Christ Sa Dza Ebubu no Yarba
Obotum asɔw yɛnye Nyame ntamu nkitahodzi a asɛɛ, yɛnye binom ntamu nkitahodzi a asɛɛ, nna hɛnankasa hɛn fã bi a woebubu no.
Mfe kakra a abɛsen kɔ, wɔ ebusua nhyiamu bi ase no, mo wɔfase William a nna oedzi mfe awɔtwe bisaa hɛn babanyin panyin, Briton, sɛ ɔnye no bɔbɔ bɔɔl a. Ahomkamu ara Briton gye do, “Nyew! Mɔdɔ dɛ mobɔ!” Mber guu mu kakra a wogudu robɔ no, bɔɔl no fii Briton hɔ, awerɛfirmu ara ɔbɔɔ ne nananom hɔn tsetse nkutu no mu kor bubuu no.
Briton no werɛ howee. Ɔhyɛɛ ase resesaw mbubui no, William kɔr no nua no ne nkyɛn na ɔbɔɔboa no ɔdɔ mu ara. Nkyii ɔkyekyee no werɛ see dɛ, “Briton, mma nnhaw woho. Da bi mubuu biribi wɔ Nanabasia na Nanabanyin hɔn fie, na Nanabasia dze ne nsa fuaa me na ɔkãa dɛ, “Oye, William. Edzi mfe enum ara.”
Na Briton buaa dɛ, “Naaso William, emi medzi mfe 23!”
Yebotum esũa pii efi kyerɛwsɛm no mu fa mbrɛ hɛn Agyenkwa, Jesus Christ, bɔboa hɛn ma konyimdzi mu ara yɛahyehyɛ ndzɛmba a ebubu wɔ hɛn abrabɔ mu a, ɔmmfa ho mfe a yeedzi. Obotum asɔw yɛnye Nyame ntamu nkitahodzi a asɛɛ, yɛnye binom ntamu nkitahodzi a asɛɛ, nna hɛnankasa hɛn fã bi a woebubu no.
Yɛnye Nyame Ntamu Nkitahodzi a Asɛɛ
Ber a Agyenkwa no rekyerɛkyerɛ wɔ asɔrfi mu no, Phariseefo na akyerɛwfo dze ɔbaa bi baa No hɔ. Yennyim ɔbaa no n’asɛm no nyina, gyedɛ “[wɔ]kyeer no wɔ awarto mu.”1 Mpɛn pii no kyerɛwsɛm no ma nyimpa bi n’abrabɔ ho asɛm ne fã kumaa bi, na yegyina ɔno do no ɔyɛ a yɛbɔ hɔn ose anaa yetsia hɔn. Obiara nnyi hɔ a wɔdze asɛm kɛse kor a osii anaa baguamu enyimguasedze kor a osii dze bɛtse n’abrabɔ ase. Kyerɛwsɛm mu nsɛm no botae nye dɛ ɔbɔboa hɛn ma yeehu dɛ nna Jesus Christ nye nyiano no, na Ɔno nye nyiano no sesei. Onyim hɛn asɛm mu ne nyinara nye amandze a yeruhu no pɔkyee, nna hɛn ahoɔdzen na hɛn mberɛwyɛ so dɛmara.
Christ no mbuae ma dɛm Nyame ne babaa a ɔsom bo no nye dɛ “Moso mummbu wo fɔ: kɔ na mma nnkɛyɛ bɔn bio.”2 Kwan kor so a yebotum dze akã “kɔ, na mma nnkɛyɛ bɔn bio” nye “kɔ na sakyer.” Nna Agyenkwa no rema no nsato dɛ onu noho: ɔnsakyer no suban, n’anyɛnkofa, mbrɛ osi tse nkã fa noara noho, na n’akoma.
Osian Christ ntsi, hɛn gyinasi dɛ “yɛbɔkɔ na yɛasakyer” no botum so ama hɛn kwan ma “yɛakɔ na yeenya ayarsa,” ɔnam dɛ Ɔno nye ayarsa ma dza ebubu wɔ hɛn abrabɔ mu nyina ne farba. Dɛ Ntamugyinafo na Odzimafo kɛse a ɔnye Egya no wɔ hɔ no, Christ tsew ho na ɔdze nkitahodzi a asɛɛ si n’ananmu—ohia kɛse, yɛnye Nyame ntamu nkitahodzi.
