Pintsinn wɔ Ehum ber Mu
Sɛ abrabɔ mu ehum tu a, ibotum egyina pintsinn osiandɛ igyina wo gyedzi no botan do wɔ Jesus Christ mu.
Mo nuanom na nkyerɛbaa adɔfo, wɔayɛ hɛn adom ndɛ dɛ yetsie Nyankopɔn asomfo a woekenyan hɔn rema afotu na nkuranhyɛ. Hɛn mu kor biara, bea biara a ɔwɔ no, nyim dɛ yɛtse awerɛhow mber mu. Me mpaabɔ nye dɛ nkyɛ metum aboa wo ma edze asomdwee akoma egyina pintsinn wɔ ehum ahorow a yehyia no mu.1
Bea a yɛbɛhyɛ ase nye yɛbɛkaa dɛ hɛn mu kor biara yɛ Nyankopɔn no dɔba na dɛ Ɔwɔ asomfo a woekenyan hɔn. Dɛm Nyame asomfo no edzi kan ehu mber a yɛtse mu yi. Ɔsomafo Paul kyerɛɛw Timothy dɛ, “Na hu iyi dɛ nda a odzi ekyir no mu awerɛhow ber bɛba.”2
Obiara a ɔwɔ enyiwa a wɔdze hwɛ aber n’asɛnkyerɛdze na asowa a otsie nkɔnhyɛfo hɔn nsɛm no nyim dɛ ɔyɛ nokwar. Esian kɛse no ho hu ba hɛn do a ofi emumuyɛdze etum. Dɛm etum no reyɛ kɛse. Na dɛm ntsi ɔrebɛyɛ dzen ara yie, ɔrennyɛ mberɛw, dɛ yebedzi ahyɛmudzi horow a, otwar dɛ yedzi na yesie ama yɛdze Jesus Christ asɛmpa no bɔ bra.
Hɛn a yɛdwen hɛnho na hɔn a yɛdɔ hɔn no, enyidado wɔ anohoba a Nyankopɔn abɔ dze esiesie guandɔbea efi ehum a ɔbeba no mu.
Asɛm a otwa dɛm bea no mfonyin nye yi. Nkɔnhyɛfo atseasefo esi do akã ho asɛm. Mfatoho, dɛm mbrɛ woetsimtsim wɔ Mormon Nwoma no mu, egya dɔfo na woekenyan no kakyerɛɛ ne mbabanyin mbrɛ wɔbesi ahyɛ hɔn ho dzen dze egyina pintsinn wɔ ehum a odzi hɔn kan: “Na afei me mbabanyin, hom nkaa, hom nkaa dɛ hɛn Pomfo a ɔyɛ Christ, Nyame ne Ba no, no botan no do na ɔwɔ dɛ hom tow hom fapem; ama sɛ abɔnsam bɔ n’ehum dzendzen no a, nyew, n’egyen menaba a ɔwɔ ekyinehyia ehum no mu no a, nyew, sɛ n’ɔsor-bo nyinara tɔ na n’ehum kɛse bɔ dzendzenndzen hwe hom a, orinnya tum wɔ hom do nntwe hom nnkɛhyɛ awerɛhow nye mbusu a onnyi ewiei no bun ase, osian ɔbotan a hom atow, … wɔ do ntsi, dza ɔyɛ fapem tsim, fapem a sɛ adasamba si hɔn adan wɔ do a wɔnkɔhwe ase.”3
Awerɛhow no na mbusu a onnyi ewiei a ɔkãa ho asɛm no yɛ bɔn ho nsunsuando yaayaw sɛ yennu hɛnho wɔ ho emudzi mu a. Ehum no a ɔreyɛ kɛse no yɛ nsɔhwɛ horow na Satan n’ekutubɔ. Onnkehiaa kɛse dɛ yɛbɛtse mbrɛ yebesi bɔtow wɔ fapem tsim no do nnkyɛn ndɛ. Emi no, beebiara nnye a yɛbɔhwɛ nnkyɛn Ɔhen Benjamin n’asɛm a ɔkãa no ewiei no a, wɔakyerɛw so wɔ Mormon Nwoma mu no.
Ɔhen Benjamin no nkɔnhyɛ nsɛm no fa hɛn ho ndɛ. Nna onyim fi nankasa no sũahu mu ɔkõ no huuhu. Nna oegyina agye no nkorɔfo wɔ ɔkõ mu a, ɔtwer Nyankopɔn no tum. Ohun Lucifer no tum huuhu no pefee, dza ɔdze sɔ Nyankopɔn ne mba hwɛ, ɔhyɛ hɔn do, na ogura hɔn abɔw.
Ɔtoo nsa frɛɛ no nkorɔfo na hɛn dɛ yentow wɔ bambɔ botan tsim no nko do, a ɔyɛ Agyenkwa no. Ɔmaa ɔdaa edzi pefee dɛ yɛwɔ ahotɔ dɛ yɛbɛsan mu beyi papa anaa bɔn na dɛ yennkotum ekwetsir hɛn nsanmuyi no nsunsuando horow no. Ɔkasaa sii hɔn enyim na ndamyɛ mu osiandɛ onyim awerɛhow a ɔbɛba hɔn a bia wɔrenntse na worinndzi n’afotu do no.
