Tsis Muaj Cai Sib Khom txog lub Koom Txoos lub Npe
Thaum peb txaus siab ua raws li tus Tswv hais los ntawm tej uas Nws tus yaj saub qhia, qhov tseem ceeb yog thaum tsis yog raws li peb xav, peb thiaj li yuav tsum txo hwj chim thiab ua kev txi, ces tus Tswv foom koob hmoov rau peb kom peb sab ntsuj plig muaj hwj chim.
Thaum muaj rooj sib tham nrog cov kws xov xwm thaum lub Yim Hli Ntuj hnub tim 16, xyoo 2018, Thawj Tswj Hwm Russell M. Nelson hais tias: “Tus Tswv tau tshoov kuv lub siab kom paub tias lub npe rau Nws lub Koom Txoos uas Nws tau qhia tseem ceeb npaum li cas, lub npe uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.1 Peb muaj hauj lwm ua xwv kom peb ua raws li Nws lub siab nyiam.”2
Ob hnub tom qab ntawd, thaum lub Yim Hli Ntuj hnub tim 18, kuv tau nrog Thawj Tswj Hwm Nelson mus rau Montreal, Canada. Tom qab wb tau nrog cov mej zeej sib ntsib hauv lub tsev Palais de Congrés, Thawj Tswj Hwm Nelson tau teb cov kws sau xov xwm tej lus. Nws lees hais tias yeej yog “ib qho nyuaj uas yuav [rov qab siv lub Koom Txoos lub npe yog lawm, thiab] yuav tsum muab kab lig kev cai uas tau siv rau ib puas xyoo tawm tso tseg.” Tiam sis nws hais tias, “tsis muaj cai sib khom txog lub Koom Txoos lub npe.”3
Xya lub lim tiam tom qab ntawd, Thawj Tswj Hwm Nelson tau hais lus hauv lub tuam rooj sab laj: “Tus Tswv tau tshoov kuv lub siab kom paub tias lub npe rau Nws lub Koom Txoos uas Nws tau tshaj tawm tseem ceeb npaum li cas, lub npe uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. … Yog tus Cawm Seej uas tau muab lub npe no thaum Nws hais tias, ‘Vim yuav tsum hu kuv lub koom txoos li no.’” Ces Thawj Tswj Hwm Nelson rov qab hais tias, “Tsis muaj cai sib khom txog lub Koom Txoos lub npe.”4
Ib lo Lus Nug Zoo
Tib neeg xav paub tias: Vim li cas yuav hloov tam sim no, vim tau ntev lawm peb twb siv lub npe “Neeg Maumoos” lawm? Tau muaj “Cov Neeg Maumoos lub Tsev Kheej Pawg Hu Nkauj,” tej video hu ua “Kuv yog Neeg Maumoos,” zaj nkauj hu ua “Kuv Yog ib tug Tub Maumoos” nev?
Khetos cov lus qhuab qhia yeej tsis hloov thiab kav ib txhis li. Tiam sis tej yam tseem ceeb ntawm tus Cawm Seej txoj hauj lwm los yuav tshwm sim thaum ib lub sij hawm tsim nyog. Tag kis no Thawj Tswj Hwm Nelson hais tias, “Kev Muab Txoj Moo Zoo Txum Tim Rov Qab Los yog ib tug txheej txheem, tsis yog ib lub sij hawm xwb.”5 Thiab tus Tswv hais tias, “Txhua yam yuav tsum tshwm sim los thaum txog lub sij hawm.”6 Tam sim no yog lub sij hawm rau peb rov qab siv lub Koom Txoos lub npe uas tau tshwm sim lawm.
Yuav tsum hu peb raws li Nws lub npe vim tias nov yog txoj hmoov ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Tsis ntev tas los kuv nyob hauv Kirtland, Ohio, es nyob ntawd tus Yaj Saub Joseph Smith, nrog ob peb tug mej zeej ntawm lub Koom Txoos xwb, tau qhia tias, “Lub Koom Txoos no yuav puv tag nrho Amelikas Sab Qaum Teb thiab Sab Qab Teb—thiab yuav puv tag nrho lub ntiaj teb.”7 Tus Tswv piav hais tias txoj hauj lwm hauv lub caij nyoog no yog “ib txoj hauj lwm zoo kawg nkaus thaib ib qho txuj ci tseem ceeb.”8 Nws hais txog ib “txoj kev khi lus nyob rau hauv hnub nyoog kawg” uas cia “txhua haiv neeg uas nyob hauv lub ntiaj teb … tau koob hmoov.”9
Cov lus los ntawm lub rooj sab laj no los tau txhais lus ua 55 yam lus. Thaum kawg, yuav hnov thiab nyeem cov lus no nyob hauv 220 lub teb chaws thiab txhais ua 98 yam lus.
