Tus Txhawb Pab Kuv Nyob hauv Tag Nrho Kuv lub Neej
Peb ua li cas thaum peb raug kev cov nyom? Peb puas puas ua Vajtswv tsaug vim peb tsom ntsoov peb tej koob hmoov ntau dua peb tej teeb meem?
Phaum mob COVID-19 yog ib qho ntawm ntau qhov kev sim siab thiab ntau qhov kev cov nyom uas Vajtswv cov me nyuam tau ntsib txij thaum ntuj tsim teb raug. Thaum xyoo no nyuam qhuav pib, kuv tsev neeg thiab kuv ntsib tej hnub tsaus ntuj nti. Vim yog phaum mob no thiab lwm yam peb tsev neeg ob peb tug neeg tas sim neej es ua rau peb tu siab heev. Txawm tias muaj kws kho mob saib xyuas, neeg yoo mov thiab thov Vajtswv pab, thaum lub sij hawm tsib lis tiam xwb, kuv tus kwv Charly, kuv tus muam Susy, thiab kuv tus yawj yij Jimmy puav leej mus dhau daim ntaub thaiv.
Qee zaum kuv tau xav paub yog vim li cas tus Cawm Seej quaj thaum nws pom Maiv Liag mob siab vim yog qhov uas nws tus nus, Laxales, tau tuag, txawm tias tus Tswv muaj lub hwj chim tso Laxales sawv thiab tsis ntev tom qab ntawd Nws twb yuav siv lub hwj chim no cawm Nws tus phooj ywg tawm ntawm qhov tuag.1 Kuv xav tsis thoob txog tus Cawm Seej kev khuv leej thiab kev hlub rau Maiv Liag; Nws to taub qhov mob siab heev kawg li uas Maiv Liag xav hauv nruab siab vim yog nws tus nus, Laxales, tas sim neej.
Peb yeej hnov qhov mob siab heev ntawd thaum peb raug cais tawm ntawm cov neeg uas peb hlub rau ib ntus. Tus Cawm Seej khuv leej peb tiag tiag. Nws tsis tsub txim rau peb vim yog peb pom tsis tau kev deb, los yog vim peb pom tsis tau txoj kev taug mus rau lub ntuj nyob mus ib txhis khav khav. Tsis yog li ntawd, Nws khuv leej peb vim yog peb txoj kev tu siab thiab txoj kev txom nyem.
Leej Txiv Saum Ntuj Ceeb Tsheej thiab Nws Leej Tub, Yexus Khetos, xav kom peb muaj kev xyiv fab.2 Thawj Tswj Hwm Russell M. Nelson tau qhia hais tias: “Kev xyiv fab uas peb muaj tsis los ntawm peb lub neej qhov chaw puag ncig, tiam sis los ntawm tej yam uas peb tsom ntsoov saib rau nqi hauv peb lub neej. Thaum peb tsom ntsoov rau Vajtswv txoj kev cawm seej,… thiab Yexus Khetos thiab Nws txoj moo zoo, peb yuav muaj kev xyiv fab txawm peb raug dab tsi—los tsis raug—los xij nyob hauv peb lub neej.”3
Thaum kuv ua ib tug tub txib thaum hluas, muaj ib tug tub txib uas kuv saib rau nqi heev uas tau txais xov phem. Nws niam thiab nws tus kwv tau raug xwm txheej ua rau nkawd tuag. Qhov chaw tshaj tawm txoj moo zoo tau muab cib fim rau tus txwj laug no rov qab mus tsev rau lub ntees tuag. Txawm yog li ntawd, tom qab uas tus txwj laug no nrog nws txiv sib tham xov tooj lawm, tus tub txib txiav txim siab nyob twj ywm thiab ua tub txib kom tiav.
Tsis ntev tom qab ntawd, thaum kuv thiab nws ua hauj lwm ua ke hauv tib lub cheeb tsam, muaj neeg hu kuv tus khub xwb thiab qhia wb tias muaj kam ceev; muaj ib co laib uas tau nyiag tus tub txib ntawd lub luv thij thiab tau xuas riam nkaug nws. Nws thiab nws tus khub tau taug kev mus rau lub tsev kho mob nyob ze, es kuv thiab kuv tus khub tau ntsib nkawd nyob ntawd. Thaum kuv tus khub wb mus tom lub tsev kho mob, kuv nyuaj siab heev rau tus tub txib ntawd. Kuv xav tias nws yuav poob siab ntsus thiab tom qab qhov uas nyuam qhuav muaj los, nws yuav xav mus tsev.
