Magustuak a Makita ti Templo
Iti templo a makaawattayo iti pammatalged dagiti naayat a konenksion ti pamilia nga agtultuloyto kalpasan ti ipapatay ken agpaut iti kinaagnanayon.
Patpatgek a kakabsatko, agyamanak a makaduakayo itoy umuna a sesion ti sapasap a komperensia. Dagiti agsarita, ti musika, ken ti kararag ti nangyeg iti Espiritu—kasta met ti rikna ti lawag ken namnama.
Dayta a rikna ti nangisubli iti lagipko iti umuna nga aldaw a nagnaak a simrek iti Templo ti Salt Lake. Maysaak idi a barito. Dagiti laeng dadakkelko ti kaduak iti dayta nga aldaw. Iti uneg, nagsardengda iti apagkanito tapno makablaawan ti maysa a temple worker. Nagnaak nga immun-una kadakuada, agmaymaysa iti apagkanito.
Kinablaawannak ti maysa a bassit nga ubanan a babai a nakabado iti napintas a puraw a kawes ti templo. Kinitanak ket immisem ket kinunana a siuulimek, “Naragsak nga isasangbay iti templo, Brother Eyring.” Impagarupko a maysa daytoy nga anghel gapu ta ammona ti naganko. Diak ammo idi a naikabil ti bassit a kard nga adda naganko ditoy iti baba ti kuelio ti amerikanak.
Nilabsak isuna ket nagsardengak. Tinangadko ti nangato a puraw a kisame a nanglawag unay iti siled a kasla nakalukat daytoy iti tangatang. Iti dayta a kanito, immay iti panunotko dagitoy nalawag a balikas: “Immayakon ditoy a nalawag a lugar idi.” Ngem dagus nga immay iti panunotko, saan iti bukodko a timek, dagitoy a balikas: “Saan, dika pay pulos immay ditoy idi. Malaglagipmo ti maysa a kanito sakbay a nayanakka. Addaka iti sagrado a lugar a kas daytoy.”
Iti ruar dagiti templotayo, ikabiltayo dagiti balikas, “Kinasantuan iti Apo [Holiness to the Lord].” Ammok iti bagik a pudno dagita a balikas. Ti templo ket maysa a nasatuan a lugar nga umayan ti paltiing a nalaka kadatayo no nakalukat ti pusotayo ken maikaritayo ditoy.
Idi agangay dayta umuna nga aldaw nariknak manen ti isu met la nga Espiritu. Iraman ti seremonia ti templo dagiti balikas a nangiparikna iti bara iti pusok, a mangipatpatalged a pudno ti maipakpakita. Pimmudno ti nariknak maipanggep iti masakbayak, kalpasan ti 40 a tawen babaen iti awag nga agserbi manipud iti Apo.
Nariknak ti kasta met laeng idi nagkasarak iti Logan Utah Temple. Inannong ni Presidente Spencer W. Kimball ti panaglantip. Iti sumagmamano a balikas nga insaona, intedna daytoy a balakad, “Hal ken Kathy, agbiagkayo tapno no dumteng ti awag, nalaka a makapanawkayo.”
Idi insaona dagita a sumagmamano a balikas, nakitak a nalawag iti panunotko, iti naan-anay a maris, ti nateppang a turod ken kalsada nga agturong iti ngato. Adda alad iti kanigid a bangir ti kalsada ken nagawan iti intar dagiti kayo iti ngato ti turod. Saan unay a makita ti maysa a puraw a balay kadagiti kayo.
Kalpasan ti makatawen, nailasinko dayta a turod idi nagmaneho kadakami ti katugangak a lalaki iti dayta a kalsada. Detalyado no ania ti nakitak idi nangted ni Presidente Kimball iti balakd iti templo.
Idi nakadanonkami iti tuktok ti turod, nagsardeng ti katugangak iti puraw a balay. Imbagana kadakami a nangikalida nga agassawa iti sanikua ken kayatna nga agyankami iti anakna a babai iti guesthouse. Agyandanto iti main house, sumagmamano laeng a kadapan ti kaadayona. Ngarud, bayat ti 10 a tawen a panangyanmi iti dayta a napintas a lugar ti pamilia, dumani inaldaw a sawenmi nga agassawa, “Nasaysayaat a nag-enjoy-tan ditoy gapu ta ditanto met agbayag ditoy.”
Dimteng ti awag manipud iti Church commissioner of education, ni Neal A. Maxwell. Ti ballaag nga inted ni Presidente Kimball a kabaelan ti “nalaka a makapanaw” ket pimmudno. Maysa nga awag a panawan ti kasla gagangay a personal a situasion ti pamilia tapno agserbi iti maysa a rebbengen iti lugar nga awan ti ammok. Nakasaganan ti pamiliak a pumanaw iti dayta nagasat a kanito ken lugar gapu ta ti maysa a propeta, iti nasantuan a templo, maysa a lugar ti paltiing, nakitana ti masakbayan a pasamak a nakaisaganaanmi idi.