Joseph Smith Nkyerɛase no da no edzi pefee dɛ ɔbaa no dzii Agyenkwa no n’afotu do na ɔsakyeer n’abrabɔ: “Na ɔbaa no hyɛɛ Nyame enyimnyam fi dɛm ber no, na ɔgyee ne dzin dzii.”3 Ɔyɛ yaw dɛ yennyim ne dzin, anaa ndzɛmba binom fa n’abrabɔ ho dɛm aber no ekyir osiandɛ ɔbɛgye enyimpi si kɛse, ahobrɛadze, na gyedzi wɔ Jesus Christ mu dze enu noho na ɔasakyer Dza yenyim nye dɛ ɔyɛ ɔbaa a “ɔgyee ne dzin dzii” a ɔwɔ ntseasee dɛ ɔwɔ kyɛfa wɔ N’afɔrbɔ a ɔmmbɔadze na onnyiewiei no mu.
Yɛnye Binom Ntamu Nkitahodzi a Asɛɛ
Luke tsir 15 mu no, yɛkenkan abɛbusɛm fa banyin bi a nna ɔwɔ mbabanyin beenu ho. Kakraba dze no bisaa n’egyapadze fi n’egya hɔ, tuu kwan kɔr kurow bi mu ekyirekyir dze asakasakabra sɛɛ n’ahodze no.4
“Na owiee ne nyina hwer no, ɔkɔm kɛse bi baa asaase no do, na ɔhyɛɛ ase dzii hia.
“Na ɔkɔree dze noho kɔbɔɔ asaase no do nkorɔfo no mu bi ho; na ɔsomaa no ma ɔkɔr ne hamu kɛnyɛɛn mpreko.
“Na no kɔn dɔɔ dɛ ɔdze asɛdua-hon a mpreko dzii no bi hyɛɛ ne yafun mã: na obiara amma no.
“Na n’enyi baa noho do no, ɔkãa dɛ, Apaafo ahen na m’egya wɔ a wɔwɔ edziban ma ɔbor do, na emi ɔkɔm ruku me yi!
“Mobɔsoɛr, na makɔ m’egya nkyɛn, na mase no dɛ, Egya, mayɛ bɔn etsia ɔsor nye w’enyim,
Na memmfata dɛ wɔfrɛ me wo ba bio: na yɛ me w’apaafo no mu baako.
“Na ɔsoɛree baa n’egya nkyɛn. Na ɔda ho wɔ ekyirkyir no, n’egya hun no, na ne yamu hyehyee no, na otuu mbirika kɛbaar no kɔn, na ofeew n’ano.”5
Megye dzi dɛ nokwar no dɛ egya no tuu mbirika kɔr ne ba ne nkyɛn no, hia. Yaw a babanyin no dze too ne papa no do no nna no mu dɔ na ɔsõ. Dɛm ara so na bia a egya no n’enyim egu ase wɔ ne babanyin ne ndzeyɛɛ no ho.
Ntsi, ebɛnadze ntsi na Egya no anntweɔn ma ne ba no ammbɛpa kyɛw? Dɛn ntsi na ɔanntweɔn amma nsiesie na nhyɛananmu nhyehyɛɛ ana ɔrema bɔfankyɛ na ɔdɔ? Iyi yɛ adze a m’adwen ho mpɛn pii.
Ewuradze kyerɛkyerɛ hɛn dɛ bɔnfakyɛ yɛ mbra ma obiara: “Emi, Ewuradze, medze hɔn a mepɛ no hɔn bɔn kyɛ hɔn, na mbom homdze, ɔyɛ hom ahyɛdze dɛ hom dze nyimpa nyina hɔn bɔn kyɛ hɔn.”6 Erema bɔnfakyɛ no botum agye akokodur kɛse na ahobrɛadze. Obotum so agye mber. Ɔgye dɛ yɛdze hɛn gyedzi na hɛn werɛ hyɛ Ewuradze mu ber a yesuow hɛn akoma ho tsebea ne nkontaabu mu. Iyi mu na hɛn ɔpɛ tum na ne hia da.
Egya yi ne ndzeyɛɛ wɔ ɔba dzesɛɛfo n’abɛbu sɛm mu no, Agyenkwa no sii do dɛ bɔnfakyɛ yɛ adzekyɛdze mu kor a ɔkrɔn a yebotum dze ama hɛnho hɛnho na hɛnankasa hɛnho pɔkyee. Yerudua bɔnfakyɛ do eyi adzesoa efi hɛn akoma do no nnda famu daa, naaso ɔnam Jesus Christ ne dzenhyɛ tum no ntsi, ɔbɛyɛ yie.
Hɛnankasa Hɛn Fã Bi a Ebubu
Ndwuma tsir 3 mu no, yesũa fa ɔbarima a wɔwoo no bubuafo a “daa wɔdze no bɔtoo asɔrfi abow a wɔfrɛ no Fɛɛfɛw no ano, dɛ ɔnserɛ hɔn a wɔrokɔ asɔrfi no mu adze” ho.”7
Nna obubuafo serɛserɛnyi no edzi mfe 40 abor8 na ɔabɔ ne bra nyina wɔ ohia na ɔtweɔn tsebew a ɔyɛ dɛ onnyiewiei da mu, osiandɛ nna ɔdan binom hɔn ayamuyie.
