Wiadze Mfɛndzanan Ehyiadzi
Akoma Nsakyer Kɛse Bi: “Minnyi Biribiara Bio dze Ma Wo”
Ebɔbira 2022 wiadze mfɛndzanan ehyiadzi

Akoma mu Nsakyer Kɛse bi

“Minnyi Biribiara Bio dze Ma Wo’’

Eduardo Gavarret ne Kasaa

Ɔkã Eduosuon no ho

Akoma mu nsakyer yi nnsi prɛko pɛr; ɔgye gyedzi, nnuhu, na daa daa sunsum mu edwuma ma oesi.

Mbueienyi

Fida, Ɔbɛsɛ 28, 1588 da no, wusihɛn La Girona, a ɔyɛ Spainfo Armada Kɛse no ne rudder tsewee ma wɔdze ntabon nko rokwan no, dze kɛpeem Lacada Point abotan no a ɔwɔ Ireland Etsifi no.1

Wusihɛn no butuwii. Nna hɔn a ɔtoow hɔn kyenee no mu baako a ɔreper no nkwa no hyɛ sika mpɛtsea a nna ne yer dze maa no nnkyɛree a woekrukye do, “minnyi biribiara bio dze ma wo’’ wɔ do.2

“Minnyi biribiara bio dze ma wo,’’—asɛnsin na mpɛtsea a ɔawen nsa a ɔdze akoma mu wɔ do, ɔdɔ sɛnkyerɛdze fi yer hɔ dze ma no kun.

Kyerɛwsɛm Mbataho

Mber a mekenkaan asɛm yi no, ɔtɔɔ mo do yie ankasa, na modwendwen ebisadze a Agyenkwa no yɛe ho dɛ; “Na afɔr a hom bɔbɔ ama me no nye akoma a abobɔ nye sunsum a abotow.’’3

Mesanee so dwendwen nkorɔfo no hɔn ndzeyɛe wɔ Ɔhen Benjamin ne nsɛm no ho: “Nyew, yɛgye nsɛm a akã akyerɛ hɛn nyinara dzi … ,a ɔama nsakyer kɛse aba hɛn akoma mu ntsi, dɛm ntsi yennyi pɛ biara bio dɛ yɛbɛyɛ bɔn, na mbom dɛ yɛbɛyɛ papa aber nyina.’’4

Mankasa me Mbataho

Hom mma menye hom nkyɛ sũahu bi a minyae mber a nna medzi mfe 12 no a no nsunsuando etsim ebodu ndɛ da yi.

Me maame kãa dɛ, “Eduardo, yɛ no ntsɛm. Yɛakyɛr Asɔr nhyiamu nkɔree.’’

Mubuae dɛ, “Maame, menye paapa bɛkã fie ndɛ.’’

“Ɔyɛ nokwar?’’ Ɔkãa dɛ, ɔwɔ dɛ ekɔ wo asɔfodzi nhyiamu.’’

Mubuaa dɛ, “Asɛm ato Paapa! Ɔbɛka ɔno nkotsee. Menye no bɛka ndɛ.’’

Nna paapa nnyɛ Jesus Christ N’asɔr a ɔwɔ hɔ ma Nda a Odzi Ekyir Ahotseweefo n’asɔrba.

Me maame na me nkyerɛbaa kɔɔr Kwesida nhyiamu. Ntsi no, mekehyia Paapa wɔ n’edwuma mu, bea a odu Kwesida a ɔpɛ dɛ ɔwɔ, na dɛ mbrɛ nna maakã akyerɛ me maame no, midzii mber kakra, ɔno nye dɛ me dzii minitsi kakra wɔ ne nkyɛn, na nkyii mibisaa dɛ, “Paapa, biribiara rokɔ yie a?’’

Ɔkɔɔr do yɛɛ n’enyikadze wɔ radio na akyerɛmber no ho nsiesie, na ɔyerɛɛw n’ano ara kyerɛɛ me.

Nkyii mekãa kyerɛɛ no dɛ, “Menye m’anyɛnkofo rikedzi agor.”

Paapa a, ɔamma n’enyiwa do no, see me dɛ, “Ndɛ yɛ Kwesida. Ana onnyi dɛ ekɔ asɔr a?’’

Mubuae dɛ, “Nyew, naaso ndɛ mekãa kyerɛɛ Maame dɛ moronnkɔ.’’ Paapa kɔɔr do yɛɛ n’edwuma, na emi dze, nna ɔyɛ akwanserɛ dɛ me mfi hɔ.

Dɛm anapa no nna bɔɔl agordzi bi a ohia bɔkɔ do, na m’anyɛnkofo akã akyerɛ me dɛ, munnkotum dɛ moronnkɔ, osiandɛ nna ɔwɔ dɛ yedzi konyim.