Mbrɛ osii kyerɛɛ nsunsuando a obedzi hɛn nsanmuyi dɛ yebedzi Sunsum ne nkenyan do anaa yebedzi nsɛm bɔn a ofi Satan hɔ do, nyia ɔrohwehwɛ asɔ hɛn ahwɛ na ɔasɛɛ hɛn:
“Na hwɛ mbusu wɔ hɔ ma nyia ɔdze noho ma dɛm sunsum [bɔn] no; na sɛ ɔdze noho ma na otsie no, na ɔtsena mu na owu wɔ no bɔn mu a, dɛm nyimpa no bɔnom dza ɔyɛ afɔbu ama nankasa ne kra; na n’akatua a obenya nye daapem asotwe, na ɔatõ Nyame ne mbra, nna ɔyɛ tsia nankasa ne nyimdzee so. …
“Dɛm ntsi, sɛ dɛm nyimpa no ennu noho, na owu dɛ ɔda ho yɛ Nyame ne tamfo a, pɛrpɛrdzi a ofi Nyame no nyan ne kra a ɔyɛ bɛkyebo no ma ohu nankasa n’afɔdzi, na ɔma ɔwodow fi Ewuradze enyim, na afɔdzi, na yaw, na awerɛhow, dza ɔtse dɛ ogya a onndum da a ne gyaframee fow kɔ sor afebɔɔ kesi afebɔɔ hyɛ n’akoko mã.”
Ɔhen Benjamin kɔr do ɔkãa dɛ, “O, hom nkɔdaa, na hom mberantsɛ nye mbofra nkakraba a hom botum atse me nsɛm ase, osiandɛ makasa pefee akyerɛ hom ama hom eetum atse ase, meserɛ dɛ hom bɔsoɛr na hom akaa mbusu gyinabew a hɔn a wɔahwe ase wɔ mbrato wɔ mu no.”4
Emi, dɛm kɔkɔbɔ no tum dɛ yennu hɛnho no twa mfonyin wɔ m’adwen mu mber pɔkyee no a emi na ɔwo yebegyina Agyenkwa no enyim wɔ abrabɔ yi ekyir. Yɛpɛ dɛ yɛdze hɛn akoma nyina no yɛnnkɔwodow mbom yɛbɔhwɛ sor ahwɛ No, ehu N’anoyerɛwee, na yɛatse dɛ Ɔrekã, “Mbo, akowaa pa nye nokwafo: … kɔ [mu].”5
Ɔhen Benjamin ma ɔda edzi pefee mbrɛ yebotum enya enyidado dze atse dɛm nsɛm no, sɛ abrabɔ yi mu yehu kwan a yebodua Jesus Christ no Werdambɔ no mu asesã hɛn su a. Ɔno nko nye kwan a yebotum atow wɔ fapem tsim no do na dɛm ntsi yegyina pintsinn wɔ nsɔhwɛ ɔreba n’ehum mu. Ɔhen Benjamin dze mfatoho dɛɛdɛw a ɔakã m’akoma yie daa kyerɛkyerɛ dɛm nsesãa no wɔ hɛn su mu. Mfe mpem pii mu na nkɔnhyɛfo akã ho asɛm na Ewuradze Noara so akã. Ɔno nye yi: otwar dɛ yɛyɛ tse dɛ abofra—abofra kakraba.
Binom no, ɔbɛyɛ dzen ama hɔn dɛ wɔbɛpen do. Hɛn mu dodowara pɛ dɛ yɛyɛ ahoɔdzenfo. Yebohu dɛ ireyɛ tse dɛ abofra yɛ dɛ eyɛ mberɛw. Awofo dodowara na wɔhwɛ da no kwan a hɔn mba begyaa mbofradze yɛ. Naaso Ɔhen Benjamin a, ɔtsee ase yie dɛ mbrɛ nyimpa biara bɛtse ase no dɛ eyɛ banyin ahoɔdzennyi na ɔkokodurfo, ma ɔda edzi pefee dɛ eyɛ dɛ abofra no nnyɛ dɛ eyɛ mbofradze. Ɔyɛ ibɛyɛ tse dɛ Agyenkwa no a, Ɔbɔɔ mpaa maa N’Egya ama Oenya ahoɔdzen dze etum ayɛ N’Egya ne pɛ na Ɔabɔ werdam ama N’Egya ne mba nyina na nkyii Ɔyɛe. Otwar dɛ hɛn su sesã bɛyɛ dɛ abofra ama yeenya ahoɔdzen a otwar dɛ yenya dze gyina pinstinn na yenya asomdwee wɔ esian ber mu.
