Namnama ken ni Cristo
Tarigagayanmi a tulongan ti amin a makarikna iti panagmaymaysa wenno saan a maibilang. Dakamatek man, nangruna dagiti agdama nga awan asawana.
Kakabsat, itoy a panawen ti Paskua ti Panagungar agpokustayo iti nagloriaan a Panagungar ti Apo ken Mangisalakantayo, ni Jesucristo. Malagipko ti naayat nga awisna nga “umaykayo kaniak, dakayo amin nga agrigrigat ken madagdagsenan, ta paginanaenkayto.
“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana a maipaay kadagiti kararuayo.
“Ta ti sangolko nalaka ken nalag-an ti awitko.”1
Ti awis ti Mangisalakan nga umay Kenkuana ket awis iti amin saan laeng nga umasideg Kenkuana ngem maibilang pay iti Simbaanna.
Iti bersikulo a sumaruno itoy naayat nga awis, isuro ni Jesus no kasano nga aramiden daytoy babaen ti panagkalikagum a mangsurot Kenkuana. Kinunana, “Awan lalaki [wenno babai] a makaam-ammo iti Anak, no saan a ti Ama; awan lalaki [wenno babai] ti makaam-ammo iti Ama, no saan a ti Anak, ken daydiay kayatto a pangipaltiinganto ti Anak.”2
Kayat ni Jesus nga ammuentayo a naayat a Nailangitan nga Ama ti Dios.
Iti pannakaammotayo nga ipatpategnatayo ti Nailangitan nga Amatayo tiulongannatayto a mangammo no asinotayo ken maibilangtayo iti naindaklan nga agnanayon a pamiliana.
Itay nabiit kinuna ti Mayo Clinic: “Napateg unay ti kaadda ti rikna ti pannakaibilang. … Dumani amin nga aspeto ti biagtayo ket nabukel iti pannakaibilang iti maysa a banag.” Inayon daytoy a report, “Ditay maisina ti pateg ti rikna ti pannakaibilang manipud iti salun-at ti bagi ken panunottayo”3.—ken, inayonko, ti naespirituan a salun-attayo.
Iti rabii sakbay ti panagsagabana iti Getsemani ken ipapatayna iti krus, nakipagkita ti Mangisalakan kadagiti disipulona para iti Maudi a Pangrabii. Kinunana kadakuada, “Ditoy lubong addanto rigatyo: ngem mananginanamakayo; siak pinarmekko ti lubong.”4 Sakbay ti ilelennek ti init iti sumuno nga aldaw, nagsagaba ni Jesucristo ket “natay [iti krus] para iti basbasoltayo.”5
Kasano ngata ti rikna dagiti napudno a babbai ken lallaki a simmurot Kenkuana iti Jerusalem idi likmutan ida ti ilelennek ti init ken sipnget ken buteng.6
Kas dagitoy nagkauna a disipulo dumani 2000 a tawen ti naglabas, masansan met a marikna ti adu kadakayo ti panagmaymaysa. Nariknak daytoy a panagmaymaysa manipud pay idi natay ti patpagek nga asawak, ni Barbara, nasurok a dua ket gudua a tawenen ti naglabas. Ammok no ania ti malikmutan kadagiti miembro ti pamilia, gagayyem, kapulapol ngem marikna latta ti panagmaymaysa—gapu ta awanen iti abayko ti patpatgek iti biag.
Ti COVID-19 pandemic ti bugas daytoy a rikna ti pannakailasin ken panagmaymaysa para iti adu. Nupay kasta, iti baet dagiti karit a sanguentayo, kas iti dayta bigat ti umuna a Paskua ti Panagungar, makariingtayo iti baro a biag ken Cristo, nga addaan kadagiti baro ken datdatlag a posibilidad ken realidad no asitgantayo ti Apo para iti namnama ken pannakaibilang.
Mariknak mismo ti saem dagitay saan a makarikna iti pannakaibilang. iBayat ti panagbuyak iti damdamag iti sangalubongan, makitak ti adu a kasla agpaspasar iti panagmaymaysa. Panagkunak, para iti adu, gapu ta dida ammo nga ipatpateg ida ti Nailangitan nga Ama ket maibilangtayo amin iti agnanayon a pamiliana. Iti panamati a patpatgennatayo ti Dios ken annaknatayo ket makaliwliwa ken makanamnama.
Gapu ta espiritu nga annaknatayo ti Dios, adda nadiosan a nagtaudan, kinatao, ken portensial ti tunggal maysa. Tunggal maysa kadatayo ket “maipatpateg nga espiritu nga anak a lalaki ken babai dagiti nailangitan a nagannak.”7 Daytoy ti pakabigbigantayo! Daytoy ti pudno a kinasiasinotayo!