Ammok a nasantuan a lugar dagiti templo ti Apo. Panggep ko ita iti panangisaritak kadagiti templo ti mangpadakkel iti tarigagaytayo a maikari ken nakasagana para kadagiti napadakkel a gundaway para iti padpadas iti templo nga umay kadatayo.
Para kaniak ti kadakkelan a motibasion tapno maikari iti padpadas iti templo ket ti kinuna iti Apo kadagiti nasantuan a balayna:
“No la ketdi mangbangon dagiti taok iti balay a para kaniak iti nagan ti Apo, ket dida palubosan ti ania man a narugit a banag a sumrek iti daytoy, tapno saan a marugitan, agtaengto ti gloriak iti daytoy;
“Wen, ket addaakto sadiay, ta umayakto sadiay, ket makitanto dagiti amin a nadalus ti panagpuspusona a mapan sadiay ti Dios.
“Ngem no marugitan saanakto a sumrek iti daytoy, ket awanto ti gloriak sadiay; ta saanakto a sumrek kadagiti saan a nasantuan a templo.”1
Inlawlawag ni Presidente Russell M. Nelson a “makitatayo” ti Mangisalakan iti templo iti pannakaawat nga agbalin nga am-ammotayon Isuna. Kinuna ni Presidente Nelson daytoy: “Maawatantayo Isuna. Maawatantayo ti aramidna ken gloriana. Ket mariknatayo ti agnanayon nga epekto ti awan kapadana a biagna.”2
No nasken a mapantayo iti templo a di naan-anay a natarnaw, ditayo makita, babaen ti bileg ti Espiritu Santo, ti naespirituan a sursuro maipapan iti Mangisalakan a maawattayo iti templo.
No maikaritayo nga umawat iti kasta a sursuro, adda mapapagdur-as babaen ti padas iti templo a namnana, rag,o, ken panangnamnama iti nasayaat iti unos ti biagtayo. Magun-od dayta a namnama, rag-o, ken panangnamnama iti nasayaat laeng babaen ti panangawat kadagiti ordinansa a maannong iti nasantuan a templo. Iti templo a makaawattayo iti pammatalged dagiti naayat a konenksion ti pamilia nga agtultuloyto kalpasan ti ipapatay ken agpaut iti kinaagnanayon.
Tawtawen ti naglabas, bayat panagserbik kas maysa a bishop, pinagkedkedan ti maysa a barito ti awisko nga agbalin a maikari nga agindeg iti Dios kadagiti pamilia iti agnanayon. Imbagana kaniak dagiti napintas a panawen a kaduana dagiti gagayyemna. Binay-ak a nagsao. Sa imbagana kaniak ti kanito bayat ti maysa a paskenna, iti baet ti ariwawa, idi kellaat a naamirisna a nariknana ti panagmaymaysa. Dinamagko no ania ti napasamak. Kinunana a nalagipna ti maysa a gundaway idi ubing pay, a nagpasaklot iti inana, a nakaarakup dagiti imana kenkuana. Iti dayta a kanito kabayatan ti panangisaritana iti dayta nga estoria, nakalua isuna. Kunak kenkuana a pudno ti ammok: “Ti laeng wagas a pakariknaam nga agnanayon dayta nga arakup ti pamilia ket agbalinka a maikari mismo ken tulongam dagiti dadduma nga umawat kadagiti pangilantip nga ordinansa ti templo.”
Ditayo ammo dagiti detalye dagiti koneksion ti pamilia iti lubong ti espiritu wenno ania ti mabalin a dumteng kalpasan a nagungartayo. Ngem ammotayo nga immay ni propeta Elias kas naikari a mangisubli iti puspuso dagiti amma iti annak ken dagiti annak iti amma.3 Ken ammotayo nga agpannuray ti agnananyon a ragsaktayo iti panangaramidtayo iti kasayaatan a mangidiaya iti kasta met la a napaut a ragsak iti kas kaadu a kabagyantayo agingga a kabaelantayo.
Mariknak dayta met la a tarigagay nga agballigi iti panangawis kadagiti sibibiag a miembro ti pamilia nga agtarigagay a maikari nga umawat ken mangdayaw kadagiti pangilantip nga ordinansa ti templo. Paset dayta ti naikari a panaguummong ti Israel kadagiti maudi nga aldawi iti agsumbangir a belo.