Thaum tus Cawm Seej rov qab los nrog lub yeeb koob, cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yuav nyob hauv txhua cov neeg, txhua haiv neeg, txhua lub teb chaws, thiab txhua kab lig kev cai ntawm lub ntiaj teb.
Lub Koom Txoos lub Hwj Huam uas Loj Tuaj
Yexus Khetos lub Koom Txoos lub hwj huam yuav mus rau cov neeg coob tsis yog rau cov mej zeej ntawm lub Koom Txoos xwb. Nyob hauv peb lub caij nyoog yuav muaj tej kev tshwm sim uas los saum ntuj los, cov vaj lug kub uas tau muab txum tim rov qab los, thiab lub txiaj ntsim Vaj Ntsuj Plig Dawb Huv uas muaj hwj chim, peb thiaj li yuav ua ib lub teeb uas ci ci saum toj thaum tej duab ntxoov ntxoo ntawm kev tsis ntseeg Yexus Khetos ua rau lub ntiaj teb no tsaus ntuj nti. Txawm yog neeg coob yuav cia lub ntiaj teb ua rau lawv tso kev ntseeg tus Txhiv Dim tseg, peb yuav “tsis raug muab tshem tawm ntawm [peb] qhov chaw mus.”10 Cov ntseeg Khetos uas tsis koom nrog peb cov mej zeej yuav zoo siab tos txais peb thiab peb zaj lus tim khawv tseeb txog Yexus Khetos. Cov Neeg Ntseeg Khetos uas tam sim no tsis tshua ntseeg peb mas yuav muaj ib hnub lawv yuav ua phooj ywg nrog peb. Thaum yav tom ntej, lwm tus yuav hu peb raws li Yexus Khetos lub npe.
Ua nej tsaug vim nej siv zog txhawb nqa lub Koom Txoos lub npe tseeb. Nyob hauv lub rooj sab laj peb xyoos tas los, Thawj Tswj Hwm Nelson tau cog lus rau peb tias “thaum peb sim siv lub npe yog rau tus Cawm Seej lub Koom Txoos … peb yuav haj yam muaj kev ntseeg thiab cov mej zeej hauv Nws lub Koom Txoos yuav haj yam muaj hwj chim ntawm sab ntsuj plig.”11
Twb tau muaj raws li kev cog lus no rau cov thwj tim rau siab nyob thoob plaws lub ntiaj teb no.12
Tij Laug Lauri Ahola los ntawm lub Teb Chaws Amelikas Sab Hnub Tuaj hais tias tsis yooj yim siv lub npe ntev ntawm lub Koom Txoos. Tiam sis vim tus yaj saub qhia li ntawd, nws tseem sim hais lub npe ntev. Muaj ib lub sij hawm, nws ntsib ib tug phooj ywg hauv ib lub koom txoos uas tsis yog peb li. Nws tau hais li no:
“Ib tug phooj ywg nug nws tias, ‘Koj puas yog neeg Maumoos?’
“Kuv hais tias, ‘Kuv yog ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, yog mas.’ Nws pib nug kuv ob peb lo lus tias, txhua zaus nws hais tias: ‘Lub Koom Txoos Maumoos puas ntseeg …?’ Thiab txhua zaus, kuv teb nws li no hais tias: ‘Nyob hauv Yexus Khetos lub Koom Txoos uas tau txum tim rov qab los, peb ntseeg tias …’
“… Thaum nws xav tias vim li cas kuv tsis kam siv lo lus ‘Maumoos’ nws nug kuv tias, ‘Koj tsis yog Neeg Maumoos los?’
“Yog li ntawd kuv nug nws seb nws puas paub Maumoos yog leej twg—es nws tsis paub. Kuv qhia nws tias Maumoos yog ib tug yaj saub … [thiab kuv] zoo siab koom ua ke nrog [nws] li ntawd.