Tsis kav, thaum kuv tus khub xwb tuaj txog lub tsev kho mob, kuv pom tus tub txib no pw saum nws lub txaj, tos mus raug phais—thiab nws luag nyav. Kuv xav hais tias, “Ua li cas nws ho luag nyav thaum muaj li no ne?” Thaum nws pw tsev kho mob mus txog thaum nws rov qab zoo, nws rau rau siab muab ntawv qhia txoj moo zoo thiab tej Phau Ntawv Maumoos rau cov kws kho mob, cov nai maum, thiab lwm cov neeg mob. Txawm tias muaj tej kev sim siab no, nws tseem tsis xav mus tsev. Nws rau rau siab ua tub txib mus txog hnub kawg muaj siab ntseeg, muaj lub siab ua kom tiav, muaj zog, thiab muaj kev zoo siab.
Thaum Phau Ntawv Maumoos pib, Nifais hais tias, “Vim kuv tau pom kev txom nyem ntau nyob hauv kuv lub neej, txawm li ntawd los, vim tus Tswv tau txhawb pab kuv ntau heev nyob hauv tag nrho kuv lub neej.”4
Kuv xav txog tej kev sim siab uas Nifais raug, nws kuj sau txog ntau qhov kev sim siab ntawd. Nifais tej kev sim siab pab peb to taub hais tias peb txhua tus muaj tej hnub uas tsaus ntuj nti. Muaj ib qho kev sim siab no thaum tus Tswv txib Nifais rov qab mus tim Yeluxalees kom muab cov phiaj toog uas Lanpas muaj. Nifais muaj ob tug tij laug uas tsis muaj siab ntseeg, thiab nkawd xuas pas muab Nifais nplawm. Nifais muaj dua ib qho kev sim siab thaum nws ua rau nws rab hneev nti lov es nws muab tsis tau nqaij noj rau nws tsev neeg. Tom qab ntawd, thaum tus Tswv txib kom Nifais txua ib lub nkoj, nws ob tug tij laug luag thuam nws thiab tsis kam pab nws. Txawm tias muaj tej kev cov nyom no thiab lwm cov kev cov nyom hauv nws lub neej los, Nifais yeej ib txwm pom tias Vajtswv ua siab zoo rau nws.
Thaum nws tsev neeg tseem tab tom hla tus dej hiav txwv mus rau lub teb chaws uas cog lus tseg, ib txhia neeg ntawm Nifais tsev neeg pib luab, hais lus nchav, thiab ua neeg tsis nco qab tias yog tus Tswv lub hwj chim uas tau tshwj lawv tseg. Thaum Nifais ntuas lawv, ua li ntawd tub qaug lawv thiab lawv muab txoj hlua khi Nifais ceev ceev kom nws ua zog tsis tau li. Phau Ntawv Maumoos hais tias nws ob tug tij laug “tau ua kub ua ceev heev rau [nws]”; nws ob lub dab teg dab taws “kuj o kawg li thiab, thiab mob kawg li.”5 Nifais tu siab heev vim yog nws ob tug tij laug lub siab tawv tawv thiab qee zaum nws kuj poob siab tsus.6 Nifais hais tias, “Txawm li ntawd los, kuv tseem tau vam khom rau kuv tus Vajtswv, thiab kuv tau qhuas nws tag nrho ib hnub li; thiab kuv tsis tau yws tawm tsam tus Tswv vim kuv tej kev kub ntxhov.”7
Kuv cov kwv tij thiab cov muam, peb ua li cas thaum peb raug kev cov nyom? Peb puas yws yws rau tus Tswv vim yog peb tej kev cov nyom? Los sis, ib yam li Nifais thiab tus tub txib uas kuv hais txog ntawd, peb puas ua Vajtswv tsaug vim peb tsom ntsoov peb tej koob hmoov ntau dua peb tej teeb meem?
