Nsakyeree Nye hɛn Botae
Biribiara nnyi hɔ a ɔbɛhyɛ mber a idzi wɔ kyerɛwsɛm no mu, eretsie Sunsum Krɔnkrɔn no a ɔkasa kyerɛ wo pɛɛ ananmu.
Bɔbor mfe ebiasa besi sesei no, yɛabɔ mu etu kwan dɛ Ewuradze N’Asɔr mu mba. Ɔbɛsɛ 2018 ber mu no na President a Odzi Kan na n’Apamfo na Asomafo Duebien no hɔn Quorum no too nsa frɛɛ hɛn dɛ yensũa Jesus Christ ho asɛm ber a yerusũa kyerɛwsɛm no wɔ kwan fofor na nkenyan kwan mu, a Bra, Bɛkã Mo Do yɛ mboa na akwankyerɛ.
Akwantu biara mu no, oye dɛ yɛbɔhom ber tõ ber na yeker hɛn kankɔ na yɛhwɛ no pefee dɛ yɛda ho rokɔ hɛn botae ho.
Nsakyeree Nye hɛn Botae
Hwɛ asɛnkã a no mu dɔ yi fi Bra Bɛka Mo Do no mbueienyi no:
“Asɛmpa no nsũae na nkyerɛkyerɛ nyina no botae nye dɛ ɔbɛma hɛn nsakyer kɔ Ɔsor Egya na Jesus Christ hɔ no mu adɔ. …
“… Asɛmpa adzesũa no a ɔtse dɛm a ɔhyɛ hɛn gyedzi dzen na ɔdze nsakyer anwanwadze ba no, nnsi prɛko pɛr. Ɔtserɛw fi adzesũa dan mu dze hɛn ankorankor akoma na efiefi mu. Ohia daa daa nwɔwdo mbɔdzenbɔ dze atse asɛmpa no ase na yɛdze abɔ bra. Asɛmpa adzesũa a ogya kɔ nokwar nsakyeree no hia Sunsum Krɔnkrɔn ne nhyɛdo.’’1
Dɛm no nye anwanwadze a yɛhwehwɛ—ber a nyimpa kor nya kyerɛwsɛm no mu sũahu,2 na Sunsum Krɔnkrɔn ne nhyɛdo no ehyira do. Sũahu horow a ɔtsetse dɛm no yɛ fapem abo a ɔsom bo ma hɛn nsakyer kɔ Agyenkwa no hɔ. Na dɛ mbrɛ ɔnnkyɛree a President Russell M. Nelson bɔɔ hɛn nkaa no, ɔwɔ dɛ daa daa yɛhyɛ sunsum mu fapem no dzen.3 Daapem nsakyeree yɛ nkwa da nyina mu kwan.4 Nsakyeree Nye hɛn Botae.
Ama woedzi mu yie no, otwar dɛ wo kyerɛwsɛm mu sũahu no yɛ ɔwoara wo dze.5 Erekenkan anaa eretsie obi ne sũahu na nhumu botum ayɛ mfaso, mbom dɛm no remmfa nsakyer tum dɛmara no mba. Biiribiara nnyi hɔ a ɔbɛhyɛ mber a ɔwo idzi wɔ kyerɛwsɛm no mu, eretsie Sunsum Krɔnkrɔn no kasa kyerɛ wo pɛɛ ananmu.
Ebɛnadze Na Sunsum Krɔnkrɔn no Rekyerɛkyerɛ Me?
Dapɛn biara sɛ mubue me Bra Bɛka Mo Do nwoma no mu a, mekyerɛw asɛmbisa yi wɔ krataafa no sor: “Ebɛnadze na Sunsum Krɔnkrɔn no rekyerɛkyerɛ me dapɛn yi ber a mekenkan etsir yinom?’’
Sɛ musũa kyerɛwsɛm no a, mokɔ do ara dwendwen dɛm asɛmbisa no ho. Na ndzeyɛe a odzi do no si aber nyina, sunsum mu nkenyan ba, na mekyerɛw wɔ mo nwoma no mu.
