Qhov uas Muaj Nqis Tshaj Plaws
Peb txhua tus yuav tsum los cuag Khetos es muab siab npuab Nws txoj moo zoo.
Cov vaj lug kub hais txog ib tug tub hluas nplua nuj uas, los txog ntawm Yexus, txhos caug rau ntawm Nws ob txhais ko taw thiab, rau siab, nug tus Xib Hwb hais tias, “Kuv yuav ua li cas kuv thiaj tau txoj sia uas ntev dhawv mus ib txhis?” Tom qab uas Yexus tshab xyuas tej kev txib uas tus tub hluas no tau ua tib zoo ua raws li, Yexus hais kom tus tub hluas no muab tag nrho nws tej khoom ntiag tug muag, muab txhua yam rau cov pluag, kwv nws tus ntoo khaub lig, thiab los nrog Yexus mus. Qhov kev txib no ua rau tus tub hluas nplua nuj no—txawm tias nws muaj ib nkawm khau khiab kim kim—ob txhais ko taw txias txias, thiab nws tawm mus yam tu siab heev li vim, raws li phau vaj lug kub hais tias, “Nws muaj khoom ntiag tug ntau heev.”1
Ham tsis zaj no hais txog txoj kev siv nyiaj txiag thiab saib yuav pab cov pluag li cas. Tiam sis thaum kawg yog ib zaj lus hais txog qhov uas peb yuav tsum muab siab npuab Vajtswv thiab Nws tej ntsiab rau peb kawg siab kawg ntsws kawg plab kawg plawv. Txawm peb muaj nyiaj los tsis muaj, peb txhua tus yuav tsum los cuag Khetos es muab siab npuab Nws txoj moo zoo ib yam li Yexus caw kom tus tub hluas nplua nuj no los muab. Ua cov lus uas cov tub hluas ntxhais hluas hais, peb yuav tsum hais tias peb puav leej “yeej yuav ua txhua yam.”2
Tus kws sau C. S. Lewis xav hais tias tus Tswv hais li no rau peb hais tias: “Kuv tsis yuav … nej lub sij hawm … [los sis] nej cov nyiaj … [los sis] nej tej hauj lwm, [npaum li tias] kuv [tsuas] yuav Nej tag nrho. [Tsob ntoo ntawm ko uas nej tab tom txiav.] Kuv tsis xav kom nej txiav ib ceg ntoo ntawm no ib ceg ntawm tod, kuv xav … kom nej ntov [tsob ntoo] tib si. [Thiab tus hniav ntawd.] Kuv tsis xav tshau, los yog muab dab tsi looj rau, los sis muab nws [ntsaws]. [Kuv xav] kom rho tus hniav tag nrho. [Muaj tseeb tiag, kuv xav kom nej muab] tag nrho nej tus kheej [rau kuv]. … [Thiab] kuv yuav muab nej hloov ua ib tug neeg tshiab. Muaj tseeb tiag, kuv yuav muab Kuv tus Kheej rau nej: kuv … lub siab yuav yog [nej lub siab].”3
Cov uas yuav hais lus hauv lub tuam rooj sab laj no puav leej yuav hais ib yam li Khetos hais rau tus tub hluas nplua nuj no hais tias: “Los cuag nej tus Cawm Seej. Los cuag Nws kawg siab kawg ntsws kawg plab kawg plawv. Kwv nej tus ntoo khaub lig, txawm hnyav npaum li cas, thiab los nrog Nws mus.”4 Thiab lawv yuav hais tej no es paub tias hauv Vajtswv lub nceeg vaj, yus lam tau lam ua tsis tau li, pib mus es tso tseg tsis tau li, thim rov qab tsis tau li. Rau lawv cov uas thov kom tau lus tso mus muab lawv niam lawv txiv tha los sis hais sib ntsib dua rau lwm cov neeg txheeb ze ua ntej tso, Yexus cov lus