Peb tus Cawm Seej Yexus Khetos ua yam ntxwv rau peb thaum Nws ua neej hauv lub ntiaj teb no. Thaum muaj kev cov nyom thiab kev sim siab, qhov zoo tshaj plaws uas yuav coj kev nyob kaj siab lug thiab kev txaus siab heev los rau peb yog ua hauj lwm pab lwm tus neeg. Phau Ntawv Mathais hais txog saib muaj li cas thaum tus Cawm Seej kawm hais tias Nws tus npawg, Yauhas tus uas Muab Neeg Ua Kev Cai Raus Dej, raug txiav caj dab vim tus Vaj Ntxwv Helauj txib kom ua li ntawd vim yog Herodias tus ntxhais ntxias, phau ntawd hais li no hais tias:
“Yauhas cov thwj tim txawm tuaj muab Yauhas lub cev coj mus faus lawm; thiab lawv mus qhia tej no rau Yexus paub.
“Thaum Yexus hnov hais tias Yauhas tuag lawm, Yexus tib leeg txawm caij nkoj tawm qhov ntawd mus rau ib qhov chaw uas tsis muaj neeg. Thaum sawv daws hnov hais tias, Yexus mus rau qhov ntawd lawm, lawv txawm tawm hauv lawv tej nroog taug ntug dej caum Yexus qab mus.
“Thaum Yexus tawm hauv nkoj los, nws pom muaj neeg coob coob, nws hlub lawv thiab nws kho lawv cov neeg muaj mob txhua tus zoo huv tib si.
“Thaum yuav tsaus ntuj, Yexus cov thwj tim los hais rau Yexus hais tias, Qhov no nyob deb nroog thiab twb lig lig lawm, thov koj kom sawv daws mus nrhiav muas mov tom tej zos noj.
“Yexus teb hais tias, Tsis txhob kom lawv mus, nej cia li muab mov rau lawv noj.”8
Yexus Khetos qhia peb hais tias thaum muaj tej lub sij hawm uas raug sim siab los yog raug kev cov nyom peb pab tau lwm tus neeg. Muaj kev khuv leej, peb cev tes mus pab lawv tau. Thiab thaum peb ua li ntawd, peb kuj zoo siab zog vim yog peb txoj kev yoog Khetos mus pab lwm tus neeg. Thawj Tswj Hwm Gordon B. Hinckley hais tias: “Qhov tshuaj tua kab mob zoo tshaj plaws rau kev txhawj xeeb yog kev ua hauj lwm. Qhov tshuaj zoo tshaj rau kev poob siab yog kev ua hauj lwm pab lwm tus neeg. Qhov uas kho tau kev nkees yog qhov uas pab lwm tus neeg uas haj yam nkees.”9
Hauv lub koom txoos no, uas yog Yexus Khetos lub Koom Txoos, kuv tau muaj cib fim ntau heev ua hauj lwm pab kuv cov neeg zej zog. Twb yog tej lub sij hawm ntawd thaum kuv pom tias Leej Txiv Saum Ntuj Ceeb Tsheej ua rau kuv lub nras sib zog. Thawj Tswj Hwm Russell M. Nelson yog Vajtswv tus yaj saub saum lub ntiaj teb; nws yog ib tug yam ntxwv zoo heev uas qhia saib peb yuav tsum pab lwm tus neeg li cas. Kuv nrog coob tug Neeg Ntseeg koom ua ke ua tim khawv hais tias Vajtswv yog peb Leej Txiv Saum Ntuj Ceeb Tsheej uas hlub peb. Kuv hnov tau Nws kev hlub tag nrho tej hnub tsaus ntuj nti uas kuv tau muaj. Peb tus Cawm Seej to taub peb tej kev mob thiab peb tej kev cov nyom. Nws xav daws peb tej nras thiab nplij peb lub siab. Peb yuav tsum ua raws li Nws tus yam ntxwv thaum peb ua hauj lwm pab lawv cov uas muaj nras hnyav dua peb muaj. Los ntawm Yexus Khetos lub npe, amees.