Mapadur-as ti naespirituan a pakabigbigantayo no maawatantayo ti adu a mortal a pakabigbigantayo kas iti tawid a mainaig iti puli, kultura, ken nasion.
Daytoy a rikna ti espiritual ken kultural a pakabigbigan, ayat, ken pannakaibilang ket makaparegta iti namnama ken ayat para ken ni Jesucristo.
Saritaek ti namnama ken ni Cristo a saan a tarigagay nga agpanunot. Ketdi, saritaek ti namnama kas panangnamnama a matungpalto. Napateg ti kasta a namnama iti panangparmek iti rigat, panangpadur-as iti spiritual resilience ken pigsa, ken panangammo nga ipatpategnatayo ti Agnanayon nga Amatayo ken datayo dagiti annakna, a kameng ti pamiliana.
No adda namnamatayo ken Cristo, maammuantayo a no nasken nga aramiden ken tungpalentayo dagiti sagrado a katulagan, matungpal dagiti kasgedan a tarigagay ken arapaaptayo babaen Kenkuana.
Nagiinnuman ti Korum dagiti Sangapulo-ket-dua nga Apostol iti espiritu ti kararag ken iti gagar a makaawat no kasano a tulongan ti amin a makarikna nga agmaymaysa wenno saan a maibilang. Kayatmi a tulongan ti amin a makarikna iti kastoy. Dakamatek man, nangnangruna dagiti agdama nga awan asawana.
Kakabsat, nasurok a kagudua dagiti nataengan iti Simbaan ita ket balo, diborsiado, wenno di pay nagasawa. Adda dagiti masdaaw maipapan iti gundaway ken lugarda iti plano ti Dios ken iti Simbaan. Maawatantayo koma a ti agnanayon a biag ket saan a gagangay a saludsod ti agdama a marital status ngem maipapan iti kinadisipulo ken panagbalin a “natured iti pammaneknek ni Jesus.”8 Ti namnama ti amin nga awan asawana ket maipada iti amin a miembro ti naisubli a Simbaan ti Apo—makagun-od iti parabur ni Cristo babaen ti “panangtungpal kadagiti linteg ken ordinansa ti Ebanghelio.”9
Isingasingko man nga adda napateg a prinsipio a nasken a maawatantayo.
Umuna, ipatalged dagiti nasantuan a kasuratan ken dagiti propeta iti ud-udina nga aldaw a ti amin a napudno nga agtungpal iti katulagan iti ebanghelio maaddaandanto iti gundaway para iti pannakaitan-ok. Insuro ni Presidente Russell M. Nelson: “Iti bukod a wagas ken oras ti Apo, awanto ti maibabawi a bendision kadagiti napudno a Santona. Ukomen ken gunggonaanto ti Apo ti tunggal tao a mayannurot iti naimpusuan a tarigagay ken kasta met iti aramid.”10
Maikadua, ti umno nga oras ken wagas a pakaitedan dagiti bendision ti pannakaitan-ok ket di pay amin naipalgak, ngem naipanamnamada.11 Inlawlawag ni Presidente Dallin H. Oaks nga adda dagiti kasasaad “ti mortalidad a maitudingto iti Milenio, a daytoy ti panawen ti panangipatungpal iti amin a saan pay a nalpas iti naindaklan a plano ti ragsak para iti amin a maikari nga annak ti Amatayo.”12
Saan a kaipapanan dayta a maitantan ti tunggal bendision agingga iti Milenio; sumagmamanon ti nakaawaten, ken agtultuloy a maawatto dagiti dadduma agingga iti dayta nga aldaw.13
Maikatlo, ti panaguray iti Apo kaipapananna ti agtultuloy a panagtungpal ken naespirituan a panagdur-as nga agturong Kenkuana. Ti panaguray iti Apo saan a kaipapanan a mangyawis iti orastayo. Diyo nasken a riknaen a kasla addakayo iti pagurayan a siled.
Ti panaguray iti Apo agkasapulan ti tignay. Naadalko iti adu a tawen a dumakkel ti namnamatayo ken ni Cristo no agserbitayo iti dadduma. Ti panagserbi kas iti panagserbi ni Jesus, gagangay a mapadakkeltayo ti namnamatayo Kenkuana.
