Maummongyo ti Israel!
Siguradoak a maaramidyo nga agtutubo daytoy gapu iti maysa a banag maipapan iti pakabigbiganyo ken ti dakkel a bileg iti unegyo.
Dumani tallo a tawen ti naglabas, inawis ni Presidente Russell M. Nelson ti amin nga agtutubo ti Ti Simbaan ni Jesucristo dagiti Santo iti Ud-udina nga Aldaw nga agpailista iti “youth battalion ti Apo a mangummong ti Israel iti agsumbangir a belo. Kinunana, “Dayta a panaguummong ti kapatgan a banag a maar-aramid iti daga ita.”1 Siguradoak a maaramidyo nga agtutubo daytoy—sayaatenyo nga aramiden—gapu iti (1) maysa a banag maipapan iti pakabigbiganyo ken (2) ti dakkel a bileg iti unegyo.
Uppat-a-pulo-ket-maysa a tawen ti naglabas, narikna ti dua a misionario iti Simbaan nga agturong iti balay iti New Jersey iti Estados Unidos. Idi agangay, nabuniagan ti agpada a nagannak ken amin a sangapulo nga annak. Iti sao ti propeta, “binay-anda a nagballigi ti Dios”2 iti biagda. Kunak koma ti “biagmi.” Siak ti maikatlo nga anak. Agtawenak iti 17 idi inkeddengko a permamente a makitulag a sumurot ken ni Jesucristo. Ngem pugtuanyo no ania pay ti inkeddengko? Diak agserbi iti full-time mission. Sobra unayen dayta. Ken saan a manamnama daytoy kaniak, di kadi? Kabarbaroak la unay a miembro ti Simbaan. Awan ti kuartak. Maysa pay, nupay katurturposko laeng iti karigatan a hayskul iti asideg a West Philadelphia ken napadasak dagiti nakabutbuteng a karit, inlimedko ti butengko a pumanaw iti balay iti uneg ti dua a tawen.
Ti Pudno a Pakabigbiganyo
Ngem kaad-adalko laeng a nagnaed ti amin a tao iti sidong ti Nailangitan nga Amatayo kas espiritu nga annakna a lallaki ken babbai sakbay a nayanaktayo. Nasken nga ammuen dagiti dadduma, kas ammok, a tinarigagayanna nga agsagrap iti agnanayon a biag ti amin nga annakna Kenkuana. Sakbay nga immaytayo iti daga, indatagna ti amin nga addaan naan-anay a planona iti pannakaisalakan ken ragsak, a ni Jesucristo ti Mangisalakantayo. Daksanggasat, ta sinupiat ni Satanas ti plano ti Dios.3 Segun iti libro ti Apocalipsis, “adda gubat idiay langit”!4 Nasikap nga inallilaw ni Satanas ti apagkatlo a paset dagiti espiritu nga annak ti Nailangitan nga Ama iti panagpaballigida kenkuana imbes a ti Dios.5 Ngem saan a dakayo! Nakita ni Apostol Juan a pinarmekyo ni Satanas “babaen ti balikas ti pammaneknek[yo].”6
Iti pannakaammok iti pudno a pakabigbigak, ket nangtulong iti patriarchal blessingko, nangted kaniak iti tured ken pammati nga awatek ti awis ni Presidente Spencer W. Kimball a mangummong iti Israel.7 Maipadanto met kadakayo, patpatgek a gagayyem. Iti pannakaammo a pinarmekyo ni Satanas babaen ti balikas ti pammaneknekyo idi ket tulongannakayto nga agayat, agibinglay, ken agawis”8 ita ken kanayon—nga awisen ti dadduma nga umay ken kumita, umay ken tumulong, umay ken agkameng, kas iti panagtultuloy ti gubat ti kararua dagiti annak ti Dios.
