Nco Ntsoov Koj Haiv Neeg Ntseeg uas Raug Txom Nyem, Auj Peb tus Vajtswv
Kev ua raws li nej tej kev khi lus qhib Yexus Khetos lub hwj chim theej txhoj kom nej cov uas raug txom nyem muaj zog thiab muaj kev xyiv fab.
Leej Txiv Saum Ntuj Ceeb Tsheej txoj hau kev zoo siab tau npaj ib lub neej rau tag nrho Nws cov me nyuam raug kev sim siab.1 Tsib xyoos tas los tus kws kho mob qhia kuv tias kuv muaj mob cancer. Kuv tau hnov thiab tseem hnov mob los ntawm kev phais mob, kev siv hluav taws xob tua kab mob, thiab tej kev mob los ntawm kev haus tshuaj. Tej lub sij hawm kuv tau nyuaj siab kawg thaum kuv mob dhau kuv thiaj li pw tsis tsaug zog. Tej txheeb suav kho mob qhia tias nyaj kuv yuav tso lub ntiaj teb no tseg ntxov dua li kuv xav, kuv yuav ncaim kuv tsev neeg uas muaj nqi tshaj rau kuv.
Txawm nej nyob qhov twg los, kev raug txom nyem ntawm lub cev los sis lub siab ntsws thiab tej kev qaug zog ntawm lub cev nqaij daim tawv yeej yog ib feem ntawm nej lub neej, tam sim no los sis thaum yav tom ntej.
Peb yuav raug kev txom nyem los ntawm qhov uas peb laus zuj zus, thaum raug kab mob, thiab tej xwm txheej ceev; kev tshaib kev nqhis los sis tsis muaj tsev nyob; los sis lwm tus ua phem rau peb, tej kev lim hiam, thiab kev ua tsov ua rog.
Kev txom nyem hauv siab ntsws los muaj los ntawm kev txhawj xeeb los sis kev nyuaj siab heev; qhov uas ib tug khub, yus niam yus txiv, los sis ib tug thawj coj ntxeev siab rau nej; tsis muaj hauj lwm los sis tsis muaj nyiaj; kev txiav txim tsis ncaj ncees; tej yam uas phooj ywg, cov me nyuam los sis tsev neeg xaiv; kev raug luag ua phem; tej yam uas tsis muaj raws li kev ua npau suav txog kev sib yuav los sis cov me nyuam; cov uas yus hlub muaj mob los sis raug tuag; thiab lwm yam li no.
Nej yuav ua li cas kom nyiaj dhau tej kev txom nyem uas yuav los rau peb txhua tus?
Zoo siab kawg, vim muaj kev cia siab hauv Yexus Khetos txoj moo zoo, thiab nej muaj tau kev cia siab hauv nej lub neej. Hnub no kuv xav qhia txog plaub lub ntsiab cai uas los ntawm cov vaj lug kub, cov yaj saub tej lus qhia, tej kev txhawb pab, thiab kuv txoj kev sim siab vim kuv mob heev. Tej lub ntsiab cai muaj nqi rau txhua tus tiam sis tej lub ntsiab cai no yeej yog tej yam uas kuv tau kawm ntawm kuv tus kheej.
Lub ntsiab cai thib ib, kev raug txom nyem tsis txhais hais tias Vajtswv tsis zoo siab rau nej. Ob txhiab xyoos tas los, Yexus cov thwj tim pom ib tug neeg dig muag nyob ntawm lub tuam tsev thiab nug hais tias, “Xib Hwb, leej twg ua txhaum thiaj ua rau tus txiv neej no dig muag? Yog nws ua txhaum los sis nws niam nws txiv ua txhaum?”
Nws cov thwj tim tau ua yuam kev ntseeg ib yam li cov neeg feem coob ntseeg niaj hnub no tias, tag nrho tej yam yus raug uas nyuaj hauv lub neej no yeej los ntawm kev ua txhaum. Tiam sis tus Cawm Seej hais tias, “Tsis yog vim nws tej kev txhaum los sis vim nws niam nws txiv tej kev txhaum. Nws dig muag kom sawv daws pom Vajtswv lub hwj chim xwb.”2
Vajtswv txoj hauj lwm yog xwv kom peb txais tau kev tsis txawj tuag thiab txoj sia nyob mus ib txhis.3 Tiam sis tej kev sim siab thiab kev txom nyem—qhov tseem ceeb yog kev txom nyem uas peb raug vim lwm tus siv lawv txoj kev ywj siab ua txhaum4—yuav ua li cas kom pab tau Vajtswv txoj hauj lwm thaum kawg?
