Tej Yam ntawm Kuv tus Ntsuj Plig

Los ntawm Txwj Laug Ronald A. Rasband

Ntawm Pawg Kaum Ob tug Thwj Tim

Nej xav txog tej yam twg? Tej yam twg muaj nqis rau nej? Tej yam ntawm nej tus ntsuj plig yog dab tsi?

Kuv cov kwv tij thiab cov muam, thaum kuv rov qab sawv huav lub Tsev rau Rooj Sab Laj ib zaug ntxiv, ua rau kuv nco txog tus Thwj Tim Petus tej lus: “Tus Tswv, yeej zoo rau peb nyob no.”¹

Hnub no ua rau kuv xav txog tus yaj saub Nifais tej lus, tus uas tau ceev xwm txheej txog nws cov neeg tom qab nws Txiv Lihais tuag lawm. Nifais sau hais tias, “Thiab nyob rau saum cov no kuv sau ntau yam ntawm kuv tus ntsuj plig.”²

Kuv ib txwm tsis tau xav txog nqe no ntau, vim kev xav txog lo lus ntau yam yeej tsis tseem ceeb txaus kom txuas ua ke nrog lo lus “kuv tus ntsuj plig.” Tiam sis kuv tau kawm tias lo lus tej yam los twb sau rau hauv vaj lug kub 2,354 zaus.³ Piv txwv hais tias, nyob hauv phau Mauxes: “Kuv yog Qhov Chiv Keeb thiab Qhov Kawg, tus Vajtswv uas Muaj Hwj Chim Tag Nrho; kuv tau tsim tej yam no los ntawm kuv Tib Leeg Tub.”⁴ Thiab Nifais tej lus: “Saib seb, kuv nyiam tej yam uas yog tus Tswv li heev; thiab kuv lub siab yeej xav ntsoov tsis tseg rau tej yam uas kuv tau pom thiab tau hnov lawm.”⁵

Nifais tej lus ua rau peb nug hais tias “Nej xav txog tej yam twg?” “Tej yam twg muaj nqis rau nej?” “Tej yam ntawm nej tus ntsuj plig yog dab tsi?”

Peb yuav to taub tej yam ntawm peb tus ntsuj plig ntxiv thaum peb muaj lus nug.

Txwj Laug Rasband nyob hauv kev sib ntsib hauv koospistawj

Cov hluas kev sib ntsib hawm Vajtswv

Cov tub hluas ntxhais hluas txoj kev tshaj tawm

Thaum muaj phaum mob kuv tau ntsib cov tub hluas ntxhais hluas nyob thoob plaws lub ntiaj teb hauv tej kev sib ntsib hawm Vajtswv, nyob hauv tej kev tshaj tawm thiab kev sib tham hauv koospistawj, thiab peb tau sib tham txog lawv tej lus nug.

Joseph Smith uas muaj kaum plaub xyoo muaj ib lo lus nug nyob hauv nws lub siab, thiab nws tau thov tus Tswv. Thawj Tswj Hwm Russell M. Nelson tau qhia hais tias: “Nug tus Tswv thiab nyeem tej yam uas txhawb kev ntseeg. Thaum nej kawm cia li xav muaj kev ntseeg tsis txhob cia siab tias nej yuav nrhiav kev txhaum hauv ib tug yaj saub lub neej los sis ib yam ua yuam kev nyob hauv vaj lug kub. Txhob ua kom nej txoj kev tsis ntseeg loj tuaj thaum nej qhia tej ntawd rau lwm tus uas tsis ntseeg. Cia tus Tswv coj nej txoj hau kev kom nej kawm txog tej yam ntawm sab ntsuj plig.”⁶

Cov tub hluas ntxhais hluas pheej nug kuv seb kuv ntseeg dab tsi thiab vim li cas kuv ntseeg li ntawd.

Kuv nco qab thaum kuv sib tham hauv lub koospistawj nrog ib tug ntxhais hluas uas nyob hauv nws lub tsev. Kuv nug nws seb puas yog thawj zaug uas ib tug Thwj Tim nyob hauv nws lub tsev. Nws teb kiag hais tias, “Yog mas.” Nws lo lus nug yeej zoo rau kuv: “Tej yam twg yog tej yam tseem ceeb tshaj plaws rau kuv paub?”