teb tsis ua xyem xyav hlo li. Nws hais tias “Cia lwm tus neeg saib xyuas tej ntawd.” “Yog leej twg tab tom tuav khais laij liag, tiam sis nws pheej tig saib rov tom qab, tus ntawd tsis tsim nyog rau Vajtswv lub nceeg vaj.”5 Thaum peb yuav tsum ua tej yam nyuaj, twb yog tej yam uas peb tsis xav ua, nco qab ntsoov hais tias qhov uas peb cog lus tias peb yuav muab siab npuab tus Khetos yog qhov tseem ceeb tshaj hauv peb lub neej. Thiab, txawm tias Yaxayas qhia peb tias qhov no yeej muaj “tsis tas them nqi hlo li,”6 peb yuav tsum npaj, siv T. S. Eliot cov lus hais tias, kom “them tsis tsawg dua txhua tsav txhia yam.”7
Ham tsis peb txhua tus muaj tej yam uas peb muaj yees ua los sis tej kev yuam kev los sis tej yam uas peb tau ua los lawm uas yuav ua tau rau peb tsis xav rau rau siab ua tej hauj lwm no. Tiam sis Vajtswv Leej Txiv yeej zoo heev zam txim pub rau peb thaum peb tso peb tej kev txhaum tseg, tej zaum vim peb pheej ua txhaum es Vajtswv pheej zam txim pub rau peb. Txawm yog li cas los, yeej muaj kev pab los saum ntuj los rau peb ib tug neeg twg uas xav hloov nws tus cwj pwm ua neeg zoo dua. Vajtswv muab Xaulus “dua ib lub siab tshiab.”8 Exekees hais kom cov neeg Ixayees thaum ub muab tej yam uas tau ua yav nram ntej tso tseg thiab “muab … ib lub siab tshiab thiab txoj kev xav tshiab.”9 Amas qhia kom “hloov siab loj”10 uas yuav ua rau sab ntsuj plig loj hlob tuaj, thiab Yexus tau qhia hais tias “yog leej twg tsis yug dua tshiab, tus ntawd yeej tsis pom Vajtswv lub nceeg vaj li.”11 Yeej zoo li Vajtswv ib qho khoom plig rau peb cov uas xav ua yog pab peb hloov peb lub neej kom ua neej zoo dua.
Kuv cov phooj ywg, thaum lub sij hawm no peb pom tau ntau txoj kev sib cais, kev nyob sib nrug deb, kev nrhiav saib yus yog leej twg tiag, thiab ntau txoj kev sib tawm tsam. Puas tsim nyog peb nug peb tus kheej saib ib lub neej “siab dua thiab dawb huv dua”12, siv Thawj Tswj Hwm Nelson cov lus, puas yuav yog ib yam peb nrhiav tau? Thaum peb ua li ntawd, tsim nyog peb nco qab ntsoov lub caij nyoog hauv Phau Ntawv Maumoos uas cov neeg ntawd nug thiab teb lo lus nug ntawd yam zoo heev hais tias:
“Thiab tau muaj tias twb tsis muaj kev sib cav sib ceg rau hauv thaj av; … vim yog Vajtswv txoj kev hlub uas tau nyob hauv cov neeg tej siab..
“Twb tsis muaj tej kev xav tau luag tug, los sis tej kev sib cav sib ceg, … thiab tseeb tiag ntshe twb tsis tau muaj ib co neeg uas yuav zoo siab tshaj nyob hauv tag nrho cov neeg uas Vajtswv txhais tes tau tsim los.
“Twb tsis muaj tub sab, los sis neeg tua neeg, thiab twb tsis muaj qhov hais tias yog cov Neeg Lamas, los sis yog lwm yam neeg twg hlo li; tiam sis lawv tsuas ua ib pab, uas yog Khetos cov me nyuam, thiab cov uas tau Vajtswv lub nceeg vaj ua lawv tug.