Tus Tswv tau qhia Nws cov neeg khi lus tias, “Kuv tau muab nej nchuav hauv yeej vub, kuv tau xaiv nej hauv lub cub tawg ntawm kev txom nyem los.”5 Nej raug txom nyem vim muaj xwm txheej li cas los xij, nej Leej Txiv Saum Ntuj Ceeb Tsheej yeej siv tau tej ntawd kom pab kho nej tus ntsuj plig zoo .6 Tej ntsuj plig uas raug kho zoo lawm yeej muaj peev xwm ris lwm tus lub nra nrog kev khuv leej.7 Cov ntsuj plig uas tau txais kev kho zoo lawm vim lawv “tiv dhau tej kev tsim txom” twb tau npaj siab muaj kev xyiv fab nrog Vajtswv tas mus li, thiab “Vajtswv yuav so lawv tej kua muag huv tib si mus.”8
Lub ntsiab cai thib ob, Leej Txiv Saum Ntuj Ceeb Tsheej paub zoo txog nej tej kev txom nyem. Thaum peb raug kev sim siab, peb ua yuam kev xav tias Vajtswv nyob deb thiab tsis xav txog peb txoj kev mob. Tus Yaj Saub Joseph Smith kuj tau hais tias nws xav li no thaum nws raug txom nyem loj heev. Thaum nws raug kaw hauv lub Tsev Kaw Liberty thaum txhiab txhiab Neeg Ntseeg hauv Hnub Nyoog Kawg raug ntiab tawm ntawm lawv tej tsev, Joseph tau thov Vajtswv pab nws to taub hais tias: “Auj Vajtswv, koj nyob qhov twg? Thiab lub tsev ntaub uas npog koj qhov chaw nkaum nyob qhov twg?” Nws tau xaus kev thov Vajtswv li no: “Nco ntsoov koj haiv neeg ntseeg uas raug txom nyem, auj peb tus Vajtswv.”9
Tus Tswv tej lus teb tau nplij Joseph lub siab thiab tag nrho cov uas raug txom nyem thiab:
“Kuv tus tub, koj cia li nyob kaj siab lug; koj tej kev nyuaj siab thiab koj tej kev txom nyem yuav muaj nyob ib nyuag ntus xwb;
“Thiab tom qab ntawd, yog koj ua tib zoo nyiaj mus, Vajtswv yuav tsa koj mus nto ntuj.”10
Haiv Neeg Ntseeg uas raug txom nyem coob tau qhia kuv tias lawv paub txog Vajtswv txoj kev hlub thaum lawv raug kev sim siab. Kuv nco qab ib lub sij hawm thaum kuv tawm tsam cancer es cov kws kho mob tsis tau paub vim li cas kuv hnov mob heev. Kuv tau nrog kuv tus poj niam zaum ua ke, kuv xav tias kuv yuav thov Vajtswv foom koob hmoov rau peb pluas mov. Tiam sis, kuv tsuas quaj xwb thiab thov, “Leej Txiv Saum Ntuj Ceeb Tsheej thov pab kuv. Kuv mob mob heev.” Rau ib me ntsis, kuv hnov Nws txoj kev hlub nyob ib puag ncig kuv. Kuv tsis tau kawm tias vim li cas kuv mob, tsis tau paub yuav zoo li cas thaum kawg, thiab kev hnov mob tsis tau tu. Kuv tsuas hnov Nws txoj kev hlub dawb huv, thiab li ntawd yeej txaus lawm.
Kuv ua tim khawv tias peb Leej Txiv Saum Ntuj Ceeb Tsheej, tus uas pom txhua zaus ib tug noog poob lawm, yeej paub thaum nej raug txom nyem.11
Lub ntsiab cai thib peb, Yexus Khetos muab Nws lub hwj chim kom pab nej muaj dag zog txaus nyiaj nej tej kev txom nyem mus. Lub hwj chim no yeej yog los ntawm Nws txoj Kev Theej Txhoj.12 Kuv ntshai hais tias cov mej zeej ntawm lub Koom Txoos feem coob xav tias yog lawv siv zog me ntsis ntxiv ces lawv yuav nyiaj mus kom dhau kev txom nyem lawv tus kheej xwb. Nov yog ib txoj kev ua neej nyuaj heev. Qhov uas yus muaj zog rau ib me pliag xwb yeej tsis zoo npaum li yus muaj tus Cawm Seej lub hwj chim kom txhawb nej lub dag zog.13
Phau Ntawv Maumoos qhia tias Yexus Khetos yuav “ris” peb tej kev mob kev nkees, thiab tej kev txom nyem Nws thiaj pab tau peb.14 Nej yuav ua li cas kom siv Yexus Khetos lub hwj chim kom pab nej thiab txhawb nej dag zog thaum nej raug txom nyem? Qhov tseem ceeb yog qhov uas nej muab nej tus kheej khi rau tus Cawm Seej thaum nej ua raws li nej tej kev khi lus uas nej khi nrog Nws. Peb ua tej kev khi lus no thaum peb txais cov kab ke pov thawj hwj.15
