiei nkwa (nkwagye ntowdo wɔ celestial ahenman no mu), a Enã Eve paa mu kãa dɛ “a Nyankopɔn dze ma hɔn a wɔyɛ setsie nyinara.14 Iyi bor nkwagye do. President Russell M. Nelson akaa hɛn dɛ, “ wɔ Nyankopɔn n’onnyiewiei nhyehyɛɛ mu no, nkwagye yɛ ankorankor asɛm; [mbom] nkwagye ntowdo yɛ ebusua asɛm.”15
Dza ɔyɛ fapem ma hɛn nye Nyankopɔn ne nyikyerɛ dɛ gyedɛ nokwardzi ma banyin na basia ntamu onnyiewiei awar nko na wotum nya nkwagye ntowdo.15 Dɛm nkyerɛkyerɛ krɔnkrɔn no ntsi na yɛkyerɛkyerɛ dɛ “[i]yɛ banyin anaa ɔbaa no yɛ ankorankor no bɔbea a ohia tsitsir ansaana ɔbɛba asaase do, no ɔnnkyebo asetsena ber, na ne onnyiewiei su na botae.”17
Dɛm so ntsi na Ewuradze ahwehwɛ N’Asɔr no a wɔdze asan ananmu aba dɛ wontsia ɔmamfo na mbra nhyɛdo dɛ wɔntwe nsan mfi Ne nkyerɛkyerɛ mu dɛ awar yɛ banyin na ɔbaa ntamu na wontsia nsesã a ɔdze adwensɛɛ ana ɔsesã iyɛ banyin anaa ɔbaa anaa ɔmma soronko nnda banyin na ɔbaa ntamu.
Asɔr no a wɔdze asan ananmu aba ne gyinabew wɔ fapem dze iyinom ho taa pegyaw ntsia. Yɛtse dɛm ase. Ɔsor Egya ne nhyehyɛɛ ma “dza otsia”18 ho kwan, na Satan ne ntsia mbɔdzembɔ kɛse noara kɔ adze biara a ohia tsitsir wɔ nhyehyɛɛ no mu. Dɛm ntsi, ɔhwehwɛ dɛ obetsia nkwagye ntowdo ho mpontu ber a ɔdandan awar, na mba woo ho abagura, anaa ɔsɛɛ adwen wɔ dɛ iyɛ banyin anaa ɔbaa ho. Naaso, yenyim dɛ ewiei no, hɛn Ɔsor Egya no botae krɔnkrɔn na nhyehyɛɛ no wɔrennsesã. Ankorankor gyinabew botum asesã, na Nyankopɔn ne nhyehyɛɛ no ma awerɛhyɛmu dɛ ewiei no, anokwafo a wosie hɔn ahyɛmudzi no benya kwan afata nhyira biara a wɔdze abɔ anohoba no.19
Nkyerɛkyerɛ soronko a ɔsom bo a ɔbɔboa hɛn ma yɛayɛ onnyiewiei nkwa, akyɛdze a ɔsõ sen Nyame n’akyɛdze nyina,”20 ho ahoboa no nye afe 1995 ebusua no ho dawurbɔ no.21 Ampaara, ɔson ne mpaamukã na sesei mbra, ndzeyɛɛ, nye adwen nsusui a wɔatahye tse dɛ bɔko mo do awar na banyin na banyin anaa besia na besia ntamu awar. Hɔn a wɔnntse Egya no ɔdɔ mu ara nhyehyɛɛ ma Ne mba nkyerɛkyerɛ ase no, bia wobosusu dɛ ebusua dawurbɔ yi yɛ nhyɛdo nsɛm ara a wotum sesã no. Naaso, yesi no pi dɛ ebusua dawurbɔ no tsim nkyerɛkyerɛ a wɔnnsesã do, ɔkyerɛ ebusua nkitahodzi a hɛn mpontu a ohia kɛse no botum edua aba.
Dɛm na Jesus Christ N’Asɔr a ɔwɔ hɔ ma Nda a Odzi Ekyir Ahotseweefo a wɔdze asan ananmu aba ne nkyerɛkyerɛ na ahyɛdze soronko no tsim do.
IV.
Ɔnnkyebo abrabɔ yi mu nkitahodzi na gyinabew horow mu, otwar dɛ hɛn mu kor biara nye hɔn a ɔson hɔn no tsena. Dɛ yɛyɛ Christ akãdofo a ɔsɛ dɛ yɛdɔ hɛn mfɛfo no, otwar dɛ yɛnye hɔn a wɔnngye dza yɛgye dzi no tsena asomdwee mu. Hɛn nyina yɛyɛ Nyame dɔfo ne mba. Ɔahyehyɛ owuekyir nkwa, na ewiei no, enyimnyam ahenman, ama hɛn nyinara. Nyankopɔn pɛ dɛ hɛn nyina yesie Ne mbrasɛm, ahyɛmudzi, na ayɛdze a ɔkrɔn, a ne nyina wɔ Ne temple krɔnkrɔn ahorow a worisisi no wiadze nyina mu no, dze per hwehwɛ Ne nhyira horow a ɔkrɔn kɛse no. Otwar dɛ yɛhwehwɛ dɛ yɛnye binom bɛkyɛ onnyiewiei nokwar yinom. Naaso ɔnam dɔ a yɛwɔ ma hɛn fipamfo nyina no ntsi, otwar dɛ aber biara yɛgye hɔn nsanmuyi horow no to mu. Dɛ mbrɛ Mormon Nwoma nkɔnhyɛnyi kyerɛkyerɛɛ no, ɔwɔ dɛ yɛper kɔ kan, a yenya “Nyankopɔn nye nyimpa nyina ho dɔ.”22
Dɛ mbrɛ President Russell M. Nelson paa mu kãa no hɛn ndaansa yi wiadze mfɛndzanan ehyiadzi no: “Mber biara mmbae nnkyɛn ber yi wɔ wiadze n’abakɔsɛm mu a hɛn Agyenkwa no ho nyimdzee ayɛ ankorankor ehiadze na ehiasɛm mbordo ma ɔdasanyi biara ne kra. … Tum wɔ Christ ne nkyerɛkyerɛ a ho tsew no mu. Ɔsesã abrabɔ no ma obiara a ɔtse ase na ɔhwehwɛ dze dzi dwuma wɔ n’abrabɔ mu.”23
Hɛn nyina yɛmfa nkyerɛkyerɛ krɔnkrɔn no mbɔ hɛnankasa hɛn bra, mobɔ ho mpaa wɔ Jesus Christ Ne dzin mu, amen.