COVID-19 mo e Ngaahi Temipalé
ʻAi ke mahuʻinga taha maʻu pē hoʻomou ngaahi fuakavá mo e tāpuaki fakatemipalé ʻi hoʻomou fakakaukaú mo e lotó. Faitotonu ki he ngaahi fuakava kuo mou fakahokó.
Siʻoku kāinga ʻofeina, kuo tau aʻusia moʻoni ha keinanga fakalaumālie. ʻOku ou mātuʻaki houngaʻia moʻoni ʻi he ngaahi lotu, pōpoaki mo e hiva ʻi he kotoa ʻo e konifelenisí ni. Fakamālō atu ki he tokotaha kotoa ʻi hoʻomou kau mai he ʻaho ní, mei ha feituʻu pē ʻoku mou ʻi ai.
ʻI he konga kimuʻa ʻo e taʻu kuoʻosí, koeʻuhí ko e fokoutua pipihi ʻo e COVID-19 mo ʻetau vilitaki ke hoko ko ha kakai lelei fakamāmani lahí, ne tau fakahoko ai ʻa e fili faingataʻa ke tāpuni fakataimi e ngaahi temipale kotoa pē. ʻI he ngaahi māhina kuo hilí, naʻe ueʻi fakalaumālie ai kimautolu ke toe fakaava fakakongokonga e ngaahi temipalé ʻi ha founga mātuʻaki tokanga moʻoni. Kuo fakaava ʻeni e ngaahi temipalé ʻi ha konga ʻe fā, ʻo muimui kakato ki he ngaahi tuʻutuʻuni fakapuleʻanga fakalotofonuá mo e ngaahi tuʻutuʻuni ki he tuʻunga malú.
Ki he ngaahi temipale ʻi he konga 1, ʻe lava ai e ngaahi hoa-mali moʻui taau kuo ʻosi maʻu ʻenitaumení ʻo sila ko ha husepāniti mo ha uaifi.
Ki he ngaahi temipale ʻi he konga 2, ʻoku fakahoko ai e kotoa ʻo e ngaahi ouau maʻá e kakai moʻuí, kau ai ha maʻu ʻenitaumeni ʻa ha tokotaha, silaʻi ʻo e husepānití mo e uaifí, pea mo hono silaʻi e fānaú ki he mātuʻá. Ne mau toki liliu kimuí ni e ngaahi meʻa ki he konga 2 ʻo fakaʻatā ʻetau toʻu tupú, kau mēmipa foʻoú, mo ha niʻihi kehe ʻoku nau maʻu ha lekomeni fakangatangata ke kau ʻi he ngaahi papitaiso fakafofonga maʻa ʻenau ngaahi kuí.
Ki he ngaahi temipale ʻi he konga 3, he ʻikai ngata pē ʻi he lava ʻa kinautolu kuo fakataimi-tēpileʻi ha ʻapoinimení ʻo kau ʻi he ngaahi ouau maʻá e kakai moʻuí, ka ʻi he ngaahi ouau fakafofonga foki maʻá e ngaahi kui kuo pekiá.
Ko e konga 4, ʻa e foki kakato ki he ngaahi ngāue fakatemipale angamahení.
ʻOku mau houngaʻia ʻi hoʻomou faʻa kātaki mo e ngāue mateaki lolotonga e vahaʻa-taimi feliliuʻaki mo faingataʻa ko ʻení. ʻOku ou lotua ke toe mālohi ange ʻi he taimí ni, ʻa hoʻomou vilitaki ke moihū mo ngāue ʻi he temipalé ʻo laka ange ʻi ha taimi kimuʻa.
Mahalo ʻoku mou fifili he taimí ni ki he taimi te mou lava ai ʻo foki ki he temipalé. Ko e talí: ʻE fakaava homou temipalé ʻi he taimi ʻe fakangofua ai ia ʻe he ngaahi tuʻutuʻuni fakapuleʻanga fakalotofonuá. ʻI he taimi kuo fakafiemālie ai e ngaahi tūkunga ʻo e COVID-19 ʻi homou feituʻú, ʻe toe fakaava leva homou temipalé. Fakahoko ʻa e meʻa kotoa pē te mou malavá, kae lava ke holoki e ngaahi fika ʻo e COVID ʻi homou feituʻú koeʻuhí ke vave ange ai haʻamou foki ki he temipalé.
ʻI he taimi tatau, ʻai ke mahuʻinga taha maʻu pē hoʻomou ngaahi fuakava mo e tāpuaki fakatemipalé ʻi hoʻomou fakakaukaú mo e lotó. Faitotonu ki he ngaahi fuakava kuo mou fakahokó.
ʻOku tau ngāue he taimí ni ki he kahaʻú! ʻOku ʻi ai ha temipale ʻe fāngofulu-mā-taha ʻoku lolotonga langa pe fakaleleiʻi. ʻI he taʻu kuoʻosí pē, neongo e fokoutua pipihí, ka ne tāpuakiʻi ai ʻa e kelekele ki ha ngaahi temipale foʻou ʻe 21!
ʻOku mau loto ke fokotuʻu e fale ʻo e ʻEikí ke toe ofi ange ki hotau kāingalotú, koeʻuhí ke nau maʻu ʻa e faingamālie toputapu ʻo e ʻalu ki he temipalé ʻi he lahi taha te nau ala malavá ʻo fakatatau mo honau ngaahi tūkungá.
ʻI heʻeku fanongonongo ʻa ʻemau palani ke langa ha toe ngaahi temipale ʻe 20, ʻoku ou fakalaulauloto mo houngaʻia ʻi he kau paionia—mei he kuohilí mo e lolotongá ni—ne fakatapui ʻenau moʻuí ke tokoni ki hono fakahoko ʻa e ngāue maʻongoʻongá ni ʻi he ʻahó ni. ʻE langa ha temipale ʻi he ngaahi feituʻu takitaha ko ʻení: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic of Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; pea mo Smithfield, Utah.
Ko e ngaahi temipalé ko ha konga mahuʻinga ia ʻo Hono Fakafoki mai ʻo e kakato ʻo e ongoongolelei ʻo Sīsū Kalaisí. ʻOku hanga ʻe he ngaahi ouau ʻo e temipalé ʻo fakafonu ʻetau moʻuí ʻaki ha mālohi mo ha ivi ʻoku ʻikai ha toe founga ke maʻu ai ia. ʻOku tau fakamālō ki he ʻOtuá koeʻuhí ko e ngaahi tāpuaki ko iá.
ʻI heʻetau tāpuni e konifelenisí ni, ʻoku mau toe fakahaaʻi atu ʻemau ʻofá. ʻOku mau lotua ke lilingi hifo ʻe he ʻOtuá ʻEne ngaahi tāpuakí mo e maluʻí kiate kimoutolu takitaha. ʻOku tau kau fakataha ʻi Heʻene ngāue māʻoniʻoní. ʻI he loto-toʻa, tuku ke tau vilitaki atu ʻi he ngāue nāunauʻia ʻa e ʻEikí! ʻOku ou lotua ʻeni, ʻi he huafa toputapu ʻo Sīsū Kalaisí, ʻēmeni.