Pangkablaaw a Mensahe
Nabara nga isasangbay iti sapasap a komperensia ken iti pribilehio a dumngeg iti timek ti Apo.
Patpatgek a kakabsatko a lallaki ken babbai ken gagayyemko iti sangalubongan, idatonko ti personal a kablaawko iti daytoy sapasap a komperensia. Aguummongtayo kas dakkel a pamilia nga agtartarigagay nga agdaydayaw iti Apotayo, ni Jesucristo. Agyamanak iti panangkadkaduayo kadakami.
Itay naglabas a tawen ti maysa kadagiti libro ti rekord. Awan duadua a nasursurotayo dagiti banag a ditay ammo iti kallabes. Naisurat ti sumagmamano a leksion nga ammok idi iti pusok iti baro ken makaisuro a wagas.
Kas pagarigan, awan duadua nga ammok nga iturong ti Apo dagiti aramid a pakaseknan ti Simbaanna. Kinunana, “Ipakitakto [kadakayo] a kabaelak nga aramiden ti trabahok.”1
Masansan, a nakitami kadagiti mamagbagak nga agluluakami bayat ti panangibabaet ti Dios kadagiti nakaro a mapannubok a kasasaad kalpasan a naaramidmin ti amin ken awanen ti maaramid pay. Agpayso a nasdaawkami amin.
Maawatak pay itan a nasaysayaat no ania ti kayatna a sawen idi kinunana, “Adtoy, padarasek ti aramidko iti panawenna.”2 Kanayon a nagrag-oak idi inturong ken impatungpalna ti panangpadaras iti aramidna—uray iti panawen ti sangalubongan a pandemia.
Patpatgek a kakabsatko, agpannuray ti pigsa ti Simbaan kadagiti aramid ken pumigpigsa a pammaneknek dagiti miembrona. Kasayaatan a mapatibker dagiti pammaneknek iti pagtaengan. Itay naglabas a tawen, adu kadakayo ti nangpadur-as iti panagadal iti ebanghelio kadagiti pagtaenganyo. Agyamanak kadakayo, ken agyamanto kadakayo dagiti annakyo.
Agtultuloy ti dakkel a proyekto a mangtarimaan iti Templo ti Salt Lake. Manipud iti opisinak adda front-row seat-ko a pangbuyaan iti maar-aramid a trabaho iti plasa ti templo.
Iti panangbuyak kadagiti trabahador nga agkali iti ramut ti daan a kayo, agtarimaan iti tubo ken nadadael a fountain, napanunotko ti panagkasapulan ti tunggal maysa kadatayoa mangikkat iti tubeng iti biagtayo, babaen ti tulong ti Apo.
Ti ebanghelio ni Jesucristo ti ebanghelio ti panagbabawi.3 Gapu iti Pannubbot ti Mangisalakan, mangted ti ebangheliona iti awis nga agtuloy nga agbalbaliw, dumur-as, ken agbalin a natartarnaw. Daytoy ti ebanghelio ti namnama, pannakaagas, ken panagdur-as. Ngarud, ti ebanghelio ti mensahe ti rag-o! Agrag-o dagiti espiritutayo iti tunggal addang nga alaentayo.
Paset ti panangummong iti Israel, ken napateg unay a paset, ket ti bilin kadatayo nga agbalin a maikari ken naayat a tumulong a mangisagana iti lubong iti Maikadua a Yaay ti Apo.
No dumngegtayo kadagiti mensahe a siaannad nga insagana dagiti lidertayo babaen ti tarabay ti Espiritu Santo, awisenkayo nga agkararag a mangilasin iti tubeng nga ikkatenyo iti biagyo tapno makapagbalinkayo nga ad-adda a maikari.
Patpatgenkayo, ay-ayatek a kakabsatko a lallaki ken babbai, ket paneknekak nga am-ammodakayo ti Nailangitan nga Amatayo ken ti Ay-ayatenna nga Anak ken ipatpategdakayo. Nakasaganada a mangtulong kadakayo iti tunggal addang a panagtultuloyyo. Nabara nga isasangbay iti sapasap a komperensia ken iti pribilehio a dumngeg iti timek ti Apo. Iti nagan ni Jesucristo, amen.