Vajtswv txoj Kev Hlub
Peb Leej Txiv thiab peb tus Txhiv Dim tau foom koob hmoov rau peb kom muaj cov lus txib thiab thaum peb ua raws li Nkawd tej lus txib, peb hnov Nkawd txoj kev hlub zoo tag nrho puv npo.
Peb Leej Txiv Saum Ntuj Ceeb Tsheej hlub peb zoo tag nrho.1 Vim Nws hlub peb, Nws tau tsim ib txoj hau kev txhiv dim thiab zoo siab kom peb txais tau tej cib fim thiab tej kev xyiv fab uas peb txaus siab txais, mus txog thaum peb txais tau tag nrho txhua yam Nws muaj.2 Xwv kom muaj li no, Nws yeej txaus siab muab Nws Tib Leeg Tub, Yexus Khetos, los ua peb tus Txhiv Dim. “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”3 Nws txoj kev hlub yeej yog ib leej txiv txoj kev hlub dawb paug—uas Nws pub rau txhua leej txhua tus.
Yexus Khetos yeej koom nrog Nws Leej Txiv hlub zoo tag nrho ib yam thiab. Thaum Leej Txiv tau qhia txog Nws txoj hau kev zoo siab, Nws tau hais kom muaj ib tug Cawm Seej uas yuav txhiv peb dim—yog ib qho tseem ceeb ntawm txoj hau kev ntawd. Yexus tau ua siab dawb hais tias, “Kuv nyob no, xa kuv mus.”4 Tus Cawm Seej “tsis ua ib yam dab tsi tsuas yog ua tej yam uas pab neeg ntiaj teb xwb; vim nws hlub neeg ntiaj teb, nws thiaj tso nws txoj sia xwv kom nws yuav coj tau neeg txhua tus los cuag nws. Yog li ntawd, nws tsis txwv ib tug twg kom tsis txhob los txais yuav nws txoj kev cawm seej.”5
Tsim nyog uas Vajtswv txoj kev hlub no yuav nplij peb lub siab thiab ua rau peb ntseeg thaum peb thov Leej Txiv los ntawm Khetos lub npe. Tsis muaj leej twg uas Nkawd tsis paub zoo. Peb tsis tas tos thov Vajtswv, tsis hais thaum peb xav tias peb tsis tsim nyog. Peb vam khom rau Yexus Khetos txoj kev hlub tshua thiab tej hauj lwm los tau.6 Yog peb muab siab ntseeg Vajtswv txoj kev hlub, peb tsis cia siab rau lwm tus txoj kev pom zoo kom coj peb mus.
Vajtswv txoj Kev Hlub Tsis Zam Kev Txhaum; Tiam sis, Nws Muab Kev Txhiv Dim rau Peb
Vim tsis muaj dab tsi cuam tshuam Vajtswv txoj kev hlub, ib txhia hais tias “tsis tas ua dab tsi,” thiab raws li lawv xav mas qhov no txhais tias Vajtswv cov koob hmoov yog tej uas peb txais tau txawm yog peb “tsis ua dab tsi,” thiab kev cawm seej yog ib yam uas peb txais tau txawm yog peb “tsis ua dab tsi.” Tsis yog li ntawd. Muaj neeg uas hais tias, “kuv zoo li cas los tus Cawm Seej hlub kuv” es qhov no muaj tseeb tiag. Tiam sis Nws coj tsis tau peb nkag mus hauv Nws lub nceeg vaj yog peb zoo li no, “vim tsis muaj ib yam tsis dawb huv uas nyob taus haud, los yog nyob ntawm nws lub xub ntiag.”7 Yuav tsum them nqi rau peb tej kev txhaum ua ntej.