Ɔhen Benjamin ne nkyerɛkyerɛmu wɔ mbrɛ dɛm nsesã no si ba nye yi: “Honammunyi no yɛ ɔtamfo ma Nyankopɔn, na ɔayɛ dɛm fitsi Adam n’asehweber do, na ɔbɔkɔ do ayɛ dɛm afebɔɔ kesi afebɔɔ, gyedɛ ogyaa noho ma Sunsum Krɔnkrɔn no ne nkenyan, na ɔpɔr nyimpa su no gu nkyɛn na ɔnam Ewuradze Christ no werdambɔ no no do bɛyɛ ɔhotsewnyi, na ɔbɛyɛ dɛ abofra, na ogyaa noho ma; ɔdwe, ahobrɛadze, onya abotar, ɔdɔ hyɛ no mã, onya pɛ dɛ ɔbɔsɔw biribiara a Ewuradze noara nyim dɛ oye dɛ ɔdze ba no do, koraa mpo ɔyɛ dɛ mbrɛ abofra gyaa noho ma n’egya no.”6
Yenya dɛm nsesã ber a yɛnye Nyame dzi ahyɛmu na yekenyan hɛn ahyɛmudzi horow. Ɔno dze Christ No Werdambɔ tum no ba a ɔma kwan ma hɛn akoma mu nsesã. Yebotum enya ho atsenkã ber biara a yedzi sacrament, yɛyɛ temple ayɛdze ma nana nkansowa bi oefi mu, gye dase dɛ Agyenkwa ne dasefo, anaa ahwɛ obi ɔwɔ hia mu dɛ Christ osuanyi.
Dɛm sũahu horow mu no, mber rugu mu no, yɛbɛyɛ tse dɛ abofra wɔ hɛn tum dɛ yɛdɔ na yɛyɛ setsie. Yɛba begyina fapem tsim no do. Hɛn gyedzi wɔ Jesus Christ mu no dze hɛn ba nnuho na Ne mbrasɛm no ne nsie. Yɛyɛ setsie, yenya tum dze tsia nsɔhwɛ, na yenya Sunsum Krɔnkrɔn n’anyɛnkoyɛ a wɔabɔ ho anohoba no.
Hɛn su sesã bɛyɛ dɛ abofra, yɛyɛ setsie ma Nyankopɔn na yenya ɔdɔ mbordo. Dɛm nsesã no bɛma yɛafata dɛ yebenya akyɛdze horow a odua Sunsum Krɔnkrɔn mu ba. Yerenya Sunsum no n’anyɛnkoyɛ no bɛkyekye hɛn werɛ, ama kwankyerɛ, na ɔahyɛ hɛn dzen.
Maba ebohu dza Ɔhen Benjamin susui no mu bi n’asekyerɛ ber a ɔkãa dɛ yebotum abɛyɛ tse dɛ abofra kakraba wɔ Nyankopɔn enyim. Menya ho sũahu pii mu dɛ Sunsum Krɔnkrɔn no taa dze ndze tseabaa kasa, a wɔtse no yie ber a w’akoma ayɛ botoo na oegyaa woho ama, tse dɛ abofra. Nokwar, mpaabɔ a ɔyɛ edwuma nye, “Morohwehwɛ dza Ɔwo ehwehwɛ nko. Meserɛ kã adze kor no kyerɛ me. Mebɛyɛ.”
Sɛ abrabɔ mu ehum tu a, ibotum egyina pintsinn osiandɛ igyina wo gyedzi no botan do wɔ Jesus Christ mu. Dɛm gyedzi no begya wo ma enya daa daa nnuho na edzi ahyɛmudzi no do aber nyina. Nkyii ibɛkaa No aber nyina. Na irudua ɔtan na emumuyɛdze ehum mpo mu a, ibenya asomdwee na enyidado ho atsenkã.
No mbordo mpo no, ibohu dɛ eretsen woho epegya binom enye hɔn aba bambɔ botan no do. Gyedzi wɔ Jesus Christ mu ogya hɛn daa kɔ enyidado mbordo na ayamuyie ho atsenkã ma nkaafo, a ɔyɛ Christ no nokwar ɔdɔ no.
Megye me dase nokwar mu dɛ Ewuradze Jesus Christ ama nsato dɛ “Hom mbra mo hɔ.”7 Ɔdze dɔ ma wo na hɔn a idɔ hɔn no, Ɔto nsa frɛ wo dɛ bra No hɔ benya asomdwee wɔ abrabɔ yi mu na onnyiewiei nkwa wɔ wiadze a ɔreba no mu. Onyim ehum ahorow a ibehyia wɔ wo nsɔhwɛ mu no ara yie, dɛ ɔyɛ nkwagye ho nhyehyɛɛ no ne fã.
Mototɔ serɛ wo dɛ gye Agyenkwa no ne nsato no. Tse abofra botoo dɔfo no, gye No mboa. Dzi ahyɛmu no a Ɔdze ma no wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu no na sie. Wɔbɛhyɛ wo dzen. Agyenkwa no nyim ehum ahorow no na bambɔ mbea a ɔwɔ fie kwan do kɔ No hɔ na hɛn Ɔsor Egya hɔ. Onyim kwan no. Ɔno nye ɔkwan no. Megye ho dase wɔ Jesus Christ ne dzin krɔnkrɔn no mu, amen.