Maysa kadagiti kaindaklan a gundawaytayo no ubing pay dagiti miembro ti pamiliatayo. Nayanakda nga addaan Silaw ni Cristo kas maysa a sagut. Daytoy ti mangipaawat kadakuada no ania ti naimbag ken no ania ti dakes. Gapu iti dayta, ti panangkita iti maysa a templo wenno ladawan ti maysa a templo ket makapadur-as iti maysa nga ubing ti maysa a tarigagay nga agbalin a maikari ken addaan iti pribilehio a makastrek iti unegna iti maysa nga aldaw.
Mabalin a dumteng ti aldaw no, kas maysa nga agtutubo, awatenda ti maysa a temple recommend nga agannong iti proxy baptism iti templo. Iti dayta a padas, mabalin nga ad-adda a mariknada a kanayon a mangitudo dagiti ordinansa ti templo iti Mangisalakan ken ti Pannubbotna. No mariknada nga idiayada iti maysa a tao iti lubong ti espiritu ti gundaway a madalusan iti basol, ad-addanto a mariknada a tumultulongda iti Mangisalakan iti sagrado nga aramidna a mangbendision iti maysa nga anak ti Nailangitan nga Amatayo.
Nakitakon ti bileg dayta a padas ti mangbalbaliw iti biag ti maysa nga agtutubo. Tawtawen ti naglabas kaduak ti anakko a babai a napan iti templo iti naladaw a malem. Isu ti kaudian a nagserbi a kas maysa a proxy iti baptistry. Nakiddaw iti anakko a babai no makapagbayag pay a mangileppas kadagiti ordinansa para iti amin a tao a naisaganan dagiti naganda. Kinunana a wen.
Binuyak idi immaddang ti ubing nga anakko a babai a napan iti baptismal font. Nangrugi dagiti panagbuniag. Nagayus ti danum iti rupa ti ubing nga anakko iti tunggal kanito a lumung-aw manipud iti danum. Nakiddaw manen ken manen kenkuana, “Mabalin kadi nga aramidem ti adu pay?” Iti tunggal kanito kinunana ti wen.
Kas maysa a maseknan nga ama, ninamnamak a mabalinna ti agpambar iti panangaramid iti ad-adu pay. Ngem nalagipko pay la ti kinatibkerna idi nakiddaw kenkuana no makaaramid iti ad-adu pay ket iti maysa a determinado a bassit a timek kinunana ti “Wen.” Nagbati agingga a ti kaudian a tao iti listaan iti dayta nga aldaw ket naawatna ti bendision ti panagbuniag iti nagan ni Jesucristo.
Idi rumuarak iti templo a kaduak ti anakko iti dayta a sardam, nasdaawak iti nakitak. Maysa nga ubing ti naparegta ken nagbalbaliw iti imatangko babaen ti panagserbi iti Apo iti balayna. Mariknak pay laeng ti rikna ti lawag ken talna idi aggiddankami a nagna manipud iti templo.
Naglabas dagiti tawen. Sasawenna latta ti wen iti saludsod ti Apo no agaramidto iti ad-adu pay para Kenkuana no narigat unay daytoy. Dayta ti maaramid ti serbisio iti templo tapno balbaliwan ken paregtaennatayo. Dayta ti gapu no apay ti namnamak kadakayo ken amin a patpatgenyo a pamilia ket dumakkelto iti tarigagay ken determinasion nga agbalin a maikari a masansan a mapan iti balay ti Apo no ipalubos dagiti kasasaadyo.
Kayatna a pasangbayennakayo idiay. Sapay koma ta bangonenyonto ti tarigagay iti puspuso kadagiti annak ti Nailangitan nga Ama a mapan idiay, a pakariknaanda nga asidegda Kenkuana, ken awisenyonto pay dagiti kapuonanyo nga agbalin a maikari a makidenna Kenkuana ken kadakayo iti agnanayon.
Mabalin a balikastayo dagitoy:
Magustuak a makita ti templo.
Innakto idiay iti maysa nga aldaw
A mangrikna iti Espiritu Santo,
Dumngeg ken agkararag.
Gapu ta balay ti Dios ti templo,
Lugar ti ayat ken ngayed.
Isaganak ti bagik ita nga ubingak pay;
Daytoy ti sagrado a pagrebbengak.4
Paneknekak nga annaknatayo ti maysa a managayat a Nailangitan nga Ama. Pinilina ti Patpatgenna nga Anakna, ni Jesucristo, nga agbalin a Mangisalakan ken Mannubbottayo. Ti laeng wagas a pakasublian nga agindeg Kadakuada ken iti pamiliatayo ket babaen dagiti ordinansa ti nasantuan a templo. Paneknekak nga iggem ken usaren ni Presidente Russell M. Nelson ti amin a tulbek ti priesthood a mamagbalin a posible ti agnanayon a biag para iti amin nga annak ti Dios. Ipaneknekko daytoy iti sagrado a nagan ni Jesucristo, amen.