Ti bukod a panagdur-as a matun-oy itan bayat ti panaguray iti Apo ken dagiti karina ket nakapatpateg, sagrado nga elemento ti planona para iti tunggal maysa kadatayo. Dagiti tulong a maaramidtayo itan a mangbangon iti Simbaan iti daga ken mangummong iti Israel ket kasapulan unay. Awan pakainaigan ti marital status iti kabaelan ti maysa a tao nga agserbi. Dayawen ti Apo dagiti agserbi ken aguray Kenkuana iti kinaanus ken pammati.14
Maikapat, idiaya ti Dios ti agnanayon a biag iti amin nga annakna. Amin nga umawat iti napintas a sagut ti Apo ti panagbabawi ken agtungpal iti bilbilinna ket umawatdanto iti agnanayon a biag, nupay dida magun-od ti amin a saguday ken kinaan-anayna iti mortalidad. Mapadasanto ti amin nga agbabawi ti kinaayat ti Apo a mamakawan kas impatalgedna: “Wen, ket kas kaadu ti panagbabawi dagiti taok ti panangpakawankonto iti naglabsinganda kaniak.”15
Iti maudi nga analisis, ti kabaelan, tarigagay, ken gundaway ti maysa a tao no mainaig iti karbengan nga agpili, agraman ti pannakaikari kadagiti agnanayon a bendision, ket banag laeng a mabalina kedngan ti Apo.
Maikalima, ti panagtalektayo kadagitoy a pammatalged nagramut iti pammatitayo ken Jesucristo a ti paraburna naituding ti amin a banag maipanggep iti mortalidad.16 Naaramid a posible ti amin a naikari a bendision babaen Kenkuana, babaen ti Pannubbotna, “nagpababa iti amin a banag”17 ken “nangparmek iti lubong.”18 Isu “nagtugaw iti makanawan nga ima ti Dios, tapno dawatenna iti Ama ti kalinteganna a mangngaasi kadagiti annak ti tattao … ; gapuna nangibabaet iti panggep dagiti annak ti tattao.”19 Iti udina, “mapunnonto dagiti santo iti dayagna, ket awatendanto ti tawidda”20 kas “makipagtawid ken ni Cristo.”21
Tarigagaytayo a tulonganto dagitoy a prinsipio ti amin a mangpadur-as iti namnama ken ni Cristo ken mangrikna iti pannakaibilang.
Diyo liplipatan nga anaknakayo ti Dios, ti Agnanayon nga Amatayo, ita ken agnanayon. Ay-ayatennakayo, ken kayat ken kasapulannakayo ti Simbaan. Wen, kasapulandakayo! Kasapulanmi dagiti timek, talento, paglaingan, kinaimbag, ken kinalintegyo.
Iti uneg ti adu a tawen, napagsasaritaantayo maipapan dagiti “young single adults,” “single adults,” ken “adults.” Nalabit a makatulong dagita a pangawag sagpaminsan ngem di naigagara a makapagbalbaliw no kasano a maawatantayo ti dadduma.
Adda kadi wagas a maliklikan daytoy nga ayo ti tao a makapagsisina kadatayo iti tunggal maysa?
Kinuna ni Presidente Nelson nga ibilangtayo ti bagbagitayo a kas miembro ti Ti Simbaan ni Jesucristo dagiti Santo iti Ud-udina nga Aldaw. Kasla sakupennatayo amin dayta, di kadi?
Adda bileg ti ebanghelio ni Jesucristo a mamagkaysa kadatayo. Ad-adda nga agpapadatayo ngem iti agdudumatayo. Kas miembro ti pamilia ti Dios, pudno nga agkakabsattayo. Kinuna ni Pablo “Ket inaramid [ti Dios] ti amin a pagtaudan ti amin a nasion ti amin a tao tapno agnaedda iti amin a rabaw ti daga.”22
Kadakayoa stake presidents, bishops, ken quorum ken sister leaders, idawatko nga ibilangyo ti tunggal miembro ti stake, ward, korum, wenno organisationyo kas miembro a makatulong ken makapagserbi kadagiti calling ken makairaman iti adu a wagas.
Addaan ti tunggal miembro kadagiti korum, organisasion, ward, ken stake-tayo kadagiti sagut ken talento nga inted ti Dios a makatulong a mangbangon iti pagarianna ita.
Awaganmi koma dagiti miembrotayo a single tapno agserbi, mangparegta, ken mangisuro. Lipaten dagiti sigud a kapanunotan ken ideya a no dadduma di naigagara a nangpaliday kadakuada ken dida maibilang wenno dida makapagserbi.
Paneknekak itoy udi ti lawas a Paskua ti Panagungar ti Mangisalakantayo a Jesucristo ken ti agnanayon a namnama nga itedna kadatayo amin a mamati iti naganna. Ket sipapakumbaba a paneknekak daytoy iti sagrado a nagan ni Jesucristo, amen.