Los Cuag Khetos Tiam Sis Txhob Los Ib Leeg Xwb
Txoj kev zoo tshaj kom pab neeg ntiaj teb ua zoo dua yog kom npaj lub ntiaj teb ntsib Yexus Khetos thaum nej caw txhua tus coj raws li Nws.
Tsis ntev tas los no, kuv txais ib tsab ntawv los ntawm ib tug ntxhais hluas uas xav paub qhov tseeb. Nws sau tias, “Kuv daig ib qho nyuaj. … Kuv tsis paub kuv yog leej twg, tiam sis kuv xav tias kuv nyob ntawm no rau ib yam loj heev.”
Nej puas tau muaj tej kev xav li ntawd? Nrhiav, hnov, thiab xav paub seb Leej Txiv Saum Ntuj Ceeb Tsheej puas paub nej thiab puas xav tau nej? Kuv cov hluas, thiab txhua leej txhua tus, kuv ua tim khawv hais tias yeej muaj! Tus Tswv muaj ib txoj hau kev rau nej. Nws tau npaj nej rau hnub no, tam sim no, los ua ib tug uas muaj zog ua zoo rau Nws txoj hauj lwm zoo kawg nkaus. Peb xav tau nej! Yeej muaj tsis tau ib yam tseem ceeb heev yog tsis muaj nej!
Peb tug yaj saub, Thawj Tswj Hwm Russell M. Nelson, qhia kom kuv nco ntsoov txog ob qhov tseeb uas yooj yim to taub thiab yog lub hauv paus ntawm nej txoj hauj lwm loj thiab muaj yeeb koob.
Thaum kuv nrog kuv tus txiv zaum saum lub rooj zaum thaum tus yaj saub rub nws lub rooj zaum los, hauv caug rau hauv caug nrog wb, thiab nws ntsia ntsoov kuv nrog nws ob lub qhov muag xim xiav. Kuv tsis paub seb kuv lub plawv puas tseem dhia los sis cia li nres lawm thaum nws hu kuv los ua tus Tuam Thawj Tswj Hwm ntawm lub Koom Haum Ntxhais Hluas. Nws noog kuv ib lo lus noog uas tseem nyob hauv kuv lub siab, “Bonnie, qhov tseem ceeb tshaj plaws uas [cov hluas] yuav tsum paub yog dab tsi?”
Kuv xav ib pliag thiab hais tias, “Lawv yuav tsum paub seb lawv yog leej twg.”
Nws hais tias, “YOG MAS! Thiab lawv yuav tsum paub lawv lub hom phiaj.”
Peb Caj Ceg Los ntawm Vajtswv
Nej yog Leej Txiv Saum Ntuj Ceeb Tsheej ib tug me nyuam uas Nws hlub. Nws hlub nej kawg nkaus li Nws thiaj li txib Nws Leej Tub, Yexus Khetos, los theej peb lub txhoj.1 Tus Cawmseej txoj kev hlub rau nej yeej tsis tu tsis tseg! Tsis muaj dab tsi yuav cais tau peb tawm ntawm Yexus Khetos txoj kev hlub Vajtswv.2 Kev nco txog txoj kev hlub no thiaj li ua rau kev ntxhov siab ploj mus, yog kev ntxhov siab uas sim nyiag nej lub peev xwm los sis ua kom nej tsis muaj zog thaum nej xav tias nej yog leej twg.
Nyob ntawm ib lub rooj sab laj FSY, kuv ntsib ob tug ntxhais hluas uas muaj kev nyuaj siab thiab kho siab. Nkawd ob leeg hais tias nkawd tau nyeem tus yawg suab txoj koob hmoov kom paub txog tus Tswv txoj kev hlub thiab txoj kev coj nkawd txoj hau kev. Cia li nrhiav nej yawg suab txoj koob hmoov, so cov hmoov av tawm yog tias tau ntev nej tsis nyeem, tiam sis cia li kawm ntau. Yog nej tsis muaj, cia li txais—sai sai. Tsis txhob tos kom paub tias tus Tswv xav qhia nej tias nej yog leej twg.
Peb lub Hom Phiaj Nyob Mus Ib Txhis
Thawj Tswj Hwm Nelson qhov tseeb thib ob uas nws hais rau peb hnub ntawd yog kev paub peb lub hom phiaj. Nov yog qhov loj uas Vajtswv txib peb ua.
Ntau xyoo tas los, kuv tus tub Tanner muaj tsib xyoo xwb thaum nws pib sib tw ncaws pob. Nws zoo siab heev!