Nna mo nsɔhwɛ nye dɛ ɔwɔ dɛ motwa mu wɔ chapel n’enyim dze kɔ pramado hɔ.

Medze enyimpi si no, motwaa mu ntsɛntsɛm dɛ morokɔ pramado hɔ na migyinae wɔ akwansidze kɛse, chapel no, n’enyim. Mutuu mbirika kɔɔr bea a wɔnantsew n’afã no ho, a ndua akɛse bi wɔ, na misii gyinae dɛ mubotu mbirika wɔ ntamu ntamu amma obiara ennhu me osiandɛ nna ɔyɛ mber a asɔrba no reba nhyiamu.

Muduur hɔ pɛpɛɛpɛ a wɔrebɛhyɛ agordzi n’ase. Na mutumii bɔɔ bɔɔl na mokɔr fie ansaana me maame reba fie.

Nna biribiara akɔ do yie, hɛn kuw edzi konyim, na m’enyi gyee. Mbom deaconfo quorum fotufo no hun mbirikatu a mutuu no yie dze kɔɔr pramado no.

Nna nuabanyin Félix Espinoza ehu me dɛ medze mbirika ntsɛntsɛm fi dua kor do kɔ dua kor do, a nna morobɔ mbɔdzen dɛ wonnkohu me.

Dapɛn n’ahyɛase no, Nuabanyin Espinoza baa me fie na ɔserɛɛ dɛ ɔnye me bɛkasa. Ɔannkã biribiara wɔ dza ohunii wɔ Kwesida no, nna oemmbisa me siantsir a maammba nhyiamu

Ɔdze nwoma no hyɛɛ me nsa mu ara na ɔkãa dɛ, “Mebɛpɛ dɛ ekyerɛ asɔfodzi adzesũafo adze Kwesida. Maahyɛ adzesũadze no nsew ama wo. Ɔnnyɛ dzen dodow biara. Mepɛ dɛ ekenkan, na ne ndaansa da no mebɛba abɔboa wo wɔ adzesũadze n’ahoboaboa ho.’’ Ɔkãa iyi no, ɔdze nwoma no maa me, na ɔkɔree.

Nna mennpɛ dɛ mekyerɛ adzesũafo no adze, naaso nna munnkotum dɛ merekã akyerɛ dɛ oho. Meyɛɛ nhyehyɛɛ dɛm Kwesida no dɛ, menye m’egya bɛka bio,—a n’asekyerɛ dɛ, nna bɔɔl agordzi a ohia bi so wɔ hɔ.

Nuabanyin Espinoza yɛ nyimpa a mbabun enyi gye no ho.5 Ohun asɛmpa a wɔdze asanananmu no na ɔsesãa n’abrabɔ, yɛrekã bio a, n’akoma.

Mber a Memenda ewiaber durii no, modwendwen ho dɛ, oye, ebia ɔkyena mobɔsoɛr a meyar, na onnkehia dɛ mobɔkɔ asɔr. Nna ɔnnyɛ bɔɔlbɔ no na ɔtseetsee me bio; nna ɔyɛ adzesũafo no a ɔwɔ dɛ mekyerɛ hɔn adze, tsitsir ara adzesũadze a ɔyɛ Ahomgyeda ho asɛm.

Kwesida bae, na mosoɛree a nna metse mpɔw kyɛn aber biara. Nna minnyi asɛm biara kã—munnkotum eguan.

Nna ɔyɛ mber a odzi kan a mebɛkyerɛ adzesũadze, mbom nna Nuabanyin Espinoza wɔ me nkyɛn, na dɛm da no nye akoma nsakyer kɛse ma me.

Fi dɛm ber dze kɔ no, mehyɛɛ ase sie Ahomgyeda no krɔnkrɔn, na mber rugu mu no, President Russell M. Nelson ne nsɛm mu no, Ahomgyeda no abɛyɛ enyigyedze.6

“Ewuradze, medze biribiara ma Wo; minnyi biribiara bio dze ma Wo.’’

Erenya

Yebesi dɛn benya dɛm akoma nsakyer kɛse no? Wɔhyɛ ase na ewiei no ɔbɛyɛ hɔ

  1. sɛ yɛkenkan kyerɛwsɛm no dze nya nyimdzee a ɔbɛhyɛ hɛn gyedzi dzen wɔ Jesus Christ mu a yebenya pɛ dze asakyer.7

  2. sɛ yedua mpaabɔ na akɔnkye do dze nyɛn dɛm ɔpɛ no a.8

  3. sɛ yɛyɛ adze, dɛ mbrɛ asɛm a yesũa anaa yɛagye no tse, na yedzi ahyɛmu dɛ yebegyaa hɛn akoma ama No, dɛmara dɛ Ɔhen Benjamin no nkorɔfo yɛe.9