Afei, misi dɛn hu mber a Sunsum Krɔnkrɔn no rekyerɛkyerɛ me? Oye, ɔtaa si wɔ akwan a nketsenketse na ɔda famu koraa mu. Ɔtɔfabi a asɛnsin bi wɔ kyerɛwsɛm mu bɛda edzi ma meehu. Mber bi so no, metse nkã dɛ m’adwen mu ebue wɔ asɛmpa fapem ne ntseasee yie ho. Mesan so tse Sunsum Krɔnkrɔn ne nhyɛdo nkã ber a emi na me yer, Anne Marie kã dza yɛrekenkan ho asɛm. Aber nyina no nhumu no ma Sunsum no ba.
Nkɔnhyɛnyi na Apaho no
Afe yi yerusũa Ahyɛmu Dadaw no—kyerɛwsɛm krɔnkrɔn a ɔdze kan hyɛ hɛn akra mu mã. Ber a merekenkan Ahyɛmu Dadaw no, metsee dɛ ma menye awerɛhyɛmu aweɔmfo: Adam, Eve, Noah, Abraham, na beberee so ridzi mber.
Ber a yerusũa Exodus etsir 7–13, dapɛn yi no, yesũa mbrɛ Ewuradze sii gyee Israelmba fii mfe ɔha ɔha ndɔmum mu wɔ Egypt ho asɛm. Yɛkenkan ɔyardɔm akron ho asɛm—yɛkenkan Nyankopɔn no tum edziyi nwanwa akron ho asɛm a—Pharoah hunii a ɔanngow n’akoma.
Nkyii Ewuradze kãa ɔyardɔm a otsĩa du ho asɛm kyerɛɛ No nkɔnhyɛnyi, Moses—na mbrɛ ebusua biara wɔ Israel besi botum ayɛ ho ahoboa. Dɛ amandze ne fã a wɔbɛfrɛ no Apaho no, nna ɔwɔ dɛ Israelfo no dze eguambaa nyin, nnyɛ dza woedzi dzɛm mbɔ afɔr. Afei nna ɔwɔ dɛ wɔdze eguambaa ne bɔgya no hyɛ hɔn efiefi no mpondua no nsew. Ewuradze bɔɔ anohoba dɛ efiefi nyinara a wɔdze bɔgya ahyɛ no nsew no benya bambɔ efi ɔyardɔm huhuuhu a nna ɔreba no mu.
Kyerɛwsɛm no se dɛ, “Na Israelmba … kɛyɛɛ dɛm … dɛ Ewuradze hyɛɛ Moses’’ (Exodus 12:28). Biribi a tum ankasa wɔ mu wɔ dɛm setsie asɛm bɔkɔɔ no mu.
Osiandɛ Israelmba dzii Moses n’afõtu do na wɔdze gyedzi dzii dwuma no ntsi, wɔgyee hɔn fii ɔyardɔm no mu, na annkyɛr, fi ndɔmmum mu.
Ntsi no, ebɛnadze na Sunsum Krɔnkrɔn no kyerɛkyerɛɛ me wɔ etsir yinom mu dapɛn yi?
Adwenkyerɛ kakra wɔ ha a ɔatɔ m’adwen do.
-
Nyankopɔn dua no nkɔnhyɛnyi do ma No nkorɔfo bambɔ na ɔgye hɔn.
-
Gyedzi na ahobrɛadze dɛ wɔdze bɛkã nkɔnhyɛnyi no do no dzii bambɔ na ɔgye no kan.
-
Bɔgya a nna ɔwɔ mpondua no do no yɛ gyedzi wɔ Jesus Christ mu, Nyame Eguambaa no mu abowano sɛnkyerɛdze.
Nkɔnhyɛnyi no na Ewuradze n’Anohoba
M’enyi gye nsɛ a ɔda kwan a Ewuradze sii hyiraa No nkorɔfo wɔ Ahyɛmu Dadaw asɛm mu na kwan a Ɔsan so rihyira No nkorɔfo ndɛ ntamu no ho.