Ti Nabileg a Pammati iti Kaungganyo
Ania ti maipapan iti dakkel a bileg iti kaungganyo? Panunoten daytoy: impukkawyo ti rag-o9 nga umay iti natnag a lubong a pakaipasanguan ti amin iti pisikal ken espiritual nga ipapatay. Ditayo kaano man kabaelan a parmeken iti bukodtayo. Ditayo laeng sagabaen saan laeng iti bukodtayo a basbasol ngem ti basbasol pay dagiti dadduma. Pudno a pasaren ti tao ti tunggal mapanunot a kita ti kinaliday ken pannakaupay10—amin iti belo ti pannakalipat iti panunottayo ken agtultuloy ti kadaksan a kabusor ti lubong a darupen ken sulisogennatayo. Namnamaen ti amin nga agsubli a nagungar ken nadalus iti nasantuan a presensia ti Dios nga agpannuray iti maysa a Parsua nga agtungtungpal iti karina.11
Ania ti nangpabileg kadakayo nga agpatuloy? Insuro ni Presidente Henry B. Eyring, “Kasapulan ti pammati ken Jesucristo a mangkanunong iti plano ti ragsak ken ti lugar ni Jesucristo ditoy no bassit unay ti ammoyo kadagiti karit a sanguenyo iti mortalidad.”12 Idi inkari ni Jesucristo nga umay iti mortalidad ken itedna ti biagna tapno ummongen13 ken isalakannatayo, gagangay a dikayo namati Kenkuana. Addaankayo a “natakneng nga espiritu”14 iti kasta a “aglaplapusanan a dakkel a pammati” a nakitayo a pudno ti karina.15 Saan a makapagulbod, isu a nakitayo Isuna a kasla imbukboknan ti darana para kadakayo, nabayagen sakbay ti pannakayanakna.16
Iti simboliko a sao ni Juan, “pinarmekyo ni [Satanas] iti dara ti Kordero.”17 Insuro ni Presidente Dallin H. Oaks nga iti lubong “nakita[yo] ti gibus manipud iti rugi.”18
Ipapan nga iti maysa nga aldaw sakbay a mapankayo iti eskuela, maysa kadagiti dadakkelyo ti agaramid iti pudno a kari a maaddaankayo iti paboritoyo a makan no agawidkayo! Aggagarkayo! Iti kaaddayo iti eskuela ipapanyo a mangmangankayo iti dayta a makan, ken maramananyon daytoy. Gagangay, nga ibinglayyo ti naimbag a damag iti dadduma. Iti panangnamnama nga agawid paragsakennakayo unay ta kasla nalaka dagiti pannubok ken karit ti eskuela. Awan ti mangpaliday kadakayo wenno mamagduadua kadakayo gapu ta sierto ti kari! Kapadana, sakbay a nayanak dagiti natakneng nga espiritu, naadalyo a kitaen dagiti kari ni Cristo iti kastoy sierto a wagas, ket naramananyoti pannakaisalakanna.19 Ti dakkel a pammatiyo kasla piskel a pumigpigsa ken dumakdakkel no iwatwatyo ida, ngem addadan iti kaungganyo.
Kasano a mariingyo ti dakkel a pammatiyo ken Cristo ken mausar daytoy a mangummong iti Israel itan ken agballigi manen ken Satanas? Iti panangadal manen a mangnamnama iti kasta met la a kinasierto ti kari ti Apo a mangummong ken mangisalakan ita. Usarenna ti Libro ni Mormon ken dagiti propetana a mangisuro kadatayo no kasano. Nabayag sakbay ni Cristo, dagiti “propeta a Nephite, ken … saserdote, ken …maestro … ginutugotna ida nga agsagana para iti Mesias, ken mamatida kenkuana nga umay a kasla dimtengen.”20 Insuro ni propeta Abinadi, “Ket ita no saan nga immay ni Cristo iti lubong, a nangibaga kadagiti banag a dumteng a kasla dimtengdan, awan koma ti pannubbot.”21 Kas ken niAlma, ni Abinadi “nangnamnama nga addaan mata ti pammati”22 ken nakitana ti sierto a kari ti Dios iti pannakaisalakan a naipatungpalen. “Pinarmekda ni [Satanas] babaen ti dara ti Kordero, ken … babaen ti balikas ti pammaneknekda” iti nabayag sakbay a nayanak ni Cristo, kas iti inaramidyo. Ket inikkan ti Apo ida iti bileg a mangawis ken mangummong iti Israel. Aramidenna met ti kasta kadakayo no mangnamnamakayo iti pammati, mangkita a maummong ti Israel—sangalubongan ken iti bukodyo a “sirkulo”23—ken mangawis iti amin!