Eruhu na Ahyɛmudzi

Yesi dɛn hu dɛ hɛn akoma resakyer?10

  1. Sɛ yɛpɛ dɛ yɛsɔ Nyankopɔn enyi wɔ ndzɛmba nyina mu.11

  2. Sɛ yɛdze ɔdɔ, enyidzi, na mbɔbɔrhu hwɛ binom.12

  3. Sɛ yehu dɛ Christsu no rebɛkã hɛn suban ho a.13

  4. Sɛ daa daa yɛtse Sunsum Krɔnkrɔn n’akwankyerɛ nkã yie a.14

  5. Sɛ yesie mbrasɛm a nna ɔyɛ dzen ma hɛn dɛ yɛbɛyɛ setsie na nkyii yɛakɔdo dze abɔ bra a.16

Sɛ yetsie hɛn baanodzifo hɔn afotu ahwɛyie mu ara na enyigye mu ara yesi pi dɛ yebedzi do a, nna yennya akoma nsesã kɛse bi?

“Ewuradze, medze biribiara ma Wo; minnyi biribiara bio dze ma Wo.’’

Nhwɛdo na Mfaso

Yebesi dɛn bɛma dɛm akoma nsakyer kɛse no akã?

  1. Sɛ dapɛn dapɛn yedzi sacrament no na yɛyɛ ahyɛmudzi no fofor dɛ yɛdze Christ ne dzin bɔto hɛn do, yɛakaa No aber nyina, na yesie Ne mbrasɛm.16

  2. Sɛ yɛdze hɛn abrabɔ kyerɛ temple no.17 Temple nkɔree daa daa bɔboa hɛn ma yeenya akoma fofor na ɔasakyer ber a yɛdze hɛn ho hyɛ ayɛdze horow mu.

  3. Sɛ yedua ɔsom dwumadzi horow na asɛmpakasomafo edwuma do yɛdɔ hɛn fipamfo na yɛsom hɔn a.18

Nkyii hɛn enyigye kɛse no, hɛn mu nsakyeree no yɛ dzen na ɔtserɛw kɛpem dɛ ndwuma pa bɛhyɛ hɛn mã.19

Akoma nsakyer kɛse yi dze fahodzi, awerɛhyɛmu, na asomdwee nkã tse brɛ hɛn.20

Akoma nsakyer yi nnsi prɛko pɛr; ɔgye gyedzi, nnuhu, na daa daa sunsum mu edwuma ma oesi. Ɔhyɛ ase sɛ yenya pɛ dze hɛn pɛ ma Ewuradze a, na ɔsesã sɛ a yɛnye no sie ahyɛmudzi na yɛkɔ mu a.

Ankorankor ndzeyɛɛ no wɔ nsunsuando a oye wɔhɛn na nkorɔfo a woetwa ehyia hɛn ho no so do.

President Russell M. Nelson ne nsɛm mu no, “Susu mbrɛ ɔsɛɛ wentwiwentwi horow a ɔwɔ wiadze mfɛndzanan no—na dza wɔwɔ hɛn ankorankor abrabɔ no—wobesi besiesie no ntsɛntsɛm sɛ hɛn nyina yɛsan mu yi dɛ yɛbɛkã Christ do na yeetsie ne nkyerɛkyerɛ no a.’’21 Ibedzi Agyenkwa ne nkyerɛkyerɛ nyɛe yi do no dze akoma nsesa kɛse ba.

Nuambanyin na nkyerɛbaa adɔfo, mbabun na mbofra, ber a yɛdze hɛn ho hyɛ ehyiadzi no mu dapɛn n’ewiei no, hom mma hɛn nkɔhyɛnyi ne nsɛm, a obefi Ewuradze hɔ aba no, nhɛn hɛn akoma mu ma yenya nsakyer kɛse.

Hɔn a wonnyae mbɛkã Ewuradze N’asɔr a ɔdze asan ananmu ho no, moto nsa frɛ hom dɛ hom mfa nokwar ɔpɛ ntsie asɛmpasomafo no nhu dza Nyankopɔn hwehwɛ wɔ hom hɔ na hom nya dɛm nsakyer a ɔwɔ mu no.22

Ndɛ nye da a ibesi gyinae dɛ ebɛkã Ewuradze Jesus Christ do. “Ewuradze, medze biribiara ma Wo; minnyi biribiara bio dze ma Wo.’’

Dɛmara dɛ wohun mpɛtsea no fii wusihɛn a ɔsɛe mu no, sɛ yɛdze hɛn akoma ma Nyankopɔn a, ɔgye hɛn fi abrabɔ yi no po yerɛwyerɛw no mu, na wɔ kwan mu no, wɔnam Jesus Christ no Werdambɔ no do tsew na wosiesie hɛn na yɛbɛyɛ “Christ ne mba,’’ a sunsum mu no “Ɔawo hɛn.’’23 Megye ho dase wɔ Jesus Christ ne dzin mu, amen.