Kuv teb hais tias tej yam ntawm kuv tus ntsuj plig, tej yam uas npaj kuv lub siab kom txais kev tshoov siab, tej yam uas ua rau kuv saib dhau tej yam ntawm lub ntiaj teb no, tej yam uas ua rau kuv paub lub ntsiab ntawm kuv txoj hauj lwm qhia txog txoj moo zoo thiab kuv lub neej.

Thov cia kuv hais txog tej yam ntawm kuv tus ntsuj plig. Tej yam no yeej muaj nqi rau tag nrho cov uas xav ua Yexus Khetos cov thwj tim tseeb. Kaum yog ib tus naj npawb zoo. Tiam sis hnub no kuv yuav hais xya yam xwb vim kuv cia siab tias nej yuav xav txog yam thib yim, cuaj, thiab kaum los ntawm nej lub neej xwb.

Yam thib ib, hlub Vajtswv Leej Txiv thiab Yexus Khetos, peb tus Cawm Seej.

Yexus tau hais txog thawj txoj lus txib tseem ceeb hais tias: “Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.”⁷

Thawj Tswj Hwm Nelson tau hais tias Nws hlub Vajtwv, peb Leej Txiv Nyob Mus Ib Txhis, thiab Nws Leej Tub, Yexus Khetos thaum Vajtswv hu nws coj tus Tswv lub Koom Txoos, hais tias, “Kuv paub Nkawd, hlub Nkawd, thiab cog lus tias kuv yuav ua hauj lwm rau Nkawd—thiab nej—txog thaum kuv ua pa zaum kawg.”⁸

Yog li ntawd, yam thib ib, hlub Leej Txiv thiab Leej Tub.

Yam thib ob, “Hlub nej tej kwv tij zej zog.”⁹

Yam no tsis yog ib lub tswv yim zoo xwb; yeej yog txoj lus txib tseem ceeb thib ob. Nej cov neeg zej zog yog nej tus khub thiab tsev neeg, pawg ntseeg, cov uas nrog koj ua hauj lwm, cov nrog nej nyob, cov uas tsis ntseeg li peb, cov uas xav tau kev pab, thiab muaj tseeb tiag, txhua leej txhua tus. Lub ntsiab ntawm kev “hlub nej tus kwv tij zej zog” los nyob hauv zaj nkauj hu ua “Ib Leeg Hlub Ib Leeg.”¹⁰

Thawj Tswj Hwm Nelson qhia peb tias, “Thaum peb hlub Vajtswv kawg siab kawg ntsws, Nws ua rau peb lub siab hloov los xav txog lwm tus.”¹¹

Yam thib peb, hlub nej tus kheej.

Yam no yog qhov uas nyuaj rau neeg coob. Xyov vim li cas kev hlub peb tus kheej yeej nyuaj tshaj qhov uas peb hlub lwm tus. Tus Tswv tau hais tias, “Hlub nej tej kwv tij zej zog ib yam li nej hlub nej lub cev.”¹² Nws saib qhov uas peb yog Nws cov me nyuam rau nqi, yog li ntawd peb yuav tsum ua li ntawd thiab. Thaum peb ua yuam kev, muaj lub siab mob, xav tias peb tsis zoo, poob siab, npau taws, los sis ua txhaum, lub hwj chim ntawm tus Cawm Seej txoj Kev Theej Txhoj, yeej yog ib yam uas Vajtswv tau tsim kom txhawb peb lub siab ntsws.

Yam thib plaub, coj raws li cov lus txib.

Tus Tswv tau qhia meej hais tias: “Yog nej hlub kuv tiag, nej yeej yuav mloog kuv lus.”¹³ Cia li siv zog txhua hnub ua zoo dua thiab ua ncaj ncees txiv mus lawm tom hauv ntej.

Yam thib tsib, ua neeg tsim nyog mus hauv lub tuam tsev txhua lub sij hawm.

Kuv hais txog qhov no tias yus tau kev tso cai mus rau tus Tswv. Txawm nej nyob ze ib lub tuam tsev los sis tsis nyob ze los yog, nej yuav tsum muaj ib daim ntawv tso cai nkag tuam tsev kom tsom ntsoov rau tej yam uas muaj nqi tshaj, uas yog nej tej kev khi lus.