Ber a Ewuradze no nkɔnhyɛnyi tseasefo, Prsident Nelson, daa Bra Bɛka Mo Do edzi kyerɛɛ hɛn dɛ kwan a yɛdze bosũa kyerɛwsɛm no, ɔtoo nsa frɛɛ hɛn dɛ yɛnsesã hɛn efiefi nyɛ no gyedzi na asɛmpa adzesũa etsitsir guandɔbea.
Nkyii ɔbɔɔ nhyira etsitsir anan ho anohoba:
-
w’Ahomgyeda bɛyɛ enyigye,
-
Wo mba enyi bɛgye dɛ wobosũa Agyenkwa ne nkyerɛkyerɛ na wɔdze abɔ bra,
-
ɔsɛefo ne nhyɛdo wɔ w’abrabɔ na wɔ wo fie no do bohuan, na
-
nsesã yinom wɔ w’ebusua mu no bɛyɛ nwanwa na ɔbɔkɔ do.6
Sesei dze yeenyi nwoma nkyerɛwee biara fi hɔn a wɔnye Moses dzii Apaho no hɔ. Naaso, yɛwɔ dasedzi pii fi Ahotseweefo a, wɔdze gyedzi dɛmara no, ridzi President Nelson n’afõtu do ndɛ na worinya anohoba nhyira no hɔ.
Dasedzi kakra a ɔtsetse dɛ nye yi:
Ebusua kakraba bi hɔn nã kãa dɛ “Yɛkã Christ ho asɛm na yedzi dɛw wɔ Christ mu wɔ hɛn fie. Emi dze iyi yɛ nhyira kɛsenara—dɛ me mba botum dze asɛmpa nkɔmbɔdzi yinom enyin wɔ fie a ɔtwe hɔn bɛn Agyenkwa no.’’7
Mo nuabanyin panyin frɛɛ ne kyerɛwsɛm adzesũa a ɔnam Bra Bɛka Mo Do do no, “kwan a kan krɔnkrɔn hyɛ mu mã a ɔboa hɛn ma yehu asɛmpa nkyerɛkyerɛ a ohia ma hɛn sunsum ne yieyɛ.’’8
Ɔyer kumabaa bi kãa nhyira wɔ n’awar mu ho asɛm dɛ: “meetum ehu mo kun n’akoma bun mu ara yie, na meetum ebue m’akoma mu yie ama no ber a yɛbɔ mu sũa.’’9
Ebusua kɛse bi hɔn nã hun mbrɛ ne mbɔdzembɔ dɛ ɔbɛkyerkyerɛ ne mba adze sii sesãe. Ɔkãa dɛ: “Obu no kɔn pɔw a, nna ɔtse dɛ ɔhyɛ esukwankyɛba nsa bɔha dze robɔ sanku. Nna morohwɛ nkekaho no, naaso nna ndwom no nntsen yie. Afei dze nsa bɔha no nnyi hɔ bio, na ber a mo ndwom da ho nndzi mu no, metse nsonsonee wɔ mu. Bra Bɛka Mo Do ama me enyido-adzehu, ahoɔdzen, enyigyen, na botae.’’10
Kun kumabaa bi kãa dɛ: “M’ehiadze etsitsir dodow a ɔwɔ fie no abɛda edzi pefee yie ofitsi ber a medze Bra Bɛka Mo Do bɛkaa me daa daa anapa ho. Murusũa no ma modwendwen ndzɛmba a no ho hia dodow ma me yie no ho, tse dɛ temple, menye me yer nkitahodzi, na me ɔfrɛ. M’enyisɔ dɛ me fie yɛ guandɔbea a Nyankopɔn dzi kan.’’11
Akyerɛbaa bi kãa dɛ: “Me daa daa sũahu wɔ Bra Bɛka Mo Do no nnyɛ dza wɔkyerɛw, mbom mber rokɔ no mutum hu mbrɛ daa daa, kyerɛwsɛm ho adzesũa enyigyen no esi resesã me. Adzesũa a ɔtse dɛm no ma me ahobrɛadze, kyerɛkyerɛ me, na ɔsesã me nkarankakra.’’12