Thaum peb txog tim tshav ncaws pob, peb pom hais tias nws pab tsis siv ib lub vas txhom pob me rau me nyuam yaus tiam sis lawv siv ib lub vas uas loj heev, muaj ntsis loj dhau rau cov me nyuam uas muaj tsib xyoos xwb.
Thaum lawv pib ncaws pob kuv pom Tanner ua tus ntes pob sawv ze lub vas. Kuv xav tsis thoob kiag li. Nws puas to taub seb nws nws lub hom phiaj pov hwm lub vas?
Lawv tshuab raj xuav, es thaum peb saib lawv ua kev sib tw ces peb tsis nco qab txog Tanner. Ces ua ciav ib tug ntawm lwm pab tau txais lub pob thiab khiav ceev ceev ncaws pob mus txog Tanner. Kuv saib Tanner seb nws puas tau npaj tiv thaiv lub vas. Qhov kuv pom los kuv yeej tsis tau xav txog.
Xyov thaum twg Tanner tsis nco qab qhov uas nws yuav tsum ntes pob tiam sis pom tias nws tau pib muab nws txhais caj npab sab laug rau hauv cov qhov hauv lub vas. Ces nws ua ib yam nrog nws txhais caj npab sab xis. Tom qab ntawd nws txhais ko taw sab laug. Thaum kawg, nws txhais ko taw sab xis. Tanner tau daig hauv lub vas. Nws tsis nco qab txog nws lub hom phiaj thiab tej yam nws tau cog lus tias nws yuav ua.
Tanner yeej tsis ncaws pob tau ntev, tiam sis kuv ib txwm nco nws zaj lus qhia rau kuv hnub ntawd. Tej lub sij hawm peb txhua tus yeej tsis nco qab vim li cas peb nyob no thiab siv peb lub zog ua lwm yam. Dab Ntxwg Nyoog ib txoj kev ntxias uas muaj hwj chim heev yog kev siv tej yam uas zoo kom peb tsis nco qab txog tej hauj lwm uas tseem ceeb tshaj plaws hauv lub ntiaj teb no.3
Peb lub hom phiaj mus ib txhis yog kom los cuag Khetos thiab koom tes ua Nws txoj hauj lwm tseem ceeb no. Yooj yim npaum li Thawj Tswj Hwm Nelson qhia: “Txhua lub sij hawm peb ua ib yam dab tsi pab lwm tus kom ua raws li lawv tej kev khi lus rau Vajtswv … peb pab muab Ixayees sau los ua ke.”4 Thiab thaum peb ua Nws txoj hauj lwm nrog Nws, peb paub Nws thiab hlub Nws ntxiv.
Peb siv zog los nyob ze Nws tsis tu tsis tseg los ntawm kev ntseeg, kev hloov siab lees txim, thiab ua raws li peb tej kev khi lus. Thaum peb khi peb tus keej rau Nws los ntawm tej kev khi lus thiab cov kab ke, peb yuav ua siab loj,5 muaj kev tiv thaiv,6 thiab muaj kev xyiv fab uas kav ntev.7
Thaum peb los cuag Khetos, peb yuav saib lwm tus raws li Nws saib lawv.8 Los cua Khetos. Los tam sim no, tiam sis tsis txhob los nej ib leeg xwb!9
Yexus Khetos txoj moo zoo tsis yog ib qhov uas zoo xwb, yog ib qhov uas tseem ceeb tshaj plaws rau sawv daws. “Tsis muaj dua lwm txoj kev los sis lwm yam uas tib neeg yuav muaj peev xwm dim tau, tsuas yog los ntawm Khetos xwb.”10 Peb xav tau Yexus Khetos! Neeg ntiaj teb xav tau Yexus Khetos.11
Nco ntsoov tias, txoj kev zoo tshaj kom pab neeg ntiaj teb ua zoo dua yog kom npaj lub ntiaj teb ntsib Yexus Khetos thaum nej caw txhua tus coj raws li Nws.
Muaj ib zaj dab neeg uas muaj hwj chim heev hauv Phau Ntawv Maumoos txog Khetos thaum Nws sawv rov los thiab mus saib cov Neeg Nifais. Nej xav tias yuav zoo li cas?
Thaum Khetos tshaj tawm tias Nws yuav tsum rov qab mus rau Leej Txiv, “nws rov tsa nws lub qhov muag ntsia ib puag ncig ntawm cov neeg coob coob.”12 Nws pom cov neeg los kua muag, thiab Nws paub tias lawv xav kom Nws nrog lawv nyob ib nyuag ntev me ntsis.