Yam thib rau, cia li muaj kev xyiv fab thiab kev zoo siab.

Tus Tswv tau hais tias, “Cia li zoo siab, thiab tsis txhob ntshai.”¹⁴ Vim li cas? Yuav ua li cas thaum peb raug tej teeb meem txhua lub sij hawm? Yog vim Yexus Khetos tau cog lus tias: “Kuv uas yog tus Tswv twb nyob nrog nej, thiab yuav sawv ntawm nej ib sab.”¹⁵

Thawj Tswj Hwm Nelson piav tias txoj moo zoo yeej yog “ib zaj lus txog kev xyiv fab!”¹⁶ Thiab nws piav hais tias, “Kev xyiv fab uas peb muaj tsis los ntawm peb lub neej qhov chaw puag ncig, tiam sis los ntawm tej yam uas peb tsom ntsoov saib rau nqi hauv peb lub neej.”¹⁷

Yam thib xya, coj raws li Vajtswv tus yaj saub qhia.

Tej zaum yam no yog yam thib xya, tiam sis yog ib yam tseem ceeb heev raws li kuv xav hnub no.

Peb muaj Vajtswv ib tug yaj saub hauv lub ntiaj teb no! Tsis txhob muab lub ntsiab tseem ceeb ntawm yam no tso tseg. Cia li nco txog tus ntxhais hluas uas kuv hais txog thaum xub thawj. Nws xav paub tej yam twg muaj nqi loj tshaj plaws. Kuv tau hais rau nws thiab kuv rov qab hais hnub no tias, “Coj raws li tus yaj saub qhia.”

Peb lub Koom Txoos tsis zoo li lwm lub vim muaj cov yaj saub, cov pom tau, thiab cov txais kev tshwm sim uas Vajtswv hu kom ua hauj lwm hauv lub caij nyoog no. Kuv cog lus rau nej tias thaum nej mloog thiab ua raws li lawv hais, ces yeej yuav tsis coj nej mus ua yuam kev. Yeej yuav tsis ua yuam kev!

Peb nyob hauv ib lub caij nyoog thaum peb raug “raws luag qab rau ub rau no,”¹⁸ thaum neeg tawm tsam sab ntsuj plig, kev tsim nyog, kev siab ncaj, thiab kev ua siab dawb. Peb yuav tsum xaiv ua zoo. Peb muaj tus Tswv lub suab uas los ntawm Nws tus yaj saub kom nplij peb lub siab thiab pab peb pom qhov deb, vim rau qhov thaum Thawj Tswj Hwm Nelson hais lus, Nws sawv cev rau tus Tswv hais lus.

Peb tau koob hmoov vim muaj vaj lug kub thiab tej lus qhia uas pab peb nco qab tias, “Kuv xav zoo tsis thooj li tej uas nej xav, thiab tej uas kuv ua zoo tsis thooj li tej uas nej ua.”¹⁹

Twb muaj li no rau Na-amas, ib tug thawj tub rog nyob hauv Xilias, uas yog ib tug neeg mob ruas, es muaj neeg qhia nws tias Elisas muaj peev xwm kho nws zoo. Elisas tau xa nws tus tub qhe mus qhia Na-amas da dej hauv tus Dej Yauladees xya zaus ces nws yuav huv. Na-amas tsis ntseeg. Yeej muaj ib tug dej loj dua li tus dej Yauladees, es vim li cas nws yuav xa ib tug tub qhe thaum nws xav tias Elisas, tus yaj saub yuav tuaj kho nws? Na-amas tab tom mus, tiam sis thaum kawg cov tub qhe tau hais kom nws ua: “Txawm yog tus cev Vajtswv lus kom koj ua tej yam nyuaj los koj yuav tau ua raws li nws hais.”²⁰ Na-amas twb mus raus xya zaus hauv tus Dej Yauladees thiab nws tus mob zoo lawm.