Tus Xib Hwb Hugh Nibley qhia tias Vajtswv lub nceeg vaj ntshe yuav ploj mus yog tias muaj ib txoj kev txhaum me me twg: “Qhov phem me tshaj plaws nyob haud txhais tias lub ntuj ceeb tsheej yuav tsis nyob mus ib txhis. Ib qho qiag twg nyob hauv ib lub tsev, lub koom haum, txoj kev cai, los sis tus cwj pwm yeej yuav ua rau yus xiam thaum nyob mus ib txhis.”8 Vajtswv cov lus txib yeej “nruj heev”9 vim Nws lub nceeg vaj thiab cov pej xeem nyob haud los tsuas nyob tau yog lawv tso kev phem tseg thiab xaiv kev zoo, tsis muaj dab tsi zam tau.10
Txwj Laug Jeffrey R. Holland tau hais tias, “Yexus to taub meej txog qhov uas peb feem coob niaj hnub no tsis nco qab: muaj ib qho txawv ntawm lo lus txib kom zam txim rau kev txhaum (uas Nws yeej muaj cai ua nyob mus ib txhis) thiab lus ceeb toom kom txhob txhawb nqa kev txhaum (uas Nws yeej tsis tau ua ib zaug li).”11
Tiam sis, txawm peb tsis zoo tag nrho tam sim no los, peb tseem muaj kev cia siab tias peb yuav txais “ib lub npe thiab muaj chaw,”12 nyob hauv Nws lub Koom Txoos thiab nyob hauv lub ntuj xilethi-aus. Tom qab tus Tswv qhia meej tias Nws yuav tsis zam kev txhaum los sis cia lwm tus ua txhaum, Nws nplij peb lub siab hais tias:
“Txawm li ntawd los, tus uas hloov siab lees txim thiab ua raws li tus Tswv tej lus txib ces tus Tswv yuav zam txim rau tus ntawd.”13
“Txhua zaus uas kuv cov neeg yuav hloov siab lees txim kuv yuav zam txim rau lawv tej kev txhaum uas lawv ua txhaum rau kuv.”14
Kev hloov siab lees txim thiab kev tshav ntuj yeej kho qhov teeb meem no:
“Thiab kuj nco ntsoov tej lus uas Amulej tau hais rau Xi-elas, nyob hauv lub nroog Amaunaihas; vim nws tau hais rau Xi-elas hais tias tus Tswv yeej yuav los txhiv nws cov neeg, tiam sis nws yuav tsis los txhiv lawv dim thaum lawv tseem muaj kev txhaum, tiam sis los txhiv lawv dim ntawm lawv tej kev txhaum.
“Thiab Leej Txiv tau muab hwj chim rau nws los txhiv lawv dim ntawm lawv tej kev txhaum vim yog txoj kev hloov siab lees txim; yog li ntawd nws thiaj xa nws cov tim tswv los tshaj tawm tej moo zoo ntawm tej kev cai txog kev hloov siab lees txim, uas coj tau tib neeg los rau tus Txhiv Dim lub hwj chim, mus rau txoj kev cawm seej ntawm lawv tus ntsuj plig.”15
Thaum muaj kev hloov siab lees txim, tus Tswv muaj cai muab kev hlub tshua thiab yuav tsis txeeb kev txim lij, es “Vajtswv yeej yog Vajtswv” tas mus li.16
Zoo li nej paub lawm, neeg ntiaj teb txoj kev yog kev tawm tsam Khetos, los sis “ua txhua yam tsuas yog tsis raws li Khetos ua xwb.” Peb lub caij nyoog yeej zoo ib yam li zaj liv xwm hauv Phau Ntawv Maumoos uas muaj cov neeg ntxim nyiam uas kav tsis ncaj ncees rau lwm tus, qhia kom coj tsis dawb huv, thiab txhawb nqa kev nrhiav nyiaj txiag vim lawv qhia tias yog lub hom phiaj ntawm lub neej no. Lawv tej lub tswv yim yeej qhia tias yus ua txhaum me me los tau,17 los sis ua txhaum ntau heev, tiam sis tsis muaj leej twg uas txhiv peb dim. Tsuas muaj kev txhiv dim dhau los ntawm tus Me Nyuam Yaj cov ntshav. Pawg neeg uas ntseeg tias “ua txhua yam tiam sis txhob ua raws li Khetos” los sis “ua txhua yam tiam sis tsis tas hloov siab lees txim” lawv qhia tias tsis muaj kev txhaum, los sis, yog tias muaj kev txhaum ces yuav tsis raug dab tsi. Kuv tsis xav tias kev hais li ntawd yuav muaj nqi thaum muaj Kev Txiav Txim Thaum Kawg.18