Nws noog tias: “Nej puas muaj neeg mob nyob hauv nej? Coj lawv los ntawm no. Nej puas muaj neeg ceg tawv, los sis dig muag, … los sis cov uas lag ntseg, los sis cov uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo.”13
Vim Nws muaj kev khuv leej, Nws tsis tau pub ib feem los es Nws cia li hu tag nrho “cov uas raug txom nyem ib yam dab tsi.” Kuv nyiam qhov uas yeej tsis muaj dab tsi uas loj dhau los sis me dhau rau Yexus Khetos kho kom zoo.
Nws paub peb txoj kev txom nyem thiab hu kom cov uas txhawj xeeb los sis tu siab, cov nkees, cov txaus siab thiab cov tsis nyab xeeb, cov uas neeg nkag siab yuam kev, cov kho siab, los cov uas “raug txom nyem ib yam dab tsi.”
Thiab “tag nrho cov neeg coob coob … mus … ; thiab nws kho tau lawv txhua tus zoo. …
“… Thiab lawv txhua tus, tsis hais cov uas nws kho tau zoo thiab cov uas tsis muaj mob, cia li qhau cev rau ntawm nws ko taw, thiab teev tiam nws.”14
Txhua zaus kuv nyeem nqe vaj lug kub no, kuv nug kuv tus kheej: Kuv yuav coj leej twg los cuag Khetos? Nej yuav coj leej twg?
Peb puas yuav saib ib puag ncig, saib tau li Yexus, kom peb tsis txhob hnov qab leej twg thiab caw txhua tus los paub Nws?
Cia kuv hais zaj lus piv txwv txog qhov uas yooj yim heev caw lwm tus los cuag Khetos. Kuv tus phooj ywg Peyton uas muaj 15 xyoos xav nyeem tsib nqe vaj lug kub txhua hnub thaum nws noj tshais, tiam sis nws tsis ua nws ib leeg xwb. Peyton ntsia dua, thiab caw nws niam thiab txiv thiab cov nus muag, nws tus kwv uas muaj tsib xyoos xwb, los nyeem nrog nws thiab. Qhov no zoo li me me xwb tiam sis Khetos qhia li ntawd thaum Nws caw, “Coj lawv los ntawm no.”
Txoj kev caw no los ntawm tus Tswv yeej tseem hais hnub no thiab. Cov ntxhais hluas thiab cov tub hluas, pib tam sim no—nyob hauv nej lub tsev. Nej puas kam thov Leej Txiv Saum Ntuj Ceeb Tsheej seb nej yuav ua li cas kom txhawb nqa nej niam nej txiv thaum lawv los cuag Khetos? Nkawd xav tau nej ib yam li nej xav tau nkawd.
Ces rov saib dua saib nej cov nus muag, nej cov phooj ywg, thiab nej cov neeg zej zog. Nej yuav coj leej twg los cuag Khetos?
Peb tus Cawm Seej tau hais, “Saib seb kuv yog txoj kev kaj; kuv tau ua ib tug yam ntxwv rau nej.”15 Peb mam li paub txog tus Cawm Seej txoj kev hlub thiab Nws txoj kev kaj siab lug thaum peb koom tes nrog Nws cawm Nws tsev neeg dim, rau qhov Nws tau cog lus, “Tus uas nrog kuv mus, tus ntawd yuav tsis taug txoj kev tsaus ntuj, tiam sis nws yuav ua nws lub neej tshav ntuj nrig.”16
Yog ib lub caij zoo heev peb koom ua hauj lwm kom muaj raws li Khetos lub hom phiaj!
Nej yeej nyob ntawm no rau ib yam loj heev. Kuv koom nrog Thawj Tswj Hwm Nelson thaum nws hais tias: “Tus Tswv xav tau nej kom nej hloov lub ntiaj teb no. Thaum nej lees yuav thiab coj raws li Nws lub siab nyiam, nej yuav pom hais tias nej ua tau tej uas tib neeg ua tsis taus!”17
Kuv ua tim khawv tias tus Tswv paub nej, thiab Nws hlub nej! Peb yuav ua raws li Nws lub hom phiaj ua ke txog thaum hnub uas Khetos rov los rau hauv ntiaj teb no thiab hu peb txhua tus los cuag Nws. Peb yuav zoo siab sib sau ua ke, rau qhov peb yog cov uas los cuag Khetos, thiab peb tsis nyob peb ib leeg. Los ntawm Yexus Khetos lub npe, amees.