Zaj lus txog Na-amas ua rau peb nco txog qhov uas peb yuav raug li cas thaum peb tsuas xaiv tej yam ntawm cov yaj saub tej lus uas sib haum nrog peb tej kev xav los sis tej yam uas tib neeg xav niaj hnub nim no. Peb tus yaj saub taw tes rau peb mus rau tus Dej Yauladees kom peb tus mob zoo lawm.

Tej lus tseem ceeb uas peb yuav mloog, xav txog, thiab ua yog tej lus uas tau tshwm sim rau peb dhau los ntawm tus yaj saub. Kuv ua tim khawv tias kuv tau nrog Thawj Tswj Hwm Nelson tham txog tej xwm txheej nyuaj heev hauv lub Koom Txoos thiab lub ntiaj teb, thiab kuv tau pom nws txais kev tshwm sim. Nws paub tus Tswv, nws paub tus Tswv tej kev, thiab nws xav kom tag nrho Vajtswv cov me nyuam yuav mloog tus Tswv Yexus Khetos.

Ntau xyoo tas los peb tau mloog tus yaj saub ob zaug ib xyoo nyob hauv lub tuam rooj sab laj. Tiam sis vim muaj teeb meem nyuaj heev hauv peb lub caij nyoog, Thawj Tswj Hwm Nelson hais ntau zaus ntxiv nyob lwm qhov chaw,²¹ hauv social media,²² kev sib ntsib hawm Vajtswv,²³ thiab kev sib tham nrog cov kws sau xov xwm.²⁴ Kuv tau pom nws npaj thiab hais tej zaj lus tshwm sim zoo kawg nkaus uas pab yaum neeg muaj kev ris txiaj, sib raug zoo nrog tag nrho peb cov kwv tij thiab cov muam hauv lub ntiaj teb, thiab muaj kev kaj siab lug, kev cia siab, kev xyiv fab, kev noj qab nyob zoo, thiab kev kho mob hauv peb lub neej.

Thawj Tswj Hwm Nelson txawj sib txuas lus zoo, tiam sis qhov tseem ceeb tshaj plaws, nws yog Vajtswv tus yaj saub. Qhov no yeej ua rau yus xav tsis thoob, tiam sis yeej tseem ceeb rau peb paub tias nws tej lus meej yuav tiv thaiv peb kom txhob raug kev ntxias, kev phem, thiab tej yam ntawm neeg ntiaj teb uas muaj zog niaj hnub no.²⁵

Tus yaj saub txoj hauj lwm yeej yog kev txais kev tshwm sim. “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los,” uas ua hauv lub Plaub Hlis Ntuj xyoo 2020 lub tuam rooj sab laj, qhia tias tus Tswv yog tus uas coj txoj hauj lwm no. Nyob hauv zaj lus tshaj tawm no, Thawj Pawg Thawj Tswj Hwm thiab Pawg Kaum Ob tug Thwj Tim hais tias: “Peb zoo siab tshaj tawm tias lub Caij Nyoog Txum Tim Rov Qab Los no tseem mus tom ntej los ntawm kev tshwm sim uas tsis tu tsis tseg. Lub ntiaj teb yeej yuav tsis zoo li qub, vim Vajtswv yuav ‘sau txhua yam los ua ib ke rau Khetos ua tus thawj’ (Efexus 1:10).”²⁶

“Kev sau txhua yam los rau Khetos ua tus thawj”²⁷ thiab “ntau yam ntawm kuv tus ntsuj plig”²⁸ yeej yog lub ntsiab ntawm lub Koom Txoos no, txoj moo zoo no, thiab cov neeg no.

Kuv xaus lus li no thaum kuv caw nej txhua tus kom xav txog xya “yam ntawm kuv tus ntsuj plig” uas kuv tau hais hnub no: hlub Vajtswv Leej Txiv thiab Yexus Khetos, peb tus Cawm Seej; hlub nej tus neeg zej zog; hlub nej tus kheej; ua raws li cov lus txib; ua neeg tsim nyog muaj ib daim ntawv tso cai nkag tuam tsev; muaj kev xyiv fab thiab kev zoo siab; thiab coj raws li Vajtswv tus yaj saub. Kuv caw nej xav txog yam thib yim, thib cuaj, thiab thib kaum nej tus kheej. Cia li xav txog qhov uas nej yuav ua li cas kom qhia txog “tej yam” ntawm nej lub siab nrog lwm tus thiab hais kom lawv thov Vajtswv, xav txog, thiab nrhiav kom txais tus Tswv coj lawv txoj kev.