Ginasgasut a misionario ti dimmur-as iti nabileg a pammatida ken ni Cristo sakbay daytoy a biag babaen ti panangiladawanda kadagiti nakaam-ammo wenno nasuruanda a nakaaruat iti kawes iti buniag ken templo. Iti maysa a bitla a napauluan iti “Begin with the End in Mind,”24 imbinglay ni Presidente Nelson ti bukodna a pagarigan ti panangaramid itoy ken binilinna dagiti mission leader a mangisuro kadagiti misionariotayo a mangaramid met ti kasta. Iti panangammo nga inusarda daytoy dakkel a pammati ken Jesucristo iti premortal a lubong ket nangtulong kadagiti misionariotayo a “dumngeg Kenkuana”25 ken nagparegget iti dakkel a pammatida a mangummong iti Israel kas inkari ti Apo.
Siempre, ti panangpanunot kadagiti inuulbod dangranna ti pammati.26 Gagayyemko, ti naigagara a panangkita iti bambanag a mangsupiat iti pudno a kinasiasinoyo, nangruna iti pornograpiae, pakapuyennanto ti pammatiyo ken Cristo ken, no awan panagbabawi makadadael itoy. Usarenyo ti panunotyo a mangpapigsa iti pammati ken Cristo, saan a dadaelen.
Programa dagiti Ubbing ken Agtutubo
Ti programa dagiti Ubbing ken Agtutubo ket napadtuan a ramit a pangtulong kadakayo nga agtutubo a bumileg iti pammati. Insuro ni Presidente Oaks, “Naisangrat dayta a programa a mangtulong kadakayo nga agbalin nga ad-adda kas iti Mangisalakantayo iti uppat a tay-ak: espiritual, sosial, pisikal, ken intelektual.”27 No idauluanyo nga agtutubo—mangidaulokayo—iti panagbiag iti ebanghelio, panangaywan iti dadduma, panangawis iti amin nga umawat iti ebanghelio, panamagkaykaysa iti amin a pamilia iti agnanayon, ken panangbuangay kadagiti naragsak nga aktibidad,28 ti dakkel a pammatiyo ken ni Cristo iti biag sakbay daytoy a biag ket pabilgennakayto a mangaramid iti trabaho ti Apo ditoy a biag!
Kasta met, dagiti bukod a panggep a tun-oyen, “nangruna dagiti ababa ti agpangna a panggep a tun-oyen,”29 tulongandakayo a bumileg ti pammatiyo. No itudingyo ti nasayaat a panggep a tun-oyenl, namnamaenyo, kas iti inaramidyo idi, ken kitaen no ania ti kayat ti Nailangitan nga Amayo a pagbalinanyo wenno ti sabali.30 Kalpasanna planuen ken trabahuenyo a nasayaat a manggun-od iti daytoy. Insuro ni Elder Quentin L. Cook, “Saan a kaano man tagibassiten ti pateg ti panagplano, panangituding iti panggep a tun-oyen … ken [panangawis iti dadduma]—amin iti mata ti pammati.”31
Dakayo ti agpili! Kinuna ti Apo kadakayo, “Ti bileg [a pumili] adda kadakuada.”32 Inlawlawag ni Elder Neil L. Andersen, “Dumakkelto ti pammatiyo saan a babaen ti gundaway ngem babaen ti pili.”33 Innayonna, “[Ania man] a napudno a saludsoden[yo] … masungbatanto iti anus ken mata ti pammati.”34
Paneknekak a ti (1) pudno a pakabigbiganyo ken (2) ti dakkel a bileg ti pammati ken Cristo iti unegyo mangpabaelto kadakayo a “tumulong a mangisagana iti lubong iti panagsubli ti Mangisalakan babaen ti panangawis iti amin nga umay ken ni Cristo ken umawat kadagiti bendision ti Pannubbotna.”35 Ibinglaytayo koma amin ti rag-o ti sierto a kari ti Libro ni Mormon:
“Dagiti nalinteg a dumngeg kadagiti …propeta, ken …mangnamnamada ken ni Cristo a sitatalingenngen … iti baet ti amin a panangidadanes … saan a maungaw.
“Ngem ni [Cristo] … agasannato ida, ket addaandanto iti talna kenkuana.”36
Iti nagan ni Jesucristo, amen.