Peb tsis tas sim ua tej yam peb ua tsis taus thaum peb xav tias peb daws tau peb tej kev txhaum mus. Peb kuj tsis tas sim ua tej yam peb ua tsis taus thaum peb xav dim tej yam uas yuav raug vim peb ua txhaum los ntawm peb lub dag zog xwb. Peb txoj kev teev ntuj tsis qhia tias peb daws tau peb tus kheej thiab peb yog neeg zoo tag nrho tiam sis peb txoj kev teev ntuj qhia tias peb txais kev txhiv dim dhau los ntawm Yexus Khetos. Yog peb xav txais kev zam txim, ces dhau los ntawm nws txoj Kev Theej Txhoj, peb tej kev txhaum twb raug ntsia saum ntoo khaub lig thiab “peb txais kev zam txim thiab tus Tswv ntxuav peb huv.”19
Cov Yaj Saub txoj Kev Hlub Yeej Zoo Li Vajtswv txoj Kev Hlub
Kuv yeej tau txais kev tshoov siab tau ntev los ntawm Vajtswv cov yaj saub txoj kev hlub peb thaum lawv ceeb toom txog kev txhaum. Lawv tsis xav rau txim rau peb. Lawv txoj kev xav yeej zoo li Vajtswv txoj kev hlub; muaj tseeb tiag, qhov no yeej yog Vajtswv txoj kev hlub. Lawv hlub cov uas Vajtswv txib lawv mus xyuas, txawm yog lawv yog leej twg thiab lawv zoo li cas los. Ib yam li tus Tswv, Nws cov tub qhe tsis xav kom leej twg raug txom nyem vim yog los ntawm kev txhaum thiab kev xaiv tsis zoo.20
Tus Tswv tau txib Amas mus hais zaj lus txog kev hloov siab lees txim thiab kev txhiv dim rau ib cov neeg uas ntxub nws lawv thiaj li txaus siab tsim txom, ua phem, thiab muab cov Ntseeg Khetos tua pov tseg, tsis hais Amas los yog. Tiam sis nws hlub lawv thiab xav kom lawv muaj kev cawm seej. Tom qab Amas tau tshaj tawm txog Khetos txoj Kev Theej Txhoj rau cov neeg Amoonaihas, Amas thov hais tias: “Thiab nim no, kuv cov kwv tij, kuv vam puag hauv kuv nruab siab tuaj, muaj tseeb tiag, kuv txhawj heev twb ua rau kuv mob, hais tias nej yuav mloog kuv tej lus, thiab muab nej tej kev txhaum tso pov tseg, … xwv kom nws yuav tsa nej sawv nyob hauv hnub kawg thiab nkag mus rau hauv [Vajtswv] qhov chaw so.”21
Ib yam li Thawj Tswj Hwm Russell M. Nelson hais tias, “Yog vim peb hlub tag nrho Vajtswv cov me nyuam heev peb thiaj li tshaj tawm txog Nws tej lus tseeb.”22
Vajtswv Hlub Nej; Nej Puas Hlub Nws?
Vim Leej Txiv thiab Leej Tub hlub peb ces Nkawd thiaj li muaj kev cia siab rau peb ua. Kuv rov qab hais ib yam uas Thawj Tswj Hwm Nelson hais tias, “Vajtswv tej kev cai yeej yog vim Nws hlub peb mus ib txhis li thiab Nws xav kom peb hloov los ua neeg raws li peb muaj peev xwm ua.”23
Vim Nkawd hlub nej, Nkawd tsis xav kom nej “nyob li qub.” Vim Nkawd hlub nej, Nkawd xav kom nej muaj kev xyiv fab thiab vam meej. Vim Nkawd hlub nej, Nkawd xav kom nej hloov siab lees txim vim txoj kev ntawd yuav ua rau nej zoo siab. Tiam sis yog ib yam uas nej yuav tsum xaiv—Nkawd cia nej muaj kev ywj siab. Nej yuav tsum xaiv kom hlub Nkawd, ua hauj lwm rau Nkawd, ua raws li Nkawd cov lus txib. Ces Nkawd yuav foom koob hmoov rau nej ntau ntxiv thiab hlub nej.