Tej yam ntawm kuv tus ntsuj plig los yeej muaj nqi rau kuv ib yam li nej li muaj nqi rau nej. Tej yam no txhawb nqa peb txoj hauj lwm pab hauv lub Koom Txoos thiab thaum ua txhua yam hauv lub neej no. Tej yam no ua rau peb cog lus rau Yexus Khetos, nco txog peb tej kev khi lus, thiab pab peb paub tias tus Tswv txhais tes khawm peb ruaj nrees. Kuv ua tim khawv tias Nws xav kom peb “tsis tshaib thiab tsis nqhis ntxiv lawm, tiam sis yuav tsau”²⁹ los ntawm Nws txoj kev hlub thaum peb nrhiav kev los ua Nws cov thwj tim, koom siab nrog Nws ib yam li Nws koom nrog Leej Txiv. Los ntawm Yexus Khetos lub npe, amees.

Lus Cim

1. Mathais 17:4.

2. 2 Nifais 4:15.

3. Saib Scripture Citation Index, scriptures.byu.edu.

4. Mauxes 2:1; ntxiv qhov uas ntawv qaij.

5. 2 Nifais 4:16; ntxiv qhov uas ntawv qaij.

6. Russell M. Nelson, “Khetos Sawv Rov Los Lawm; Kev Ntseeg Nws Yuav Muab cov Roob Txav Tau,” Liahona, Tsib Hlis Ntuj 2021, 103.

7. Mathais 22:37.

8. Russell M. Nelson, “Thaum Peb Mus Tom Ntej Ua Ke,” Liahona, Plaub Hlis Ntuj 2018, 7.

9. Mathais 22:39.

10. “Ib Leeg Hlub Ib Leeg,” Cov Nkauj Qhuas Vajtswv, zaj 145.

11. Russell M. Nelson, “Txoj Lus Txib Tseem Ceeb Thib Ob,” Liahona, Kaum Ib Hlis Ntuj 2019, 97.

12. Mathais 22:39.

13. Yauhas 14:15.

14. Lus Qhuab Qhia thiab Kev Khi Lus 68:6.

15. Lus Qhuab Qhia thiab Kev Khi Lus 68:6.

16. Russell M. Nelson, “Zaj Lus Txais Tos Sawv Daws,” Liahona, Tsib Hlis Ntuj 2021, 7.

17. Russell M. Nelson, “Kev Xyiv Fab thiab Kev Nyiaj Kom Dhau ntawm Sab Ntsuj Plig,” Liahona, Kaum Ib Hlis Ntuj 2016, 82.

18. Efexus 4:14.

19. Yaxayas 55:8.

20. 2 Vaj Ntxwv 5:13.

21. Ua piv txwv, saib Friend to Friend Broadcast for Children: 2021 (Ob Hlis Ntuj 20, 2021), broadcasts.ChurchofJesusChrist.org, feem 3, pib ntawm 9:57 mus txog 13:16.

22. Ua piv txwv, saib Russell M. Nelson, Facebook, Xya Hli Ntuj 23, 2021, facebook.com/russell.m.nelson; “President Russell M. Nelson on the Healing Power of Gratitude” (vidi-aus), ChurchofJesusChrist.org; Russell M. Nelson, Twitter, Tsib Hlis Ntuj 6, 2021, twitter.com/NelsonRussellM.

23. Ua piv txwv, saib Russell M. Nelson, “The Love and Laws of God” (Brigham Young University kev sib ntsib hawm Vajtswv, Cuaj Hlis Ntuj 17, 2019), speeches.byu.edu.

24. Ua piv txwv, saib “First Presidency and NAACP Leaders Announce a Shared Vision to ‘Learn from and Serve One Another’” (kev tso xov xwm tawm, Rau Hli Ntuj 14, 2021), newsroom.ChurchofJesusChrist.org.

25. Saib Efexus 4:11–14.

26. “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los,” ChurchofJesusChrist.org.

27. Efexus 1:10.

28. 2 Nifais 4:15.

29. 3 Nifais 20:8.