“Ces kuv hais tias, ‘Tiam sis, Maumoos tsis tau tuag theej kuv tej kev txhaum. Maumoos tsis tau … raug txom nyem hauv Khexemanes los sis tuag saum tus ntoo khaub lig [rau kuv]. … Yexus Khetos yog kuv tus Vajtswv thiab kuv tus Cawm Seej. … Thiab kuv xav kom lwm tus paub kuv los ntawm Nws lub npe. …’
“… Nws tsis hais lus rau ib chim, ces [tus phooj ywg hais tias], ‘Yog li ntawd, koj yog ib tug neeg ntseeg Khetos tiag!’”13
Nej puas nco qab Thawj Tswj Hwm Nelson tej lus? “Kuv cog lus rau nej yog peb yuav ua zoo npaum li peb ua tau kom rov qab siv lub npe ntawm tus Tswv lub Koom Txoos, ces Nws yuav nchuav Nws lub hwj chim thiab cov koob hmoov saum Tsoom Haiv Neeg Ntseeg hauv Hnub Nyoog Kawg tej taub hau, ntau dua li peb ib txwm tau pom dua.”14
Tus Tswv Yeej Qhib Kev rau Peb
Tus Tswv yeej ua raws li Nws cov lus cog tseg. Tus Tswv yeej qhib kev rau peb thaum peb ua Nws txoj hauj lwm.
Ntau xyoo peb tau cia siab xav yuav qhov chaw internet lub npe ChurchofJesusChrist.org thiab ChurchofJesusChrist.com. Ob qho no los luag tsis kam muag. Ob lub hlis ua ntej Thawj Tswj Hwm Nelson txoj kev tshaj tawm, ob qho chaw no los muaj lawm. Yog ib qho txuj ci tseem ceeb.15
Tus Tswv tau pab peb siv zog ua hauj lwm thaum kho tej npe uas ntev los lawm lawv hu lub Koom Txoos no.
Nrog kev ntseeg, peb tau muab cov Neeg Maumoos lub Tsev Kheej Pawg Hu Nkauj hloov ua lub Tsev Kheej Pawg Hu Nkauj ntawm Tshav Tuam Tsev. Qhov chaw website LDS.org, uas neeg mus xyuas 21 plhom zaus txhua lub hlis los tau hloov ua ChurchofJesusChrist.org.16 Tau muab LDS Business College lub npe hloov ua Ensign College. Qhov chaw website Mormon.org tau muab hloov ua ChurchofJesusChrist.org. Twb muaj ib txhiab yam uas muaj npe “Maumoos” los sis “LDS” uas hloov lawm. Tej Haiv Neeg Ntseeg coob uas rau siab ntseeg tau hloov lawv tej website, podcast thiab akhauj hauv Twitter.
Peb tau hloov siv ib lub cim tshiab uas tsom ntsoov rau Yexus Khetos.
“Nyob nruab plawv lub cim hom no muaj ib daim duab txog Thorvaldsen tus mlom txog Yexus Khetos. Nws piav txog txoj kev sawv rov los, tus Tswv uas muaj sia nyob ncav ob txhais tes rau txhua tus neeg uas yuav los cuag Nws.
“Ua cim hom, Yexus Khetos sawv hauv qab ib tug ncej pob zeb uas nkhaus [kom] pab peb nco txog qhov uas tus Cawm Seej uas sawv rov los tawm ntawm lub ntxa hnub thib peb tom qab lawv muab Nws Ntsia Saum Ntoo Khaub Lig.”17
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau hloov txoj kev sau ntawv kom haum 50 yam lus. Muaj ntau yam lus uas tau yuav tej qhov chaw internet lub npe.
Kev Ris Txiaj rau Lwm Tus txoj Kev Pab
Peb zoo siab rau cov neeg zoo uas tau ua raws li peb xav kom hais lub npe yog lawm. Kuv tau nyeem ib zaj lus uas hais txog ib tug xib hwb Catholic uas hu peb ua “Tsoom Haiv Neeg Ntseeg hauv Hnub Nyoog Kawg”.18 Thaum kuv sib tham nrog ib tug thawj coj hauv lwm lub koom txoos ntseeg Khetos ib lub hlis tas los nyob hauv lub Teb Chaws Amelikas, nws hais txog lub Koom Txoos siv lub npe ntev, thiab thaum nws rov qab hais nws siv lub npe, “Yexus Khetos lub Koom Txoos.”