Asɛmpasomafo a ɔaba bɔɔ amandzɛɛ dɛ: “Bra, Bɛka Mo Do nhyehyɛɛ no ama meedu kyerɛwsɛm adzesũa ne mpɛnpɛndo do a muduu wɔ m’asɛmpakã no, na meetum efi ndzɛmba a wɔkyerɛw no nkorkor adwen wɔ kyerɛwsɛm adzesũa ho aba nkenyan mber a mubohu Nyankopɔn mu.’’13
Nuabanyin bi kãa dɛ: “Metse nkã dɛ Sunsum Krɔnkrɔn no aba m’abrabɔ mu yie na metse Nyankopɔn ne nyikyerɛ akwankyerɛ no nkã wɔ adwenpɔw a meyɛ mu. Mowɔ nkɔmbɔdzi a no mu dɔ yie a ɔfa Christ na No Werdambɔ ho nkyerɛkyerɛ bɔkɔɔ ne fɛw ho.”14
Mfe esuon ba bi kãa dɛ: “Ɔnnkyɛr na oenuma me, na Bra Bɛka Mo Do reyɛ me krado. Menye m’ebusua ka enuma ho asɛm, na munnsuro dɛ wobonuma me sesei. Bra, Bɛka Mo Do no boa Sunsum Krɔnkrɔn no ma ɔba m’akoma mu, na sɛ mekenkan kyerɛwsɛm no a menya ahomka.’’15
Na ewiei no, fi mba beberee hɔn nã hɔ no: “Ber a yesũa Nyankopɔn n’asɛm no, Ɔno aboa m’ebusua ma yeefi ɔhaw mu akɔ tum mu; yeefi nsɔhwɛ na tafɛrbanyinmbɔmu mu akɔ ɔgye mu; yeefi wentwiwentwi na kasatsĩa mu akɔ ɔdɔ na asomdwee mu; na yeefi ɔsɛefo ne nhyɛdo do akɔ Nyankopɔn ne nhyɛdo ase mu.’’16
Iyinom na Christ n’akadofo anokwafo pii so no sɛnkyerɛdze mu ara dze Nyame Eguambaa no bɔgya no aka hɔn efiefi no kwan enyim. Wɔrekyerɛ hɔn mu pisi dɛ wɔbɛkã Agyenkwa no do. Hɔn gyedzi dzi anwanwadze no kan. Ɔyɛ nyimpa kor renya kyerɛwsɛm no mu sũahu na Sunsum Krɔnkrɔn ne nhyɛdo no ehyira dɛm sũahu no do awanwadze.
Sɛ yesũa kyerɛwsɛm no a, sunsum mu kɔm biara nnyi asaase do hɔ. Dɛ mbrɛ Nephi kãe dɛ, “Obiara a obetsie Nyame n’asɛm, na oesuo mu dzen no, na nsɔhwɛ nye abɔnsam n’egyen menaba no runntum nnhyɛ hɔn do mmfura hɔn enyiwa a ɔdze hɔn bɔkɔ ɔsɛɛ mu.”(1 Nephi 15:24).
Tsetse ber no, ber a Israelmba dzii Ewuradze n’akwankyerɛ a ɔdze dua no nkɔnhyɛnyi Moses do dze mae do no, wɔdze ahotɔ na fahodzi hyiraa hɔn. Ndɛ, ber a yedzi Ewuradze n’akwankyerɛ a oedua hɛn nkɔnhyɛnyi tseasefo President Nelson do dze ama do no, wɔdze nsakyer wɔ hɛn akoma mu na bambɔ wɔ hɛn efiefi hyira hɛn dɛmara.
Megye dase dɛ Jesus Christ tse ase. Iyi nye N’Asɔr a, woduaa Nkɔnhyɛnyi Joseph Smith do dze asan ananmu aba. President Russell M. Nelson nye Ewuradze no nkɔnhyɛnyi ndɛ. Modɔ no na mema no tsipia. Jesus Christ ne dzin mu, amen.