Cov neeg Amas tau ua kev cai raus dej. Tom qab ntawd lawv tau raug yuam ua qhev thiab luag txwv tsis pub lawv teev tiam Vajtswv los sis thov Vajtswv nrov. Tiam sis lawv tau ua raws li lawv tej kev khi lus thiab tseem thov Vajtswv hauv lawv lub siab. Yog li ntawd, lub hwj chim saum ntuj tau los rau lawv. “Tus Tswv tau txhawb lawv lub dag lub zog es lawv thiaj ris tau lawv tej nra hnyav yam yooj yim.”16
Nyob hauv peb lub caij nyoog, tus Cawm Seej tau hais tias, “Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai.”17 Thaum peb ua raws li txoj kev khi lus ntawm lub cim nco txog kom nco ntsoov txog Nws, ces Nws cog lus tias Nws tus Ntsuj Plig yuav nrog peb nyob. Tus Ntsuj Plig muab dag zog rau peb kom nyiaj dhau tej kev sim siab thiab ua tej yam uas peb ua tsis taus peb tus kheej. Tus Ntsuj Plig kho tau peb, txawm yog Thawj Tswj Hwm James E. Faust qhia tias, “Ib feem ntawm kev kho mob no los yuav muaj tom qab lub neej no.”18
Peb kuj tau koob hmoov los ntawm tej kev khi lus thiab cov kab ke hauv lub tuam tsev, nyob ntawd “thiaj pom lub hwj chim ua li Vajtswv tshwm sim.”19 Kuv tau mus xyuas ib tug poj niam uas nws tus ntxhais hluas xiam thaum muaj xwm txheej ceev, ces tom qab ntawd nws tus txiv tuag vim nws muaj mob cancer. Kuv nug nws seb nws ua li cas kom tiv dhau tej kev txom nyem li no. Nws teb tias ua rau nws muaj zog vim nws txais kev nplij siab tias nws yuav nrog nws tsev neeg nyob mus ib txhis li thaum nws mus teev tiam hauv lub tuam tsev. Raws li tau cog lus, cov kab ke hauv tus Tswv lub tsev ua rau nws muaj Vajtswv lub hwj chim txhawb nqa nws.20
Lub ntsiab cai thib plaub, xaiv kom nrhiav kev xyiv fab txhua hnub. Cov uas raug txom nyem los feem ntau xav tias hmo ntuj yeej yuav tsis tiav, thiab tshav ntuj yeej yuav tsis los. Yeej tsim nyog yog nej quaj.21 Tiam sis, yog tias nej raug txom nyem uas dub npaum li hmo ntuj, thaum nej xaiv kev ntseeg ces nej yuav tsim los pom lub hnub ci ci thaum sawv ntxov.22
Piv txwv hais tias, kuv tau mus xyuas ib tug niam tsev hluas uas txais kev kho mob cancer, nws luag nyav thaum nws zaum hauv nws rooj zaum txawm yog nws hnov mob heev thiab tsis muaj plaub hau. Kuv tau ntsib ib khub niam txiv uas zoo siab ua hauj lwm pab cov tub hluas ntxhais hluas txawm yog nkawd muaj tsis taus me nyuam. Kuv tau sib tham nrog ib tsev neeg uas lawv pog thiab lawv niam yuav tso lub ntiaj teb no tseg ob peb hnub tom ntej; tiam sis lawv luag thiab los kua muag thiab zoo siab sib tham txog yav tas los.
Haiv Neeg Ntseeg uas raug txom nyem no coj yam txwv txog qhov uas Thawj Tswj Hwm Russell M. Nelson tau qhia tias:
“Peb txoj kev xyiv fab yeej tsis nyob ntawm seb peb raug dab tsi hauv peb lub neej tiam sis kev xyiv fab nyob ntawm seb peb tsom ntsoov rau dab tsi hauv peb lub neej.
“Thaum peb tsom ntsoov rau Vajtswv txoj kev cawm seej … thiab Yexus Khetos thiab Nws txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej.”23
Kuv ua tim khawv24 tias peb Leej Txiv Saum Ntuj Ceeb Tsheej nco txog Nws haiv neeg ntseeg uas raug txom nyem, Nws hlub nej, thiab paub txog nej. Peb tus Cawm Seej paub tias nej xav li cas. “Nws yeej tau tiv peb tej kev nyuaj siab, thiab ris peb tej kev txom nyem.”25 Kuv paub tias txoj kev ua raws li nej tej kev khi lus yuav qhib Yexus Khetos lub hwj chim theej txhoj kom nej cov uas raug txom nyem muaj zog thiab muaj kev xyiv fab—kuv paub li no vim kuv txais cov koob hmoov no txhua hnub.26
Rau tag nrho cov uas raug txom nyem, kuv thov “Vajtswv pub rau nej kom nej tej nra yuav sib, los ntawm txoj kev xyiv fab txog [Nws] Leej Tub.”27” Los ntawm Yexus Khetos lub npe, amees.