Peb paub tias qhov uas ntxiv rau lo lus rau peb lub npe yeej yuav tsis yooj yim rau cov kws sau xov xwm, tiam sis ib yam li Thawj Tswj Hwm Nelson hais tias, “cov neeg uas sau xov xwm yuav muaj siab xav ua raws li peb thov.”19 Ua tsaug vim nej saib taus peb thaum nej siv lub npe uas peb nyiam zoo ib yam li nej saib taus lwm lub koom haum tsis hais tej koom haum ntawm kab lig kev cai, kev sib tw ntaus pob, kev kav teb kav chaw, los sis koom haum hauv zej zog.
Yeej yuav muaj tsawg tus neeg uas xav luag thuam peb ntiag tug hauj lwm, lawv tseem yuav hu peb ua “neeg Maumoos” los sis “lub Koom Txoos Maumoos.” Peb thov kom cov neeg ncaj ntawm cov kws sau xov xwm ua raws li peb xav kom hu peb raws li lub npe uas peb muaj rau 200 xyoo lawm.
Haiv Neeg Ntseeg hauv Hnub Nyoog Kawg txoj Kev Ua Siab Loj
Muaj txhiab txhiab tus Neeg Ntseeg hauv Hnub Nyoog Kawg uas tau ua siab loj tshaj tawm lub Koom Txoos lub npe. Thaum peb ua peb feem, ces lwm tus yuav ua li ntawd thiab. Kuv nyiam zaj dab neeg los ntawm Tahiti no.
Iriura Jean uas muaj kaum xyoo tau xav rau siab ua raws li Thawj Tswj Hwm Nelson tej lus.
“Nyob hauv nws hoob kawm ntawv lawv tau sib tham txog qhov uas lawv ua li cas rau hnub so … thiab Iriura hais txog … lub koom txoos.
“Nws tus xib hwb, Vaite Pifao, hais tias, ‘Auj, ces koj yog neeg Maumoos yom?’
“Iriura hais tias, ‘Tsis yog … kuv yog ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg!’
“Nws tus xib hwb teb hais tias, ‘Yog mas, … koj yog neeg Maumoos.’
“Iriura hais tias, ‘Tsis yog, xib hwb, kuv yog ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg!’
“Tus xib hwb Pifao xav tsis thoob vim Iriura ntseeg heev thiab xav paub vim li cas nws yuam tas zog siv lub koom txoos lub npe uas ntev heev. [Nws tau txiav txim siab kawm ntxiv txog lub Koom Txoos.]
“[Tom qab ntawd, thaum Muam] Vaite Pifao tau ua kev cai raus dej [nws tau hais lus] ris Iriura txiaj vim nws ua raws li Thawj Tswj Hwm Nelson tej lus.”20
“Tsis muaj cai sib khom txog lub Koom Txoos lub npe.” Thov kom peb yuav mus tom ntej nrog kev ntseeg. Thaum peb txaus siab ua raws li tus Tswv hais los ntawm tej uas Nws tus yaj saub qhia, qhov tseem ceeb yog thaum tsis yog raws li peb xav, peb thiaj li yuav tsum txo hwj chim thiab ua kev txi, ces tus Tswv foom koob hmoov rau peb kom muaj hwj chim rau peb sab ntsuj plig thiab txib Nws cov tim tswv los txhawb nqa peb thiab sawv ntawm peb ib sab.21 Peb yuav txais tau tus Tswv txoj kev pom zoo.
Kuv ua tim khawv txog lub hwj chim saum ntuj ceeb tsheej uas peb tus yaj saub, Thawj Tswj Hwm Russell M. Nelson, muaj. Nws tsuas xav ua rau tus Tswv zoo siab thiab foom koob hmoov rau Leej Txiv Saum Ntuj Ceeb Tsheej cov me nyuam. Los ntawm tej yam dawb ceev uas kuv tau txais, kuv ua tim khawv tias tus Tswv hlub nws. Nws yog Vajtswv tus yaj saub.
Kuv ua tim khawv tias Yexus yog tus Khetos, Vajtswv Leej Tub. Los ntawm Yexus Khetos lub npe, amees.