“Thiab lawv tau koob hmoov heev!”13
Lawv tau ua dab tsi lawv thiaj zoo siab txaus siab npaum li no? Twb nyob hauv ntawv ua ib txoj kab lus hais tias: “Vajtswv txoj kev hlub … nyob hauv cov neeg lub siab.”14 Thaum Vajtswv txoj kev hlub coj kav peb lub neej, peb txoj kev hlub ib leeg rau ib leeg thiab tej yam peb xav txog tib neeg ntiaj teb, ces tej kev sib cais, kev nyob sib nrug deb, kev hais tsis sib haum pib ploj mus thiab txawm muaj kev nyob kaj siab lug. Twb tau muaj li no hauv zaj piv txwv ntawd los ntawm Phau Ntawv Maumoos. Tsis muaj cov neeg Lamas, cov neeg Yakhauj, los sis cov neeg Yauxej, los sis cov neeg Xaulas. Tsis muaj kev sib cais hlo li. Cov neeg no tau rais los mus ua neeg tshiab uas sib koom siab tsis xaiv ntsej muag li. Lawv puav leej yog “Khetos cov me nyuam.”15
Peb kuj hais txog thawj txoj lus txib uas muab rau tib neeg ntiaj teb—kom hlub Vajtswv, kawg siab kawg ntsws, muab siab npuab nws tshaj txhua tsav txhia yam suav lwm cov vaj tswv thiab.16 Txoj kev hlub Vajtswv li no yog thawj txoj lus txib hauv qab ntuj khwb no. Tiam sis qhov tseeb thib ib hauv lub ntuj thiab lub ntiaj teb yog qhov uas Vajtswv hlub peb ib yam li ntawd—kawg siab kawg ntsws kawg plab kawg plawv Nws tsis qee dab tsi li. Thiab thaum Nws lub siab thiab peb lub siab sib ntsib tsis muaj kev cheem, ces zoo li muaj hwj chim loj kawg nkaus coj ncaj ncees ntawm sab ntsuj plig. Ces, ib yam li Teilhard de Chardin sau hais tias, “rau [lub] sij hawm thib ob hauv lub ntiaj teb no zaj keeb kwm, tib neeg tau kawm tias hluav taws yog dab tsi.”17
Yog tias muaj li no tiag, ces peb mam li ua tau raws li txoj lus txib thib ob es tsis lam tau lam ua raws li xwb. Yog tias peb hlub Vajtswv npaum li tias peb yuav muab siab npuab Nws, Nws yuav muab peev xwm, lub siab lub ntsws, thiab txoj kev rau peb hlub peb cov neeg zej zog thiab peb tus kheej. Tej zaum thaum ntawd peb yuav hais tau dua ib zaug ntxiv hais tias, “Twb tsis tau muaj ib co neeg uas yuav zoo siab tshaj nyob hauv tag nrho cov neeg uas Vajtswv txhais tes tau tsim los.”18
Kuv cov kwv tij thiab cov muam, kuv thov Vajtswv hais tias peb yuav ua zoo dua tus tub hluas nplua nuj uas xaiv yuam kev ntawd, tias peb yuav kwv tus ntoo khaub lig, txawm nyuaj heev npaum li cas, txawm muaj teeb meem zoo li cas thiab txawm tias tus nqi kim npaum li cas. Kuv ua tim khawv hais tias thaum peb cog lus tias peb yuav raws Yexus qab, txoj kev uas peb taug ntawd yuav mus dhau ib lub kaus mom ntoo tuaj pos thiab ib tug ntoo khaub lig Loos. Txawm tias tus tub hluas nplua nuj muaj nyiaj npaum li cas, nws tsis muaj txaus them tus nqi kom dim kev txim txhaum thiab kev tuag, thiab peb them tsis tau thiab. Vim yog peb yeej yuav tau tej koob hmoov txais qhov uas zoo tshaj plaws—lub txiaj ntsim ntawm txoj sia nyob mus ib txhis—ces yog ib qho me me uas peb yuav tsum muaj zog thaum peb ua raws li peb tus Pov Thawj Hlob, peb tus Hnub Qub Nruab Hnub, peb tus Txhiv Dim, thiab peb tus Vaj Ntxwv hais. Kuv ua tim khawv ua ke nrog Amalej ib tug yaj saub yav thaum ub uas hais tias peb yuav tsum ua li ntawd, “muab tag nrho [peb] lub siab lub ntsws ua kev tiam pub rau nws.”19 Peb hu nkauj txog txoj kev muab siab npuab no hais tias:
Qhuas lub roob; kuv ntsia ntsoov nws:
Lub roob uas koj txoj kev hlub txhiv peb dim. …
Kuv muab kuv lub siab lub ntsws pub rau koj,
Muab khi rau lub ntuj ceeb tsheej.20
Los ntawm Yexus Khetos lub npe dawb ceev, amees.