Qhov uas Nkawd xav kom peb ua kuj yog kev hlub lwm tus. “Tus uas tsis muaj kev hlub, tus ntawd yeej tsis paub Vajtswv, rau qhov Vajtswv yog tus uas muaj kev hlub.”24 Xws li Yauhas sau hais tias, “Cov phooj ywg, Vajtswv twb hlub peb npaum li ntawd lawm, yog li ntawd tsim nyog peb ib leeg yuav tsum hlub ib leeg.”25
Lub Koom Haum Me Nyuam Yaus tus Tuam Thawj Tswj Hwm dhau los Joy D. Jones nco qab tias thaum nws tus txiv thiab nws nkawd yog ib khub niam txiv hluas, tus npisov hu nkawd kom mus xyuas thiab txhawb pab ib tsev neeg uas tsis tau mus rau lub koom txoos tau ntau xyoos. Thawj zaus nkawd paub tias lawv tsis xav tau nkawd tuaj xyuas. Tom qab nkawd sim mus xyuas lawv ntau zaus lawm, thiab tom qab nkawd thov Vajtswv tiag thiab xav xav txog qhov no, Tij Laug thiab Muam Jones tau txais lus teb kom nkawd paub vim li cas nkawd ua hauj lwm pab nyob hauv nqe vaj lug kub hauv phau Lus Qhuab Qhia thiab Kev Khi Lus: “[Nej] yuav tsum hlub tus Tswv [nej tus Vajtswv kom kawg [nej] lub siab thiab koj lub dag lub zog; thiab [nej] yuav tsum ua hauj lwm rau nws los ntawm Yexus Khetos lub npe.”26
“Wb paub hais tias thaum wb muaj siab xav pab tsev neeg no thiab pab wb tus npisov, tiam sis wb tau nug wb tus kheej seb wb puas xav pab lwm tus vim wb hlub tus Tswv. …
“… Wb tau pib tos ntsoov thaum wb yuav mus xyuas tsev neeg no vim wb hlub tus Tswv (saib 1 Nifais 11:22). Wb ua rau Nws. Nws tau ua kom tsis nyuaj rau wb ntxiv. Tom qab ntau lub hli uas wb sawv ntawm lawv lub qhov rooj, tsev neeg no twb pib cia wb nkag mus hauv tsev. Ces tom qab ntawd, peb tau thov Vajtswv thiab sib tham txog txoj moo zoo ua ke. Peb tau ua phooj ua ywg zoo heev. Wb yeej teev tiam thiab hlub Vajtswv los ntawm qhov uas wb hlub Nws cov me nyuam.”27
Thaum peb lees hais tias Vajtswv hlub peb zoo tag nrho, tsim nyog uas peb txhua tus nug hais tias, “Kuv hlub Vajtswv npaum li cas? Nws puas ntseeg kuv txoj kev hlub ib yam li kuv ntseeg Nws txoj kev hlub?” Puas tsim nyog uas peb yuav xav ua neej kom Vajtswv hlub peb tsis yog txawm peb ua txhaum los tiam sis vim rau qhov peb hloov los ua neeg zoo li Nws? Xav kom Nws hais txog peb ib yam li Nws tau hais txog Hyrum Smith, ua piv txwv hais tias, “Kuv, tus Tswv, hlub nws vim txoj kev coj zoo ntawm nws lub siab.”28 Cia peb nco ntsoov Yauhas tej lus hais tias: “Qhov uas peb hlub Vajtswv yog peb ua raws li tej lus uas Vajtswv hais. Thiab Vajtswv tej lus peb yeej coj tsis nyuaj li.”29
Muaj tseeb tiag, Nws cov lus yeej tsis nyuaj li—yeej tsis yog li ntawd hlo li. Nws tej lus qhia txog txoj kev rau peb txais kev kho mob, kev zoo siab, kev kaj siab lug thiab kev xyiv fab. Peb Leej Txiv thiab peb tus Txhiv Dim tau foom koob hmoov rau peb kom muaj cov lus txib thiab thaum peb ua raws li Nkawd tej lus txib, peb hnov Nkawd txoj kev hlub zoo tag nrho puv npo.30
Nov yog kev kho teeb meem hauv peb lub caij nyoog uas nyiam sib cav sib ceg. Nyob rau lub caij nyoog zoo tshaj plaws hauv Phau Ntawv Maumoos tom qab tus Cawm Seej tau los qhuab qhia lawv, twb tau sau hais tias “Twb tsis muaj kev sib cav sib ceg nyob hauv thaj av, vim yog Vajtswv txoj kev hlub uas nyob hauv cov neeg lub siab.”31 Thaum peb koom ua ke txhim tsa Xi-oos, thov kom peb yuav nco ntsoov tej lus cog tseg nyob hauv phau Tshwm Sim: “Cov uas ntxhua lawv tej tsoos tsho huv lawm, yog cov uas nyob kaj siab lug, lawv muaj feem mus noj cov txiv uas muaj txoj sia thiab muaj feem mus ntawm cov rooj vag mus rau hauv lub nroog.”32
Kuv ua im khawv txog qhov uas muaj peb Leej Txiv Saum Ntuj Ceeb Tsheej thiab peb tus Txhiv Dim, Yexus Khetos, tiag tiag thiab txog Nkawd txoj kev hlub uas tsis tu tsis tseg. Los ntawm Yexus Khetos lub npe, amees.