Da kor bi ohun “Peter nye John dɛ wɔrekɛhɛn asɔrfi mu no [na] obisaa dɛ obenya akyɛdze.
“Na Peter, dze n’enyiwa tsiim no do ɔnye John so, na ɔsee dɛ, Hwɛ hɛn.
“Na ɔhwɛɛ hɔn komm, osusu dɛ oribenya biribi wɔ hɔn hɔ.
“Na Peter see dɛ, Sika nye dwɛɛtɛɛ dze; minnyi bi, na dza mowɔ na medze rema wo yi: Nazarethnyi Jesus Christ ne dzin mu, nantsew.
“Na osuoo ne nsa nyimfa mu, na ɔmaa no do: na amonmu hɔ ara n’anansa nye n’anandwɛ yɛɛ dzen.
Na ohuruwii gyinae, na ɔnantsewee, na ɔnye hɔn kɔr asɔrfi no mu, ɔnam na oruhuruhuruw, na oriyi Nyankopɔn ayɛw.”9
Mpɛn pii yebotum ehu hɛnho, dɛ obubuafo serɛserɛnyi no a ɔda asɔrfi abow ano, abotar mu ara—anaa ɔyɛ a ntsɛmpɛ mu ara—“[ro]tweɔn Ewuradze.”10 Rotweɔn dɛ yebenya honanmu anaa nkã tse mu ayarsa. Rotweɔn mbuae a ɔkã hɛn akoma no bun mu. Rotweɔn anwanwadze bi.
Yɛrotweɔn Ewuradze botum ayɛ krɔnkrɔn bea—bea a wotwuw ho na wɔtsew ho a yebotum ebohu Agyenkwa no ankorankor kwan do kɔ bun mu. Yɛrotweɔn Ewuradze so botum ayɛ bea a yebohu dɛ yeribisa, “O Nyankopɔn, ewɔ hen?”11—bea a sunsum mu nketsesi gye dɛ yɛdze gyedzi dzi dwuma wɔ Jesus Christ mu ber a enyidaho mu ara yɛresan mu eyi No bio na bio. Minyim dɛm bea yi, na metse dɛm ɔtweɔn yi ase.
Midzii ndɔnhwer pii wɔ kokoram ayarsa bea, a menye nkorɔfo pii a hɔn enyi da kwan dɛ wobenya ayarsa no bɔmu hun amandze. Binom nyaa nkwa; binom so ennya. Musũaa wɔ ahobow kwan do dɛ ɔgye fi hɛn nsɔhwɛ horow mu yɛ soronko ma hɛn mu kor biara, ntsi ɔnnsɛ dɛ hɛn enyi tsim kwan a wɔbɛfa do agye hɛn no do mbom hɛn enyi tsim wɔ Ɔgyefo Noara no do. Ɔsɛ dɛ hɛn enyi tsim Jesus Christ do daa daa!
Yɛdze gyedzi ridzi dwuma wɔ Christ mu nnkyerɛ dɛ yɛdze hɛn werɛ rehyɛ Nyame ne pɛ mu nkõ mbom wɔ Ne mber mu so. Osiandɛ Onyim dza yehia pɔkyee na mber pɔkyee a yehia. Sɛ yɛdze hɛnho ma Ewuradze ne pɛ a, ewiei no yebenya pii asen dza yɛhwehwɛɛ no.
M’anyɛnkofo adɔfo, hɛn nyinara wɔ biribi wɔ hɛn abrabɔ mu a woebubu a ohia dɛ wɔsɔw, wosiesie, anaa wɔsa no yar. Ber a yɛdan kɔ Agyenkwa no hɔ no, ber a yɛdze hɛn adwen na hɛn akoma to Nedze ho no, ber a yenu hɛnho no, Ɔba hɛn nkyɛn a “ɔdze ayarsa wɔ ne ntsaban mu,”12 dze no dɔ abasa no fua hɛn, na ɔkã dɛ, “Oye. Edzi mfe 5—anaa 16, 23, 48, 64, 91 ara. Yebotum yɛabɔ mu esiesie iyi!”
Megye dase dɛ biribiara nnyi w’abrabɔ mu a ebubu a ɔbor Jesus Christ ne ayarsa, ɔpon na dzenhyɛ tum do. Nyia a ɔso dɛ ɔma ayarsa, Jesus Christ ne dzin a ho tsew krɔnkrɔn no mu, amen.